1. ¿Chem amatubalchi dungu upaai Cristo ñi ngüneneel mu?

 NGÜNENIETULE Jesús ti mapu huaranca tripantu mu, huiñomongetuai tati pu che. Rume müleai ayühun. Com iñchiñ taiñ ñamümel familia lan mu ayünieiñ taiñ huiño petuafiel. Jehová ca femngechi ayülei (Job 14:15). Com che mapu mu rume ayüucüleai tañi petufiel mu ñi piuqueyenieelchi che. Rupachi troquiñ mu taiñ pefiel, “pu norngechi che” huirintuculei ñi üi ti mongen lifru mu. Fei huiñomongetuaingün ñi ‘llohual rumel mongen’ (Hech. 24:15; Juan 5:29). Taiñ piuqueyenieelchi che hune huiñomongetuaingün chi. b Cafei “pu norngenochi che” turpu quimnofilu ca serfinofilu Jehová petu ñi lanon, ca huiñomongetuaingün tañi juiciangeal.

2, 3. 1) Isaías 11:9, 10 tañi eipin, pu huiñomongetulu, ¿chem quimpoaingün? 2) ¿Chem ngüneduamaiñ tübachi papiltun mu?

² Com pu huiñomongetulu duamaingün tañi quimeltungeal  engün (Is. 26:9; 61:11). Feimu müleai fentren cüdau ñi quimeltungeal com pu che com huall mapu mu (papeltunge Isaías 11:9, 10). ¿Chumngelu? Pu norngenochi che mülei ñi quimal Jesús mu, Chau Dios ñi Gobierno mu ca Jesús ñi lan mu. Ca mülei ñi quimal fente falin-ngen Jehová tañi üi, ca femngechi quisu müten mülei ñi ngünenieal com dungu. Pu norngechi che cütu mülei ñi quimeltungeal. Quiñeque engün laingün petu ñi huirintucungenon ti Biblia. Petu ñi lalen mu engün, Jehová quimeltuniefi tañi pu che. Feimu huiñomongetule engün, mülei ñi quimeltungeal femngechi ñi quimürpuafiel Jehová ñi quimeltun. Felei llemai, pu norngechi che ca pu norngenolu mülei ñi quimeltungeal fentrenque dungu.

³ Tüfachi troquiñ huiñoldunguaiñ tüfachi ramtun mu: ¿chumngechi entungeai tüfachi quimeltun cüdau? Pu che lloufilu Jehová ñi quimeltun ca caquelu llounofilu, ¿chumngeaingün? Rume falin-ngei taiñ quimal ti huiñoldungun. Feula inaduamaiñ quiñeque profecia mülelu Daniel ca Apocalipsis lifru. Tüfa quimeltuaiñmu chem ñi rupayal huiñomongetule tati pu che. Huelu hune peaiñ ñi feipin Daniel 12:1, 2. Tüfa quimeltuaiñmu chem dungu ñi rupayal cüpalechi antü meu.

4, 5. ¿Chem eipi Daniel 12:1 tañi upaal abalchi antü mu?

⁴ (Papeltunge Daniel 12:1). Daniel pingechi lifru pengeli chem dungu ñi rupayal ti afaelchi antü meu. Por ejemplo, Daniel 12:1 pengeli ta Jesús, Miguel ca pingelu, quellumequefi Chau Jehová ñi troquiñche. Tüfachi profecia huechutripai 1914 tripantu mu, hue reycünungelu Jesús huenu mu.

⁵ Huelu Daniel ca feipingei ñi müleal “fütra cutrancahun turpu ñi mülequenoel. Feichi elcünungelu müten tati hunen troquiñche, mülequelafui femngechi cutrancahun”. Jesús “huitrapürayai feichi antü mu” pingei ta Daniel. Tüfachi “fütra cutrancahun” ñi feipingeel Mateo 24:21 mu. Jesús huitracünuhuai ñi incayafiel Jehová tañi pu che Armagedón mu, afle ti fütra cutrancahun. Apocalipsis lifru mu ca nütramcangei Jehová ñi pu che mu feipilen mu quiñe fütra troquiñche “tripai tati fütra cutrancahun mu” (Apoc. 7:9, 14).

6. Tati bentren pu che mongetripale ula bütra cutrancahun mu, ¿chem upaai ca chemu eipiiñ tüba? (Pebinge ti dungu “Pregunta de los lectores” papil Ti Huerquen mu).

