1. ¿Chem maneluhun elueiñmu Jehová?

 JEHOVÁ eluqueiñmu quiñe cüme maneluhun. Quiñeque elufi tañi rumel müleal huenu meu (1 Cor. 15:50, 53). Caquelu Jehová elufi ñi rumel müleal mapu meu (Apoc. 21:3, 4). Chem maneluhun nieliyiñ rume, iñchiñ rume falintuquefiyiñ.

2. ¿Chemu maneluuquiiñ?

² Biblia feipi pu maneluuquelu cüme quimnieingün ñi müleal cümeque dungu. Jehová mu cüpai tüfachi maneluhun (Rom. 15:13). Quimnieiñ chem ñi feipicünuel Jehová femtripaquei (Núm. 23:19). Jehová niei nehuen ca ayüniei ñi femürpual tañi feipicünuel. Feimu re ayülaiñ müten ñi femtripayal Jehová ñi feipicünuel, cüme quimnieiñ tañi rüf femtripayal.

3. ¿Chem ngütramcaaiñ tübachi quimelün mu? (Salmo 27:14).

³ Jehová piuqueyeiñmu ca ayüniei taiñ maneluhual quisu mu (papeltunge Salmo 27:14). Cüme maneluuliyiñ Jehová mu, nehuencüleaiñ ca ayüucüleaiñ chem rupaliyiñ rume. Tüfachi troquiñ inaduamaiñ chumngechi cuñiutucuqueiñmu ti maneluhun. Hune, peaiñ Biblia trürümfi taiñ maneluhun quiñe ancla mu ca quiñe casco. Ca peaiñ chumngechi doi maneluhuafuiñ.

4. ¿Chemu taiñ maneluhun quiñe ancla reque beli? (Hebreos 6:19).

⁴ Biblia mu, Pablo trürümfi taiñ maneluhun quiñe ancla reque (papeltunge Hebreos 6:19). Pablo ñi miyauquen farcu mu quimniefui ñi fente duamfalngen ti ancla, femngechi ti farcu ñi amuconnoal lafquen mu. Quiñe rupa miyaulu farcu mu, mülerquei fütra cürüftucu mahun. Pu huentru ütrüftucufingün ti ancla lafquen mu, femngechi ñi troncünoal ti farcu (Hech.  27:29, 39-41). Feimu ti ancla nehuentuniequefi quiñe farcu tañi nehuentu nengümuunoal, ca femngechi taiñ maneluhun quelluaiñmu ñi püntütripanoal Jehová mu rupaliyiñ huesaque dungu mu. Cüme quimnieiñ ñi müleal cümeque dungu. Feimu taiñ maneluhun mu, tüngduamcüleiñ chem huesa dungu rupaliyiñ rume. Jesús feipi taiñ caiñetungeal (Juan 15:20). Huelu raquiduamliyiñ Jehová ñi feipicünuel quelluaiñmu taiñ serfinieafiel.

5. ¿Chumngechi ti maneluhun nehuentubi Jesús tañi lan mu?

⁵ Jesús ñi maneluhun mu, Jehová mu quellueyu ñi nehuencüleal. Ti Pentecostes 33 tripantu meu, Pedro nütramcai quiñe profecia Jesús mu. Feipi: ‘Maneluhun mu mongelean. Elcünulayaen Rüngan meu. Iñche rumel feyentuqueyu. Feimu elcünulayaimi ñi funayal tañi cuerpo. Fentren ayühun eluaen eimi tami adquiñ meu’ (Hech. 2:25-28; Sal. 16:8-11). Jesús quimniefui tañi layal, huelu maneluhui Jehová mu ñi huiñomongeltuaeteu. Ca maneluhui tañi püratual huenu mu ñi müleal tañi chau mu (Heb. 12:2, 3).

6. ¿Chem eipi quiñe peñi tati maneluhun mu?

