Ere ibebene me jw.org ikaan̄ esese esese ibot usem mè fidio echi eneen̄be isasa iriki ulọk ebi kpere Ebi Ata-Ikọ Jioba. (Ikwaan̄ 13:48) Ikikpa mkpọ ekitumu me ere ekikaan̄ etip mè iyaka ire mkpọ ebi ene ekikeek mè ikitumu mkpọ ofolek.

Ike owa ke obokọt isa ere ibebene me jw.org isa irọ mkpọ me uko ni?

• Kisi jw.org mgbọ geelek. Kitap iman̄ me lek ayaya mkpọ etapbe me ere ya mè kikeek ubọk obokọt isa inu cha itap ubọk inyi ogwu okakaan̄ ulọk me uko. (Inyi omun̄ ayaya mkpọ echi etapbe me ere ibebene me jw.org, keme “See More.”) Ikekiriọọn̄ ayaya mkpọ ekitap me jw.org motap ubọk inyi eji eriọọn̄ ayaya mkpọ eji ebekitumu me uko.

• Kisa ibot usem mè fidio echi okukup me ere ibebene me jw.org sa bene ukpatu. Ibot usem mè fidio chi mokọt irọ ibe eji eriọọn̄ usini mkpọ ebi ikup me agan̄ kiji ekikeek mkpọ ofolek.

• Jeen̄ ebi ene ere ibebene. Kpa mkpọ ofolek usini ibot usem, mè jeen̄ ene ya ubọk ibokọt iweek ibot usem me jw.org.

• Ria link jet ema. Usini ene kpekima igọgọọk eji ikpa usem, ire, ema mekọt ima isisi jw.org. Eya orọ, katet ikaan̄ iraria link ofolek ere ibebene mè iyaka ire ge me lek ibot usem mè fidio echi ejeen̄be me ere ya ijet ebi ikakaan̄ ulọk.