⁶ (Papeltunge Daniel 12:2). ¿Chem dungu rupayai ti fütra troquiñche mongetripale ti fütra cutrancahun meu? Tüfa feipi ñi müleal huiñomongetun. Cuifi raquiduamelquefeiñmu ñi feipin Daniel 12:2 ñi müleal huiñomongetun huenu mu. Ca raquiduamquefuiñ tüfachi dungu ñi feipin Daniel pengeli ñi doi amulen ti amuldungun cüdau 1918 tripantu mu. Feichi mu, taiñ pu caiñe epe huitracünufuingün taiñ cüdau. c Huelu feula femngechi raquiduamhuelaiñ. Feula quimürpuiñ ñi feipin ta Daniel pengeli ñi müleal huiñomongetun ti  hue mapu meu. ¿Chumngelu femngechi raquiduamiyiñ? Job 17:16 nütramcai tati trufür ca ti Rüngan, tüfachi epu dungu trüri. Feimu, Daniel 12:2 pengeli ñi huiñomongetual pu che deu rupale ti Armagedón hueichan.

7. 1) Quiñeque che huiñomongetoingün tañi “abquenochi mongen nieal”, ¿chemu eipiiñ tüba? 2) ¿Chemu am tüba doi cüme huiñomongetun?

⁷ Huelu Daniel 12:2 feipi quiñeque che ñi huiñomongetual “ñi rumel mongeleal”. ¿Chem pi ta tüfa? Com pu huiñomongetulu mülei ñi amuleal tañi quimafiel ta Jehová ca Jesús ca ñi inayafiel ñi feipin, femngechi llohuaingün rumel mongen afle ti huaranca tripantu (Juan 17:3). Cuifi mu, quiñeque che huiñomongetuingün, huelu rupan mu ta antü huiño larpuingün. Huelu pu huiñomongetualu hue mapu mu llohuafuingün rumel mongen, turpu lahuelayaingün. Feimu llohuaingün “quiñe doi cüme huiñomongetun” (Heb. 11:35).

8. Quiñeque che huiñomongetoingün tañi “yamngenoal ca illamngeal”, ¿chemu eipiiñ tüba?

⁸ Huelu com pu huiñomongetualu, quiñeque ayülayai ñi inayafiel Jehová ñi quimeltun. Feimu Daniel feipi quiñeque che huiñomongetuai “ñi rumel illamcangeal”. ¿Chem pi tüfa? Quiñeque che pilayai tañi inayafiel Jehová ñi quimeltun, feimu tañi üi engün huirintuculelayai ti mongen lifru mu, fei rumel mongen nielayaingün. Femngechi rumel apümcangeaingün. Ñi feipin Daniel 12:2 pengeli ñi chumngeal pu huiñomongetulu inafile cam inanofile Jehová ñi quimeltun (Apoc. 20:12). d Quiñeque llohuai rumel mongen, caquelu femlayai.

9, 10. 1) Daniel 12:3 tañi eipin, ¿ca chem upaai upale ula bütra cutrancahun? 2) ¿Iñi engün huilübaingün huenu reque?

⁹ (Papeltunge Daniel 12:3). Deu peiñ Daniel 12:2 chem dungu ñi rupayal. Ti versiculo 3 ca feipieiñmu chem ñi rupayal deu rupale ti fütra cutrancahun.

¹⁰ Ñi feipiel ta Daniel, ¿inei engün am tati fente huilüfalu? Ñi feipin Jesús Mateo 13:43 fei quelluaiñmu. Jesús feipi: “Feichi mu, pu nor che huilüfai antü reque tañi Chau ngünenietule mapu”. Feichi Jesús feipilu raquiduami “pu coneltulelu ñi ngünenietual mapu”. Tüfa engün tati pu dullin quiñentrür ngüneniealu Jesús engün (Mat. 13:38). Feimu, ¿inei mu nütramcai Daniel 12:3? Tati pu dullin cristiano ca ti cüdau ñi femal engün huaranca tripantu mu.

11, 12. Pu 144.000, ¿chumaingün 1000 tripantu mu?

¹¹ Pu dullin cristiano quelluafi “fentren che ñi inayal ti norngechi dungu”. ¿Chumngechi femaingün? Jesús engün adcünuaingün ti fütra cüdau ñi quimeltungeal com pu che huaranca tripantu mu. Pu 144.000 dullin cristiano re reyngelayaingün, ca sacerdotengeaingün (Apoc. 1:6; 5:10; 20:6). Fei engün ‘tremoltuafi pu troquiñche’. ¿Chem pi tüfa? Quelluafingün tati pu che ñi culpan chengehuenoal (Apoc. 22:1, 2; Ezeq. 47:12). ¡Pu dullin rume ayühunquechi femaingün tañi cüdau!

¹² ¿Inei engün am tati “fentren che” ñi quellungeal? Tüfa engün tati pu huiñomongetualu, pu mongetripalu Armagedón mu ca pu pichiqueche choyüngealu  hue mapu mu. Afle ti huaranca tripantu, com pu mülealu mapu mu culpafengehuelayaingün. Fei, ¿chumül am huirintucuñmangeai ñi üi engün tinta meu ti mongen lifru mu? Peafiyiñ.

13, 14. Petu llounole abquenochi mongen, ¿chumaingün pu che mapu mu?

