1. ¿Chem am taiñ ‘duamneal quimal iñingen Chau Ngünechen’, ca chumngechi quellueiñmu (incaeiñmu) taiñ ayüucüleal?

 TATI rüf ayüucülechi che pichiñmaquelai tañi ayüucülen, rumel ayüucülequei llemai. ¿Chem quelluaiñmu taiñ rüf ayüucüleal? Jesús feipi: “Ayühun niei pu quimlu ñi duamnieel Chau Ngünechen ñi adnieteu” (Mat. 5:3). ¿Chumngelu feipi tüfa Jesús? Iñchiñ deumangeiñ ñi quimafiel ca püramyeafiel ta Jehová. Fei taiñ poyefiel mu tati ayühun-ngechi Dios, iñchiñ ca ayüucüleafuiñ (1 Tim. 1:11).

2, 3. 1) Jesús tañi eipin, ¿iñi engün ca ayüucüleabüingün? 2) ¿Chem peabiiñ tübachi quimelün mu, ca chemu duambali taiñ ngütramcaal tübachi dungu mu?

² ¿Ayüucüleafuiñ huesa rupaliyiñ rume? Femafuiñ llemai. Jesús feipi pu hueñancülelu tañi huesa femün mu ca tañi huesa rupan mu ca ayüucüleafui. Ca femngechi ayüucüleafui pu caiñetungelu ñi femquen ti nor dungu ca pu huesa rupamequelu engün tañi serfiniefiel mu ta Cristo (Mat. 5:4, 10, 11). ¿Rüf ayüucüleafuiñ rupan mu huesaque dungu mu rume?

³ Jesús feipilai pu cüme felelu müten ayüucüleafui pilai, doi mai pu eluucülelu ñi adnieaeteu ta Jehová ca tati pu fülconlu ta Chau Dios mu (Sant. 4:8). ¿Chumngechi femafuiñ? Feitachi chillcatun mu peaiñ cüla dungu taiñ femal femngechi taiñ rüf ayüucüleal.

4. Une, ¿chumabüiñ taiñ ayüucüleal? (Salmo 1:1-3).

⁴ HUNEN DUNGU: Taiñ rüf ayüucüleal, mülei taiñ cüme papeltuafiel ta Biblia. Jesús trürümfi Jehová tañi dungu tati iyael mu. Tati pu che ca pu culliñ mülei ñi iyael engün tañi mongeluucüleal. Huelu iñchiñ taiñ chengen müten papeltuafuiñ ta Biblia, fei ta falin-ngei taiñ femal. Feimu Jesús feipi: “Re cofque meu müten mongelequelai ta che. Huelu mongelequei inale com ñi feipiel Chau Jehová” (Mat. 4:4). Feimu rulpacünulayaiñ quiñe antü no rume taiñ papeltuafiel ta Biblia. Ca ti salmista feipi: ‘Tati huentru rume ayühuelqueyu Jehová ñi ley dungu, antü ca pun meu papeltuquei ñi ley’ (papeltunge Salmo 1:1-3).

5, 6. 1) Biblia mu, ¿chem dungu quimabüiñ? 2) Taiñ papiltun Biblia, ¿chumngechi quelluqueiñmu?

⁵ Jehová am piuqueyenieteu iñchiñ feimu feipiqueiñmu taiñ chumal taiñ ayüucüleal. Feipieiñmu chemu elueiñmu taiñ mongen, chumngechi hueniyeafuiñ ca feipieiñmu taiñ chumal perdonangeal taiñ culpan. Ca feipieiñmu taiñ cüme mongen taiñ nietual (Jer. 29:11). Com feitachi dungu taiñ quimürpuel Biblia mu rume ayühuelqueiñmu.

