1. ¿Chem cüme quimniiñ?

 QUIMNIEIÑ Jehová taiñ piuqueyeteu mu, feimu ayüquei taiñ nieal quiñe cüme mongen (Rom. 8:35-39). Ca quimnieiñ inaliyiñ Chau Jehová tañi ngülam, cümelcayaiñmu (Is. 48:17, 18). Huelu, ¿chumafuiñ ruparumeliyiñ huesaque dungu mu?

2. ¿Chem hueyaque dungu upaumeabüiñ? Ca ¿chem ramtuhuabüiñ?

² Com iñchiñ serfiquefilu Jehová rupaqueiñ huesaque dungu mu. Quiñeque taiñ familia huesa duamelafeiñmu cam cutrancüleiñ chi, feimu cüdahuelquelafiyiñ Jehová chumngechi taiñ ayüquefel. Taiñ mapu mu rupai chi quiñe fütra nüyün cam cürüftucu mahun, fei rume huesalcaeiñmu. Cam inacangequeiñ chi taiñ testigongen mu. Femngechi dungu mu rupaliyiñ, ramtuhuafuiñ: “¿Chemu am fente huesaque dungu ta ruparupangen? ¿Huesa fempen mai? ¿Culpapefiñ mai ta Jehová? ¿Feimu chi quelluhuelaeneu?”. ¿Femngechi ramtuuqueimi eimi? Femülmi, huesa duamquilnge. Fentrequen pu che poyequefilu Jehová cuifi, femngechi dungu mu rupaquefuingün (Sal. 22:1, 2; Hab. 1:2, 3).

3. Salmo 34:19, ¿chem quimeleiñmu?

 ³ (Papeltunge Salmo 34:19). Feitachi versiculo feipi epu falin dungu: 1) nor chengeliyiñ rume, rupayafuiñ huesaque dungu mu. Ca 2) Jehová montulqueiñmu huesaque dungu mu. ¿Chumngechi montulqueiñmu Jehová? Quelluqueiñmu taiñ cüme raquiduamal rupaliyiñ huesaque dungu mu. Jehová feipilaeiñmu taiñ rupanoal huesaque dungu, huelu feipieiñmu taiñ ayüucüleal serfifiliyiñ (Is. 66:14). Ca feipiqueiñmu taiñ raquiduamcüleal taiñ cüme feletual cüpalechi antü mu (2 Cor. 4:16-18). Huelu petu ñi acunon feichi antü, Jehová quellunieiñmu taiñ cüme serfinieafiel (Lam. 3:22-24).

4. ¿Chem ngütramcaaiñ tübachi quimelün mu?

⁴ Feitachi troquiñ mu ngüneduamaiñ ruparumeliyiñ huesaque dungu mu, Jehová quelluaiñmu maneluucüleliyiñ quisu mu (Sal. 55:22). Cafei peaiñ chem dungu ñi rupan quiñeque serfiquefilu Jehová cuifi mu ca famülque mu. Ngüneduammequefiliyiñ ñi rupan, ramtuhuafuiñ: “¿Chumafun chi cai iñche femngechi dungu rupali? Tañi rupan engün, ¿chumngechi quellueneu tañi doi maneluhual ta Jehová mu? ¿Chem quimeltueneu ñi femün engün?”.

5. Jacob, ¿chem huedaque dungu upai Labán ñi duam mu? (Ngüneduamnge tati adentun hunen pagina mu).

⁵ Cuifi mu, quiñeque serfiquefilu Jehová rupaingün huesaque dungu tañi raquiduamquenofel rume. Raquiduamaiñ ñi rupan ta Jacob. Tañi chau feipieyu ñi amual ta Labán mu, quiñe pariente serfiquefilu Jehová, fei ñi nieafiel Labán ñi ñahue. Tañi chau feipieyu Jehová tañi cümelcayaeteu (Gén. 28:1-4). Jacob elcünui tañi ruca, fei amui ta Labán mu, nierquefui epu ñahue, Lea ca Raquel. Jacob ayüfi Labán tañi inan ñahue. Tañi nieafiel feitachi domo, mülefui ñi cüdahuelafiel Labán regle tripantu (Gén. 29:18). Huelu femtripalai Jacob ñi raquiduamfel. Labán ngünencaeyu fei elueyu tañi hunen ñahue, Lea. Quiñe semana rupalu, Labán elueyu ñi nieafiel ta Raquel, huelu mülefui tañi cüdahual ca regle tripantu (Gén. 29:25-27). Fei müten no, Labán ca encañaeyu negocian dungu mu. 20 tripantu Labán allmalltui tañi huesa femafiel ta Jacob (Gén. 31:41, 42).

