Me emen ikpa ogwu ikwaan̄ Pọọlu ogebe ijet Taitọs, ibe me ebi Ijija, ikerere Taitọs ekeluk ugwem eyi ebi ene “mêkikpọ, mè ikikween̄ inu ofolek irọrọ ata inu.” (Tai 2:6, 7) Me ijeje inyi isi me ibot ikpa yaage si, ijeen̄ ibe ke Jisọs motuku ebi eyi Jioba itana inyi ekaan̄ “ìkpele ulọk irọrọ ata inu.” (Tai 2:14) Ge me lek ata inu cha ire ilolook ata etip mè ikijeen̄ inu ofolek Ama Ubọọn̄ Awaji. Ire ke owu ire ogwu ijija, ire omokọt isa unye okaan̄be me mgbọ keyi isa igbọ oniin̄ eyi mgbidim mgbọ me iyaka ire eyi ojot mgbọ ni?—Urọk 20:29.

Ire omoma igbọgbọ oniin̄ eyi ojot mgbọ, neen̄ irek kwun̄ jaan̄ ufuna ore ge. (Luk 14:28-30) Kubọk inu njeen̄, ike owa ke obosa ikikpọ chieen̄ me lek kwun̄ mè ikisi ikwaan̄ eyi ojot mgbọ? Ike owa ke obokọt ikikaan̄ otu-ifuk mbubak mgbọ eweekbe? Beek ibe Jioba itap ubọk inyi owu me emen irek kwun̄. (Itọn̄ 37:5) Gọọk nga kwun̄ mè nte kwun̄ kpa ubọk osabe ineen̄ mè kpa si me lek ebi iwuwuuk lek ikigbọ oniin̄. Mè bene kirọ inu otobe me isi. Jioba mogbana ikpele ulọk okaan̄be me irọrọ ikwaan̄ kan̄!

KPỌ FIDIO EBI IJIJA ÌKIMIN JIOBA, MÈ FỌỌK IDODO CHI OGỌGỌỌK:

• Kpa rumurumun̄ ke usini ebi ene ekọt itim igak inyi ema ekọt egbọ oniin̄ eyi ojot mgbọ, ike owa si ke ema esa ikọt irọ itet?

• Ike owa ke uga mè ute ebekọt itap ubọk inyi nsabọn kiban̄ inyi ekana ebi ikigbọ oniin̄ eyi ojot mgbọ?

• Eke orọ ikupbe ufiak ibe oneen̄ ubọk obosa ikisibi uko?

• Ike owa ke ntitiin̄ obosa itap ubọk inyi ogwu okigbọ oniin̄ eyi ojot mgbọ?

• Kpasi ugbana ke ebi ikigbọ oniin̄ eyi ojot mgbọ ekikaan̄?