⁶ Jehová ca eluqueiñmu cümeque ngülam Biblia mu taiñ cüme feleal, feimu inaniefiliyiñ ayüucüleafuiñ. Feimu huesaque dungu mu rupaliyiñ,  papeltuafiyiñ ta Biblia ca piuquentucuafiyiñ tañi feipin. Jesús feipi: “¡Ayühun niei pu allcütulu Chau Dios ñi dungu ca inaniefilu!” (Luc. 11:28).

7. ¿Chumngechi doi quellueiñmu taiñ papiltun Biblia?

⁷ Com iñchiñ mülei taiñ cüme papeltuafiel Biblia. Raquiduamnge tüfa, elungelmi quiñe tami iyael tami ayüqueel, huelu fente tami aporiaucülen lümülümücünufimi. Rupan ilu ta eimi inaduamimi tami aporiaucülen ifiel ti iyael, quimlaimi rume chem tami in. Ca femngechi femafuiñ papeltufiliyiñ ta Biblia. Fente tañi aporiaucülen rulparulpacünuafuiñ, raquiduamlayafuiñ rume chem taiñ papeltufiel. Feimu elcünuaiñ ta tiempo taiñ cüme papeltuafiel Biblia ca taiñ cüme raquiduamal taiñ papeltun mu, femliyiñ doi ayüucüleaiñ.

8. Tati quimche cüdaube manelbalngelu, ¿chumngechi quellueiñmu? (Pebinge udamngechi dungu).

⁸ Jesús elfalcünufi ti “quim manelfal cüdaufe” taiñ quelluaeteu puuchi antü meu, femngechi taiñ cüme hueniyeafiel Jehová (Mat. 24:45). b Com taiñ enseñalqueteu ti quim manelfal cüdaufe cüpai Biblia mu (1 Tes. 2:13). Fei ta quelluqueiñmu chem tañi raquiduamqueel ta Jehová, feimu papeltuquefiyiñ Ti Huerquen ca ¡Tami quimafel! pingechi revista, cafei fillque dungu mülelu jw.org mu. Ca estudiaqueiñ chem ñi inaduamngeal ti trahun semana mu ca afchi semana mu. Ca fill cüyen pequefiyiñ tati JW Broadcasting^®. Rumel cüme papeltufiliyiñ ta Biblia, fei ta femafuiñ ca dungu taiñ ayühuelaeteu. ¿Chem dungu? Peafiyiñ.

9. ¿Chem epungechi dungu chumabüiñ taiñ ayüucüleal?

⁹ EPU DUNGU: Taiñ rüf ayüucüleal inayafiyiñ com taiñ mandalqueteu ta Jehová. Biblia feipi: “Ayüucülei com tati yamniefilu ta Jehová, tati miyauquelu Quisu ñi rüpü meu” (Sal. 128:1). ¿Chumngechi pengelqueiñ taiñ yamquefiel Jehová tañi huercün dungu? Chem femquelaiñ rume taiñ huesa duamelafiel (Prov. 16:6). Feimu feyentuquefiyiñ ñi feipin Jehová chem ñi cümen ca chem ñi cümenon (2 Cor. 7:1). Inafiliyiñ ñi ayüqueel ta Jehová ca famentufiliyiñ ñi üdequeel, doi ayüucüleaiñ (Sal. 37:27; 97:10; Rom. 12:9).

10. Com iñchiñ, ¿chumaiñ? (Romanos 12:2).

¹⁰ (Papeltunge Romanos 12:2). Iñchiñ quimnieiñ Jehová müten mülefui tañi feipial chem ñi cümen ca chem ñi cümenon, huelu ca mülei taiñ inayafiel tüfa. Raquiduamnge tüfa, quiñe che quimniefui ñi müte matuyaunoal carretera mu, tüfa ñi huercüel ti gobierno. Femfulu rume, ti che inaquelafi ñi feipin ti gobierno, feimu doi matuyauquei carretera mu. ¿Chem quimeltueiñmu tüfa? Taiñ femquen mu pengelqueiñ taiñ yamquefiel Jehová taiñ huercüeteu (Prov. 12:28). David quimniefui doi cümei ñi inangeal Jehová ñi huercün dungu, feipi: “Eimi quimelelqueen ti rüpü hulquelu ta mongen. Tami adquiñ mu fentrelei ta ayühun; tami man püle rumel mülequei ayühun” (Sal. 16:11).

