RIWIɄKWEYNA 04
Niwipáw kinki nanʉn nugari inʉ nanʉnno
Akwey nʉnkwe pari sʉmʉ diosu ʉnkaʼchwi kʉgaʼmʉkana awaki nuga ni. Ey ʉweʼki, Bibriáseʼri iʼngwi Niwipáw zʉʼn neyka «bema gwasi umʉn aʼzʉna» kwʉya ni wásʉya ni (2 Crónicas 2:5). Ari inʉ nanʉnno, awiri iari íkʉseʼ diosu ʉnkaʼchwi kaʼmʉkana ʉwa gwasi ingumʉ́n aʼzʉnari nanʉnno. Ema riwiʉkweynáseʼri Niwipawseʼ agʉnchona awʉndi, minwʉna neyka riwía awkwa.
1. Niwipawri azi zaʼkinuga nanʉnno, awiri iari agʉnchona unari aʼzʉna ni meʼzánʉko.
Bibriáseʼri, Niwipáw eméy zaʼ ʉnkaʼchóʼsʉya ni: «Nʉʼn Jeuwá nawin. Eyméy zaʼkinukwa ni» (Isaías 42:5, 8seʼ aʼgwa ú). Jeuwari hebreokin reʼzagikumana neyka ni. Inʉ winʉkʉriwí winzoya ki nugáseʼri, «aseʼ aʼzʉna neyka ayéy ʉnchunha ʉwa gwasi izʉna ni» winaʼzʉnki nuga ni. Jeuwari eméy zaʼkinukwa ni kazʉn unari aʼzʉna ni (Éxodo 3:15). Iari emí ʉwa ni meʼzánʉko. Ari Bibriáseʼri 7.000 nánʉkin azʉzaʼkinuga aʼnikwʉngwa reʼgow una nameʼ. a«Kuʼnawa awiri kaʼseʼ Niwipáw ta kinki nanʉn nugari» Jeuwá zaʼkinuga ni (Deuteronomio 4:39).
2. Jeuwasiri Bibriáseʼri azi zakaʼchóʼsʉya no.
Bibriáseʼri, ikʉ diosu ʉnkaʼchwi kaʼmʉkana awaki nuga gwasi, Niwipáw ta kinki neykari iʼngwi zʉʼn neyka ni wásʉya ni ímari Jeuwá ni. Iari eméy ʉwa ná meʼzánʉko. Jeuwari «inʉ kwey ʉwa gwasiri, ingumʉ́n aʼzʉna» nanʉn nuga neyka ni (Salmo 83:18seʼ aʼgwa ú). Ari bema gwasiri Ingumʉ́n ɉumamʉ kʉnʉna nameʼ, ayásinri azi nikweʼri aʼzanʉndi, nikʉkwéy kʉnanʉn nuga neyka ni. Kuʼnawa, Kaʼseʼ awiri «pinna ɉuna» chʉká aʼzari kwey ʉwa neyka Niwipawseʼ gowna na ni (Apocalipsis 4:8, 11). Ey awiri, Jeuwá nʉʼkin ey kinki kwey nakʉn nuga nariri ey kinki kwey zweingwa na ni (Salmo 90:2).
INGUMɄ́N RIWIɄKWASI
Niwipáw zaʼkinugari iʼngéygwiseʼ neki kʉnanuʼ nari aseʼ nʉʼkin kʉnʉna ni, awiri a diwʉ́n diwʉ́n zakaʼchoʼkumʉyari, iari diwʉ́n nanʉnno, sekʉnanʉn núkʉkwa nanʉngwa ni. Awiri azi nisi ari dinhaɉwaʼsʉngwaʼsa awaki nuga nanʉnno. Ey awi, iari agʉnchona unanʉn aʼzanʉnno riwiʉkwa nanʉngwa ni.
3. Niwipawri diwʉ́n diwʉ́n zakaʼchoʼkumʉya ni, ey ʉweʼki zaʼkinugari iʼngwi zʉʼn kʉnʉna ni
Iʼngeygwi diwʉ́n diwʉ́n zakaʼchóʼkumi ɉwaʼkumʉya neʼki azʉzaʼkinuga ɉwaʼsa awkwari akingwi nanuʼ neyka ni meʼzʉn awkwasi, WIDEW chwa unayu, ema sí rimasey awkwa:
-
Niwipáw diwʉ́n diwʉ́n zakaʼchóʼkumʉya neʼki a zaʼkinuga ɉwaʼsa awkwari, iari diwʉ́n nanʉnno.
Bibriáseʼri íkʉri inʉ biga ɉuna diosu ʉnkaʼchwi kaʼmʉkari zoya ni wásʉya ni. Salmo 136:1-3seʼ aʼgwa unayu, ema sí rimasey awkwa:
-
Diosu ʉnkʉgaʼchwi azoya gwasiri ingumʉ́n aʼzʉna neykari inʉ nanʉnno.
