1. Nor ca cüme raquiduam yeneal, ¿chem am chi? (2 Timoteo 4:5).

 IÑCHIÑ ayülaiñ taiñ püntütripayal Jehová mu ca tañi troquiñche mu. Huelu rupayafuiñ cüdaungechi dungu mu. ¿Chem quelluafeiñmu taiñ chaftuafiel? Mülei taiñ nieal cüme raquiduam, taiñ trepeluucüleal reque ca ñi nehuentuleal taiñ feyentun (papeltunge 2 Timoteo 4:5). ¿Chem quelluaiñmu taiñ nieal cüme raquiduam? Mülei taiñ ñochi piuquengeal ca taiñ raquiduamal chumngechi ñi raquiduamquen Jehová. Femliyiñ, ngünenielayaiñmu taiñ huesa duamcülen.

2. ¿Chem ngütramcaaiñ?

² Rupachi troquiñ mu pefiyiñ cüla dungu taiñ femqueteu pu che poyequenofilu Jehová. Tüfachi troquiñ mu peafiyiñ caquelu cüdaungechi dungu rupayafui trahunche mu, femngechi cüdaungeafui taiñ püntütripanoal Jehová mu. ¿Chem dungu mu rupayafuiñ? 1) Quiñe peñi cam quiñe lamngen huesa duamelafeiñmu, 2) nehuentu norümngeafuiñ, 3) ca cüdautuafuiñ caletule ti dungu trahunche mu. ¿Chem quelluafeiñmu taiñ nieal cüme raquiduam ca taiñ püntütripanoal Jehová mu ca tañi troquiñche mu? Peafiyiñ.

3. Quiñe peñi cam lamngen hueya bemetu troquiuliiñ, ¿chem raquiduamabüiñ?

³ ¿Raquiduamqueimi quiñe peñi quiñe lamngen cam quiñe loncolelu cütu tami huesa duameleteu? Fei ayülafui  chi tami huesa duamelaeteu (Rom. 3:23; Sant. 3:2). Femfulu rume, huelu eimi rume cutrantuimi tami feipieteu, umautuhuelaimi rume chi tami fente raquiduameleteu ti dungu. Ca ramtuhuimi chi femngechi ñi femün mu ti peñi, ti lamngen, ¿tüfa mai Jehová ñi troquiñchepe? Femngechi ayülei ti Huecüfü tami femngechi raquiduamal (2 Cor. 2:11). Femngechi raquiduam nieliyiñ, püntütripayafuiñ ta Jehová mu ca tañi troquiñche mu. Feimu quiñe peñi cam quiñe lamngen huesa duameleliyiñmu, ¿chem quelluafeiñmu taiñ nieal cümeque raquiduam?

4. 1) Hueyalcangelu José, ¿chumi tañi nor ca cüme raquiduam yeneal? (Génesis 50:19-21). 2) ¿Chem quimelelqueiñmu José tañi bemün?

⁴ Rumel huesa duamcülelayaiñ. Inaduamafiyiñ ñi rupan ta José. Huechengelu José, tañi hunenque peñi rume huesa femquefeyu. Üdengequefui ca quiñeque ayülefui tañi langümaeteu (Gén. 37:4, 18-22). Ca fendeeyu engün quiñe cüdaufe reque. Müna huesa dungu mu rupai José. Mari cüla tripantu mu huesa dungu mu rupai. José raquiduami chi Jehová ñi piuqueyehuenoeteu ca ñi quisucünueteu, huelu femngechi raquiduamlai. José rumel huesa duamlai, huelu mai cümeque raquiduam niequefui ca tüngcülequefui. Quiñe rupa José huiñoleltuafui ñi huesa femeteu ñi pu peñi. Huelu femlai, pengelelfi tañi piuqueyefiel ca ñi perdonafiel engün (Gén. 45:4, 5). ¿Chumngelu femi tüfa? Fei cüme raquiduami. Müte raquiduamlai ñi huesa femngen, huelu mai doi raquiduami ñi ayünieel ta Jehová (papeltunge Génesis 50:19-21). ¿Chem quimeltueiñmu tüfa? Quiñe peñi cam quiñe lamngen huesa duameleliyiñmu, turpu illcutulayafiyiñ ta Jehová ca raquiduamlayaiñ taiñ quisucünueteu. Doi cüme raquiduamaiñ chumngechi taiñ quelluqueteu Jehová taiñ chaftuafiel ti huesa dungu ca perdonayafiyiñ inei taiñ huesa femeteu. Loncontucunieaiñ ti piuqueyechequelu rumel eluucülequei ñi perdonacheal (1 Ped. 4:8).

