1. ¿Ayübimi tami papiltobel pu pelon dungu?

 “RUME ayühuelqueneu ngüneduamal Biblia ñi feipicünuel” feipi quiñe hueche Ben pingelu. ¿Ca femngechi feipiqueimi? Cam, ¿rume cüdaungei ñi adümafiel ca afeluhun-ngei pimi? Quimürpulmi Jehová chumngelu eli fillque profecia Biblia mu, femngechi ayüumayafimi.

2. ¿Chem ngüneduamaiñ?

² Tüfachi troquiñ mu peaiñ chumngelu mülei taiñ cüme quimafiel Biblia ñi feipicünuel ca chumaiñ taiñ ngüneduamafiel. Fei hula peaiñ epu profecia Daniel ñi lifru mu, ca chumngechi quelluqueiñmu tañi chem pilen.

3. ¿Chumabüiñ taiñ adümal pu pelon dungu?

³ Taiñ cüme adümafiel fillque profecia Biblia, duamfali taiñ quellungeal. Raquiduamnge tüfa mu. Amuimi quiñe huaria tami quimnofel, huelu compañnieimu quiñe hueni cüme quimfilu ti huaria. Tami hueni cüme quimniefi ti rüpü ca cheu tamu miyahun. Müna cümei tami compañnieteu tami hueni. Ca femngechi, Jehová cüme quimniei chem rupamequei taiñ antü meu ca chem rupayai cüpalechi antü mu. Feimu taiñ cüme adümafiel Biblia ñi feipicünuel, ñom piuque mu ngillatuafiyiñ Jehová taiñ quelluaeteu (Dan. 2:28; 2 Ped. 1:19, 20).

4. Jehová ñi dungu mu müli bentren pelon dungu, ¿chemu quidu ayüni tüba? (Jeremías 29:11; ca inaduamnge ti adentun).

⁴ Quiñe cüme chau reque, Jehová ayüquei tati pu che ñi cüme feleal (papeltunge Jeremías 29:11). Jehová müten feipiafeiñmu chem dungu ñi rupayal cüpalechi antü mu. Feimu huirintucui profecia taiñ quimtucunieal chem falinque dungu ñi rupayal (Is. 46:10). Taiñ huenu Chau  fente taiñ piuqueyeteu elcünui fillque profecia quiñe regalo reque. Huelu, ¿chumngelu maneluhuafuiñ ñi rüf femngechi femtripayal?

5. Max tañi bemün, ¿chem quimelelbi pu huechequeche?

⁵ Colegio mu mülei che yamquenofilu ta Biblia. Fei engün tañi feipiqueel ca tañi femqueel epurume raquiduamelafui pu huecheque testigo chem tañi feyentuel. Peaiñ chem ñi rupan Max. Fei feipi: “Huechengelu iñche epurume raquiduamün. Tañi pu chau, ¿quimeltupeneu mai ti rüf religion? pifun, ca ¿rüf cüpapei mai Biblia Chau Dios mu? pifun”. ¿Chem femi tañi pu chau? Max feipi: “Iñche quimnien ñi huesa duamcülen engu, huelu afeluulaingu”. Tañi pu chau Biblia mu huiñoldungulelfingu tañi ramtun, huelu Max femcünuulai. Quisu feipi: “Fei eluhun ñi ngüneduamal Biblia ñi feipicünuel ca nütramcaquefiñ tañi quimürpuel chaf hueche tañi trahunche mu”. ¿Chum tripai? Max feipi: “Fei hula quimtucun Chau Ngünechen rüf adcünufiel ti Biblia”.

6. Adümnoliiñ Biblia tañi eipin, ¿chumabüiñ?, ¿chemu?

⁶ Max reque, epu rume raquiduamcüleafuimi chi chem ñi feipin ta Biblia. Huesa duamcülelayaimi ca re femcünuulayaimi. ¿Chumngelu? Chem taiñ epurume raquiduameleteu percan reque felei. Percanle quiñe falin-ngechi chemcün ca femcünufiliyiñ müten huesañmahuafui. Percanle reque tami feyentun, ¿chumafuimi? Hune ramtuunge: “Biblia feipi chem ñi rupayal cüpalechi antü mu, ¿feyentuquen ñi feipilen?”. Maneluucülenolmi, duamfali tami ngüneduamal chumngechi deu huechutripai Biblia ñi feipicünuel. ¿Chem quelluafeimu?

7. ¿Chem dungu quellubi (incabi) Daniel tañi papiltobel pu pelon dungu? (Daniel 12:10; ca inaduamnge ti adentun).

