1. Yabcalu Adán ca Eva engu, ¿chumi Jehová? (Génesis 3:15).

 CULPALU Adán Eva engu, pichin tiempo rupai, fei Jehová feipicünui chem ñi huirintuculen Génesis 3:15. Tüfa elufi maneluhun ta Adán ca Eva ñi pu cüpanche (papeltunge Génesis 3:15).

2. Génesis 3:15 tañi eipin, ¿chemu amatuqueiñmu?

² Tüfachi profecia mülei tati hunen lifru Biblia mu, huelu nüucülei com caquelu lifru mu. Génesis 3:15 quiñe def reque nüniefi ti Biblia quiñe quimeltun mu. ¿Chem quimeltun am? Ñi cüpayal quiñe Montulchefe, fei apümcangeai ta Huecüfü ca tati huesaque che. b Com tati piuqueyeniefilu ta Jehová cümeque dungu llohuaingün.

3. ¿Chem dungu mu ngütramcaaiñ?

³ Tüfachi troquiñ mu inaduamaiñ cüla dungu ñi mülen Génesis 3:15 mu: ¿inei engün am coneltulei tüfachi profecia mu? ¿Chumngechi femtripaquei ti profecia? Ca, ¿chumngechi quelluafeiñmeu?

4. ¿Iñi am tati bilu ca chumngechi quimabüiñ?

⁴ Génesis 3:14, 15 pengeli quiñe filu ca quiñe “domo”. Ca mülei ti filu ñi cüpanche ca tati “domo ñi cüpanche”. Biblia quimeltui inei am engün. c ¿Inei am tati filu? Quiñe rüf filu adümlayafui Jehová ñi feipin Edén lof mu. Huelu Apocalipsis 12:9 pengeli ñi ineingen tüfachi filu. Feipilei tati “fütra filu” fei ta Satanás chi Huecüfü. Huelu, ¿inei am ti filu ñi cüpanche?

5. ¿Iñi engün am tati bilu tañi eluupachi che?

⁵ Biblia feipilu cüpanche, quiñeque mu adentulei quiñe che cüme inayentuquefilu ta cangelu che, feimu tañi yall pingeafui. Fei tati filu ñi cüpanche coneltulei pu huesaque che ca pu huesaque püllü, tüfa engün catrütuquefi Chau Jehová ca tañi pu che. Femngechi inaniefingün ca chauyefingün reque ta Huecüfü. Feichi huesaque püllü mu ca coneltulepelai tati pu püntüulu Chau Dios mu Noé tañi antü meu (Gén. 6:1, 2; Juan 8:44; 1 Juan 5:19; Jud 6).

6. “Tati domüche” mülelu Génesis 3:15 mu Eva ngelai, ¿chemu?

⁶ ¿Inei am tati “domo”? Eva no tati. ¿Chumngelu? Ti texto feipi tati domo ñi cüpanche ‘pünonacümafi’ tati filu ñi lonco. Huelu quiñe che Eva mu cüpalu, ¿femafui tüfa? Femlayafui, quiñe püllüngelu cai ta Huecüfü. Fei, ¿inei apümcayafi ta Huecüfü?

7. Apocalipsis 12:1, 2, 5, 10 tañi eipin, ¿chumngechi pengeli iñingen tati domüche mülelu Génesis 3:15 mu?

 ⁷ Apocalipsis pengeli inei am tati domo (papeltunge Apocalipsis 12:1, 2, 5, 10). Tüfachi domo mapu tuhun-ngelai. Biblia feipi tañi miñche namun meu nierquei ti cüyen. Lonco mu yeniei quiñe corona 12 huangülen nielu. Choyüfi reque quiñe püñeñ. ¿Chem adentulei chi püñeñ? Chau Dios tañi Gobierno, tüfa huenu mu mülei, feimu ti domo cafei mülei ti huenu mu. Fei, ¿chem adentulei ti domo? Pu cümeque püllü poyeniefilu ta Chau Jehová huenu mu (Gál. 4:26).

