ILULUK UGWEM KUBỌK EBI EYI KARAIS
Ubọk Obosa Itap Ubọk Mfufiat Isirọn̄ Isan̄a
Owuwa mfufiat ikpọkpọk ikibọkọ irek me chereyi. Mfufiat isirọn̄, ikup ufiak ibe eriọọn̄ ubọk eneen̄ ubọk ebesa itap ubọk inyi ebi ene. Bak lek eyi, Akpalek Okikpọ Ntitiin̄ mineen̄ ibe ekaan̄ Agọọk Okikpọ Chieen̄ Me Lek Mfufiat me otutuuk otu agọọk ikwaan̄.
Bọn ute ebi ikisi ikwaan̄ me agọọk yi isiriọọn̄ ibe ke mfufiat irọn̄ me ere ge, ema megwat lek igwen ebi ugane ntitiin̄ ikup me ere ya inyi ema ekọt eriọọn̄ ubọk ebesa itap ubọk inyi ebi bọn ute me ere ya. Ire inu mfufiat ya ofiatbe imin igak inu ebi bọn ute ikup me ere ya ebekọt irọ, otu agọọk ikwaan̄ moneen̄ ibe bọn ute ebi imimin isoon̄ esi ekpọ chieen̄ me lek. Bọn ute cha mekọt iweek ebi ibesan̄a lek isibi isi ikwaan̄, mekọt ido ibe enyi usini inu eweekbe mè iyaka ire, ema mekọt ilep mè iche inu echi okukup ufiak me ere ya.
Eyi ikirọ ibe ekakirọ chieen̄ ikwaan̄ yaage, wọlọwọlọ ikakup, mè ekakifiat ikpoko mè mkpọ ikwaan̄ ubọk geelek mije, inu chi mokọt irọ mgbọ geelek ebi bọn ute esirọ mkpọ ubọk ema eweekbe.
Bọn ute ebirieen̄ ebi otu agọọk ikwaan̄ ogobobe mekọt itumu otu ifuk ikpoko mè ene ema eweekbe isasa itap ubọk inyi ebi mfufiat orọn̄be itet. Ema si mekọt iriọọn̄ ebi mkpulu ebi mekọtbe itap ubọk irọ inyi ikwaan̄ kiji igwat. Ọmọ orọ, ikasa me ubọk kinyi gaalek ibọkọ ikpoko, iria mkpọ mè iyaka ire ikọp uran̄ isi ere mfufiat orọn̄be itata etutumu ibe mè enyi erọ ikeya.
Ire, mgbọ geelek mfufiat orọn̄be, eji mikiweek itatap ubọk. (Iburu 13:16) Eji mima ebi bọn nte kiji! Keke ke eji ebekọt irọ ni? Eyi okukup ufiak ichit, eji mekọt ibeek uriaak me ibot ebi mfufiat orọn̄be itet mè ebi ikitap ubọk inyi ema. Eji si mekọt inyi ikpoko isasa ibieen̄ ikwaan̄ ekirọ me otutuuk linyọn̄ yi inye. Igọọk me lek ntọ-ubọk Akpalek Okikpọ Ntitiin̄, otu agọọk ge ge motumu ifieek ubọk ebesa ikpoko irọ mkpọ me oniin̄ onwọnwọn ichit. Ire eji iweek igọgọọk irọ ikwaan̄ me ere mfufiat orọn̄be, eji mekọt ijeen̄ ibe ke eji miweek isasan̄a lek isibi sa me ibọbọkọ ikpa ekigwen Local Design/Construction Volunteer Application (DC-50).
IKPỌ FIDIO IBOT MUN̄ ILE OFAFIAT MKPỌ ME BRAZIL, MÈ IFỌỌK IDODO YI:
Keke ke oma ofolek ikwaan̄ Ebi Ata-Ikọ Jioba esibe isasa itap ubọk inyi ebi ene mgbọ ibot mun̄ ile onin̄be Brazil me acha 2020?