⁷ Taiñ ngüneduamafiel Biblia ñi feipicünun inayentuafiyiñ ta Daniel. Fei ngüneduamquefui ti profecia cüme duam mu, femngechi ñi quimal ti rüf dungu. Quisu ca ñom chengefui. Quimniefui Jehová ñi eluquefiel adümuhun pu cüme quimfilu ca inayentuquefilu tañi lif norngechi dungu (Dan. 2:27, 28; papeltunge Daniel 12:10). Daniel pengeli ñi ñom chengen ngillatufilu ta Jehová tañi quelluaeteu (Dan. 2:18). Cafei Daniel cüme ngüneduamquefui Chau Ngünechen ñi huirintucuel. Ñochiquechi inaduamquefui Chau Ngünechen ñi huirintucuel feichi mu mülelu (Jer. 25:11, 12; Dan. 9:2). ¿Chumngechi inayafuiñ Daniel ñi femün?

8. Quiñeque che, ¿chemu papiltobingün pu pelon dungu? Huelu, ¿chumabüiñ?

⁸ Cüme duam mu ngüneduamaiñ Biblia ñi feipin. ¿Chumngelu chillcatuquefimi Biblia ñi feipicünuel? ¿Rüf ayüfimi ñi quimürpual ti rüf dungu? Femngechi femülmi, Jehová quelluaimu (Juan 4:23, 24; 14:16, 17). Huelu quiñeque che cüme duam mu  chillcatuquelafi ta Biblia, re papeltuquefi ta Biblia ñi pengelcünual ti Biblia ñi cüpanon Chau Dios mu. Re ayüqueingün quisuque ñi dullial chem ñi cümen ca chem ñi cümenon, femngechi quisutu ñi tutehual tañi mongen mu. Huelu iñchiñ cüme duam mu ngüneduamaiñ Biblia ñi feipicünuel. Huelu, ¿feica müten pemai? Femlai, cafei duamfali cangelu falin dungu.

9. ¿Chem duamniiñ taiñ adümabel pu pelon dungu ca chemu?

⁹ Ñom chengeaiñ. Jehová feipicünui ñi quelluafiel pu ñom che (Sant. 4:6). Femngechi ñi cüme adümafiel Biblia ñi feipicünuel mülei taiñ ngillatuafiel taiñ quelluaeteu. Ñom chengeliyiñ, eluhuaiñ taiñ quelluaeteu ti quim manelfal cüdaufe. Chau Jehová falintuquefi tüfachi manelfal cüdaufe taiñ eluaeteu fillque quellu puuchi antü mu (Luc. 12:42). Jehová cüme adcünuquefi itrocom, feimu llemai Jehová adniefi tüfachi troquiñche müten taiñ quelluaeteu ñi cüme adümafiel Biblia ñi rüfngechi feipin (1 Cor. 14:33; Efes. 4:4-6).

10. Ester tañi bemün, ¿chem quimeleleimu?

¹⁰ Cüme ngüneduamafiyiñ ti Biblia. Raquiduamaimi quiñe profecia feipilu Biblia tami doi ayüquefiel, fei eluunge tami ngüneduamafiel. Femngechi femi quiñe lamngen Esther pingelu. Quisu ayüfui ñi cüme ngüneduamal fillque profecia feipilu chumül ñi acual ti Mesías. Feipi: “Nielu 15 tripantu iñche, ayüfun ñi quimal ¿tüfachi profecia rüf huirintucungepei mai petu ñi acunon Jesús mapu mu?”. Fei ¿chem chumi? Fei eluhui ñi papeltuafiel quiñeque dungu nütramcalu ti Chümpol papel pengelu Mar Muerto mu. Tañi quimürpuel mu epu rume raquiduamhuelai. Esther feipi: “Quiñeque tati chümpol papel huirintucungei petu ñi acunon ta Jesús, feimu chem tañi feipicünuel Chau Ngünechen mu cüpai”. Huelu ca feipi: “Quiñeque papel fentren rupa papeltufiñ tañi cüme adümafiel”. Rume ayühueleyu tañi femün. Deu ñi cüme ngüneduamfiel quiñeque dungu feipicünulu Biblia, taiñ lamngen feipi ñi chum duamcülen: “Quimtucun Biblia nütramcai ti rüf dungu, iñche quisu ngüneduamfiñ”.

11. Taiñ quimpoel Biblia ñi rübngen, ¿chumngechi cümelcaqueiñmu?

¹¹ Cüme ngüneduamfiliyiñ chumngechi femtripai Biblia ñi feipicünuel, doi maneluhuaiñ Jehová mu ca cüme inayafiyiñ com taiñ feipieteu. Cafei Biblia ñi feipicünuel quelluqueiñmu taiñ nieal maneluhun ca cüme raquiduamal chem dungu rupale rume. Feula pichi ngüneduamaiñ epu profecia mülelu Daniel ñi lifru mu ñi femtripamequen famülque mu. Adümliyiñ tañi feipilen, quelluaiñmu taiñ cüme dullial chem ñi chumal.