8. Tati domüche tañi eluupachi che, ¿iñi am doi manelbali ca chumül doi manelbalngepoi? (Génesis 22:15-18).

⁸ Biblia pengeli inei am ta hunelei tati domo ñi cüpanche meu. Tüfa mülefui ñi cüpayal Abrahán mu (papeltunge Génesis 22:15-18). Jesús llemai cüpai Abrahán mu (Luc. 3:23, 34). Huelu quiñe huentru müten apümcalayafui ta Huecüfü. Feimu epe 30 tripantu nielu Jesús dullingei Chau Dios ñi nehuen meu, femngechi hunelerpui tati domo ñi cüpanche meu (Gál. 3:16). Jesús huiñomongetulu, Chau Dios elueyu ñi püramyengeal ca ñi saquingeal. Cafei elfalcünungei com ñi mülen ta huenu ca nag mapu mu. Ca elungei ñi apümcayafiel chem ñi femün ti Huecüfü (Heb. 2:7; Mat. 28:18; 1 Juan 3:8).

9, 10. 1) ¿Iñi engün deyüconcüli tati domüche tañi eluupachi che mu ca chumül deyüconcülepoingün? 2) ¿Chem ngütramcaaiñ beula?

⁹ ¿Ca inei coneltulei ti domo ñi cüpanche? Ti apostol Pablo feipi ineingen engün. Fei feipifi pu dullin cristiano judio che ca judiongenolu: “Tamün inaniefiel ta Cristo, Abrahán ñi cüpanchengeimün. Feimu llohuaimün chem ñi feipicünungeel ta Abrahán” (Gál. 3:28, 29, TNM). Jehová tañi nehuen meu dullifiel mu quiñe cristiano, fei hula coneltuquei tati domo ñi cüpanche mu. Fei Jesús ca ti 144.000 che coneltulei ti domo ñi cüpanche mu (Apoc. 14:1). Com engün inayentuquefingün tañi Chau Jehová ñi femün ca ñi raquiduam.

¹⁰ Tüfa hula quimnieiñ inei ñi coneltulen Génesis 3:15 mu. Feula inaduamaiñ chumngechi ñi femtripan Jehová ñi feipicünuel ca chumngechi taiñ quellunieteu.

11. Tati domüche tañi eluupachi che, ¿chumngechi allbeñmangi “trüncoi namun” mu?

¹¹ Génesis 3:15 mu feipicünui tati filu ñi allfülmayafiel ti rüncoi namun tati domo ñi cüpanche. ¿Chumül femtripai tüfa? Tati Huecüfü ngüchaltucufilu tati judio che ca Roma che ñi langümafiel ta Jesús (Luc. 23:13, 20-24). Quiñe che allfüle tañi namun, pichiñma mu cüdaulayafui. Ca femngechi rupai Jesús, lalu pichiñma mu pepi cüdaulafui (Mat. 16:21).

12. Tati bilu tañi lonco, ¿chumngechi pünongeai ca chumül bemngeai?

¹² Génesis 3:15 mu pengeli Jesús pichiñma mu ñi huiñomongetual, femngechi ñi pünonacümafiel ti filu ñi lonco. Feimu cüla antü mu Jesús huiñomongetui püllüngetual rumel huenu mu. Acule chi antü Jehová ñi pin,  Jesús apümcayafi ta Huecüfü (Heb. 2:14). Jesús ca pu 144.000 apümcayafi tati filu ñi cüpanche, fei tüfa Chau Ngünechen tañi pu caiñe (Apoc. 17:14; 20:4, 10). d

13. Tübachi pelon dungu tañi mupiltripal, ¿chumngechi cümelcaqueiñmu?

¹³ Tüfachi profecia cümelcaquefi Jehová tañi pu che. Jesús cüpalu mapu mu cüme inayentufi tañi chau com dungu mu (Juan 14:9). Feimu Jesús tañi femün mu quimfiyiñ ca piuqueyefiyiñ ta Chau Jehová. Cafei cümelcaqueiñmu Jesús tañi quimeltun ca ñi adniefiel ti trahunche. Jesús quimeltueiñmu chumngechi taiñ ayühuelafiel ta Jehová. Jesús tañi lan ca cümelcaqueiñmu. Huiñomongetulu, huli tañi falin mollfüñ Chau Jehová ñi adquiñ meu, femngechi ñi liftuñmayal com taiñ culpan (1 Juan 1:7).