6. Jacob, ¿ca chem huedaque dungu upai?

⁶ Jacob ca rupai ca huesaque dungu. Jacob alün familia niefui, huelu tañi pu fotüm cüme yeucülelafuingün. Quiñe rupa, fendefingün tañi peñi José esclavo reque. Epu tañi fotüm, Simeón ca Leví, huesa femlu engu, huesa dunguyengei tañi familia ca Jehová tañi üi. Ca tañi saquin domo Raquel lai petu choyülu tañi püñeñ. Ca rume füchalu ta Jacob, quiñe fütra ngüñün ta rupai, feimu amuingün ta Egipto mapu mu (Gén. 34:30; 35:16-19; 37:28; 45:9-11, 28).

7. Jehová, ¿chumngechi pengelelbi ta Jacob tañi ayüucülen quidu mu?

⁷ Rupafulu rume huesaque dungu mu, Jacob maneluucülefui müten Jehová mu, ca Jehová pengeleleyu tañi ayüucülen quisu mu. Jacob femeteu rume huesaque dungu ta Labán, Jehová elueyu fentren chemcün ca culliñ. Ca huiño petufilu tañi fotüm, ¿rume mañumcülepelafui  Jehová mu? Jacob tañi cüme hueniyefiel mu ta Jehová, chaftufi com huesaque dungu (Gén. 30:43; 32:9, 10; 46:28-30). Jacob reque iñchiñ cüme hueniyefiliyiñ ta Jehová, ca chaftuafiyiñ huesaque dungu taiñ raquiduamquenofel.

8. ¿Chem ayünebüi David?

⁸ Peaiñ ñi rupan David. David ayüquefui ñi femal fillque dungu ñi cüdahuelafiel ta Jehová. Huelu pepi femlafui com tañi ayüquefel. Ayüfui ñi deumalelafiel quiñe ngillatuhue ruca ta Jehová. Nütramcafilu tati profeta Natán, quisu feipieyu: “Femnge com tami raquiduamqueel tami piuque mu” (1 Crón. 17:1, 2). ¿David ayüupelafui ñi allcütufiel ñi feipin ta Natán? ¿Pürüm pepicaupelafui David ñi femal feitachi cüdau?

9. ¿Chumi David eipingelu ñi deumanoabel ti ngillatuhue ruca?

⁹ Feichi pun müten, Jehová feipifi ta Natán David ñi deumanoal ti ngillatuhue ruca, Salomón mai ta femai pifi. Fei Natán feipimefi ta David tañi feipieteu Jehová. Huesa duamfui chi ta David (1 Crón. 17:3, 4, 11, 12). ¿Chumi David? Anücünuulai, pürüm trapümfi com tañi duamafel ñi deumangeal ti ngillatuhue ruca (1 Crón. 29:1-5).

10. Jehová, ¿chumngechi cümelcabi David?

¹⁰ Rupan feipifilu ta David ñi deumanoafiel ti ngillatuhue ruca, Jehová feipicünufi quiñe tañi yomelche ñi rumel reyngerpual (2 Sam. 7:16). Fei ti hue mapu mu David quimai Jesús, quiñe tañi yomelche, ñi ngüneniefiel ti mapu, feimu rume ayühuai. ¿Chem quimeltueiñmu ñi rupan David? Iñchiñ pepi cüdahuel-layafuiñ chi ta Jehová chumngechi taiñ ayüquefel. Huelu Jehová ca cümelcayafeiñmu, raquiduamlayafuiñ rume chumngechi taiñ cümelcayafeteu Jehová.

11. Pu cristiano hunen siglo mu, ¿chumngechi cümelcaeyu Jehová? (Hechos 6:7).

¹¹ Peafiyiñ ñi rupan pu cristiano hunen siglo mu. Fei engün ayüniefuingün Chau Dios ñi ngünenietual mapu, huelu quimlafuingün chumül ñi femal (Hech. 1:6, 7). ¿Fei chumingün? Eluhuingün tañi amuldungual engün. Com püle amuldunguingün, feimu quimingün chumngechi tañi cümelcaeteu Jehová (papeltunge Hechos 6:7).