4. Jeuwari nʉɉwaʼsa unayu nʉzakaʼchoʼ kinki ukumanari aʼzʉna ni
Iari Jeuwari nʉɉwaʼsa unayu nʉzakaʼchoʼ ukumanari aʼzʉna ni meʼzánʉko. WIDEW chwa unayu, ema sí rimasey awkwa:
-
Azi nameʼri Jeuwari nʉɉwaʼsi nʉzakaʼchoʼ ukumanari aʼzʉna ni meʼzano.
Jeuwari zaʼkinuga zakaʼchoʼ kinki ukumanari aʼzʉna ni. Romanos 10:13seʼ aʼgwa unayu, ema sí rimasey awkwa:
-
Iari Niwipáw Jeuwá zaʼkinuga zakaʼchoʼ awkwari awʉtari aʼzʉna nanʉnno.
-
Ma mizaʼkinugasin mikʉkana ukumʉyeʼri azi meʼzʉna no.
-
Jeuwá azʉzaʼkinugasin zakaʼchoʼ awkwa nanʉndi, azi aʼzarizáy meʼzano.
5. Jeuwari azʉɉúnʉkʉnʉ nʉnnari minwʉna ni
Iʼngwi aʼmía Camboya zanʉn Soten zaʼkinugari, Niwipáw zʉzaʼkinuga ɉwaʼsa awkwari, bema ɉuna ipana awkwa gwasi ingumʉ́n du neyka ni wasey uyʉn. WIDEW chwa unayu, ema sí rimasey awkwa:
-
Widewseʼ aʼzarunhʉn nusiri, Soten Niwipáw zʉzaʼkinuga ɉwaʼsa unameʼ azi nanʉngwa kʉnise.
Iʼngeygwi ɉúnʉkʉnʉ kʉnika awkwásiri, minsaʼgwi azʉzaʼkinuga ɉwaʼsamʉ kawa ni. Santiago 4:8seʼ aʼgwa unayu, ema sí rimasey awkwa:
-
Jeuwari azi niʼnari minwanʉnno.
-
Niwipáw ɉwaʼsa awiri azʉzaʼkinuga zakaʼchoʼ awkwa nanʉndi a ingumʉ́n mʉchéy kʉnikʉkwasi, mikaʼmʉkana awizáy meʼzano.
IʼNGWINÉ YEYKARI: «Niwipáw iʼngwikin neyka nameʼ, azi zakaʼchoʼsʉnki akingwi zʉʼn naʼkinó».
-
Niwipawri Jeuwá kʉchʉ zaʼkinukiza nʉnáy meʼzano.
-
Azi nisi iʼngeygwi Niwipawri azʉzaʼkinugasin nʉzakaʼchoʼ unari aʼzʉna ni nʉkʉyʉnno.
RIGAWIɄWA NEYKA
Niwipáw ta neyka nʉʼkin zʉʼn Jeuwá zaʼkinuga ni. Ari azʉɉúnʉkʉnʉ nikʉkwásiri azʉzaʼkinuga ɉwaʼsa unáyuri nʉzakaʼchoʼ ukumanari aʼzʉna ni.
Rigʉnchunhasʉkwasi
-
Íkʉseʼ diosu ʉnkaʼchwi kaʼmʉkʉna gwasi, iari Jeuwari diwʉ́n kinki nanʉnno.
-
Iari Niwipáw zʉzaʼkinuga zakaʼchoʼsamʉ kawʉnno.
-
Iari Jeuwari azʉɉúnʉkʉnʉ kʉnika unari nʉnwʉna ni meʼzano.
INGUMɄ́N IZATAKA AWKWA
Asewa nánʉkin Niwipáw ey kwʉya ni chwizʉnhásʉya sékʉnʉn awkwa.
«Niwipawri kwʉyáy kinki ki nanʉnno» (JW.ORG -seʼ aʼnikwʉn nuga)
Niwipáw ey kinki kwʉya ni meʼzanʉkwéy neyka sékʉnʉn awkwa.
«Niwipawri ínʉseʼ gowna nanʉnno» (Gaʼyʉn nuga, agosto 1, 2014)
Niwipáw zaʼkinuga azi ayana ni meʼzanuʼ nʉngeʼki, zakaʼchoʼsʉkwari awʉtari aʼzʉna ni sékʉnʉn awkwa.
Niwipáw zakaʼchóʼsʉkwa awʉtari aʼzʉna nanʉnno. Niwipawri zaʼkinugari aseʼ nʉʼkin kʉnʉna ni meʼzari sékʉnʉn awkwa.
«Niwipawri bin ɉwa aʼníkwʉya nanʉnno» (JW.ORG -seʼ aʼnikwʉn nuga)
a Iari iʼngwí Bibriáseʼri Niwipáw zaʼkinugari aʼnikuʼ nanʉnno, awiri Niwipáw zaʼkinuga eméy gwasi zʉna ni meʼzʉn awʉngwásiri apéndice A4. La Biblia. Traducción del Nuevo Mundo -seʼ ingumʉ́n gaʼkʉnamʉ mikaʼchona awʉngwa ni.
