Iʼngwi powru estado Sajóniaseʼ kʉtwinuga sí kwakumanawa ni. Ey ukweʼri, República Democrática Alemana (RDA) awga nʉnna ni. Urakʉseʼri yow riguzʉna gunti anʉnna ni; ey awi nʉ́nkʉri, achʉna ɉinari emi du nari kwey zweykwéy nanʉngwasi niweʼzawiagwi una ni. República Democrática Alemánari comunista winneyka nʉnameʼ, ikʉ Sajonia zánʉri Niwipáw sí meʼzánʉkwa neykari awʉtari aʼchuʼ nʉnna ni. Ey ʉwameʼ, nʉʼn Niwipáw sí naʼzanuʼ nʉnna narín. Mowga ɉuna naʼzawía ukumana nʉnnari ema nʉnna ni: Niwipáw sí meʼzanuʼ nʉnkwa neyka awiri comunismo meʼzánʉkwa neyka.

Iari comunismo nʉguzʉna naríe. Ayari yow akín gunti riwari zweykwa aí azoya nʉnameʼ narín. Ey awi nʉ́nkʉri, nówmʉsinʉ awiri nasi aʼzʉna yow akín gunti rigawari zweykwéy nanʉngwásiri, inʉ ingumʉ́n kʉnanʉn nugari kʉnanuʼ naseʼ kʉbasamʉ kauʼ kinno naʼzarín. Ey ʉwameʼ, abiti ɉina comunista winaʼzari winʉnkʉníʼkumi winzoya sí ʉ́nkʉtwi unayu twiré winʉkʉyʉnpana ukwin. 14 kʉgi nʉʼnzareʼri, kaʼgʉ́mʉseʼ du zanʉngwa naʼzari yʉnke paperi witʉrenana aʼpʉ́ zʉnameʼ aya ʉnnisi nikamʉ reʼwe awʉnʉngwa naʼzari zweinpana ukwin. Umʉnteʼ aʼzʉna pówruʼba zánʉri emí nikwameʼ zeynari aʼzʉna chwizʉnhásiri inʉ awʉtari aʼzʉna nʉkʉna uyʉn. Abiti nʉnkweʼki, sakuku ɉina umʉnteʼ aʼzʉnasin rinhaɉwaʼsa anawaki nukakwin. Dúkʉchʉ nari zwein nuʼkwáy naʼzʉnameʼ zeyzey naʼzarín.

Ey uyeʼki, yow diwʉ́n nʉkʉnikʉngwa nika uyʉn. 1989seʼri muro Berlín zanʉn ʉnwaʼna uyʉn. Ayásinri Europa comunista kazari azoya nʉnnari emí anʉkazanuʼ nanʉngwa nikagwi uyʉn. Ey awi keywʉ, du rigagukuʼ nari azwein nugin naʼzʉngwi uyʉn. Comunista kazari azoya neyka twiré keiʼ neykari awʉ́ʼ iazari azoya nʉn ki nusin. Azi nameʼ emí anikʉn nuse, comunista kazʉnna neykari yow akín gunti rigawari azoya naʼnuʼ kinare kwa emí meʼzari zweykwa aya neykari gaʼkʉnámʉkin zʉʼn kinare naʼzari nʉgʉnchonʉnpana uyeʼri, kwa riwanuʼ nʉnkwin.

Íwari música awiri pintura nanʉn nuga sí nʉguzanʉnpana uyʉn. Ey ʉwameʼ, escuela música sí rigawiuyʉn chona ukwin. Universidad zwein nʉngwa naʼzari música awiri pintura nanʉn nuga neykari aya sí du kawi riwía awʉn nʉngwa naʼzarín. Ʉngʉ́ nʉkʉzʉnkwe duna neyka riwianawa nʉnnari ʉnchusa ukwin. Ey awiri, kwa reʼkusʉnʉngwa nʉkin naʼzʉnameʼ sʉmʉ gwati nʉkʉnarín ey ʉweʼki, música kwa pintura nanʉndi naʼzʉnákʉchʉ zoriwa neyka kineki kwa naʼzanuʼ nanʉn nugaseʼ pari tanʉ naʼkusi naʼwite ʉwáy naʼzanuʼ narín. Tʉkin pari azi nanʉngwa nanʉnno, inakwa kwʉn nukwe naʼzanʉnpana uyʉn.

 Gaʼkʉnamʉ nʉgʉnchona awʉn naʼɉúnʉya neyka nʉgʉnchona uyeʼri, arunhá naʼzarín. Iʼmʉ́nʉri sinkʉ escuela nanʉn nʉkákweʼri, winriwiuya ɉina zʉguró winʉnkʉnari sa naʼba asa ukwin. Ikʉ́nhari tʉkin zanʉngwa neyka sí winasayʉn nusin. Ayaʼbari Mandy a eygwi narín, iʼngwi Jeuwá sí gaʼyeyka ɉina. Ari gwamʉ nʉwí emí nʉkein: «Andreas, ma emi kwey zweykwaʼba awiri tʉkin zanʉngwa neyka sí migʉnchona awʉn meʼɉunʉndi, Bibriaseʼ izataka awkwa».

