QUIMELÜN ÑI PAPILTUNGEAL 33
Jehová cuñiutubi tañi pu che
“Jehová tañi pu nge pequebi com ti pu yamquebilu” (SAL. 33:18).
ÜLCATUN 4 Jehová iñche ñi Camañfe
¿CHEM QUIMAIÑ? a
1. Jesús, ¿chemu ngillatubi Jehová tañi cuñiutobel quidu ñi inanequetu?
FEICHI pun petu ñi lanon Jesús, feipifi ta Jehová ñi cuidayafiel tañi pu inanieteu (Juan 17:15, 20). Chau Jehová rumel cuñiutucuquefi tañi pu che. Huelu Jesús quimniefui tañi caiñetuaeteu engün ta Huecüfü. Feimu duamnieafuingün tañi cuñiutucuaeteu ta Jehová.
2. Salmo 33:18-20 tañi eipin, upaleliiñ cüdaungechi dungu ¿chemu llücalaaiñ?
2 Famülque mu, iñchiñ pu cristianongen rupaqueiñ huesaque dungu mu Huecüfü ñi duam mu. Feitachi huesaque dungu huesa duamelafeiñmu ca famentuafeiñmu taiñ poyeafiel ta Jehová. Huelu feitachi troquiñ mu peaiñ taiñ llicalenoal. Jehová pequei taiñ huesaque dungu taiñ rupamequen ca eluucülei taiñ quellunieaeteu. Peaiñ ñi rupan Elías ca Job, fei quimaiñ “Jehová ngüneduammequefi tañi pu yamnieteu” (papeltunge Salmo 33:18-20).
“QUIDULEN” RAQUIDUAMLU IÑCHIÑ
3. ¿Chumul “quidulen” piabüiñ?
3 Trahunche mu niefuliyiñ rume fentren pu peñi ca pu lamngen, quiñeque mu quisulelu troquihuafuiñ. Quiñeque mu, pu huechequeche colegio mu mülei ñi incañpeal ñi feyentuqueel. Fei raquiduamafuingün ñi nienon engün inei tañi quellueteu. Cafei huiñamtuule engün ca trahunche mu, quisulelu troquihuafuingün. Ca quiñeque iñchiñ hueñancüleafuiñ ca yafüngehuelayafuiñ, feimu quisulelu troquihuafuiñ. ¿Chumngelu? Cüdautuafuiñ nütramcayafiel ta caquelu taiñ rupamequen, entendelayafeneu tañi chum duamcülen piafuiñ. Doi mai, inei no rume duamtuquelaeneu piafuiñ. Quisulelu troquiuliyiñ, rume hueñancüleafuiñ. Jehová ayüquelai taiñ feleal.
4. Elías eipi “iñche müten mülen”, ¿chemu?
4 Peaiñ ñi rupan ta Elías. Jezabel feipicünufui tañi langümafiel ta Elías, feimu quisu 40 antü ellcauquiyaufui (1 Rey. 19:1-9). Quiñe antü ellcaucülelu quiñe lolo meu, feipifi ta Jehová quisu müten mülehuefui tañi profetangen (1 Rey. 19:10). Huelu femlafui, ca mülefui caquelu profeta. Abdías montulfi 100 profeta tañi langümnoaeteu Jezabel (1 Rey. 18:7, 13). Fei, ¿chemu am Elías quisulelu troquihui? ¿Raquiduampelafui ñi lan com pu profeta tañi montulel ta Abdías? ¿Raquiduampelai chem ñi rupan Carmelo huincul mu? Feichi mu Jehová quimfalcünui ñi rüf Ngünechen ngen, huelu inei no rume poyelaeyu. ¿Femngechi raquiduampelai ta Elías? Ca raquiduampelai “inei no rume quimlai tañi inantucungen tañi langümngeal” ¿pipelai ta Elías? “¿Mülepei mai quiñeque che ñi raquiduamcülen iñche mu?” pipelai. Biblia feipilai com ñi raquiduamquefel ta Elías, huelu Jehová quimniefui chumngelu ñi quisulelu troquihun ta Elías. Ca femngechi quimniefui chumngechi tañi quelluafiel.
