RIWIɄKWEYNA 10

Jeuwá sí gaʼyeyka ɉinasin ʉnniʼkumʉkwari iari du nanʉnno

A’CHUNɄNGWASI

Jeuwá sí gaʼyeyka ɉina ʉnniʼkumʉyekʉ gunʉ meʼkuma awaki nuga no. a Nʉzweiʼgwi neyka nanʉndi, aziri nanʉngwa nanʉnno meʼzari mowgá meʼzʉngwi auʼ nʉnno. Eméy nʉwarunhagwi auʼ nʉnno: «Ikʉnhari iari winʉnkʉniʼkuma awkwa neyka awʉtari aʼchwʉya nanʉnno. Nʉʼnri eymekʉ zoyamʉ ki nʉkawʉnno». Emáʼbari, ʉnniʼkuma awkwari Niwipáw ɉúnʉkʉnʉ kʉnikʉkwéy mikʉnariri, ayeygwi nʉkaʼmʉkana awʉngwasi na ni nʉriwía awʉngwa ni.

1. Iari ʉnkʉniʼkuma ukumʉya no.

Iʼngwi Bibria aʼsanari ʉnniʼkuma awkwari eymi ʉwameʼ neyka ni in: Zʉguró nari «ʉnkaniʼkumʉyʉnri Jeuwá zeywamʉ kʉkusa awʉnʉngwa ni» (Salmo 26:12). Jeuwá sí gaʼyeyka ɉinari, ayeygwi winʉnkʉniʼkuma ʉnte ʉwameʼ, zeyzey zanamʉ ipana ʉwa ni. Pin zʉnayri, semana zʉnʉkin Niwipáw azamʉya awiri iʼba Niwipáw amaseygwi ʉwa ni. Awiri kʉgi zʉnʉkin asamblea winʉnkizákusi zʉguró winʉnkʉniʼkuma ʉwa ni.

2. Eymékʉri inʉ nʉnkʉriwía uniko.

Ayaʼbari Bibria sí ingumʉ́n zakaʼchóʼkumiri ayaseʼ pari ingumʉ́n kʉrá zawí eméy gwasi ni aya ni (Nehemías 8:8seʼ aʼgwa ú). Nʉnníʼkuma awʉndi, Niwipáw sí nʉnkʉriwía awiri du arúnhʉya na ni meʼzʉn awʉngwa ni. Ey awi, niwinhaguzʉna kinki naʼnó meʼzʉn unigeʼri, ingumʉ́n ɉúnʉkʉnʉ kʉnika awʉn meʼɉunʉngwa ni. Ayeygwi emi kwey zweykwaʼba du kinki nari kukwéy mikʉnanʉngwasi nʉnkʉriwía awʉngwa ni (Isaías 48:17, 18).

3. Eykʉri iʼngeygwi ɉwaʼsa awkwari azi nari mingunámʉsa uniko.

Jeuwari eméy níkʉkwa niwikʉya ni: «Diʼkin azi niweʼzano meʼzari puré riwánʉkwa, dinhaguzari zoriri du nikʉnʉngwa meʼzari ʉngunamʉsʉkwéy nanʉngwasi» (Hebreos 10:24, 25). Eykʉri zaguzʉna kinki chwizʉnhásʉya awiri Niwipáw sí ʉnkʉriwía awʉn aʼɉúnʉya nʉɉwaʼsagwi awʉngwa ni. Ayaʼbari Bibria sí tanʉ meʼkusa awkwéy neyka nʉnoʼkwa awʉngwa ni (Romanos 1:11, 12seʼ aʼgwa ú). Ayeygwi buniʼgʉmʉ kaʼnugweri zweykwa kawʉn nuga nʉɉwaʼsa awʉngwa ni. Jeuwari ʉngunamʉsʉkwéy nariza ni aʼzʉnameʼ aʼchúkumuʼ nari ʉnniʼkuma unari aʼzʉna ni.

INGUMɄ́N RIWIɄKWASI

Jeuwá sí gaʼyeyka ʉnniʼkumʉyekʉ, emí aniga ni meʼzari ʉnniʼkuma awkwari du nariza ni ʉnkʉriwín núkʉkwa nʉngwa ni.

4. Jeuwá sí gaʼyeyka ʉnkʉniʼkuma ʉwe

Kʉtʉkʉnʉn kristíanuri winʉnkʉniʼkuma awi Niwipáw kaʼmʉkana una ni (Romanos 16:3-5). Colosenses 3:16seʼ aʼgwa unayu, ema sí rimasey awkwa:

Kʉtʉkʉnʉn kristianu iari ʉnkʉniʼkuma kinki uye.

Jeuwá sí gaʼyeykari winʉnkʉniʼkumʉyʉn ʉnniʼkumagwi ʉwa ni. Eykʉri azi aniga no meʼzʉn awʉn meʼɉunʉndi, WIDEW chwa ú. Unayu wiʼ nuga ʉnkaniʼkumi ʉwa sí chwa awiri ema sí rimasey awkwa:

WIDEW: Ʉnhaniʼkumʉyʉn azi aniga no (2:12)

Jeuwá sí gaʼyeyka ɉina winʉnkʉniʼkuma ʉweʼri azi nisi Colosenses 3:16 yay nisi winzoya no.
Widew, wiʼ nuga ʉnkaniʼkumi ʉwa sí bema ingumʉ́n miguzʉn awao.

2 Corintios 9:7seʼ aʼgwa unayu, ema sí rimasey awkwa:

Iari Jeuwá sí gaʼyeyka ʉnkʉniʼkumʉyʉn ɉwi síkumuʼ nanʉnno.

Meʼzawín nugasin, ʉnhaniʼkumʉyekʉ riwín anukʉngwa sí sékʉnʉn awkwa.

Ʉnhaniʼkumʉyekʉ nʉriwiana bema ingumʉ́n miguzʉn awao.

Riwía ú

JW.ORG -seʼri ʉnhaniʼkumʉyaʼba bekʉ awiri bin zangeʼ izanʉnno meʼzʉn awʉn meʼɉunʉndi taka ú.

Bibria sí waséy awiri gaʼkʉnamʉ ʉnkʉbasʉkwasi niweʼzawía ukumi widew aʼchwagwi ʉwa ni. Ipekumi awiri iwikumʉngeʼ Niwipáw azamaya awiri amasey ukumʉya ni.
Ey naʼbari gaʼkʉnamʉ waséykumʉn nukʉngeʼ ayeygwi gaʼkʉnamʉ ʉnkiwe awʉn meʼɉunʉndi awkweygwi neyka ni.
Cheyrwa, aʼmía, gʉmʉsinʉ, achʉna ɉina, bema neki yow chonʉkwéy gunti neyka ni.
Jeuwá sí gaʼyeyka ɉina ʉnniʼkumʉyʉnri ɉwi síkumuʼ neyka ni.

5. Ʉnkʉniʼkumʉkwari awkin nanuʼ neyka ni

Jesuri asinámʉsin Nazaret kwʉya nʉnameʼ, Niwipáw kaʼmʉkanʉngwasi kʉgi zʉnʉkin gwírkʉnʉ zʉnáy nenʉ́n Jerusalenkin máykʉnʉ ɉwía zweykwa kʉzʉnna ni. Lucas 2:39-42seʼ aʼgwa unayu, ema sí rimasey awkwa: