1, 2. 1) ¿Chem peaiñ tübachi quimelün mu? 2) ¿Chumngechi quimniiñ Jehová ayüqui taiñ quelluetu (incaetu)?

 RUPALIYIÑ huesaque dungu mu, Jehová quelluafeiñmu taiñ aguantayal ca taiñ ayühunquechi serfinieafiel. Tüfachi chillcatun mu peaiñ chumngechi quelluqueiñmu Jehová ca chumafuiñ iñchiñ taiñ quelluaeteu. Huelu hune peaiñ ¿rüf eluucülepei mai Jehová taiñ quelluaeteu?

² Taiñ quimal ngüneduamaiñ ñi feipin ti apostol Pablo. Feipi: “Chau Jehová quelluqueneu. Llicalayan. ¿Chumafeneu cai tati che?” (Heb. 13:6). Quiñeque lifru pengelquei tüfa ñi feipin Pablo raquiduamelafeiñmu quiñe che mu lefquelu tañi quellucheal. Inei rume huirarhuirarngele ñi quellungeal, feitachi che pürüm eluuquei ñi quelluafiel. Raquiduamnge tüfa, Jehová leflefngei ñi quellunieafiel quiñe che duamnielu ñi quellungeal, feita pengeleleiñmu chumngechi Jehová com piuque mu ayüniei taiñ quelluaeteu. Jehová am fülmanieteu iñchiñ, feimu ayüucüleafuiñ rupaliyiñ rume huesaque dungu mu.

3. ¿Chem cüla dungu mu Jehová quellueiñmu taiñ nehuenduamcüleal ayühun mu?

 ³ ¿Chumngechi quelluqueiñmu Jehová taiñ ayüucüleal rupan mu huesaque dungu mu? Taiñ quimal, ngüneduamaiñ ñi feipin ti lifru Isaías. Fentren profecia ñi huirintucuel Isaías pengelquei ñi rupamequen Jehová ñi pu che famülque mu. Ca femngechi ñi feipin Isaías quimeltuqueiñmu falinque dungu Jehová mu. Capitulo 30 mu, Isaías pengeli Jehová chumngechi ñi quelluquefiel tañi pu che: 1) cüme allcütuqueiñmu llellipufiliyiñ, 2) cüme quimeltuqueiñmu, ca 3) cümelcaqueiñmu fachantü ca cüpalechi antü meu. Peaiñ feitachi cüla dungu.

4. 1) ¿Chem eipi Jehová pu judio che Isaías tañi antü mu, ca chem upaingün? 2) ¿Chem maneluhun elubi Jehová pu mupitulechi judio che? (Isaías 30:18, 19).

⁴ Isaías capitulo 30 mu, Jehová feipifi pu judio ñi trencül piuquengen engün ca ñi rume huesa culpaquen engün. Ca feipi feitachi troquiñche ‘feyentuquelai ca piquelai ñi allcütuafiel Jehová ñi ley dungu’ (Is. 30:1, 9). Tañi feyentunon mu engün, feimu Isaías feipi ñi rupayal huesaque dungu mu engün (Is. 30:5, 17; Jer. 25:8-11). Femngechi tripai, pu Babilonia che yetueyu engün. Huelu ca mülequefui quiñeque judio feyentuquelu, ¿maneluucülepeafuingün mai? Femafuingün llemai. Isaías feipi quiñe antü ñi huiñotual engün Jerusalén mu, Jehová ñi pin mu (papeltunge Isaías 30:18, 19). Com feitachi dungu huechurpui, Jehová entutueyu engün Babilonia mu ñi huiñotual tañi mapu mu. Huelu Biblia feipi Jehová ñochi duam mu üngümcülei tamün füreneaeteu. Tüfa pengeli ñi rupayal quiñeque tripantu ñi lifrecünungeal pu judio. Femngechi dungu rupai, 70 tripantu rupai ñi lifrecünungetual Babilonia mu (Is. 10:21; Jer. 29:10). Femngechi huiñotulu tañi mapu mu, hueñancülehuetulaingün, doi mai ayüucületuingün.

5. ¿Chem eipicünoiñmu Isaías 30:19?