Jehová chumngechi ñi quellufiel ta Elías, ¿chumngechi quelluafeiñmu quisulelu troquiuliyiñ? (Inaduamnge parrafo 5 ca 6).
5. ¿Chumi Jehová tañi quelluabel (incaabel) Elías ñi loncontucual “quidulelan”?
5 Jehová fillque dungu femi tañi quelluafiel ta Elías. Chau Jehová ayüfui tañi nütramcayaeteu ta Elías, feimu epu rupa ramtufi: ‘¿Chem am ta cüpaleimu ta tüfa püle?’ (1 Rey. 19:9, 13). Feitachi epu rupa mu, Elías feipifi ta Jehová tañi chum duamcülen, fei Jehová cüme allcütueyu. Jehová ca huiñoldungufi ta Elías, pengelelfi tañi compañnieteu ca tañi nehuen-ngen. Jehová ca feipifi ta Elías ñi mülen fentren Israel che ñi poyequefiel Jehová (1 Rey. 19:11, 12, 18). Elías nülacünulfilu tañi piuque ta Jehová ca allcütueteu, ¿doi cüme duampetulafui ta Elías? Jehová ca elufi falinque cüdau ta Elías. Feipifi ñi reycünuafiel ta Hazael Siria mapu mu, ñi reycünuafiel Jehú Israel mapu mu ca ñi profetacünuafiel ta Eliseo (1 Rey. 19:15, 16). Elufilu am cüdau ta Elías quellufi ñi cüme raquiduamcüleal. Ca elufi quiñe cüme compañ, Eliseo. ¿Iñchiñ cai? Quisulelu troquiuliyiñ, ¿chumafuiñ taiñ llohual Jehová ñi quellu?
6. ¿Chem eipiabüiñ Jehová? (Salmo 62:8).
6 Jehová feipiqueiñmu taiñ ngillatuafiel. Jehová pequeiñmu chem huesa dungu taiñ rupaquen ca feipiqueiñmu chem hora mu rume llellipufiliyiñ, allcütuñmayaiñmu (1 Tes. 5:17). Jehová rume ayüuquei tañi llellipueteu tañi pu che (Prov. 15:8). ¿Chem dungu mu ngillatuafuiñ ta Jehová quisulelu troquiuliyiñ? Nülacünulelafiyiñ taiñ piuque ta Jehová, Elías reque (papeltunge Salmo 62:8). Feipiafiyiñ Jehová taiñ chum duamcülen ca chem dungu taiñ fill raquiduamelnieteu. Quisulelu troquiuliyiñ ca quimnoliyiñ taiñ chumal, feipiafiyiñ Jehová taiñ quelluaeteu. Por ejemplo, eimi hueche, ¿chem dungu femafuimi quisulelu troquiulimi ca llicalelmi nütramcayal Jehová mu tami colegio mu? Feipiafimi Jehová tami eluaeteu nehuen ca quimün, femngechi tami cüme quimfalcünual tami feyentun (Luc. 21:14, 15). Hueñancüleliyiñ, feipiafiyiñ Jehová taiñ quelluaeteu nütramcayafiel quiñe peñi cam quiñe lamngen quimchengelu. Ca feipiafiyiñ ta Jehová tañi quelluafiel feichi che taiñ entendeaeteu. Feimu llemai, nülacünulelafiyiñ taiñ piuque ta Jehová, ngüneduamaiñ chumngechi taiñ huiñoldunguaeteu ca eluhuaiñ taiñ quelluaeteu ta caquelu. Femliyiñ, quisulelu troquiulayaiñ.
¿Eluucülepeimi mai tami doi amuldungual ca tami compañtuafiel ta caquelu? (Inaduamnge parrafo 7).
