1. 1 Tesalonicenses 5:11 tañi eipin, ¿chem cüdau mu concülequiiñ com iñchiñ?

 DEUMANGEN mu quiñe hue Trahunhue Ruca, com iñchiñ müna ayüucüleiñ. Ti hunen trahun mu, fente taiñ ayühun mu pepi ülcantulayafuiñ chi. Cüme adngele taiñ Trahunhue Ruca, püramyengeai ta Chau Jehová. Huelu hueluconque yafültucuuliyiñ Trahunhue Ruca mu, doi püramyengeai ta Jehová. Tüfachi dungu mu raquiduampefui Pablo huirintuculu ñi chem feipin 1 Tesalonicenses 5:11 (papeltunge).

2. Tübachi quimelün mu, ¿chem peabiiñ?

² Ti apostol Pablo cutranpiuqueyefi ca cüme yafültucufi tati pu peñi ca pu lamngen. Tüfachi troquiñ mu ngüneduamaiñ cüla dungu chumngechi Pablo quellufi tati pu peñi ca pu lamngen: 1) rupan mu engün huesaque dungu, 2) quellufi engün ñi cümelcaucüleal, ca 3) yafültucufi engün ñi doi maneluhual Jehová mu. Cafei peaiñ chumngechi inayentuafuiñ ta Pablo, femngechi taiñ yafültucucheal (1 Cor. 11:1).

3. ¿Chem cüme raquiduam nii Pablo?

³ Pablo rume piuqueyeniefi tañi pu peñi ca pu lamngen. Quisu rupai fentren huesaque dungu mu, feimu adümfui ñi huesa rupan caquelu peñi ca lamngen, fei cutranpiuqueyefi. Quiñe rupa, Pablo niehuelafui plata, fei duamniefui quintual cüdau tañi mongeluhuam quisu ca ñi pu compañ (Hech. 20:34). Pablo quim deumaquefui carpa rucangealu, fei puulu Corinto mapu mu,  quiñentrür cüdahui Áquila ca Priscila engu. Huelu fill sabado antü mu amuldunguquefi tati pu judio ca Grecia che, fei aculu Silas ca Timoteo, Pablo eluhui ñi amuldungucheal (Hech. 18:2-5). Pablo rume cüdahui ñi nieal com tañi duamnieel, huelu ca com nehuen mu cüdahuelfi ta Chau Jehová. Feimu ngülamtuafui pu peñi ca pu lamngen chem no rume ñi catrütunoaeteu engün ñi cüme poyeafiel ta Chau Jehová (Filip. 1:10).

4. Pablo ca Timoteo, ¿chumngechi quellubingu tañi pu peñi ca lamngen tañi nehuenduamtubel caiñeltun?

⁴ Hue deumangelu ti trahunche Tesalónica huaria mu, pu peñi ca pu lamngen rume caiñetungeingün. Quiñe antü quiñeque caiñe quintuyahulfingün ta Pablo ca Silas, huelu penofilu engün huingüd cüpalfi engün ta quiñeque peñi, fei “yefi engün tati huaria che tañi autoridad meu”. Fei huirari engün: “¡Com quisu engün yamüñmalafi tañi ley dungu tati Roma tuuchi emperador!” (Hech. 17:6, 7). ¿Müna llicalepelafuingün tüfachi pu hue cristiano? Pablo ayülelafui ñi cüdahuelhuenoafiel engün ta Jehová, feimu feipifi engün: ‘Huercüfiyiñ taiñ peñi Timoteo tamün nehuentucuaeteu ca yafültucuaeteu tamün feyentun meu, femngechi ta inei no rume ñi ngañhuadnoal’ (1 Tes. 3:2, 3). Timoteo, ¿ca femngechi rupapelai caiñetun dungu quisu tañi huaria Listra mu? Fei, ¿ngüneduampelai chumngechi Pablo yafültucufi pu peñi ca pu lamngen? Timoteo pei chumngechi Jehová yafültucufi pu peñi ca pu lamngen Listra huaria mu. Feimu cüme feipiafui pu peñi ca pu lamngen Tesalónica huaria mu Jehová ñi ca quelluaeteu engün (Hech. 14:8, 19-22; Heb. 12:2, TNM).