⁶ Taiñ pu peñi ca pu lamngen rupan mu huesaque dungu mu, aguantalequeingün tañi nien mu maneluhun. Peaiñ ñi rupan taiñ peñi Leonard Chinn, mülequefulu Inglaterra mapu mu. Ti Primera Guerra Mundial mu, taiñ peñi carceltucungei ñi pinon mu ñi coneltual ejercito mu. Epu cüyen mu cerrantucuniengefui, quisulequefui. Rupalu ti epu cüyen, obligangequefui ñi femal fanechi cüdau. Taiñ peñi feipi: “Tañi maneluhun quellueneu tañi nehuencüleal, feimu quimürpun fente falin-ngen tañi maneluucüleal. Tañi rupan ta Jesús, pu apostol, pu profeta ca com ti cümeque dungu ñi feipicünuel Jehová Biblia mu, quelluqueneu tañi nehuencüleal ca ñi nieal maneluhun”. Ti maneluhun ñi nieel Leonard quiñe ancla reque felequefui, nehuentuniefeyu. Iñchiñ ca nehuentuleafuiñ nieliyiñ maneluhun.

7. Upalu iñchiñ cüdaungechi dungu mu, ¿chumngechi doi nehuentuquebi taiñ maneluhun mu? (Romanos 5:3-5; Santiago 1:12).

⁷ Rupaliyiñ huesaque dungu mu, Jehová quelluqueiñmu taiñ nehuencüleal. Taiñ nehuencülen mu iñchiñ ayühuelquefiyiñ ta Jehová, feimu doi maneluucülequeiñ (papeltunge Romanos 5:3-5; Santiago 1:12). Huecüfü ayüfui taiñ huesa duamcüleal rupaliyiñ huesaque dungu mu. Huelu Jehová tañi quellun mu, com huesaque dungu cüme chaftuafiyiñ.

8. ¿Chemu taiñ maneluhun quiñe casco reque beli? (1 Tesalonicenses 5:8).

⁸ Biblia ca feipieiñmu taiñ maneluucülen quiñe casco reque felei (papeltunge 1 Tesalonicenses 5:8). Quiñe soltau yeniequei tañi casco ñi allfülmangenoal ñi lonco. Ca femngechi iñchiñ mülei taiñ cuñiutucuafiel taiñ raquiduam taiñ chaftuafiel ta Huecüfü. Huecüfü chumquei rume taiñ hueluraquiduamelaeteu. Huelu iñchiñ nieiñ ta maneluhun, tüfa quiñe casco reque felei, cuñiutucuqueiñmu taiñ raquiduam ca quelluqueiñmu taiñ püntütripanoal Jehová mu.

9. Pu che nienole maneluhun, ¿chem upaai?

 ⁹ Iñchiñ maneluucüleiñ taiñ rumel mongeleal. Loncontuculiyiñ tüfachi maneluhun, quelluaiñmu taiñ cüme femal. Huelu raquiduamcüleliyiñ taiñ ayüqueel mu müten, ngoimanentuafuiñ ti maneluhun taiñ nieel. Peaiñ ñi rupan quiñeque cristiano mülequefulu Corinto huaria mu. Fei engün feyentuhuelaingün tati pu la ñi huiñomongetual (1 Cor. 15:12). Pablo feipi feiti pu feyentuhuenolu femqueingün quisu ñi ayünieel müten (1 Cor. 15:32). Fachantü fentren che feyentuquelai Chau Dios ñi feipicünuel mu, feimu femqueingün quisu engün tañi ayüqueel müten. Iñchiñ femquelaiñ, maneluuqueiñ Jehová ñi feipicünuel mu. Taiñ maneluhun quiñe casco reque felei, cuñiutucuñmaqueiñmu taiñ raquiduam ca quelluqueiñmu taiñ raquiduamnoal iñchiñ mu müten. Femngechi hueniyenieafuiñ ta Jehová (1 Cor. 15:33, 34).