5. Miqueas, ¿chumi tañi nor ca cüme raquiduam yeneal?

⁵ Peaiñ ñi rupan quiñe loncolelu Miqueas pingelu. b Tüfachi peñi quiñeque loncolelu ñi huesa femeteu troquiufui. Miqueas feipi: “Tüfa rume huesa duameleneu ca rume hueñancüleneu, umautuquelafun ca ngümaquefun fente tañi hueñancülen” pi tati peñi. Taiñ peñi cümelcacünutui tañi raquiduamcülefel, fei cümeque raquiduam nierpui. ¿Chem quellueyu? Ngillatuquefui ta Jehová tañi eluaeteu ñi nehuen, femngechi tañi aguantayal ca quintuquefui chem publicacion tañi quelluafeteu. ¿Chem quimeltueiñmu ñi femün tüfachi peñi? Eimi huesa femeteu quiñe peñi cam quiñe lamngen troquihulmi, ñochi piuque mu tüngcüleaimi ca niequilnge huesaque raquiduam. Fei ti peñi cam ti lamngen huesaque dungu mu rupalefui chi, ¿feimu peno huesa duameleimu eimi? Feimu ngillatufinge ta Jehová, feipifinge tami chem raquiduamcülen ca ngillatufinge tami quelluaeteu tami raquiduamcüleal fei reque. Femülmi raquiduamaimi ti peñi cam ti lamngen ayülai tami huesa duamelaeteu, femngechi eluucüleaimi tami perdonayafiel (Prov. 19:11). Quimtucunieaimi Jehová quimniei chem dungu ñi rupalen ca eluaimu nehuen tami aguantayal (2 Crón. 16:9; Ecl. 5:8).

6. Piuqueyen mu Jehová norümtuqueiñmu, ¿chemu manelbali taiñ loncontucual tüba? (Hebreos 12:5, 6, 11).

⁶ Taiñ norümtungen mu hune huesa duamelafeiñmu chi. Huelu rume raquiduamliyiñ taiñ huesa duameleteu taiñ norümtungen, falintulayafuiñ chi ca raquiduamafuiñ iñche ngelafui tañi norümtungeal ca ngoimayafuiñ Jehová norümtuqueiñmu taiñ piuqueyenieteu (papeltunge Hebreos 12:5, 6, 11). Rume raquiduamliyiñ taiñ huesa duamcülen mu, fei Huecüfü huelulcayafeiñmu. Huecüfü ayülei taiñ famnentuñmayafiel norümtueliyiñmu Jehová ca taiñ püntütripayal quisu mu ca tañi troquiñche mu. Eimi norümtungelmi, ¿chem quelluaimu tami nieal cüme raquiduam?

7. 1) Norümtungelu ula Pedro, ¿chem elbal cüdau elueyu Jehová? (Pebinge tati adentun). 2) ¿Chem quimelelqueiñmu Pedro tañi bemün?