5. Quiñe loncolelu quellubi Bryant, beimu ¿chumi quidu?

⁵ ¿Ca chem chumi Pablo ñi yafültucuafiel pu peñi ca pu lamngen? Huiño pemetufilu ta Listra, Iconio ca Antioquía, Pablo ca Bernabé elfalcünufingu ta quiñeque peñi ñi loncoleal feichi cüla trahunche mu. Pablo ñi antü mu, pu loncolelu müna yafültucupelafingün tati pu trahunche, chumngechi femquei pu loncolelu famülque mu (Hech. 14:21-23). Quiñe peñi, Bryant pingelu, feipi: “Nielu 15 tripantu iñche, tañi chau quisucünueiñmu ca ñi ñuque huemünentungei ti trahunche mu. Rume huesa duamcülefun, quisulelu troquihun”. ¿Chem quellueyu Bryant ñi ngañhuadnoal? Bryant feipi: “Quiñe loncolelu Tony pingelu, rumel nütramcaquefeneu. Quisu nütramcaeneu quiñeque che poyequefilu ta Jehová cutrancaumequefulu rume, huelu ayüucülequefuingün. Ca pengeleneu chem feipi Salmo 27:10. Cafei acordaleneu ti rey Ezequías mu. Tañi chau püntütripalefulu rume ta Chau Jehová mu, Ezequías com piuque mu poyequefui ta Chau Jehová. Com ñi feipieteu Tony rume yafültucueneu, feimu eluhun ñi cüdahuelafiel ta Chau Jehová fill antü” pi Bryant. Eimün pu loncolelu, eluucülemün tamün yafültucuafiel pu duamnielu quellu (Prov. 12:25).

6. ¿Chumngechi Pablo pünebi cuibique ngütram tañi nehuentubel caquelu?

⁶ Pablo ca feipifi tañi pu peñi ca pu lamngen fentren che poyequefilu ta Jehová cuifi meu rupaquefuingün huesaque dungu mu, huelu Jehová quellueyu engün ñi nehuentuleal (Heb. 12:1). Pablo quimniefui tañi rupan engün quelluafui pu peñi ca pu lamngen ñi yafüluucüleal  ca doyümafiel Jehová tañi dungu (Heb. 12:22). Ca femngechi famülque mu, papeltufilu iñchiñ chumngechi Jehová quellufi ta Gedeón, Barac, David, Samuel ca caquelu pu che, tüfa müna yafültucuqueiñmu (Heb. 11:32-35). Taiñ revista mu ca huirintucungei ñi rupan taiñ pu peñi ca pu lamngen famülque mu. Papeltufilu iñchiñ, müna mañumcüleiñ. Quiñeque mandaqueingün carta ñi mañumafiel ti fütra Betel ruca.