10. ¿Chumngechi tati maneluhun quelluqueiñmu taiñ bamentobel coilaque dungu?

¹⁰ Huecüfü ayüquei taiñ raquiduamelaeteu Jehová ñi ayüucülenon iñchiñ mu, feimu quiñeque mu raquiduamafuiñ “iñche turpu femlayafun com tañi feipiaeteu Jehová, llounoafilu ti rumel mongen troquiuquen”. Elifaz femngechi raquiduamelfi ta Job, feipifi: ‘Quiñe huentru, ¿lifngepeafui mai? Chau Dios maneluuquelai tañi pu cümeque püllü mu, tati huenu rume lifcülelai tañi adquiñ mu’ (Job 15:14, 15). Fei ta re coilafel tati. Huecüfü ayüquei taiñ femngechi raquiduamal, femngechi taiñ maneluucülenoal. Huelu taiñ maneluhun quiñe casco reque cuñiutucuaiñmu. Feimu famentuafiyiñ Huecüfü ñi coilatun ca loncontucuaiñ Jehová ñi feipicünuel mu. Ngoimalayaimi, Jehová ayüniei tami rumel mongeleal tüfachi mapu meu ca quelluaimu tami femal (1 Tim. 2:3, 4).

11. ¿Chemu abeluulaiñ?

¹¹ Quiñeque mu, raquiduamafuiñ Jehová alüñmaquei ñi femal tañi feipicünuel, feimu cüdautuafuiñ taiñ maneluucüleal. Huelu Jehová rumel mülequei, feimu raquiduamquelai iñchiñ reque (2 Ped. 3:8, 9). Quisu com ñi feipicünuel femngechi enturpuafi. Iñchiñ ayünieafuiñ Jehová ñi müchai müten femürpual ñi feipicünuel. Huelu Jehová femlayai taiñ ayünieafel. Quisu eluule ñi femal, cüme femürpuai. Feimu mülei taiñ üngümcüleal. ¿Chem quelluafeiñmu taiñ maneluucüleal ca taiñ üngümcüleal Jehová mu? Peafiyiñ (Sant. 5:7, 8).

12. Hebreos 11:1, 6 tañi eipin, ¿chemu tati maneluhun ca ti mupitun quiñeucülingu?

¹² Fülmaucüleliyiñ Jehová mu, doi maneluucüleaiñ. Biblia feipi mülei taiñ maneluhual ñi mülen ta Chau Dios ca ñi “fürenequefiel feichi pu che tañi serfiqueteu”, femngechi nieafuiñ maneluhun (papeltunge Hebreos 11:1, 6). Feyentuleliyiñ ñi mülen ta Jehová, maneluucüleaiñ ñi huechurpual ñi feipicünuel. Peafiyiñ chumafuiñ taiñ doi fülmaucüleal Jehová mu, femngechi taiñ doi maneluucüleal.

13. ¿Chumngechi hueniyeabüiñ Chau Dio?

¹³ Llellipunieafiyiñ ta Jehová ca papeltuafiyiñ  tati Biblia. Huelu iñchiñ pequelafiyiñ ta Jehová, femfule rume hueniyeafuiñ. Llellipun mu nütramcayafuiñ ta Jehová fei allcütuaiñmu (Jer. 29:11, 12). Cafei papeltufiliyiñ Biblia allcütuafuiñ taiñ feipiaeteu. Biblia mu, inaduamafuiñ Jehová chumngechi quelluquefi tañi pu che cuifi, femngechi doi maneluucüleaiñ. Com mülelu Biblia mu ‘huirintucungei taiñ quimeltungeal, cafei yafültucuqueiñmeu ca quelluqueiñmeu taiñ nehuentuleal. Feimu nieiñ ta maneluhun’ (Rom. 15:4).

14. ¿Chemu cümeabüi taiñ ngüneduamal Jehová tañi bemel caquelu che mu?