⁷ Lloufinge tami norümngen ca cüme elcünutuaimi tami raquiduam. Jesús fentren rupa norümtufi ta Pedro caquelu apostol ñi mülen mu (Mar. 8:33; Luc. 22:31-34). Pedro yehuei chi ñi norümtungen mu caquelu apostol ñi adquiñ mu. Femün mu rume, püntütripalai Jesús mu. Fei cüme llohui ti norümtun ca cüme elcünutui tañi raquiduam. Ñi cüme femün mu ta Pedro, Jehová elueyu cümelcan ca falinque cüdau llohui trahunche mu (Juan 21:15-17; Hech. 10:24-33; 1 Ped. 1:1). ¿Chem quimafuiñ Pedro ñi femün mu? Taiñ norümtungen mu pichi yehueafuiñ chi, huelu cüme llohuafiyiñ ti norümtun ca cüme elcünutuaiñ taiñ raquiduam. Femliyiñ, Jehová eluaiñmu falinque cüdau trahunche mu.

8, 9. Norümtungelu Bernardo, ¿chum duami? Huelu, ¿chumngechi cacünoi tañi raquiduam?

⁸ Peaiñ ñi rupan mu taiñ peñi Bernardo, Mozambique mapu mu mülelu. Fei loncolelulefui trahunche mu, huelu ñi norümtungen mu loncolehuelai trahunche mu. ¿Chum duami taiñ peñi? Fei ayülafi ti norümtun, feimu huesa duamcülefui. Fei raquiduamcülefui chem dungu tañi raquiduamal ti trahunche. Taiñ peñi feipi: “Cüdautun tañi cüme llohuafiel tañi norümtungen.  Rupalechi cüyen mu, cacünutun tañi raquiduam. Cüme lloufiñ tañi norümtungen, maneluutun Jehová mu ca tañi troquiñche mu”. ¿Chem quellueyu Bernardo ñi cüme raquiduamtual?

⁹ Quisu feipi: “Cuifi loncolelungelu iñche trahunche mu, pengelelquefiñ pu peñi ca pu lamngen Hebreos 12:7, femngechi ñi cüme llohual engün norümtungele. Fei raquiduamün iñche ca mülei ñi inayafiel feitachi ngülam”. ¿Ca chem femi Bernardo? Doi papeltui ta Biblia ca cüme raquiduami tañi papeltuel. Taiñ peñi müleduamcülefui chem ñi raquiduamcülen caquelu peñi ca lamngen. Femfulu rume, amuldunguquefui fei engün mu, amuquefui trahun mu ca huiñoldunguquefui fei mu. Rupalechi antü mu, loncolelungerputui trahunche mu. Eimi norümtungelmi Bernardo reque, huesa duamcüleafuimi, yehueafuimi chi, huelu fente raquiduamcülelayaimi tüfa mu. Doi mai, cüme lloufinge tami norümtungen ca cüme elcünutuaimi tami raquiduam (Prov. 8:33; 22:4). c Femngechi femülmi ca püntütripanolmi Jehová mu ca tañi troquiñche mu, Jehová eluaimu cümelcan.

10. Pu Israel che tañi antü mu, ¿chem dungu caletui?

¹⁰ Cambiacünungetule quiñeque dungu Jehová ñi troquiñche mu, cüdautuafuiñ chi taiñ cüme llohuafiel ca püntütripayafuiñ Jehová mu. Raquiduamaiñ chem dungu ñi rupan pu Israel che elungelu Moisés ñi ley engün. Petu ñi acunon ti ley, pu loncolelu familia mu sacerdote cüdau niequefuingün. Deumaquefuingün altar ñi hulal sacrificio fei mu, femngechi ñi cümelcaleal ñi familia (Gén. 8:20, 21; 12:7; 26:25; 35:1, 6, 7; Job 1:5). Huelu aculu ti ley, pu loncolelu familia mu femhuelaingün femngechi cüdau. Jehová dullifi Aarón tañi familia ñi sacerdotengeal, fei ñi lüpümal sacrificio altar mu. Feichi antü mu, pu loncolelu familia mu huelu Aarón ñi familiangenofule lüpümfile sacrificio altar mu, mülefui ñi layal (Lev. 17:3-6, 8, 9). d ¿Feimu peno Coré, Datán, Abiram, ca 250 loncolelu chaftufingün Moisés ca Aarón ñi loncolen? (Núm. 16:1-3). Cüme quimlaiñ, huelu Coré ca caquelu huentru püntünentuhuingün Jehová mu. Feimu cambiahun mu quiñeque dungu Jehová ñi troquiñche mu, ¿chem mülei tami femal tami püntütripanoal Jehová mu ca tañi troquiñche mu?