¹³ Quiñe che culpafe chengehuenole, ¿lloufemafui rumel mongen? Femlayafui. Raquiduamafuiñ Adán engu Eva mu. Culpafengelafuingu, fei mülefui tañi inayal Jehová tañi feipin. Femngechi müten rumel mongeleafuingu. Huelu culpaingu, lloulafingu rumel mongen. ¡Müna huesa! (Rom. 5:12).

¹⁴ Chumngechi peiñ, afle ti huaranca tripantu, com che culpafengehuelayai. Huelu, ¿rumel mu quelluntucuafingün Jehová ñi Gobierno? ¿Cam Adán ca Eva reque püntütripayaingün Jehová mu? Peaiñ chem dungu ñi rupayal.

15, 16. 1) ¿Chumül com pu che pengelaingün tañi hueniyeabel Jehová? 2) ¿Chum tripaai tübachi dungu?

¹⁵ Huecüfü cerrantucungeai huaranca tripantu mu, femngechi ngünencalayafi tati pu che. Huelu rupale hula ti huaranca tripantu, Huecüfü neicümngetuai fei tripayai tañi ngünencayafiel pu che culpafengehuenolu. Feichi mu, com pu culpafengehuenochi che quimfalcünuafuingün tañi yamquefiel Jehová ñi üi  ca ñi eluucülen ñi ngünenieaeteu Jehová (Apoc. 20:7-10). Tañi femün mu engün pengelaingün ñi huirintucuñmangeal cam ñi huirintucuñmangenoal ñi üi ti mongen lifru mu, turpu ñi borrañmangenoal.

¹⁶ Quiñeque che, Adán ca Eva reque, famentuafingün Jehová, eluulayaingün tañi ngünenieaeteu. ¿Chumngeaingün? Apocalipsis 20:15 feipi: “Tati pu huirintucunienolu tañi üi ti mongen ñi lifru mu, ütrüftucungei cütral lafquen meu”. Fei llemai, com pu famentufilu Jehová rumel mu apümcangeaingün. Huelu epe com pu culpafengehuenochi che püntütripalayaingün Jehová mu, feimu tinta mu reque huirintucuñmangeai ñi üi engün ti mongen lifru mu.

17. Cüme huerquen püllü, ¿chem eipibi Daniel? (Daniel 12:4, 8-10).

¹⁷ Pürapapiuquelqueiñmu com dungu ñi rupayal. Huelu quiñe angel ca feipifi ta Daniel quiñe falin dungu ñi rupayal ti afaelchi antü meu (papeltunge Daniel 12:4, 8-10; 2 Tim. 3:1-5). Feipifi: “Tati rüf quimün alün-ngerpuai”. Felei, Chau Dios ñi pu che doi cüme adümürpuafuingün ti profecia mülelu Daniel lifru mu.  Ti angel feipifi ta Daniel ca dungu ñi rupayal ti afaelchi antü meu. Feipifi: “Tati huesaque che huesaque dungu femaingün, ca quiñe huesa che no rume adümlayafi” ñi feipingen Daniel.

18. Pu hueyaque che, ¿chem upaai?

¹⁸ Famülque mu, fentren huesaque che castigangequelai tañi huesa femün meu (Mal. 3:14, 15). Huelu Jesús pichiñma mu juzgayafi engün. Feimu pu huesaque che capüra reque felelu püntünentungeai pu ufisa meu (Mat. 25:31-33). Fei engün mongetripalayaingün ti fütra cutrancahun mu ca huiñomongetulayaingün ti hue mapu mu. Tañi üi engün huirintucungelayai ti “lifru ñi acordaniengeam” ñi feipiel Malaquías 3:16.

19. ¿Chem pengelaiñ beula ca chemu? (Malaquías 3:16-18).

¹⁹ Taiñ femün meu pengelaiñ taiñ trürnon pu huesaque che meu (papeltunge Malaquías 3:16-18). Iñchiñ ayüqueiñ Jehová ñi “saquin chengerpual”.

20. Jehová, ¿chem eipicünobi Daniel ca chemu ayüquimi tañi cüme tripaal?

²⁰ Rume afmatufali taiñ rupamequen famülque mu. Huelu pichiñma mu doi afmatufalchi dungu rupayai. Com huesaque dungu apümcangeai. Cafei, huechutriparpui Jehová ñi feipicünufiel ta Daniel. Feipifi: “Cüpalechi antü mu huitratuaimi ñi llohual chem tami ngen-ngeel” (Dan. 12:13). Daniel ca eimi tami piuqueyenieelchi che huitratuaingün ti hue mapu mu. ¿Ayüafuimi tami petuafiel engün? Femülmi, eluucülenge tami turpu püntütripanoal Jehová mu. Femngechi tami üi huirintucungeai ti mongen lifru mu, turpu borrangelayai.