7. Pablo tañi ngülam mülelu Romanos 14:19-21, ¿chem quimeleleiñmu?

⁷ Iñchiñ quelluntucuafuiñ taiñ trahunche ñi tüngcüleal. Feimu quiñeucülenole taiñ raquiduam, eluulayaiñ tüfa taiñ püntülcayaeteu. Fei Biblia meu mülenole quiñe ngülam feipilu taiñ chumal, obligalayafuiñ ta caquelu peñi cam lamngen ñi raquiduamal iñchiñ reque. Ngüneduamaiñ ñi rupan cuifi mu Roma trahunche mu. Feichi mu pu cristiano inahuelafingün Moisés ñi ley dungu, feimu elungefuingün ñi iyal chem iyael rume (Mar. 7:19). Quiñeque cristiano judio tuhun-ngelu cümelu troquifingün tüfa, huelu ca caquelu cristiano judio tuhun-ngelu tañi raquiduam elulaeyu ñi femal tüfa, feimu ti trahunche quiñeucülelafui. Pablo pengeli ñi fente falin-ngen tüngcüleal ti trahunche, fei feipi: “Doi cümei ñi ingenoal ta ilo, ca ñi putungenoal rume ta pulcu, ca ñi chem chumnoal rume ta che femngechi tañi huesa duamnoal tami peñi cam tami lamngen, fei ñi püntütripanoal” (papeltunge Romanos 14:19-21). Feimu cümelafui ñi chaftudunguhual engün femngechi dungu mu. Pablo ca eluhui ñi cacünutual ñi chumquen femngechi ñi huelulcanoafiel ta caquelu (1 Cor. 9:19-22). Ca femngechi famülque mu, chaftudungulayaiñ feichi dungu mu ñi dulliafel caque quiñeque cristiano, femngechi quelluntucuaiñ ñi tüngcüleal ti trahunche.

8. Upalu hueya dungu trahunche mu, ¿chumi Pablo tañi quelluabel pu peñi ca lamngen tañi tüngcüleal?

⁸ Pablo raquiduamquelafui caquelu cristiano reque quiñeque falin-ngechi dungu mu, huelu tañi femün mu quellufi ti trahunche ñi tüngcüleal. Por ejemplo, quiñeque cristiano feipiquefui tati pu cristiano judio tuhun-ngenolu mülefui ñi circuncidangeal, femngechi ñi huesa dunguyengenoal engün (Gál. 6:12). Pablo femngechi raquiduamquelafui, huelu obligaquelafi ta caquelu ñi inayal quisu tañi raquiduam, doi mai eluhui ñi adnieaeteu tati pu apostol ca pu loncolelu mülelu Jerusalén huaria mu (Hech. 15:1, 2). Ñi femün mu, Pablo quellufi ti trahunche ñi ayüucüleal ca tüngcüleal (Hech. 15:30, 31).

9. Taiñ inaabel Pablo ñi bemün, ¿chumaiñ?

⁹ Taiñ trahunche quiñeucülenole ñi raquiduam quiñe falin dungu mu, ¿chumafuiñ? Pablo reque eluhuaiñ taiñ adnieaeteu pu loncolelu. Femngechi ti trahunche quiñeucüleai ca tüngcületuai. Jehová ñi troquiñche hulquei fillque publicacion ca pauta, tüfa meu mülei fillque Biblia ñi ngülam pengelquelu taiñ chumal cam taiñ femnoal. Fei eluuliyiñ taiñ inayal feichi ngülam, quelluafuiñ ñi quiñeucüleal ca tüngcüleal ti trahunche.

10. ¿Ca chumi Pablo tañi nehuentubel tüngcüleal trahunche mu?

¹⁰ Pablo ngüneduamquelafui ñi huesa femün tañi pu peñi ca pu lamngen,  doi mai nütramcaquefui tañi cüme chumngen ca cüme femquen engün. Femngechi quelluntucui ñi cüme feleal ti trahunche. Por ejemplo, huirintucufilu pu Roma che, Pablo üitufi fentren pu peñi ca pu lamngen ca feipi tañi cüme chumngen engün. ¿Chumngechi inayentuafuiñ ta Pablo? Nütramcayaiñ ñi cüme piuquengen ca ñi cüme femquen taiñ pu peñi ca pu lamngen. Femngechi quelluquefiyiñ engün ñi doi quiñeucüleal ca ñi doi piuqueyehual.