⁵ Biblia feipi: “Huirarülmi tami quellungeal, fei quisu quelluaimu llemai” (Is. 30:19). Feitachi dungu ñi feipin Isaías müna yafültucuqueiñmu. Duamliyiñ taiñ quellungeal, Jehová pürüm allcütuaiñmu ca quelluaiñmu. Huelu ca dungu mülei, Isaías feipi: “Allcüelmu müten huiñoldunguaimu”. Felei llemai, Chau Jehová rüf piuque mu allcütuñmaqueiñmu taiñ llellipun ca rume ayüquei taiñ quelluaeteu. Quimün mu tüfa, ayüucüleafuiñ rupan mu rume huesaque dungu mu.

6. Jehová allcütuqui tañi pu che ñi ngillatun, ¿chumngechi pengeli tüba Isaías?

⁶ ¿Ca chem enseñalqueiñmu ñi feipin Isaías? Jehová caque quiñeque iñchiñ allcütuñmaqueiñmu taiñ llellipun. ¿Chumngechi quimiyiñ tüfa? Isaías capitulo 30 mu, Jehová dungufi com ti Israel troquiñche. Huelu versiculo 19 mu, dungufi caque quiñeque engün. Isaías feipi: “Eimi ngümahuelayaimi”, “quisu quelluaimu llemai”, ca“huiñoldunguaimu”. Quiñe cüme chau hueñancülele quiñe tañi fotüm, feipilayafi: “Hueñancülequilnge, tami peñi reque trüraimi” pilayafi. Jehová ca femlayafeiñmu, caque quiñeque iñchiñ cuidaqueiñmu ca allcütuqueiñmu (Sal. 116:1; Is. 57:15).

7. Müna balin-ngi bill antü mu ngillatual, ¿chumngechi pengeli tüba Isaías ca Jesús?

 ⁷ Llellipufiliyiñ Jehová ca feipifiliyiñ taiñ fill raquiduamcülen, quisu eluaiñmu nehuen taiñ aguantayal. Huelu rupanole ti huesa dungu, fentecünulayaiñ taiñ ngillatuafiel ta Jehová taiñ nehuentucuaeteu. Femngechi feipieiñmu Isaías taiñ femal, quisu feipi: “Ngillatunieafimün quisu” (Is. 62:7). ¿Chem quimeltueiñmu tüfa? Fente taiñ ngillatufiel ta Jehová cansatul-layafiyiñ, ngillatunieafiyiñ müten. Jesús ca femngechi feipieiñmu taiñ ngillatuleal müten, entui quiñeque nütram taiñ quimeltuaeteu tüfa (Luc. 11:8-10, 13). Ca pediafuiñ taiñ cüme adnieaeteu taiñ cüme femal.

8. ¿Chumngechi bemtripai Isaías 30:20, 21 tañi eipin?

⁸ (Papeltunge Isaías 30:20, 21). Pu Babilonia che hualloñmafilu Jerusalén huaria doi quiñe tripantu, müna cutrancahuingün pu judio. Huelu versiculo 20 ca 21 pengeli pu judio repentiutufule ca cüme elcünutufule ñi huesa femün, Jehová feipieyu ñi montulaeteu engün. Isaías feipi ta Jehová ñi ‘Fütra Quimeltuchefe ngen’, ca feipi quisu quimeltuafi tañi pu che chumngechi ñi poyeaeteu. Feitachi dungu huechurpui. Jehová lifrecünufi pu judio Babilonia mu, quimfalcünui ñi Fütra Quimeltuchefe ngen. Ca quisu ñi quellun mu, pu judio cüme poyetufingün ta Jehová. Fachantü ca Jehová enseñalqueiñmu, fei ayühuelqueiñmu.

9. Taiñ antü mu, ¿chumngechi Jehová quimeleleiñmu?

⁹ Jehová femquei epu dungu taiñ quimeltuaeteu, ¿chem dungu? Hunelu mu, Isaías feipi: “Quisu tami nge mu peafimi tami Fütra Quimeltuchefe”. Ñi feipin mu Isaías, iñchiñ estudiante reque feleiñ. Jehová puñmanieiñmu taiñ quimeltuaeteu. ¿Chumngechi quimeltuqueiñmu Jehová? Tañi troquiñche mu quimeltuqueiñmu, taiñ trahun mu ca fütraque trahun mu ngülamtungequeiñ. Ca femngechi hulngequei publicacion, video ca caquelu quellu, femngechi chaftuafuiñ huesaque dungu ayühun mu. Mañumcüleiñ Jehová taiñ quimeltuqueteu mu.

