Eji ekisa unye kiji irọ inu ijaan̄ me mgbọ eji ekito me isi inu echi eji ebekọt ikirọ inyi Jioba. (1 Kọr 9:26) Itoto inu eji ebekọt ikirọ inyi Jioba me isi motap ubọk inyi eji ekọt ekesa sọntitiik mgbọ osisik sabum ukot keyi morakabe ekerọ inu ejaan̄. (Efes 5:15, 16) Me nkween̄mkpọ ototun̄ ukan̄ kinyi, enyi mekọt ikpa usini inu enyi ebekọt irọ me emen aya acha ikwaan̄ okinu. Ufuna enyi ekọt erọ eyi, ikpa nkween̄mkpọ yi iben ibot usem echi okpakpa esese esese mkpọ ekito me isi echi enyi mekọtbe ikeek mè iriaak uriaak ofolek.—Jemis 1:5.

Kubọk inu njeen̄, ire otutuuk ene me ototun̄ ukan̄ kinyi mekọt igbaan̄ ineen̄ mè itap ubọk irọ ufuna ukpọk lek ene ge ibene ikigbọ oniin̄ ojot mgbọ nje? Ire ikup me lek kwun̄ kubọk okpokọt ikinyi otu ifuk mbubak mgbọ eweekbe, gọọk usini ebi ikigbọ oniin̄ ojot mgbọ, ebi irek kiban̄ okupbe si kubọk eyi kwun̄ kpa usem. (Urọk 15:22) Enyi mekọt ibọkọ usem me otu ogwu okigbọ oniin̄ me nkween̄mkpọ ototun̄ ukan̄ kinyi. Enyi isirọ isan̄a, omokọt ige isibi ubọk obosa ikisibi uko. Ire owuuk lek igbọ oniin̄ me mgbọ oraraka, keek nu mè ire irek kwun̄ mochieek ibe owu okpọk obene mgbọ keyi.

Ire usini ene me uwu kinyi mekọt igbọ oniin̄ eyi mgbidim mgbọ me onyan̄ ge mè iyaka ire iwa igak ikeya ni? Ire okayaka ikaan̄ unye akpalek, omokọt igbọ oniin̄ eyi mgbidim mgbọ mè ire okisa sọntitiik mgbọ ikilook etip usen geelek. Ire okakaan̄ mgbọ ikigọọk isibi uko me etete nde mije ibe ke okisi ikwaan̄ me usen cha mè iyaka ire, okisi uwu ikpa, omokọt igobo igbọgbọ oniin̄ eyi mgbidim mgbọ me onyan̄ eyi ebenyi owu irek ibe otap efuuk mè iyaka ire onyan̄ eyi obeben ota nde go. Tap iman̄ me lek ikpa ifuk-usen mgbọ oweekbe igbọgbọ oniin̄ eyi mgbidim mgbọ mè ge sibi ubọk oneen̄be irọrọ eya.—Urọk 21:5.

IKPỌ FIDIO RE OGWU OTETET LEK INYE . . . OGWU OKISIBI UKO OJOT MGBỌ, MÈ IFỌỌK IDODO CHI:

• Ike owa ke Jioba osa itap ubọk inyi gwun̄ ute enenwaan̄ Aamand? Keke ke eyi okijeen̄ eji?