11. Hueluraquiduamle quiñeque peñi ca lamngen, ¿chumaiñ tañi huiño tüngcüleal?

¹¹ Quiñeque mu, pu quimünque cristiano cütu tutehuelayafui cam yafcahuafui caquelu cristiano engu. Femngechi rupai Pablo Bernabé engu. Bernabé ayüniefui ñi compañaeteu Marcos tañi fill püle amuldunguyahual engün, huelu Pablo ayüquelafui tüfa. Feimu “rume fütra huelulcahui engu”, fei püntütripaingu (Hech. 15:37-39). Huelu Pablo, Bernabé ca Marcos cümelcautuingün, femngechi pengelingün ñi doi falin-ngen ñi tüngcüleal ca quiñeucüleal ti trahunche. Fei rupachi antü mu, Pablo cümeque dungu feipi ta Bernabé ca Marcos mu (1 Cor. 9:6; Col. 4:10). Ca femngechi iñchiñ, yafcauliyiñ quiñe peñi cam lamngen engün, yafüluhuaiñ taiñ cümelcautual ca ngüneduamafiyiñ ñi cüme piuquengen engün. Femngechi tüngcüleai ca quiñeucüleai ti trahunche (Efes. 4:3).

12. ¿Chem hueyaque dungu upaquingün taiñ pu peñi ca lamngen?

¹² ¿Ca chem femafuiñ ñi yafültucuafiel taiñ pu peñi ca pu lamngen? Quelluafiyiñ engün ñi doi maneluhual Jehová mu. Quiñeque engün ayentuqueyu tañi pu che poyequenofilu ta Jehová cam tañi pu compañ colegio cam cüdau mu. Caquelu rume cutrancüleingün cam rume cüdautuquefingün ñi chaftuafiel huesaque raquiduam. Ca caquelu peñi ca pu lamngen yeniei fentren tripantu ñi üngümniefiel ñi afal com ti huesaque dungu mapu mu. Ñi rupan mu engün, cüdautuafuingün ñi maneluhual Jehová mu. Pu cristiano hunen siglo mu ca femngechi huesaque dungu rupaingün, ¿chumngechi yafültucueyu Pablo? Peafiyiñ.

13. ¿Chumngechi Pablo quellubi pu cristiano ayetungelu tañi mupitun mu?

¹³ Biblia mu, Pablo quellufi pu peñi ca pu lamngen ñi doi maneluhual Jehová mu. Por ejemplo, pu cristiano judio tuhun-ngelu feipipelaeyu tañi pu che: “Pu judio doicüleingün pu cristiano mu”. Fei tüfachi pu peñi ca pu lamngen quimquelafuingün chi ñi chem feipiafiel tañi pu che. Feimu Pablo huirintucufilu pu hebreo che, rume yafültucufi ca quellufi engün ñi huiñoldunguafiel tañi pu caiñetueteu (Heb. 1:5, 6, TNM; Heb. 2:2, 3; 9:24, 25). Ca femngechi famülque mu, taiñ pu peñi ca pu lamngen ayentungequeingün. Feimu quelluafiyiñ engün ñi püneafiel taiñ fillque publicacion ñi incañpeafiel tañi feyentun engün. Cafei pu hueche ayentungele tañi feyentunon evolucion mu, quelluafuiñ engün ñi ngüneduamal ti folleto ¿Es la vida obra de un Creador?, ca ti folleto El origen de la vida. Cinco cuestiones dignas de análisis. Femngechi cüme quimelafuingün chumngelu feyentuqueingün Chau Dios ñi deumael itrocom mülelu.

14. Pablo bentren cüdau niebüi ume, huelu ¿chumi?

 ¹⁴ Pablo yafültucufi pu peñi ca pu lamngen ñi femal “cümeque dungu”, femngechi ñi pengelal tañi piuqueyehun (Heb. 10:24). Quelluntucufi engün tañi feipin mu, huelu cafei tañi femün mu. Por ejemplo, rupalu filla pu peñi ca pu lamngen Judea mapu mu, Pablo eluhui ñi eluafiel quiñeque dungu ñi duamnieel engün (Hech. 11:27-30). Pablo amuldunguquefui ca quimeltuchequefui, huelu cafei rumel eluhui ñi quelluafiel pu duamnielu tañi mongeluhuam (Gál. 2:10). Femngechi quellufi pu peñi ca pu lamngen ñi doi maneluhual Jehová ñi cuidanieaeteu engün. Famülque mu hulafuiñ taiñ tiempo, nehuen cam adümuhun ñi quelluafiel taiñ pu peñi ca pu lamngen duamnielu quellu. Cafei hulafuiñ plata ñi quelluntucual taiñ amuldungun cüdau mu. Femliyiñ com tüfachi dungu, taiñ pu peñi ca pu lamngen quimtucuaingün Jehová turpu quisucünulayaeyu engün.

