Keke ke okirurumun̄ me lek usen geelek? Owu ire ogwu ibot ototun̄ ukan̄, ogwu okisa ikọkọt ikpọ chieen̄ me lek owuwa inu ni? Owu ire ute mè iyaka ire uga okup agaga, ogwu okitap efuuk ikiweek mkpọ obosa ikpọ chieen̄ me lek bọn kwun̄ ni? Kubọk ogwu ijija, ire ebi otu ogbo kwun̄ ekirọ owu me lek me uwu ikpa ni? Owu ire ogwu okirurumun̄ me lek orukan̄ mè iyaka ire ufialek acha ukan okisa inu ni? Otutuuk kiji mikaan̄ ufialek. Owuwa ebi eyi Karais ekirurumun̄ me lek owuwa ufialek me mgbọ yaage. Ire, eji miriọọn̄ ibe ke Jioba mosan̄a ufialek chi sọnja mgbọ.—2 Kọr 4:16-18.

Jioba igobo itet mkpọ eji ekirurumun̄ me lek, imọnọ utoon̄-ejit kiji mè ime eji ekikaan̄ ibene, ọmọ mogbana eji enenen. Ire, sabum ibosan̄a ufialek kiji, kè irọriọọn̄ inu chi ikikat eji ejit. (Jeri 29:11, 12) Jisọs si ikaan̄ olilọk me lek kiji. Ike eji ekebirọ ikwaan̄ kiji kubọk ebi eyi Karais, eji kpekiwuuk use kè Jisọs yi: “Emi mâkup melek kinyi.” (Mat 28:20) Eji ekinama ikpọchieen̄ kiji inye melek ntumu-mfieek eji erọbe ikukup inye ikime ufialek eji ekije itibi mgbọ keyi me mgbọ eji ekigwu nkeek ikom me lek utelelek eji ebekaan̄ me irak Ama Ubọọn̄ Awaji.—Rom 8:19-21.

IKPỌ FIDIO IKE UFIALEK ILILE OKEBINU, GWUUN̄ CHIEEN̄ ME LEK JISỌS!—UGBANA ECHI AMA UBỌỌN̄ AWAJI OBOSA INU ME ISI, MÈ IFỌỌK IDODO CHI:

• Kpa ubọk ke ebilene esa ida lek ibọkọ me lek Awaji, keke ke iyaka isan̄a isibi?

• Keke ke ebi igbegbe utoon̄-ejit inyi Jioba ebenwọọn̄ me mgbọ okup me isi?

• Uyeke uyeke ata mkpọ echi eji ebenwọọn̄ me mgbọ okup me isi ibojeje ifet ni?

• Kpasi ugbana ke owu okikpọ chieen̄ ikakaan̄ me emen ayaya inyọn̄?