11. Pu cohatita tañi bemün, ¿chem quimelelqueiñmu?

¹¹ Cambiale quiñeque dungu Jehová ñi troquiñche mu, com piuque mu quelluntucuafiyiñ. Peaiñ ñi rupan pu Cohat che. Pu Israel che mülelu huellin mapu mu mülefulu engün cañpüle ñi amual, pu Cohat che com che ñi adquiñ mu yequefuingün ti falin caja pengelquelu Chau Dios ñi eldungu (Núm. 3:29, 31; 10:33; Jos. 3:2-4). Rume falin cüdau femquefuingün, huelu caletui ti dungu. Puulu engün ti mapu mu ñi feipicünueteu Jehová, ti falin caja yengehuelai cañpüle. Fei Salomón ñi antü mu, pu Cohat che elungei cangelu cüdau, quiñeque ülcantuquefuingün, caquelu cüdauquefuingün  conpupeyümchi puerta mu cam almacen mu (1 Crón. 6:31-33; 26:1, 24). Biblia mu pu Cohat che feipilaingün ¿tüfachi cüdau müten femaiñ? Illamlafingün ti hue cüdau ñi elungeel. ¿Chem quimeltuqueiñmu tüfa? Quiñeque dungu cambiale Jehová ñi troquiñche mu, quelluntucuaiñ com taiñ nehuen mu. Chem cüdau rume elungeliyiñ Jehová ñi troquiñche mu, ayühunquechi mülei taiñ femafiel. Quimtucunieaiñ, Chau Jehová falintuquelaiñmu taiñ nien mu falinque cüdau, huelu mai taiñ inaniefiel mu ñi feipin (1 Sam. 15:22).

12. Elcünolu Betel, ¿chum duami Zaina?

¹² Peafiyiñ ñi rupan quiñe lamngen Zaina pingelu. Fei cüdahui doi 23 tripantu Betel mu, rume falintuquefui ñi cüdau. Huelu quiñe antü feipingei ñi cüdauhuenoal Betel mu, huelu precursora especialngeaimi pingei. Taiñ lamngen feipi: “Rume huesa duameleneu tañi cüdauhuenoal Betel mu, falihuenolu troquihun. ¿Huesa dungu mai femperquen? pin”. Cafei quiñeque peñi ca lamngen huesa duameleyu, feipiquefeyu: “Doi cüme entufulmi tami cüdau, mülenagafuimi Betel mu”. Feimu Zaina fill antü ngümaquefui fente ñi huesa duamcülen. Ti lamngen feipi: “Turpu elcünulan tañi maneluhun Jehová ñi troquiñche mu ca Jehová tañi piuqueyenieteu”. ¿Chem quellueyu Zaina ñi cüme raquiduamcüleal?

13. ¿Chumi Zaina tañi cüme duamcüleal?

