RIWIɄKWEYNA 05
Bibriari níwizey nari Niwipáw zʉgaʼkʉnamʉ kʉnʉna ni
Jeuwari Bibria niweʼwe una ni: 66 libro nánʉkin neyka ni. «Bibriari azi nari aʼchunna nanʉnno. Ínʉseʼ aʼsʉngwaʼsana nanʉnno». Migʉnchonʉkwéy nanʉngwásiri, azi nari Niwipáw zʉgaʼkʉnámʉri iwakin ey kwéy nakʉn nuga nanʉnno sekʉnánʉkwa nʉngwa ni.
1. Bibria íkʉseʼ aʼsana nameʼ iari Niwipáw zʉgaʼkʉnamʉ ni yʉkwéy nanʉnno.
Bibriari 40 cheyrwa neykaseʼ aʼsana ni. Ímari 1513 Kristu nakuʼgwi nʉnkwe pari ey awi 98seʼ kʉgi Kristu naka ki iwíkuma una ni. 1.600 kʉgi nánʉkin nʉnna ni. Iʼngwiri chiwa chwʉya, wakʉ tósʉya, ey awi sakuku kinʉngwi una ni. Eméy uneʼki gaʼkʉnámʉseʼ reʼbebé neki kauʼ nari nʉnʉkin aʼnikwʉn nuga ni, iari eméy yʉkwéy nanʉnno, Niwipáw zʉgaʼkʉnamʉ neyka nameʼ (1 Tesalonicenses 2:13seʼ aʼgwa ú). Bibria winaʼsanari ikʉnha winaʼzʉna neki aʼsuʼ nʉnna ni. «Niwipawseʼ ánugwe seymʉkesin igunámʉsa ʉwameʼ ikʉ́nhari winasey una ni» (2 Pedro 1:21). a Ánugwe seymʉkésinri ikʉnhaseʼ winaʼzʉna neki winaʼsuʼ nari Niwipawseʼ aʼzʉna neyka zʉʼn winaʼsa una ni (2 Timoteo 3:16).
2. Bibriari ínʉseʼ kʉnanʉkwéy nanʉnno.
Powru diwʉ́n diwʉ́n nari nakʉn nugaseʼ diwʉ́n aseykumʉya duna gaʼkʉnamʉ Bibriaseʼ kʉnʉna ipanʉkwéy gunti neyka ni (Apocalipsis 14:6seʼ aʼgwa ú). Niwipáwseʼri diwʉ́n diwʉ́n reʼzagikumʉngwa reʼgow una ni. Ey awi nʉ́nkʉri, bema libro gwasi ingumʉ́n reʼzagikumana neyka ni. Bemaseʼ neki diwʉ́n diwʉ́n aʼsʉya kwa be kwʉya nenanʉnke, Bibriáseʼri eméy yeyka nanʉnno aʼzanʉkwéy gunti kʉnʉna ni.
3. Jeuwari Bibriari ey kinki kwʉngwa reʼgow awaki nuga ni.
Bibriari anaʼnuga zʉcueroseʼ kwa nanʉndi kanʉ papiro zaʼkinugaseʼ aʼkumana ni. Ayari mʉnʉʼ waʼmʉ ikumʉkwéy neyka nʉnameʼ Bibria winaguzʉna neykaseʼri sʉmʉ copia wingawi nʉnʉkin kawi winaʼsa una ni. Ikʉ awʉnkawa aʼzari Niwipáw sí ta aʼzanuʼ neykaseʼri kʉchunha awʉnʉngwa aʼzari zorieʼki, iʼngwiri agwasizekʉ nise neki ey kinki kwey zweingwasi twiré winya una ni. Jeuwari níwisin dimaséy nʉn awʉngwa kʉreʼgow ukumʉn kaɉunʉyeʼki, aseʼri eméy neki nanuʼ nanʉngwa reʼgow awaki nuga ni. Bibriaseʼ yeykari: «Niwipáw zʉgaʼkʉnamʉ aʼkwakin nanʉngwa ni» (Isaías 40:8).
INGUMɄ́N RIWIɄKWASI
Niwipawri iʼngwí emí nisi Azʉgaʼkʉnamʉ aʼsʉngwaʼsa awʉngwasi igunámʉsa awi, ey kinki kweyri bemaseʼ neki kʉnanʉkwéy nʉngwasi, eymi nikaki nuga ni meʼzánʉkwa nʉngwa ni.
4. Bibriari imaseʼ aʼsʉngwaʼsana niwikʉya ni
WIDEW chwa ú. 2 Timoteo 3: 16seʼ aʼgwa unayu, ema sí rimasey awkwa:
-
Bibriari íkʉseʼ aʼsana nameʼ iari Niwipáw Zʉgaʼkʉnamʉ naní ayʉnno.
-
Niwipáw arunhʉyari íkʉseʼ pari aʼsʉngwaʼsa una ni yʉkwéy ki nanʉnno.