7. Mauricio tañi upan, ¿chem quimeleleiñmu?
7 Com iñchiñ Jehová eluqueiñmu falinque cüdau. Jehová pequeiñmu ca falintuqueiñmu com taiñ cüdau taiñ femqueel trahunche mu ca amuldungun mu (Sal. 110:3). Quisulelu troquiuliyiñ, ¿chumafuiñ taiñ fentecünunoal taiñ cüdau? Raquiduamaiñ chem ñi rupan quiñe hueche huentru Mauricio pingelu. b Pichi rupalu tañi fautizahun ta Mauricio, quiñe tañi doi cüme hueni ñochiquechi famtripai ta Jehová mu. Mauricio feipi: “Püntütripalu tañi hueni, fill raquiduamfun. Ramtuuquefun: ‘¿Serfipeafiñ mai Jehová com tañi mongen mu chumngechi tañi feipicünufiel?’. Quisulelu troquihun, ‘inei no rume entendenoaeteu troquiufun’ pin”. ¿Chem quellueyu Mauricio ñi doi cüme feletual? Quisu feipi: “Doi amuldungufun, fei quellueneu tañi raquiduamcülehuenoal iñche mu müten. Cüdaulu am caquelu pu peñi iñchiñ amuldungun mu, fei doi quisulelu troquiuhuelan ca doi ayüucületun”. ¿Ca chem quellueyu? Fei feipi: “Ca doi eluhun tañi cüdahual trahunche mu. Elfalcünungelu quiñe asignacion trahun mu, cüme pepicauquefun ñi com cüme tripayal. Feitachi cüdau tañi elungequen inaduamün tañi falintueteu ta Jehová ca ti trahunche”.
UPALU IÑCHIÑ CÜDAUNGECHI DUNGU TAIÑ CUTRANCAHUAL
8. Upalu iñchiñ cüdaungechi dungu, ¿chum duamcüleabüiñ?
8 Com iñchiñ quimnieiñ taiñ rupayal huesaque dungu mu (2 Tim. 3:1). Huelu quiñeque mu ruparumeafuiñ huesaque dungu mu taiñ raquiduamquenofel rume. ¿Chem dungu? Quiñeque mu nierumelayafuiñ chi ta plata, ti doctor feipiafeiñmu taiñ nien quiñe huesa cutran, cam larumeafui chi quiñeque taiñ pu che. Rupaliyiñ femngechi dungu mu, rume hueñancüafuiñ, huelu doi hueñancüafuiñ hueluque contupaeliyiñmu feitachi huesaque dungu. Huelu loncontucuaiñ, Jehová cüme quimniei taiñ rupamequen ca quelluaiñmu taiñ cüme chaftuafiel huesaque dungu.
9. Job, ¿chem cüdaungechi dungu upaquebüi?
9 Peaiñ chumngechi Jehová quellufi ta Job. Pichiñma mu müten, Job rupai fentren huesaque dungu mu. Quiñe antü mu müten Job feipingei ñi hueñeñmangen ca langümcañmangen tañi pu culliñ. Huelu fei ca müten no, ca feipingei ñi lan tañi pu cüdaufe ca tañi pu yall (Job 1:13-19). Pichi rupalu, petu hueñancülelu ta Job, contupaeyu quiñe huesa cutran (Job 2:7). Fente tañi huesa rupamequen ta Job, ayühuelafui tañi mongeleal (Job 7:16).
Jehová feipifi ta Job ñi cüme cuidaquefiel tañi deumael. Femngechi Job doi maneluhui Jehová tañi piuqueyequeteu ca tañi cuidayaeteu (Inaduamnge parrafo 10).
10. ¿Chumi Jehová tañi quelluabel Job tañi nehuenduamtuabel ñi hueyaque upan? (Pebinge adentun unen pagina mu).
10 Chau Jehová quimniefui com ñi rupan ta Job. Fei fente tañi piuqueyefiel mu, quellufi tañi nehuencüleal ca ñi püntüunoal ta quisu mu. ¿Chem femi Jehová? Jehová nütramcafi ta Job, feipifi fente ñi quimün-ngen ca ñi cuidaquefiel com tañi deumael. Nütramcafi afmatufal culliñ mu (Job 38:1, 2; 39:9, 13, 19, 27; 40:15; 41:1, 2). Jehová ca adniefi quiñe hueche huentru, Elihú pingelu, ñi yafültucuafiel ta Job. Elihú feipifi ta Job Jehová rumel cümelcaquefi tañi pu che nehuencülelu rupan mu huesaque dungu. Jehová ñi duam mu, Elihú ca ngülamtufi ta Job, quellufi ñi raquiduamcülehuenoal quisu mu müten. Cafei quellufi ñi raquiduamal Chau Jehová ñi doi alüpüralen iñchiñ mu (Job 37:14). Jehová ca feipifi ta Job ñi ngillatual tañi cüla culpachi pu hueni mu (Job 42:8-10). Famülque mu, rupan mu huesaque dungu mu, ¿chumngechi quelluqueiñmu Jehová?