Aya sí izatákʉkwa ingʉ́ mowgá naʼzarieki, izataka awʉnʉngwa naʼzarín. Mándyri Daniel kʉnowkwa 12 nʉwía uyʉn. Aʼgwa ukweʼri, arunhá naʼkusa uyʉn. Emaʼba gaʼkʉnámʉseʼ tʉkin zanʉngwa wásʉya neykari sakuku pin zʉnáy reʼgukʉn nukʉngwa neyka sí wásʉya ni. Ey awi, Mándyri Bibriaseʼ tʉkin pari ikʉ azi aʼzari kwey zwein nukʉngwa neyka sí nʉwiagwi uyʉn. Gaʼkʉnamʉ nʉgʉnchona awʉn naʼɉúnʉya neyka nʉgʉnchona ʉwáy naʼzarín. Ey ʉweʼki, ema gaʼkʉnamʉ tʉkin zanʉngwa neyka siri ínʉseʼ wasey unʉnno, inʉseʼri ayéy gugín ʉnchona awʉngwáy wasey unʉnno, émari Niwipáw ey kwʉya ni gwasi nanuʼ ki nanʉnno naʼzanʉnpana uyʉn.

Mándyri iʼngwi ʉnkachwi Jeuwá sí gaʼyeyka, Horst awiri Angelika nʉwía uyʉn. Ikʉ́nhari Bibria ingumʉ́n du aʼnoʼkwʉn nʉngwasi nʉgʉnámʉsa uyʉn. Ey uyeʼri, Jeuwá sí gaʼyeyka ɉina nʉʼkin Jeuwá zʉzaʼkinuga zakaʼchóʼsʉya ni awiri pinnaseʼ ɉwaʼsʉngwasi igunámʉsʉya ni nʉgʉnchona uyʉn (Salmo 83:18; Mateo 6:9). Ey awiri, Jeuwari ikʉ Kaʼgʉ́mʉseʼ Paraísu du zʉnaʼba kukwéy kʉnanʉngwasi, aʼwe awʉngwa ni nʉgʉnchonagwi uyʉn. Salmo 37:9seʼ wasʉyari: «Jeuwá ʉnkiwaʼkʉn nugari kaʼgʉmʉ ipana awʉngwa ni». Íkʉri ayéy ki nari Niwipáw yay ʉnkaʼnoʼsi zoya awʉndi, ikʉ́nhari ema duna neyka inkipanʉkwéy gunti na ni naʼzarieri nʉguzʉn uyʉn.

Nánʉkin nʉkʉnanuʼ narín du nanuʼ neyka chusi Bibriaseʼ yay nari zwein nʉngwásiri. Músico nari awiri pintor nari zoya nawa neykari awʉ́n kawa naʼzanʉngwasi nʉreʼgow awaki nusin. Ey ʉwameʼ, ingumʉ́n awʉ́ʼ reʼkusi zwein nʉngwasi riwiʉkwa nʉkʉzarín. Ayeygwi tinku nisi zoriwa neykari chusʉkwari nánʉkin nʉkʉníkuʼgwi narín. Jeuwari nʉnwaʼka awi, emí aʼzʉni nʉnwariri, Bibriaseʼ yay nari zoya awʉn aʼɉunʉyari du igunámʉsa awʉngwa aʼzʉnameʼ, zeyzey naʼzʉnin.

18 kʉgi nanʉkinri comunismo awiri Niwipáw sí meʼzanuʼ nari zweykwa neyka naʼzari zoya nawa narín. Ey uye pari, Bibria ʉnkʉriwiʉnpana ukweʼri, ingumʉ́n du nari zwein nʉngwasi nʉkaʼmʉkana awaki nuga ni. Ayaʼba ʉnkʉriwianawa neykari ingumʉ́n tanʉ naʼzari zweykwéy nʉkʉnanʉngwasi nʉkaʼmʉkana awaki nuga ni. 1993seʼri ɉwa ʉnkʉsi Jeuwá sí gaʼyeyka ɉina ʉnnika ukwin. Ey awiri, 2000seʼri Tabithasin ʉnkachwi nika ukwin. Niwi mówgari Bibriaseʼ aʼnikwʉn nuga neykari íkʉseʼ awí zweinʉngwa niweʼzari azwein nugin. Nʉʼn zanagwi nari sʉmʉ ikʉ comunismo nanʉndi Niwipáw sí meʼzanuʼ nʉnkwa neyka sí aʼzari zwein nuga ni. Ikʉ Jeuwá ɉwaʼsʉkwéy kʉnanʉngwasi igunámʉsʉn nukwameʼ zeyzey naʼzʉna ni.

Jeuwá sí gaʼyeyka ɉinasin ʉnkʉchʉnʉnpana ukweʼri, achʉna ɉina puré winaʼzarín. Ey ʉweʼki, ingiti ingiti nʉnnari ingumʉ́n du nari zwein nʉkwʉn winhaʼzʉn awaki nuga ni. Íwari ikʉnha Bibria winriwín nusiri Jeuwá sí gaʼyeyka ɉina winʉnniʼkumʉyeʼkʉ winzwein nugameʼ, zeyzey naʼzʉnin.

Tabithásinri Bibriaseʼ ʉnkachwi neykari eymí nari zoyamʉ kawa ni wásʉya ayéy wasey nugameʼ, zeyzey niweʼzʉnin. Ema nariza nʉndi, ʉnkachwi neykari rinhachusuʼ nari diʼkin kinki ʉnkʉnánʉkwa wásʉya neykari ingumʉ́n iʼba ʉnkʉnanʉkwasi niwikaʼmʉkana awaki nuga ni (Hebreos 13:4).

Emi kwey zweykwa neyka awiri tʉkin azi zanʉngwa nanʉnno naʼzʉna neyka sí puré naʼzanuʼ ni. Íwari Jeuwá sí gaʼyeyka ɉinari íʼngwikin ʉnkʉnariri sinamʉ rigawari tanʉ niweʼzari azoyaʼba anʉʼkʉtwi nukwa ni. Emáʼbari sinámʉkin rigawariri yow akín gunti kazʉna ni. Ímari birin pari emí niweʼzari azoriza nanʉndi naʼzari takʉn nʉʼnawa narín.