Gaʼkʉnamʉ aʼsʉn nugari, umʉ́n aʼzʉna neki nanuʼ nanʉnno aʼsʉn yʉn nuga zʉʼn umʉ́n aʼzʉna nanʉnno. Bibriasinri akingwí niga ni, íkʉseʼ aʼsana neki gaʼkʉnámʉri Niwipawzey neyka ni.
5. Bibria kʉchunhákumuʼ nʉn una ni
Niwipawri Bibria kʉchunhákumuʼ nanʉngwa reʼgow una ni. Birindi sakuku ɉináseʼri kʉchunha awʉnʉngwa winaʼzari nakʉn nuʼna ni. Awiri Niwipáw sí aʼzʉna winyeykari Bibria íkʉseʼ kʉnanuʼ nanʉngwa winaʼzari nakʉn nuʼna ni. Emí kazari azwein nuseʼki Bibria winaguzʉnari wichizekʉ kʉniseʼki, ey kinki kwʉngwa winaʼzari winzoya una ni. Eméy winaʼzari winzoyana ɉwaʼsʉkwéy nanʉngwasi, WIDEW chwa unayu, ema sí rimasey awkwa:
-
Awkin nanuʼ nʉnneki Bibria ey kwʉngwa kʉzari twiré aya uyʉn meʼzʉneʼri, aʼgwa awkwa neykari awʉtari aʼzʉnáy meʼzano.
Salmo 119:97seʼ aʼgwa unayu, ema sí rimasey awkwa:
-
Iʼngwiri wicha neki awizekʉ kʉniseʼki, azi nameʼ Bibria ingumʉ́n reʼzaysi zoriri pinnazey ey kʉnanʉngwa winaʼzari winzoya awaki nukʉnno.
6. Iʼngwi libro pinnazey neyka
Birin pari Bibriari bema libro gwasi ingumʉ́n reʼzagikumana nariri pin zʉnáy bákuma awaki nuga ni. Hechos 10:34, 35seʼ aʼgwa unayu, ema sí rimasey awkwa:
-
Niwipawri iari Azʉgaʼkʉnámʉri sʉmʉ diwʉ́n diwʉ́n aseykumʉya reʼzagíkuma awiri pin zʉnáy wékuma awʉngwa reʼgow awaki nuga nanʉnno.
-
Bibriaseʼ wasʉyari bema ingumʉ́n miguzʉna no.
Bibriari
pinnaseʼ
kʉnanʉkwéy
neyka ni diwʉ́n diwʉ́n reʼzagikumana nameʼ
Diwʉ́n diwʉ́n reʼzagikumana nameʼ
3.000
ingumʉ́n nánʉkin
gugín kwa ey naʼba kwʉya ni
5.000 millones
nánʉkin Bibriari aʼchunha awaki anuga ni.
Bema libro gwasiri, ingumʉ́n aʼchunhákuma awaki nusi nakʉn nuga neyka ni
IʼNGWINÉ YEYKARI: «Bibriari ikʉ birin zánʉnseʼ aʼsana zʉʼn naʼkinó».
-
Mari azi nʉwarunhakwe.
-
Azi nameʼ Bibriari Niwipáw Zʉgaʼkʉnamʉ na ni meʼzanʉkwéy nanʉnno.
RIGAWIɄWA NEYKA
Bibriari Niwipáw Zʉgaʼkʉnamʉ neyka ni awiri aseʼ kingwi pinnaseʼ ey gunti kʉnanʉngwa reʼgow awaki nuga ni.
Rigʉnchunhasʉkwasi
-
Niwipawri Bibria íkʉseʼ pari aʼsʉngwaʼsa una yeʼri azi gwasi igwakʉnno.
-
Bibria kʉchunhákumuʼ nari, diwʉ́n diwʉ́n reʼzagíkuma awiri pin zʉnáy aʼpʉgena una sí azi niʼkwe.
-
Niwipáw mʉchéy niwikʉnika awʉn aʼɉúnʉya neykari azi nʉwarunhakwe.
INGUMɄ́N IZATAKA AWKWA
Bibria birin aʼkumi nʉnna: iwa azi awi ukumʉya nanʉnno meʼzari sékʉnʉn awkwa.
«Azi nari Bibria niwikʉnanʉn nuga nanʉnno» (¡Despertad!, noviembre, 2007)
Bibria máymʉru naʼba kʉchunha awʉnʉngwa kazʉnna sí aʼgwa awkwa.
Iʼngwí Bibria reʼzaysa ʉwameʼ wichizekʉ nekʉ kʉnika una sí chwa ú.
Bibria sʉmʉ reʼzagíkumi ey awi sʉmʉ copia agachunha awaki nuga ni. Ey ʉwameʼ, iari Niwipáw zʉgaʼkʉnamʉ ʉntákumuʼ nari ey kinki kawi nakʉn nuga ná meʼzánʉko.
«Bibriari gaʼkʉnamʉ itaʼkuma awaki nuga ki nanʉnno» (JW.ORG -seʼ aʼnikwʉn nuga)
a Ánugwe seymʉkeri, Niwipáw zʉɉumamʉ neyka ni, riwiʉkweyna 07seʼri ima ánugwe seymʉkeri eméy nikʉn nuga ni wásʉya ni.
