Gʉmʉsinʉ nʉnkweʼri, inʉ kaʼgʉ́mʉseʼ kwey ʉwa neyka nʉguzʉna narín. Ey ʉwameʼ, nʉsinámʉsin kʉ́nkʉnʉ zʉnekʉ awiri ɉiwʉ aʼkwʉyʉn azoya ʉnteʼ una ni, powru Jyväskylä ayʉnke Finlandia. Ayeygwi anáʼnuga nʉguzʉna neyka ni. Gʉmʉsinʉ nʉnkweʼri, perʉ awiri misi nʉguzʉna nʉnnameʼ ʉnkʉchigaka ʉnteʼ unawa narín. Aniʼnáy zorikweʼri, anáʼnuga zi agaʼzi zoyameʼ kwa riwanuʼ nʉnkwin. Ey ʉwameʼ, zʉguró ʉnkʉnari anáʼnuga ikwa ukumʉya ni ayʉnke ta rihʉ́nkʉtwi ukwin. Imáʼbari ikʉ nʉʼn zanagwi aʼzʉna ɉwaʼsa ukwin.

Anáʼnuga ikwʉn nʉngwa niweʼzari niwikʉzanʉn kinki ʉnteʼ nusin. Ey awiri, gaʼkʉnámʉseʼri anáʼnuga ikwa awʉn niweʼɉúnʉyʉn í pin zʉnáy aʼpʉgena ʉnteʼ uyʉn. Ey awiri, anáʼnuga zʉkueru ʉnhageysi ʉwaʼba awiri médico ɉina medicina gawʉngwa aʼzari anaʼnugaseʼ inʉ kʉriwí zoya neyka sí rigʉnsi niweʼzanuʼ ni í agachona ʉnteʼ uyʉn. Akowna nékʉri, pin zʉnáy anáʼnuga ikwʉya ni niwizʉn awʉngwa reʼbona uyʉn. Azi anari azoya neykari ʉnkʉrigʉnsi niweʼzanuʼ ni í agachona ʉnteʼ uyeʼri, sakuku ɉinasin buníʼgʉmʉ ʉnteʼ niweʼzanʉngwa niwikʉnisʉn. Ey awi nʉ́nkʉri, nʉtókuma awiri nʉkʉreʼguka ukumagwi uyʉn.

Ayeygwi, iʼngeygwi ɉuna naʼba rigʉnsi naʼzanuʼ nameʼ, Amnistía Internacional awiri Greenpeace ʉ́nkʉtwi unayu twiré kʉya ukwin. Awiri iʼngeygwi awʉ́ʼ iaʼzʉna neyka sí, nasi aʼzʉna sí awiri mari aʼzʉna winneyka sí twiré yaygwi ukwin.

Ey uyeʼki, du zaʼkusʉkwéy nʉkʉnanuʼ na ni nʉgʉnchona uyʉn. Ey naʼbari, umʉ́n zʉʼn ʉnteʼ ukumayeʼki, iʼngéygwiseʼ naʼbari ingumʉ́n buníʼgʉmʉ kwakumʉngwa reʼbona ʉnteʼ uyʉn. Buníʼgʉmʉ zʉʼn o aʼzanika ki uye aʼchwʉkwéy narín. Ey ʉwameʼ, azi nikʉkó naʼzarín.

Azi nikʉkó naʼzʉnameʼ, Niwipáw sí awiri Bibria sí aʼzarunhʉnpana ukwin. Minsáʼgwiri Jeuwá sí gaʼyeyka ɉinasin riwía awaki nukakwin. Ikʉ́nhari du winharunhiri puré winʉnwarín. Ey uyeʼki, azi nari zoriwa neyka chusa awʉn ninzari nánʉkin nʉkʉnikuʼgwi narín. Ey ʉweʼki, iwa nʉngwari ʉntákuma awʉnʉngwa naʼzarín.

Ey ʉwameʼ, Bibria nʉkʉnanʉn nuga taka unayu aʼgwakʉnpana ukwin. Ey uyeʼri, naʼmʉchi naʼzanʉn nugaʼba du naʼkusa ʉwáy naʼzarín. Bibriaseʼ anáʼnuga du ʉnkʉchwamʉ kawa ni wásʉya neyka sí aʼgwakʉnpana ukwin. Ema nariza nʉndi, Proverbios 12:10. Emaʼba yeykari: «Nanʉyʉʼkin nigari anáʼnuga du ʉnkʉchwʉya ni». Ayeygwi, emi buníʼgʉmʉ kwey nanʉn nugari Niwipáw kawi nanuʼ na ni naʼzʉn uyʉn. Ayumeka, ikʉ Niwipawseʼ yay nari zweiʼ nameʼ, emi buníʼgʉmʉ kwʉn nuga ni naʼzʉn uyʉn. Ey awiri, Niwipáw niwihaguzʉna nariri ari niwinwaʼka ʉwa neyka sí aʼzarunha ukweʼri, nʉgúzʉnkʉchʉ uyʉn (Salmo 103:8-14).