12. Pu namun nielu botra ca hierro, ¿chem pengeli? (Daniel 2:41-43).

¹² (Papeltunge Daniel 2:41-43). Quiñe peuma mu ti lonco ülmen Nabucodonosor  pei quiñe adentun. Tüfachi adentun ñi namun “reyülei fotra engu pañillhue”. Trürümfiliyiñ ñi feipicünuel Daniel ca Apocalipsis, quimürpuaiñ ti namun adentulei Estados Unidos ca Reino Unido quiñeucülelu. Tüfa engu tati doi fütra gobierno mülelu famülque mu. Daniel quimelelfilu ta Nabucodonosor chem pin tañi peuma, feipicünui tüfachi fütra gobierno mu: “Quiñeque dungu mu nieai nehuen ca quiñeque mu nielayai”. ¿Chumngelu feipiafuiñ? Feitachi gobierno pañillhue reque felei, huelu reyülei fotra engu. ¿Chem pi tüfa? Ti pu che fotra mu adentulelu eluquelafi tüfachi gobierno ñi pengelal tañi nehuen-ngen”. b

13. Tübachi pelon dungu quellueiñmu taiñ adümal balinque dungu, ¿chuchi am?

¹³ Ñi feipin Daniel ti adentun ca tañi namun, quelluqueiñmu taiñ adümal falinque dungu. Hune, ti fütra gobierno Estados Unidos ca Reino Unido pengeli tañi nehuen-ngen. Por ejemplo, Estados Unidos ca Reino Unido quelluntucui ñi huehual ti Hunen ca tati Epungechi Fütra Hueichan com mapu püle. Huelu tüfachi fütra gobierno nehuen-ngehuelai ca amuleai ñi nehuen-ngehuenon. ¿Chemu? Fente tañi pofolcaumequen quisu tañi pu che. Epu, ngelayai quiñe gobierno Estados Unidos ca Reino Unido reque. Petu ñi ngüneniemequen Estados Unidos ca Reino Unido, Chau Ngünechen apümcayafi com pu gobierno, Chau Dios müten ngünenietuai mapu. ¿Chumngelu quimnieiñ tüfa? Biblia feipi “ti cura”, tüfa ta Ngünechen ñi Gobierno, atemcayafi ti adentun ñi namun (Dan. 2:34, 35, 44, 45). Quiñeque mu caquelu pais caiñetuafi Estados Unidos ca Reino Unido, huelu hueulayafingün. Chau Ngünechen müten apümcayafi.

14. ¿Chemu quellueiñmu taiñ adümal tübachi pelon dungu?

¹⁴ Daniel feipicünui ñi chumngeal ti adentun ñi namun. ¿Eimi maneluucüleimi ñi rüfngen tüfachi dungu? Femngechi femülmi, pengelaimi tami mongen mu. Quimülmi ñi pichilehuen mapu müleyechi dungu, doyümlayafimi ti plata (Luc. 12:16-21; 1 Juan 2:15-17). Cafei adümliyiñ tüfachi profecia, doi falintuafiyiñ taiñ amuldungun cüdau ca doi quelluafiyiñ pu che ñi discipulongeal (Mat. 6:33; 28:18-20). Feula deu inaduamfilu tüfachi dungu, cümeafui taiñ ramtuhual: “¿Chem pengelquen tañi femquen mu? ¿Maneluucülepen mai Chau Dios ñi Gobierno mu, fei ñi apümcayafiel mapu mülechi gobierno pichiñma mu?”.

15. Bachantü, ¿iñi am lonco ülmen norte mu ca lonco ülmen sur mu? (Daniel 11:40).

¹⁵ (Papeltunge Daniel 11:40). Daniel capitulo 11 nütramcai ñi mülen epu lonco ülmen cam gobierno, epuñpüle hueichamequei engu fei ñi ngünenieafiel ti mapu. Trürümfiliyiñ tüfachi dungu ca caquelu dungu feipilu Biblia, quimnieiñ fachantü “ti lonco ülmen norte mapu mu” feita Rusia ca tañi quelluqueteu. Ca “ti lonco ülmen ngünenielu sur mapu mu” feita Estados Unidos ca Reino Unido, tüfa tati doi fütra gobierno. c