¹⁴ Raquiduamaiñ chumngechi Jehová huechurpuquei tañi feipiqueel. Peaiñ ñi feipicünufiel ta Abrahán ca Sara. Sara ca Abrahán rume füchaingu, feimu nielayafuingu pichiqueche. Huelu Jehová feipieyu tañi quiñe nieal engu (Gén. 18:10). ¿Chem raquiduami Abrahán? “Feyentui ñi chaungerpual fentren troquiñche meu” (Rom. 4:18). Chem che rume feyentulayafui, huelu Abrahán maneluhui Chau Jehová mu ñi huechurpual ñi feipin. Rupachi tiempo mu, Abrahán ca Sara nierpuingu quiñe pichiche chumngechi ñi feipicünueteu Jehová (Rom. 4:19-21). Tüfa quelluqueiñmu taiñ maneluhual Chau Jehová mu ñi huechurpual tañi feipiqueel, quimlayafuiñ chi chumngechi ñi femal, huelu femürpuai llemai.

15. ¿Chemu cümeabüi taiñ ngüneduamal Jehová ñi inaduamnetu?

¹⁵ Raquiduamaiñ chumngechi quelluqueiñmu Jehová. Biblia mu, Jehová feipicünueiñmu chumngechi taiñ quelluaeteu. Por ejemplo, Jesús feipi Chau Jehová eluaiñmu com taiñ duamnieel  (Mat. 6:32, 33). Ca feipi pedifiliyiñ Jehová taiñ eluaeteu ñi nehuen, fei eluaiñmu (Luc. 11:13). Jehová femquei llemai com tüfachi dungu. Jehová ca feipicünui taiñ perdonayaeteu, taiñ yafültucuaeteu ca taiñ quelluaeteu fülconcüleal quisu mu. ¿Ngüneduamquepeimi mai chumngechi tami quellueteu Jehová? (Mat. 6:14; 24:45; 2 Cor. 1:3). Raquiduamliyiñ tüfa mu, doi maneluhuaiñ Chau Jehová ñi huechurpual ñi feipicünuel cüpalechi antü meu.

16. ¿Chemu tati maneluhun müna balin-ngi?

¹⁶ Iñchiñ ta nieiñ quiñe maneluhun-ngechi dungu: taiñ rumel mongeleal, rume ayüfali. Quimnieiñ ñi acual feichi antü, epechi aculniefiyiñ. Ti maneluhun taiñ nieel quiñe ancla reque felei, quelluqueiñmu taiñ nehuencüleal rupaliyiñ huesaque dungu mu, caiñetungeliyiñ cam langümngefuliyiñ rume. Cafei taiñ maneluhun quiñe casco reque felei, cuñiutucuñmaqueiñmu taiñ raquiduam, femngechi taiñ famentuafiel huesaque dungu ca taiñ femal cümeque dungu. Ti maneluhun taiñ eluqueteu Biblia pengeli fente taiñ piuqueyequeteu Jehová ca quelluqueiñmu taiñ fülconcüleal quisu mu. Nieliyiñ tüfachi maneluhun, rume quelluaiñmu.

17. ¿Chemu ayühulqueiñmu taiñ maneluhun?

¹⁷ Pablo feipifi pu Roma che: “Ayühuaimün ti maneluhun meu” (Rom. 12:12). Pablo quimniefui püntütripanofule Jehová mu rumel mongeleafui huenu mu, tüfa ayühuelquefeyu. Iñchiñ ca ayüucüleafuiñ taiñ maneluhun mu. Iñchiñ quimnieiñ Jehová huechurpuai com ñi feipicünuel, feimu ayüucüleiñ taiñ maneluhun mu. Biblia feipi: ‘Ayühun-ngei feiti che tati maneluucülelu tañi Chau Ngünechen Jehová mu. Quisu nor piuquengei’ (Sal. 146:5, 6).