RIWIɄKWEYNA 09
Niwipawsin rimasey mʉchéy kʉnika ú
Niwipawsin rimaseykwari sʉmʉ ɉuna naseʼ niwikaʼmʉkana ʉwa ni. Emi kwey zweykwaʼba ingumʉ́n du nari zweykwéy niwikʉnanʉngwasi, chʉwi niweʼzanʉn nukʉngeʼ tanʉ zanamʉ ipanʉkwasi kwa Niwipáw kingwi umʉ́n mʉchéy kʉnika awʉn niwingwasi aʼmʉkana ʉwa ni. Ey ʉweʼki, azi nisi Niwipáw naʼnoʼkwa áwʉyʉn meʼzanʉkwéy nanʉnno.
1. Ínʉri amasayamʉ kawʉnno.
Jesuri Niwipáw kuʼnawa zanʉn nʉʼkin amasayamʉ kawa ni in. Ey awi nʉ́nkʉri a kingwi Jeuwá amasey una ni. Iʼmʉnʉri eyméy kein: «Míwiri, Niwipáw eyméy key amaseykwa: “Niwipáw kuʼnawakʉ zanʉn...”» (Mateo 6:9). Jeuwasin rimaseykwari ingumʉ́n ɉúnʉkʉnʉ nanʉkwéy niwikʉnanʉngwasi niwikaʼmʉkana ʉwa ni.
Niwipáw amaseingeʼri inʉ sí kuwaseykwéy nanʉnno. Bema ɉuna neki kuwaseykwéy neyka ni. Ey ʉweʼki, Niwipáw niweʼnoʼkwa unari niweʼzanʉndi ínʉri aseʼ aguzʉnáy kawi aʼzasisamʉ kawʉn nuga ni. Bibriáseʼri eyméy yeyka ni: «bema ɉuna aʼzasisa neʼ awʉnke aseʼ aguzʉnáy kawi nanʉndi, ari niweʼnoʼkwa ʉwa ni» (1 Juan 5:14). Jesuri Niwipáw gwamʉ ʉnkaʼsisa unigeʼri eymí key amaseykwéy na ni yana ni (Mateo 6:9-13seʼ aʼgwa ú). Manʉnkaʼ meʼzʉna neyka kuwasey kéywʉri, duni kʉyʉkwa neykari meʼtikumuʼgwi nanamʉ kawa ni, ey awiri iʼngeygwi igunámʉsa awkwa kʉyʉkweygwi nariza ni.
2. Niwipáw azi key amaseykwéy nanʉnno.
Bibriáseʼri eyméy níkʉkwa niwikʉya ni: «Anugweseʼ miweʼzʉna neyka [Niwipawseʼ] kʉya awkwa» (Salmo 62:8). Ey ʉwameʼ, anugweseʼ azi meʼzanʉndi nanʉyʉʼkin kʉyamʉ kawa ni. Jeuwari biwkʉnʉ ki choʼsi kwa sa nari kwa choʼ nari gwamʉ aʼsísʉkwa niwikéy neyka ni. Ayeygwi a amasein nukʉngeʼri umʉta kwa meʼzʉn guntiki aseʼri noʼkwa gunti ʉwa ni, osʉn aʼchuʼ nari amasein kínkiri aseʼri awʉtari aʼchwʉya ni. Ey awi nʉ́nkʉri bin zangeʼ neki kwa be neki manʉnkaʼ Niwipáw amaseykwéy neyka ni.
3. Azi nari Niwipáw niweʼnoʼkwa ʉwa neyka chwizʉnhásʉya no.
Sʉmʉ nanʉnno, ey ʉweʼki iʼngwi neykari Azʉgaʼkʉnamʉ Bibriaseʼ pari neyka ni. Azʉgaʼkʉnamʉ aʼgwakʉn kinki nukʉndi «agʉnkuʼ neykari agʉnkwʉya» reʼgow awʉngwa ni (Salmo 19:7; Santiago 1:5seʼ aʼgwa ú.) Awiri buniʼgʉmʉ niwikʉnʉneʼri Jeuwari tanʉ zanamʉ niweʼwe awʉngwa ni. Ey awi nʉ́nkʉri, iʼngeygwi niwingunámʉsa unari niweʼzanʉn nukʉngeʼ, Jeuwáseʼri ayéy reʼgow awkweygwi nanʉngwa ni.
INGUMɄ́N RIWIɄKWASI
Emabaʼri azi nisi manʉnkaʼ Niwipáw niweʼzʉnʉkin amaseykwéy nanʉnno awiri asin rimaseykwari, azi nameʼ niwikaʼmʉkana awʉnno ʉnkʉriwín núkʉkwa nʉngwa ni.
4. Niwipawsin rimaseykwásiri aseʼ aguzʉnáy kawi awamʉ kawa ni
Azi kawi Niwipawsin rimasein zʉʼn noʼkwa awʉnno. WIDEW chwa ú.Jeuwari a nʉʼkin amaseynari aʼzʉna ni.
Salmo 65:2seʼ aʼgwa unayu, ema sí rimasey awkwa:
-
Jeuwá nʉmasey ʉweʼri minnoʼkwʉn aʼɉuná ʉwa ni meʼzano.
Niwipáw niwinnoʼkwa unari niweʼzanʉndi azʉgaʼkʉnámʉseʼ azi yʉndi ayéy uzoyamʉ kawa ni. Miqueas 3:4 awiri 1 Pedro 3:12seʼ aʼgwa unayu, ema sí rimasey awkwa:
-
Niwipáw niweʼnoʼkwa awʉngwásiri azi nikamʉ niwikawʉnno.