10. ¿Chumngechi allcütuiñ Jehová tañi eipin iñchiñ mu?

¹⁰ ¿Ca chumngechi quimeltuqueiñmu Jehová? Isaías feipi: “Tamün pilun allcüai quiñe dungun tamün furi  püle”. ¿Chem raquiduameleiñmu ñi feipin Isaías? Jehová inanieiñmu, feipiqueiñmu chem rüpü taiñ miyahual. Fachantü, ¿chumngechi allcüñmaquefiyiñ Dios ñi dungun furi püle? Biblia meu. Biblia cuifi mu huirintucungei, feimu papeltufiliyiñ allcütuafuiñ quisu ñi dungun furi püle (Is. 51:4).

11. ¿Chumaiñ taiñ nehuenduamcüleal ayühun mu, ca chemu?

¹¹ Jehová quimeltuqueiñmu tañi troquiñche mu ca Biblia mu. Fei, ¿chem mülei taiñ femal iñchiñ? Isaías feipi: “Tüfa tati rüpü. Amumün tüfa püle” (Is. 30:21). Feimu quimlayafiyiñ müten tati rüpü, miyahuaiñ fei mu. Com taiñ quimeltuqueteu mu Jehová quimürpuqueiñ chem dungu ñi ayüqueel, fei taiñ inayafiel. Femliyiñ feitachi dungu, ayühunquechi serfiafiyiñ Jehová rupaliyiñ rume huesaque dungu mu, ca Jehová cümelcayaiñmu.

12. Isaías 30:23-26, tañi eipin ¿chumngechi Jehová cümelcaabi tañi pu che?

¹² (Papeltunge Isaías 30:23-26). Cuifi mu, ¿chumngechi huechurpui feitachi dungu ñi feipiel Isaías? Pu judio huiñotulu Jerusalén mu, rume cümelcaeyu ta Jehová. Jehová fentren iyael elufi engün ca quellufi ñi fülconcüleal quisu meu ca ñi cüme poyeaeteu. Feichi mu, pu Israel che turpu femngechi cümelcangequelafuingün, ca femngechi Jehová cüdetufi reque engün tañi doi cüme quimal tañi dungu (Is. 60:2). Femngechi Jehová ñi pu che ayüucülefuingün ca nehuencünuuquefuingün tañi poyeafiel (Is. 65:14).

13. ¿Chumngechi bemtripai Isaías tañi pelon dungu taiñ antü mu?

¹³ Isaías ñi feipin ñi cüme poyengetual ta Jehová, ¿huechurpumequepei mai taiñ mülen antü mu? Femi llemai, ¿chumngechi? 1919 tripantu ca fantepu mu, fentren che coneltulehuelai coilaque religion mu, Babilonia la Grande pingelu. Quisu engün doi cüme feletuingün tati pu Israel che tripafulu Babilonia mu ca quiñehun mu poyequefingün ta Jehová (Is. 51:3; 66:8).

14. ¿Chem am tati rüb huenupüramquebel, ca taiñ antü mu iñi engün am mongelingün tüba mu? (Pebinge quimal dungu).

¹⁴ Feichi 1919 ca fantepu mu, pu dullinque cristiano quiñentrür ayühunquechi poyequefingün Jehová. Rupachi  antü mu, pu che mülealu mapu mu, tüfa tati “caquelu ufisa”, quiñehuingün pu dullinque cristiano engün ñi poyeafiel Jehová. Cafei trür quellungequeingün ñi fülmaucüleal Jehová mu ca inaquelafingün coilaque quimeltun. Ca nieingün quiñe ayüfal cüdau tañi ayühuelqueteu engün: tañi amuldungual ti cümeque dungu. Com trür cüme hueniyequefiyiñ Jehová, cafei com iñchiñ cüme yeuqueiñ taiñ pu peñi ca pu lamngen iñchiñ. Quisu engün quelluqueiñmu taiñ ayühunquechi chaftuafiel huesaque dungu. Llouqueiñ com feitachi cümeque dungu taiñ poyeniefiel mu Jehová ca taiñ inayentuniefiel mu (Juan 10:16; Is. 25:6; 65:13).