11, 12. 1) Bill raquiduamcülelu cam hueñancülelu iñchiñ, ¿chem dungu mu cuñiutuaiñ? 2) Filipenses 4:8, ¿chumngechi quellueiñmu taiñ ngümintual (dullial) taiñ ayüumuquebel?

 ¹¹ Huesa duamcüleliyiñ, quintuafuiñ chi taiñ cüme duameleteu. Huelu cuñiutucuhuaiñ ñi femnoal Jehová ñi üdequeel (Efes. 5:10-12, 15-17).

¹² Pablo feipifi pu Filipos che ñi falintuafiel ‘com tati norngelu, tati lifngelu, piuqueyefalngelu ca com tati cümelu’ (papeltunge Filipenses 4:8). Ñi feipin Pablo quelluaiñmu taiñ cüme dullial chumngechi taiñ cüme rupaleal. Raquiduamnge tati musica tami allcütuqueel, tati pelicula tami pequeel, tati lifru tami papeltuqueel ca chem tami aucantuqueel, ¿chaftuquepefi mai Pablo ñi feipin? Femngechi quimaiñ chem dungu ñi ayüqueel ta Jehova ca chem ñi ayüquenoel. Ayüqueiñ taiñ cüme inayafiel Jehová tañi cümeque dungu (Sal. 119:1-3). Femngechi tüngcüleai taiñ raquiduam. Fei cüme raquiduamcüleliyiñ, femafuiñ ca dungu taiñ ayühuelaeteu. ¿Chem dungu? Peafiyiñ (Hech. 23:1).

13. ¿Chem cülangechi dungu chumabüiñ taiñ ayüucüleal? (Juan 4:23, 24).

¹³ CÜLA DUNGU: Hunelu mu quintuafiyiñ Jehová taiñ mongen mu. Quisu am deumaeteu iñchiñ, mülei taiñ poyeafiel (Apoc. 4:11; 14:6, 7). Feimu mülei taiñ poyeafiel “rüf dungu meu ca chumngechi ñi adcünueteu Chau Ngünechen tañi nehuen” (papeltunge Juan 4:23, 24). Eluucüleaiñ taiñ adnieteu Jehová tañi nehuen, femngechi cüme poyeafiyiñ Jehová chumngechi ñi feipiel Biblia. Mülefuliyiñ rume quiñe pais ñi catrütungequeel taiñ femal Jehová ñi cüdau, ca doyümafiyiñ ñi poyeafiel Jehová. Famülque mu, doi pataca taiñ pu peñi pu lamngen presulei tañi testigongen mu. c Femngechi dungu rupafulu rume engün, quisu engün papeltuniequefingün Biblia, ngillatuqueingün ca amuldunguqueingün Chau Dios ñi ngünenietual mapu. Huesa pingeliyiñ rume, caiñetungeliyiñ rume, quimnieiñ Jehová mülei iñchiñ mu ca cümelcayaiñmu, feimu ayüucüleiñ (Sant. 1:12; 1 Ped. 4:14).