14. Tübachi pelon dungu com trür mupiltripalai, ¿chemu eipiabüiñ tüba?

¹⁴ Chau Jehová ñi feipicünuel tüfachi profecia mu mülelai com trür ñi tripayal. Alüñmayafui ti domo ñi nieal tañi cüpanche ca ti Huecüfü ñi quintual tañi pu che. Ca femngechi alüñmayafui ñi caiñetuhual tüfachi epu troquiñche. Tüfachi profecia ngüfetumequeiñmu chumngechi taiñ caiñetuaeteu Huecüfü ñi pu che. Ca femngechi Jesús ngüfetufi tañi pu che (Mar. 13:13; Juan 17:14). Iñchiñ peiñ chumngechi ñi femtripan tüfachi profecia, doyelchi mai rupan mu pataca tripantu.

15. 1) ¿Chemu caiñetungiiñ bachantü? 2) ¿Chemu llücalaabiiñ Satanás?

¹⁵ Jesús eluulu ñi ngünenieal 1914 tripantu mu, pichi rupalu huenu mu huemünentufi ta Huecüfü. Huecüfü femngelu, mapu mu miyahui, üngümniei müten tañi apümcangeal (Apoc. 12:9, 12). Huelu quisu anülelai müten, rume illculei, quehuatumequefi Chau Jehová tañi pu che (Apoc. 12:13, 17). Feimu lle Huecüfü ñi pu che doyelchi mai caiñetunieiñmu ca inantucunieiñmeu. Huelu llicaquelaiñ, apostol Pablo reque maneluucüleiñ. Quisu huirintucui: “Ngünechen mülele iñchiñ meu, ¿fei inei am caiñetuaiñmeu?” (Rom. 8:31). Epe com ñi feipin Génesis 3:15 femtripai, feimu lle maneluucüleiñ Chau Jehová mu.

16-18. Curtis, Ursula ca Jessica, ¿chumngechi quellueyu (incaeyu) Génesis 3:15?

¹⁶ Jehová ñi feipicünuel Génesis 3:15 mu quelluafeiñmu taiñ chaftual huesaque dungu taiñ mongen mu. Curtis misionero ngei Guam mapu meu, fei feipi: “Quiñeque mu rume cüdautun tañi nor piuqueyeafiel ta Jehová. Huelu raquiduamquen ñi feipin Génesis 3:15. Tüfa quellueneu tañi maneluhual tañi Chau Jehová mu”. Curtis rume duamniei ñi puhual feichi antü Chau Jehová ñi apümcayafiel huesaque dungu.

¹⁷ Ursula pingei quiñe lamngen Bavaria mapu mu, fei feipi Génesis 3:15 ñi quellueteu ñi maneluhual Biblia ñi cüpan Ngünechen meu. Fei ngüneduami com tati profecia nüucülei Génesis 3:15 mu. Tüfa afmatuleneu pi. Quisu ca feipi: “Jehová pürüm müten eluhui ñi cüme elcünutuafiel chi dungu, femngechi  com pu che ñi nieal maneluhun. Tüfa puhui ñi piuque mu”.

¹⁸ Taiñ lamngen Jessica, Micronesia mapu mu, feipi: “Petu acordanien quimlu iñche Biblia ñi rüf dungu Génesis 3:15 femtripamequei. Fei quimtucun Chau Jehová ayülafui ñi huesa feleal tati pu che mapu meu. Tüfachi profecia rume yafültucueneu tañi cüdahuelafiel ta Jehová com tañi nehuen meu. Tüfa rüf cümelcayaeneu feula ca cüpalechi antü meu”.

19. ¿Chemu maneluhuabüiñ tübachi pelon dungu tañi com mupiltripaal mu?

¹⁹ Génesis 3:15 femngechi tripamequei. Quimtucuiñ ineingen ti domo ñi cüpanche ca tati filu ñi cüpanche. Jesús hunelei tati domo ñi cüpanche ca deu tremotui tañi allfeñ rüncoi namun meu. Feimu lle, feula quiñe nehuen-ngechi reyngetui huenu mu. Jehová deu dulli epe com pu 144.000 che ngüneniealu Jesús engu huenu meu. Ti hunen troquiñ ti profecia mu deu femtripai. Feimu lle, maneluucüleiñ ñi pünonacümngeal ti filu ñi lonco. Jehová ñi pu che rume ayüucüleaingün apümcangele ta Huecüfü. Petu ñi acunon feichi antü nehuentuleaiñ. Rüf maneluucüleiñ Jehová mu. Ti domo ñi cüpanche mu, Chau Dios cümelcayafi com tati pu che mapu meu (Gén. 22:18).