11. Upaleliiñ hueyaque dungu, ¿chumngechi Biblia nehuentueiñmu?
11 Jehová dungunacümpaquelaeiñmu chumngechi ñi nütramcafiel ta Job, huelu Biblia mu dunguqueiñmu reque (Rom. 15:4). Eluqueiñmu maneluhun, fei tüfa yafültucuqueiñmu. Fei rupaliyiñ huesaque dungu mu, ¿chumngechi yafültucuafeiñmu Biblia ñi feipin? Peafiyiñ. Biblia mu, Jehová feipiqueiñmu chem no rume catrütulayafeyu taiñ piuqueyeaeteu (Rom. 8:38, 39). Chau Jehová ca feipieiñmu quisu fülmaniefi com tañi pu llellipuqueteu (Sal. 145:18). Jehová ca feipieiñmu maneluuliyiñ quisu meu, chaftuafuiñ chem huesa dungu rume ca ayüucüleafuiñ cütu cutrancauliyiñ rume (1 Cor. 10:13; Sant. 1:2, 12). Biblia ca feipi com ti huesaque dungu taiñ rupamequen famülque mu pichiñmayai müten, ¿chumngelu? Ti huesaque dungu trürümfalngelai com ti cümeque dungu taiñ eluaeteu Chau Jehová pichiñma mu (2 Cor. 4:16-18). Biblia ca feipicünueiñmu Chau Jehová apümcayafi ta Huecüfü ca tañi pu inayentuqueteu. Fei engün mu tripaquei com huesaque dungu (Sal. 37:10). ¿Loncontucunieimi cai quiñeque troquiñ Biblia tami quelluaeteu rupalmi huesaque dungu mu?
12. ¿Chem ayüni Jehová taiñ bemal?
12 Chau Jehová ayüquei taiñ cüme papeltuafiel ta Biblia ca taiñ raquiduamal taiñ papeltuel mu. Ca mülefui taiñ cüme inayafiel taiñ quimürpuel, femngechi doi feyentuleaiñ Chau Jehová mu ca doi fülconaiñ quisu mu. Femngechi femliyiñ, nehuencüleaiñ rupaliyiñ huesaque dungu mu. Jehová ca eluquefi tañi nehuen tati pu maneluulu Biblia ñi feipin mu. Feitachi nehuen quelluafeiñmu taiñ chaftuafiel chem huesaque dungu rume (2 Cor. 4:7-10).
13. Quimche cüdaube manelbalngelu taiñ eluetu, ¿chumngechi nehuenduamtueiñmu?
13 Jehová ñi quellun mu, ti quim manelfal cona deumaquei fillque publicacion, video ca ülcantun. Com tüfa quelluqueiñmu taiñ doi feyentuleal Chau Jehová mu ca taiñ doi fülconcüleal quisu meu (Mat. 24:45). Mülei taiñ falintuafiel com feitachi dungu. Quiñe lamngen, Estados Unidos mu mülelu, rume mañumcülei com tañi eluqueteu Jehová. Feitachi lamngen fentren huesaque dungu rupai. Quiñe rupa quiñe ngollilechi che chocañmaeyu tañi abuelo ca langümüñmaeyu. Tañi chau ca tañi ñuque contueyu quiñe huesa cutran, fei mür laingu. Ca feitachi lamngen epu rupa cancer cutran niefui. Taiñ lamngen 40 tripantu yeniei tañi serfifiel Jehová, fei com feitachi dungu famentuafeyu Jehová mu. Huelu femlai, püntütripalai Jehová mu. ¿Chem quellueyu? Taiñ lamngen feipi: “Chau Jehová rumel cuidaqueneu. Com tañi eluqueteu mu tati quim manelfal cona mu quelluqueneu tañi nehuencüleal. Feimu raquiduamquen Job reque, quisu feipi: ‘Lali rume, elcünulayan ñi nor piuquengen’” (Job 27:5).