¹³ Zaina elcünui ñi huesa duamcülen, ¿chem quellueyu? Papeltui quiñeque publicacion tañi quelluaeteu chaftuafiel ñi rupamequen. Papeltui quiñe troquiñ nütramcalu chem dungu ñi rupaquefel Marcos cuifi. Marcos eluñmangehuelai ñi compañafiel Pablo, tüfa quiñe falin cüdau ñi niefel ta Marcos. Feimu huesa duamcülepelai Zaina reque. Zaina feipi: “Marcos ñi ejemplo rume quellueneu tañi huesa duamcülehuenoal”. Taiñ lamngen inafülmaniefi tañi pu hueni, quiñe püle tripalai tañi pu lamngen mu, ca fente raquiduamcülelai tañi huesa duamcülefel mu. Quimtucui Jehová tañi nehuen mu adniefi tañi troquiñche ca quimtucui pu loncolelu ñi duamtunieteu. Ca quimtucui doi falin-ngei ñi femngeal Jehová tañi cüdau.

14. ¿Chem cüdaungechi dungu upai Vlado, ca chem loncontucui tañi cüme duamcüleal?

 ¹⁴ Peaiñ ñi rupan quiñe loncolelu, Vlado pingelu, quisu 73 tripantu niei ca Eslovenia mapu mu mülei. Tañi trahunche trapümngei ca trahunche mu, fei ti trahunhue ruca ñi amuquefel Vlado cerrangetui. Ti peñi nehue ayülafui tüfa, feipi: “Müna cüme adcülefui taiñ trahunhue ruca, fei ¿chumngelu am cerrangetui? piquefun. Hue cüme elcünutufuiñ, feimu illcufun ñi cerrangetun mu. Cafei iñche deumafiñ quiñeque mueble ñi pünengeal trahunhue ruca mu. Cafei quiñeque iñchiñ deu füchalen mu cüdautuqueiñ taiñ amual ca trahunche mu”. Fei ¿chem quellueyu taiñ peñi? Feipi: “Cambiale quiñeque dungu Jehová ñi troquiñche mu ca com piuque mu quelluntuculiyiñ fei ta cümelcangeaiñ. Tüfa pepicayaiñmu chem rupale rume cüpalechi antü meu”. Eimi cai, ¿trapümngei tami trahunche ca trahunche mu? Cam, ¿ca cüdau elungeimi Jehová ñi troquiñche mu? Eimi huesa duamcüleimi chi, huelu Jehová quimniei tami chum duamcülen. Quelluntuculmi tañi feipiel Jehová ñi troquiñche ca püntütripanolmi Jehová mu ca tañi troquiñche mu, fei Jehová cümelcayaimu (Sal. 18:25).

15. Upaliiñ cüdaungechi dungu trahunche mu, ¿chumabüiñ taiñ nor ca cüme raquiduam yeneal?

¹⁵ Doi püllelele Jehová ñi antü, rupayaiñ cüdaungechi dungu ti trahunche mu, fei doi cüdaungeafui taiñ pülleleal Jehová mu. Feimu, ¿chumafuiñ taiñ nieal cüme raquiduam? Huesa duameleliyiñmu quiñe peñi cam quiñe lamngen, ngelai taiñ rumel cutranpiuqueleal. Norümngeliyiñ, fente raquiduamcülelayaiñ taiñ huesa duamcülen mu, huelu cüme inayafiyiñ ca cüme elcünutuaiñ taiñ raquiduam. Cafei cambiangele quiñeque dungu Jehová ñi troquiñche mu, com piuque mu quelluntucuafiyiñ.

16. ¿Chumabüimi tami maneluhual Jehová ca tañi trahunche mu?

¹⁶ Rupaliyiñ cüdaungechi dungu mu rume, mülei taiñ maneluhual Jehová mu ca tañi troquiñche mu. Huelu, ¿chem quelluaiñmu? Tüngcüleaiñ, cüme raquiduamaiñ ca raquiduamaiñ Jehová reque. Biblia mu, inaduamafiyiñ quiñeque che ñi rupan cüdaungechi dungu iñchiñ reque. Llellipuafiyiñ Jehová taiñ quelluaeteu, turpu famtripalayaiñ pu peñi ca pu lamngen mu. Femngechi chem rupale rume, Satanás püntünentulayaiñmu Chau Jehová mu ca tañi troquiñche mu (Sant. 4:7).