16. Lonco ülmen norte tañi mapu mu, ¿chem cüdaungechi dungu upaquingün Jehová ñi pu che mongelelu bei mu?

¹⁶ “Ti lonco ülmen norte mapu mu”  inantucuniefi Chau Dios ñi pu che mülelu fei mu. Quiñeque testigo hulelcangei ca presuntucungei tañi feyentun mu. Huelu eluulaingün ñi llicalcangeal, doi mai, nehuentui tañi feyentun. ¿Chumngelu? Quimnieingün ñi inantucungeal, chumngechi feipicünungei Daniel ñi lifru mu (Dan. 11:41). d Raquiduamtuculiyiñ chumngechi ñi femtripalen tüfachi dungu, quelluqueiñmeu iñchiñ taiñ doi maneluucüleal ca püntütripanoal Chau Jehová mu.

17. Lonco ülmen sur tañi mapu mu, ¿chem cüdaungechi dungu upaquingün Jehová ñi pu che mongelelu bei mu?

¹⁷ Cuifi mu, “ti lonco ülmen ngünenielu sur mapu mu” ca inantucufi Jehová ñi pu che. ¿Chem dungu rupaingün? Feichi epu fütraque hueichan fentren pu peñi ca pu lamngen carceltucungei tañi coneltunon hueichan mu. Ca pu pichiqueche huemünentungei colegio mu tañi poyenofiel  ti bandera. Famülque mu, cheu ñi ngünenieel ti lonco ülmen sur mapu mu, Jehová ñi pu che cüdautufuingün tañi quelluntucual Chau Ngünechen ñi Gobierno. Raquiduamnge tüfa: dullingele quiñe che cam quiñe politico troquiñche ñi ngünenieal, quiñe cristiano ayüafui chi ñi coneltual tüfachi dungu mu. Votanole rume, huelu tañi lonco mu ca piuque mu ayüafui chi feichi che ñi huehual. Feimu rüf taiñ coneltunoal mapu müleyechi dungu mu, re cuñiutucuulayaiñ chem taiñ femquen, huelu cafei chem ñi mülen taiñ piuque mu ca lonco mu (Juan 15:18, 19; 18:36).

18. Pebilu iñchiñ tübachi epu lonco ülmen tañi hueichan, ¿chum duamcüliiñ? (Pebinge ti adentun).

¹⁸ Quiñeque che maneluuquelai Biblia ñi feipicünuel, fei huesa duamcüleafuingün pefilu ti lonco ülmen sur mapu mu ñi caiñetufiel tati lonco ülmen norte mapu mu (Dan. 11:40). Feichi epu lonco ülmen ti arma nuclear tañi nieel mu apümcayafui chi com mongen mülelu mapu mu. Huelu Chau Jehová eluulayai ñi rupayal tüfachi dungu (Is. 45:18). Fei fill raquiduamcülelaiñ ca llicalelaiñ. Doi mai pefilu ñi caiñetuhun ti lonco ülmen norte mapu mu ca tati lonco ülmen sur mapu mu, doi nehuentuquei taiñ feyentun. ¿Chumngelu? Tüfa pengeli ñi fülcülepan ñi afal mapu mu müleyechi dungu.

19. ¿Chem adümabüiñ pu pelon dungu mu?

¹⁹ Quimlaiñ chumngechi huechutripayal quiñeque dungu ñi feipicünuel Biblia. Tati profeta Daniel no rume quimlafui chem pifel com tañi huirintucuel (Dan. 12:8, 9). Müte adümnoliyiñ quiñe dungu ñi feipicünuel Biblia, feipilayafuiñ tañi huechutriparpunoal. Rüf maneluucüleiñ puuchi antü mu Chau Jehová quimelaiñmu chem taiñ duamnieel ñi quimal, chumngechi femi cuifi (Amós 3:7).

20. ¿Chem pelon dungu bemtripaai püchün upa mu, ca chumabüiñ?

²⁰ Tati troquiñque mapu feipiaingün: “¡Com cümelcalei, ngelai chem dungu rume!” (1 Tes. 5:3). Fei hula tati pu gobierno caiñetuafingün tati coilaque religion ca apümcayafingün (Apoc. 17:16, 17). Cafei caiñetuafingün Chau Dios ñi pu che (Ezeq. 38:18, 19). Fei hula conai ti afchi hueichan Armagedón pingelu (Apoc. 16:14, 16). Rüf maneluucüleiñ tañi rupayal tüfachi dungu pichiñma mu. Petu ñi acunon feichi antü, amulepe taiñ mañumtuniefiel taiñ Huenu Chau Jehová, amulepe taiñ ngüneduamniefiel Biblia ñi feipicünuel ca quellunieafiyiñ ta caquelu pu che ñi ca femngechi femal.