15. ¿Cheu rüb huenupüramabüiñ Jehová?

¹⁵ Famülque mu, com mapu mu müleyei poyequefilu Jehová. Feimu cheu rume müleliyiñ, poyeafuiñ ta Jehová. Femngechi quiñeucüleaiñ taiñ pu peñi ca pu lamngen huall mapu mu ca rume cümelcan llohuaiñ.

16. ¿Chumaiñ taiñ balintobel taiñ pu peñi ca lamngen huall mapu mu?

¹⁶ Mülei taiñ falintuafiel Jehová ñi troquiñche huall mapu mu femngechi taiñ quiñeucüleal. ¿Chumngechi femafuiñ? Inaduamüñmalayafiyiñ tañi huelulcaquen engün, huelu mai tañi cüme femquen engün (Juan 17:20, 21). ¿Chemu fente falin-ngei taiñ femal? Raquiduamnge feita mu. Mahuida mu fentrenque anümca mülei, caquerumei. Ca femngechi trahunche mu, ca caquerumei taiñ pu peñi ca pu lamngen (Is. 44:4; 61:3). Quiñeque anümca ancülei chi, tapülngehuelai. Huelu fei müten inaduamfiliyiñ, pelayafuiñ ñi fente cüme adcülen ti mahuida. Ca femngechi re inaduamüñmafiliyiñ taiñ pu peñi ca pu lamngen ñi huelulcan, pelayafuiñ ñi fente quiñeucülen Jehová ñi troquiñche huall mapu mu.

17. ¿Chumaiñ epuñpüle taiñ quiñeucüleal taiñ trahunche?

¹⁷ ¿Chumafuiñ ñi quiñeucüleal ti trahunche? Eluucüleaiñ taiñ cümelcaucüleal pu peñi ca pu lamngen iñchiñ  (Mat. 5:9; Rom. 12:18). Iñchiñ quimnieiñ Jehová ñi cüpalfiel com feitachi che mülelu ti trahunche mu (Juan 6:44). Jehová rume falintuquefi ñi quiñeucüleal tañi pu che. Feimu eluucüleliyiñ taiñ cümelcaucüleal taiñ pu peñi ca pu lamngen iñchiñ, ¿ayüucülenoafulu ta Jehová? (Is. 26:3; Ageo 2:7).

18. ¿Chem dungu mu ngüneduamaiñ, ca chemu?

¹⁸ Jehová eluquefi tañi pu che fentren cümeque dungu, fei ¿chem mülei taiñ femal iñchiñ? Papeltuafiyiñ ta Biblia ca taiñ fillque publicacion, fei cüme raquiduamaiñ taiñ quimürpuel. Femliyiñ doi cüme cristianongeaiñ ca pengelaiñ taiñ hueluconque piuqueyehun (Rom. 12:10). Raquiduamün mu com tati cümeque dungu taiñ elueteu Jehová, doi hueniyeafiyiñ. Ca raquiduamliyiñ taiñ cümelcayaeteu cüpalechi antü mu, doi maneluucüleaiñ, feimu ayühunquechi serfinieafiyiñ ta Jehová.

19. 1) Isaías 30:18 tañi eipin, ¿chem cüme quimniiñ? 2) ¿Chem quellueiñmu taiñ nehuenduamcüleal ayühun mu?

¹⁹ Jehová huitrapürayai taiñ quelluaeteu, fei apümcayafi com huesaque dungu mapu meu. “Nor Ngünechen ngelu am” Jehová eluhuelayafi ta Huecüfü ñi ngünenieafiel mapu (Is. 30:18; 25:9). Jehová ca iñchiñ esperaniefiyiñ ñi ngehuenoal huesaque dungu. Esperanieliyiñ, ngillatuafiyiñ ta Jehová, papeltuafiyiñ Biblia ca inayafiyiñ ñi feipin, ca raquiduamaiñ com tati cümeque dungu taiñ eluqueteu ta Jehová. Femliyiñ Jehová quelluaiñmu taiñ aguantayal ca taiñ ayühunquechi serfinieafiel.