15, 16. ¿Chumngechi trucuabiiñ tañi pu peñi ca lamngen nehue mupitunolu?

¹⁵ Pablo yafültucufi pu müte feyentuhuenolu. Pablo cutranpiuqueyefi ca cüme dungufi engün (Heb. 6:9; 10:39). Por ejemplo, huirintucufilu pu hebreo che, fentren rupa feipi “iñchiñ” cam “taiñ”, femngechi pengeli quisu ca duamniefui ñi inayal tañi ngülamtuel (Heb. 2:1, 3). Pablo reque, yafültucuafiyiñ pu müte nehuen-ngenolu tañi feyentun. Feimu pengelafiyiñ fente taiñ piuqueyeniefiel engün. Taiñ feipin mu yafültucuafuiñ engün, huelu doyelchi mai piuqueyen mu dungufiliyiñ engün.

¹⁶ Pablo acordalelfi pu peñi ca pu lamngen  Jehová ñi cüme quimnien tañi cüme femquen engün (Heb. 10:32-34). Ca femngechi yafültucuafuiñ pu müte nehuen-ngehuenolu tañi feyentun. Fei ramtuafuiñ engün: “Eimi, ¿chumngechi quimfimi tati rüf dungu?”. Ca quelluafuiñ engün ñi raquiduamal chumngechi Jehová quellueyu cuifi mu. Fei feipiafuiñ engün: “Jehová acordaniequei com tami cüme femün cuifi meu, fei turpu quisucünulayaimu” (Heb. 6:10; 13:5, 6). Femngechi femliyiñ, quelluafuiñ chi tañi serfinieafiel ta Chau Jehová.

17. ¿Chumngechi doi cüme nehuentubiiñ taiñ pu peñi ca lamngen?

¹⁷ Chumngechi quiñe che doi cüme nentuquei ñi cüdau rupan mu chi antü, ca femngechi iñchiñ doi cüme adümurpuafuiñ chumngechi yafültucuafiel taiñ pu peñi ca pu lamngen. ¿Chumngechi quelluafuiñ ñi nehuentuleal engün? Acordalelafuiñ chumngechi Jehová quellufi feichi pu huesa rupamequelu cuifi mu. ¿Chumngechi quelluafuiñ ñi quiñeucüleal ti trahunche? Nütramcayaiñ ñi cüme piuquengen caquelu pu peñi ca pu lamngen. Cafei mülele yafcahun, cümelcautuaiñ. Ca ¿chumngechi quelluafuiñ pu peñi ca pu lamngen ñi doi feyentuleal? Quelluafuiñ engün ñi doi cüme ngüneduamafiel Biblia ca taiñ fillque publicacion, eluafuiñ chem ñi duamnieel engün ca yafültucuafuiñ feichi pu müte nehuen-ngenolu tañi feyentun.

18. Com piuque mu, ¿chumaimi?

¹⁸ Pu quelluquelu ñi deumayal Trahunhue Ruca, müna ayüucülequeingün. Iñchiñ ca ayüucüleafuiñ quelluntucufiliyiñ taiñ pu peñi ca pu lamngen ñi doi maneluhual Chau Jehová mu. Rupachi antü mu quiñe Trahunhue Ruca huesañmahuafui, huelu com taiñ femqueel ñi yafültucuafiel taiñ pu peñi ca pu lamngen turpu aflayafui. Feimu llemai, hueluconque nehuentucuhuaiñ (1 Tes. 5:11).