Soldado ɉinari ingumʉ́n winzʉn awʉngwasi Niwipáw gwamʉ aʼzasisa ki awagwi auʼ nʉnno. Ey ʉweʼki, Niwipáwseʼri aʼnoʼkwa awiza ni chwʉkwéy ki nanʉnno.
5. Niwipawsin rimaseingeʼri anugweseʼ niweʼzʉnʉkin kʉyamʉ kawa ni
Iʼngwiri Niwipawri eymí key amaseykwa kéykumi riwiʉkwa nenʉ́n keykumʉya ni. Ey ʉweʼki, imari Niwipawseʼ aguzʉn gunti ki awʉnno. Mateo 6:7seʼ aʼgwa unayu, ema sí rimasey awkwa:
-
Niwipawsin rimaseingeʼri akingwi key nanʉkwasi azi nikʉkwéy nanʉnno.
Sigin zʉnʉkin naʼzʉna meʼzari Niwipáw duni key nʉzweingeʼri iʼngwi semana ʉnzanikʉngeʼri Niwipawri akingwi key nari diwʉ́n diwʉ́n key amasey ukwin meʼzʉn awʉngwa ni.
Achʉna ɉinari agʉmʉsinʉ anugwesíkʉkin naʼzʉnʉkin nʉkʉya unari aʼzʉna ni. Jeuwari manʉnkaʼ ayeygwi anugwesíkʉkin niweʼzʉnʉkin nʉkʉya unʉndi niwinwʉna ni.
6. Niwipawsin rimasey awkwari aseʼ niweʼwena neyka ni
Niwipawsin rimaseykwari buniʼgʉmʉ niweʼzanʉn nukʉngeʼri, azi nisi ɉumamʉ niweʼwe awʉnno. WIDEW chwa ú.
Bibriáseʼri Niwipawsin rimaseykwari tanʉ zanamʉ kinki niweʼwe awʉnʉngwa ni wásʉya ni. Filipenses 4:6, 7seʼ aʼgwa unayu, ema sí rimasey awkwa:
-
Niwipawsin rimaseykwari buniʼgʉmʉ tisa auʼ nanʉngeʼki, azi nisi niwikaʼmʉkana ʉwa no.
-
Niwipawri inʉ sí kuwasey amasey awʉn meʼɉuno.
Riwía ú
Amén ayari azi gwasi izanʉnno. «Ʉnkʉrigʉnsi nawin» kwa «eymíkʉchʉ nʉngwa ni» yʉkwa neyka ni. Bibriáseʼri birin pari Niwipawsin rimasey aniwisi nanʉngeʼri eméy aya nʉnna ni wásʉya ni. (1 Crónicas 16:36).
7. Sigin zʉnʉkin Niwipawsin rimasey kinki awʉnʉngwa meʼzánʉkwa
Iʼmʉneʼri niwikʉzanʉn nugameʼ Niwipawsin rimaseykwari niweʼtikuma ʉwa ni. Jesuseʼri Niwipawsin rimaseykwari bin nánʉkin awʉtari aʼchwʉya nare. Mateo 14:23 awiri Marcos 1:35seʼ aʼgwa unayu, ema sí rimasey awkwa:
-
Jesuri azi nisi Niwipawsin rimasey kinki uye.
-
Awiri mari azi nisi Niwipawsin rimasey kinki awʉnʉngwa meʼzari nʉzoya no.
IʼNGWINÉ YEYKARI: «Niwipawri azi key amaseinke aseʼri noʼkwa zʉʼn auʼ nʉnno».
-
Aziri nʉkʉyʉnno.
RIGAWIɄWA NEYKA
Niwipawsin niweʼzʉnʉkin rimaseykwari mʉchéy kʉnikʉn niwingwasi aʼmʉkana ʉwa ni. Awiri Jeuwaseʼ aʼɉunʉyáy kawi zweykwéy nanʉngwasi ɉumamʉ niweʼwesʉngwasi aʼmʉkana ʉwa ni.
Rigʉnchunhasʉkwasi
-
Ínʉri amasayamʉ kawʉnno.
-
Azi keyri amasayamʉ kawʉnno.
-
Niwipawsin rimaseykwari azi nisi niwikaʼmʉkana awʉnno.
INGUMɄ́N IZATAKA AWKWA
Íkʉri Niwipawsin rimaseykwari eyméy nisi rimaseykwa ni aʼzanuʼ nʉn neʼki agʉnchona una neyka sékʉnʉn awkwa.
«Kogamʉrʉ nánʉkin Niwipawsin rimaseykwa neyka sí warunhʉnkwa neyka» (Gaʼyʉn nuga, octubre 1, 2010)
Niwipawsin rimaseykwari awʉtari aʼzʉna ni awiri azi nisi ingumʉ́n du rimasey zweykwéy nanʉnno meʼzanʉngwasi aʼgwa awkwa.
«Iari Niwipawsin rimaseykwari awʉtari aʼzanʉnno» (JW.ORG -seʼ aʼnikwʉn nuga)
Bema neki amaseykwéy ki nanʉnno Bibriaseʼ azi wásʉya nanʉnno meʼzari sékʉnʉn ú.
«Muñeku kwa Virgen awga neyka gwamʉ aʼzasisamʉ ki kawʉnno» (JW.ORG -seʼ aʼnikwʉn nuga)
Widew azamáy ʉwáseʼri bin zangeʼ kwa ey naʼba kin Niwipáw gwamʉ aʼzasisamʉ ki kawʉnno meʼzanʉngwasi sékʉnʉn ú.