¿Chumafuiñ taiñ quelluafiel ta caquelu trahunche mu? (Inaduamnge parrafo 14).
14. Upaleliiñ hueyaque dungu, ¿chumngechi Jehová ngüyulabüi taiñ pu peñi ca lamngen taiñ quelluatu? (1 Tesalonicenses 4:9).
14 Jehová enseñalquefi tañi pu che tañi piuqueyehual ca tañi huelucontu yafüluhual rupan mu huesaque dungu engün (2 Cor. 1:3, 4; papeltunge 1 Tesalonicenses 4:9). Elihú chumngechi ñi quellufiel ta Job, ca femngechi taiñ pu peñi ca pu lamngen quelluqueiñmu iñchiñ taiñ püntütripanoal Jehová mu rupaliyiñ huesaque dungu mu (Hech. 14:22). Peaiñ ñi rupan quiñe lamngen Diane pingelu. Tañi huentru contueyu quiñe huesa cutran, fei ti trahunche quellufi ta Diane ñi fülconcüleal ta Chau Jehová mu. Quisu feipi: “Rume huesa dungu mu rupafuyu, huelu müna quellueiñmu ta Jehová. Mafültucupaeiñmu reque tañi lipang mu ta Jehová. Ca ti trahunche rume quellueiñmu. Taiñ pu lamngen pemequeiñmu taiñ ruca mu, mütrümqueiñmu ca mafülcaqueiñmu. Com taiñ femeteu taiñ pu lamngen, quellueiñmu taiñ nehuentuleal. Quim manejanolu am iñche, feimu pu lamngen yequeneu ta trahun mu ca amuldungun mu” pi taiñ lamngen. Pu peñi ca pu lamngen quelluchequelu ca piuqueyechefengelu rume mañumfalingün.
MAÑUMCÜLIIÑ JEHOVÁ TAIÑ CUÑIUTUETU PIUQUEYEN MU
15. ¿Chemu quimniiñ taiñ nehuenduamtuabel pu hueyaque dungu?
15 Com iñchiñ rupayafuiñ huesaque dungu mu. Huelu quisulelaiñ tati. Quiñe cüme chau reque, Jehová pequeiñmu chem dungu mu taiñ rupaquen. Quisu fülmanieiñmu, feimu eluucülei taiñ allcütuaeteu ca taiñ quelluaeteu (Is. 43:2). Jehová elueiñmu com taiñ duamnieel taiñ nehuencüleal. Elueiñmu taiñ llellipuafiel, tati Biblia, fentren publicacion ca video, ca elueiñmu taiñ pu peñi ca pu lamngen. Com tüfa quelluafeiñmu taiñ cüme chaftuafiel chem huesa dungu rume.
16. ¿Chumaiñ taiñ llohual Jehová tañi cuñiutun?
16 Müna mañumcüleiñ taiñ cuidaqueteu mu taiñ Huenu Chau. Rume “ayüucülei taiñ piuque” taiñ Chau Ngünechen mu (Sal. 33:21). Allmalltuliyiñ com taiñ eluqueteu Jehová taiñ cuidayaeteu, femngechi pengelelafiyiñ taiñ falintufiel. Huelu, ¿ca chumafuiñ taiñ cuidanierpuaeteu Jehová? Iñchiñ feyentuliyiñ com taiñ feipicünueteu Jehová ca cüme femliyiñ quisu tañi adquiñ mu, femngechi rumel cuidanieaiñmu (1 Ped. 3:12).
ÜLCATUN 30 Ñi Ngünechen, ñi cüme Chau ca tañi Hueni
a Taiñ chaftuafiel com huesaque dungu taiñ rupamequen duamnieiñ taiñ quelluaeteu Jehová. Tüfachi troquiñ mu peaiñ Jehová cuidaquefi tañi pu che. Quisu quimniei taiñ rupaquen caque quiñeque iñchiñ, ca eluqueiñmu com taiñ duamnieel taiñ nehuencüleal.
b Tüfachi troquiñ mu, ca üi tuculelngei ta quiñeque che.