14. Quiñe hueche peñi Tayikistán mapu mu, ¿chem dungu mu upai, ca chemu?

¹⁴ Famülque mu, quiñeque taiñ pu peñi ca pu lamngen huesaque dungu mu rupafuingün rume, ayüucülefuingün. ¿Chumngelu? Inafingün ti cüla dungu taiñ ngüneduampeel. Peaiñ ñi rupan taiñ peñi Jovidón Bobojonov, 19 tripantu nielu ca mülelu Tayikistán mapu mu. Taiñ peñi pilai ñi conal servicio militar mu. Fei 4 conchi octubre 2019 tripantu mu, entungei tañi ruca mu, fei fentren cüyen presuntucungei, quiñe huesa che reque troquingei. Com püle nütramyengei ñi huesa femngen taiñ peñi. Ca feipingei noticia mu pu soltau hulelcafingün taiñ peñi ñi tucual ti uniforme ca ñi conal ejercito mu. Rupachi antü mu, taiñ peñi condenangei ca mandangei cheu ñi obligangequem pu presu ñi cüdahual. Rupalu chi antü,  ti presidente feipi ñi neicümngeal taiñ peñi. Huesa rupafulu rume taiñ peñi, ayüucülei ca püntütripalai Jehová mu. ¿Chem quellueyu? Eluucülefui tañi adnieaeteu Jehová.

15. Mülelu Jovidón racümtucuhue mu, ¿chumi tañi nehuentubel tañi hueniyehun Jehová mu?

¹⁵ Carcel mu taiñ peñi nielafui Biblia cam taiñ publicacion, huelu fentecünulai tañi papeltunieafiel. ¿Chumngechi femi? Pu peñi ca pu lamngen yeleleteu mu iyael quiñe carpa mu, huirintuleleyu engün ti texto diario. Femngechi fill antü papeltuquefui ta Biblia ca raquiduamquefui tañi papeltupeel mu. Tripalu ta carcel mu, taiñ peñi huli quiñe ngülam, feipi: “Petu tamün lifrelen cüme papeltuafimün Biblia ca taiñ publicacion, femngechi doi fülconaimün ta Jehová mu”.

16. Jovidón, ¿chem mu raquiduamqui?

¹⁶ Taiñ peñi inafi Jehová ñi huercün dungu. Taiñ peñi huesa raquiduamlai ca femlai Jehová ñi ayüquenoel. Raquiduami Jehová mu ca tañi ayüqueel. Ngüneduamquefui com tañi deumael ta Jehová. Fill pulihuen allcütuquefui ñi cholpifmequen pu pichique üñüm, fill  pun ca ngüneduamquefui ti cüyen ca ti pu huangülen. “Com feitachi dungu ayühuelqueneu” pi. ¿Chem quimeleiñmu tüfa? Mañumcüleliyiñ com taiñ eluqueteu mu Jehová, ayüucüleaiñ ca nehuencüleaiñ.

17. Hueya upalmi Jovidón reque, ¿chumngechi quelluaimu 1 Pedro 1:6, 7?

¹⁷ Jovidón ca doyümi ñi poyeafiel Jehová. Jesús feipi: “Mülei tami püramyeafiel ta Chau Ngünechen Jehová, fei müten mülei tami poyeafiel” (Luc. 4:8). Pu soltau ngüchaltucuquefingün ta Jovidón ñi poyehuenoafiel ta Jehová. Huelu taiñ peñi fill antü ngillatuquefui ta Jehová tañi quelluaeteu, fei ñi püntütripanoal quisu mu. Huesa femngelu rume taiñ peñi, fentecünulai ñi poyeafiel Jehová. Ñi huesa rupan mu taiñ peñi, fei quellueyu ñi doi feyentulerpual Jehová mu, tüfa ayühuelqueyu (papeltunge 1 Pedro 1:6, 7).

18. ¿Chumaiñ taiñ rüb ayüucüleal?

¹⁸ Jehová cüme quimniei chem taiñ duamnieel iñchiñ taiñ chengen, femngechi ñi rüf ayüucüleal. Inafiliyiñ ti cüla dungu taiñ inaduampeel, rüf ayüucüleaiñ rupaliyiñ rume huesaque dungu. Femngechi rüf tripayai ñi feipin Salmo 144:15: “¡Ayühun-ngei tati troquiñche poyequefilu ta Chau Ngünechen Jehová!”.