Me esese esese mgbọ me mfufuk ebilene, ebi ikup me unye ntọ-ikọ mikitap ubọk inyi ebi eyi Jioba. (Ejira 6:1-12; Esita 8:10-13) Me chereyi si, eji mikimun̄ ubọk “ijọn̄”—orere, usini mkpulu linyọn̄ yi—okisa imeen̄ “okwaan̄” orere, tukutuku echi “ijijinu ya,” orere, Setan okisan̄a isibi. (Ichi 12:16) Usini mgbọ, Jioba, “Awaji òkinyan̄a ene,” ikekibieen̄ ebi ikikpulu ibe etap ubọk enyi ebi eyi kan̄.—Itọn̄ 68:20; Urọk 21:1.

Ire etap owu me mkpọn mije ichechieek kwun̄ ye? Kakaan̄ cheche ejit ibe ke Jioba okikpọ owu chieen̄ me lek. (Ibeb 39:21-23; Itọn̄ 105:17-20) Kaan̄ utoon̄-ejit ibe ke omobọkọ mkpukpe mije ichechieek kwun̄, mè riọọn̄ ibe ke utoon̄-ejit okebigbe ikitap efuuk me owot ebi bọn ute me otutuuk linyọn̄.—Filip 1:12-14; Ichi 2:10.

IKPỌ FIDIO BỌN UTE EBI IDO KOREA ESAN̄ABE ISIBI ME MKPỌN, MÈ IFỌỌK IDODO CHI:

• Keke orọ etapbe obop obop bọn ute kiji ikup me South Korea me mkpọn̄?

• Kpasi oyerebet efieekbe me uwu oyerebet orọ me egwat lek esan̄a usini bọn ute kiji me mkpọn?

• Kpa ubọk ke eji ebekọt itap ubọk inyi bọn ute kiji me otutuuk linyọn̄, ebi etapbe me mkpọn mije ichechieek kiban̄?

• Kpa ubọk ke eji ebekisa nkaan̄-lek eji ekebinwọọn̄ mgbọ keyi irọ inu?

• Ekene ochubọk ikirọ inyi ikọ ikinwọn eji me uwu oyerebet?