Ey ukweʼri, libro ¿Qué enseña realmente la Biblia? zaʼkinugasin «riwía awʉn meʼɉuno» yeyka nʉkaʼchona uyʉn. Ey uyeʼri, correoseʼ pari «ey awʉn naʼɉúnʉyʉn» í gaʼsa ukwin. Anawi nareʼri, iʼngwi ʉnkachwi Jeuwá sí gaʼyeyka ɉina winʉkaʼnáy Bibria sí naʼzawía awiza nʉkein. Ey uyeʼri, Bibria sí riwinpana ukwin. Ey anawiri, ikʉnha winʉnniʼkumʉyekʉ nenʉ́n zweinpana ukwin. Ey unari, Bibriaseʼ gaʼkʉnamʉ ta neyka aʼnikwʉn nugari ánugwe síkʉkin nʉʼnkínkuma ʉwáy naʼzarín.

Bibriari ʉntákumi zweykwéy nʉkʉnanʉngwasi nʉkaʼmʉkana uyʉn. Eygwi neki, cigarrillo anaʼguʼ nanʉngwa reʼkusakwin. Weyru umʉngwi áʼgʉkwa kineki. Ey awiri, rinhaɉʉkwaʼba kwa aseykwáʼbari akingwi neki nanuʼ nanʉngwa reʼkusagwi ukwin. Ayeygwi, sakuku du nanuʼ neyka naʼnʉnno neki naʼzanuʼ nanʉngwa reʼkusakwin (Romanos 13:1). Iʼngéygwiseʼ naʼbari, azi anisi azoya neyka du nanuʼ neykari du neyka naʼnʉnno neki naʼzanuʼ nanʉngwa reʼkusagwi ukwin.

Du nanuʼ nari azwein nugameʼ aya sí zapanʉkwéy nanʉngwasi zʉguró ʉnkanisi azoya neyka siri akingwi kawi ʉnchuʼ nanʉngwa nanʉnno naʼzʉnameʼ nánʉkin nʉkʉnikuʼ narín. Ey ʉweʼki, Niwipawseʼ Reʼgukʉngwasi Chusana nʉʼkin zʉʼn ikʉ du kʉreʼgukʉkwéy kʉnanʉnno naʼzʉnameʼ, íkʉseʼ aya sí ɉwaʼsʉkwéy kʉnanʉngwasi igunamʉsʉnpana zʉʼn awʉnʉngwa reʼkusakwin (Mateo 6:33).

Du ananuʼ nari zwein nugameʼ, azapana ʉnteʼ uyeʼri, áykʉnʉ ʉnkananʉngwa ʉnteʼ nisin: ingʉ́ zʉguró nanʉkinri du nari zwein nʉngwa aʼzʉna kinʉngwi awiri iʼngeygwi zʉguró nanʉkinri du nanuʼ nari zwein nʉngwa aʼzʉna kinʉngwi ʉnteʼ uyʉn. Du nanuʼ nari zwein nʉngwa aʼzʉnari azi nari kʉpanuʼ nʉʼnniʼkwe ʉnteʼ naʼzarín. Iwa Bibriari o zanamʉ chusʉnʉngwasi awiri iʼngeygwi ingumʉ́n aguzari zwein nʉngwasi nʉkaʼmʉkana awaki nuga ni (Mateo 5:44). Ima zaguzanámʉri sʉmʉ ɉuna naseʼ chwizʉnhasa awaki nukwa ni. Iʼngwi neykari, Niwipawseʼ Reʼgukʉngwasi Chusana sí íkʉseʼ gaʼkʉnamʉ kʉbasʉn nusi. Ayari zeyzey zanamʉ awiri tanʉ zanamʉ kwʉngwa reʼgawʉyameʼ, zeyzey naʼzʉna ni. Ey awiri, ikʉ tʉkin du zanʉngwa neyka ʉnkipanʉkwéy nanʉngwa reʼgáwʉya nameʼ.

Du zanuʼ nanʉn nugari Niwipawseʼ nʉʼkin du reʼgukʉkwéy kʉnanʉnno naʼzʉneri, ingumʉ́n tanʉ naʼzʉnin. Ari, inʉ pinna kwey ʉwa neyka aseʼ gowna nameʼ, ikʉ awiri anáʼnuga zi agaʼzi ʉwa neykari awiri Aseʼ Kaʼgʉmʉ gowna neyka zi agaʼzi kʉchunhʉn anuga neykari éykʉchʉ zʉnin aʼzanuʼ na ni naʼzʉnin. Aseʼ Reʼgukʉngwasi Chusánari bin zanuʼgwi íkʉseʼ waʼmʉ isana neykari eygwi du kʉkusa awʉngwa ni (Isaías 11:1-9). ¡Zeyzey naʼzʉnin! Ta neyka ɉwaʼsa unawameʼ nʉʼkin nanuʼ nari, iʼngeygwi ema ta naʼnó aʼzʉn awʉngwasi igunámʉsʉn nukwameʼ. Eygwi ʉnzapanamʉ nʉkauʼ náy naʼzʉnʉn.