Mbat-olom ebi eyi Karais, echi okije ijaan̄ ikekimin erieen̄ Jioba mè ikisa unwọọn̄ ijet olom mè nwa si. (Mak 10:9) Ire ebi eyi Karais isa onineen̄ Baibul irọ inu me mgbọ ebegobo ogwu ebebat mè iyaka ire ido, mbat-olom kiban̄ mokup ibia mè inyi ema ubelejit.

Katet ene itele obodo mè iyaka ire ichieek ibabat ene ire ‘okamimin inin̄ ene’ orere, ire okamin iraka mgbọ olilọk ilaak okimin me emen ene mè ikirọ ifuna ene ikakirọ ata ntumu-mfieek. (1 Kọr 7:36. NW ) Igbe ibe osa mgbọ okupbe agaga onama mgbaan̄je kwun̄ melek Awaji mè okaan̄ si eru ogbegbe ebi eyi Karais. Eya motap ubọk inyi owu okọt otap efuuk orọ inu echi oborọ ibe onwọọn̄ mbat-olom kwun̄.

Sabum obodo mè iyaka ire ibat ene, riọọn̄ ubọk kween̄ ene ya jaan̄ mè riọọn̄ mkpọ okup me “emen ibot ejit” kan̄. (1 Pita 3:4) Ire obene ikikaan̄ cheche ofolek ene ya, gọọk ọmọ kpa usem. Ire okaan̄ olom mè iyaka ire nwa, obokitatap efuuk ikirọ mkpọ echi obokisibi oruru inyi nlom kwun̄ mè iyaka ire nwa kwun̄, okpokito chieen̄ me lek inu ibokirọ inyi owu. (Filip 2:3, 4) Ire obene ikitap onineen̄ Baibul me ikwaan̄ mgbọ keyi, mofet ibe okup onye okorọ ikeya me mgbọ okaan̄be olom mè iyaka ire nwa, eyi oborọ inyi onwọọn̄ mbat-olom kwun̄.

IKPỌ FIDIO INENEEN̄ LEK INYI MBAT-OLOM—OKPỌKỌ 3: ‘RIỌỌN̄ MKPỌ IGỌBỌBE,’ MÈ IFỌỌK IDODO CHI:

• Ike owa ke mgbaan̄je gwun̄ ute enenwaan̄ ya melek gwun̄ ute enerieen̄ Shane osa ije?

• Keke ke gwun̄ ute enenwaan̄ ya omun̄ ike ikiriọọn̄ gwun̄ ute enerieen̄ ya ijaan̄?

• Ike owa ke nga kan̄ mè nte kan̄ esa itap ubọk inyi ọmọ, kpasi ata ntumu-mfieek ke irọ si?