12. Upalu engün ngüñün dungu mu, ¿chumingün pu cristiano?

¹² Hunen siglo mu fentren che rupaingün filla dungu mu (Hech. 11:28). Tati pu cristiano ca femngechi dungu mu rupaingün. Pu chau ramtuuquefuingün chumngechi ñi eluafiel tañi familia tañi duamnieel engün. Pu hueche ayüafuingün chi tañi amuldungual engün, huelu rupale hula ti filla fei hula amuldunguan piafuingün chi. Femngechi dungu mu rume rupalu engün, eluucülefuingün müten tañi amuldungucheal ca com tañi nieel engün quellufingün pu cristiano mülelu Judea mapu mu (Hech. 11:29, 30).

13. Pu cristiano ngüñücaubülu ume engün, ¿chumngechi cümelcangingün?

¹³ Pu cristiano rupalu filla mu engün, Jehová quellueyu ca elueyu com tañi duamnieel (Mat. 6:31-33). Cafei com pu peñi ca pu lamngen ñi quellueteu engün, doi fülcontufingün ca com tati quelluntuculu rume ayüucülefuingün (Hech. 20:35). Feimu pu cristiano huesa dungu mu rupalu rume engün, eluhuingün tañi cüme femal, feimu Jehová cümelcaeyu engün.

14. ¿Chem dungu mu upaingu Pablo ca Bernabé? Ca ¿chum tripai ñi bemün engu? (Hechos 14:21, 22).

 ¹⁴ Pu cristiano hunen siglo mu inacangequeingün, quiñeque mu raquiduamquelafuingün rume tañi inacangeal. Peaiñ ñi rupan Pablo ca Bernabé. Amuldunguyaulu engu Listra mapu mu, pu che ayühunquechi allcütueyu, huelu tañi pu caiñe “ngüchaltucufingün ti pu che ñi caiñetuafiel ta Pablo”, feimu quiñeque tañi amuldungulelfiel curatucaeyu ca lalu troquieyu (Hech. 14:19). Huelu Pablo ca Bernabé fentecünulai tañi amuldungual engu, cañpüle amuingu ñi amuldungual. Fei ¿chum tripai ñi femün engu? “Quimeltufingün fentren che ñi inayafiel ta Jesús” ca yafültucufingu pu peñi ca pu lamngen tañi femün mu ca tañi feipin mu (papeltunge Hechos 14:21, 22). Inacangefulu rume engu, Pablo ca Bernabé fentecünulaingu tañi amuldungual, femngechi quellufingu fentren pu che. Fentecünunoliyiñ taiñ cüdahuelafiel Jehová, rume cümelcayaiñmu.

15. ¿Chem quimeleiñmu taiñ peñi Macmillan ñi upan?

¹⁵ Feichi 1914 tripantu Jehová ñi pu che ca rupaingün cüdaungechi dungu mu. Peaiñ ñi rupan ti peñi Alexander Macmillan. Petu ñi puunon 1914 quisu ca caquelu raquiduamcülefuingün ñi pichilehuen ñi amual huenu mu. Septiembre 1914 tripantu ti peñi huli quiñe hueupin, feipi: “¿Tüfa tati af hueupin peno tañi hulal?” pi. Huelu femlai, femtripalai tañi raquiduamquefel engün. Fei ti peñi feipi: “Aporiaucülefuiñ reque taiñ amual ta huenu, mülefui taiñ amuleal taiñ cüdahuelafiel ta Jehová”. Femngechi femi taiñ peñi. Ayühunquechi amuldungui, yafültucufi pu presulelu ca faltaquelafui trahun mu füchalu rume. Esperanielu tañi amual ta huenu mu, eluucülefui tañi cüdahual. Fei, ¿chum tripai ñi femün? Pichi faltalu tañi layal 1966, taiñ peñi feipi: “Turpu fentecünuquelan tañi feyentulen”. Rume quellueiñmu ñi femün taiñ peñi Macmillan, inayentufali. Iñchiñ fentren tripantu mu chi üngümniefuiñ tañi apümcangeal huesaque dungu, huelu ñi femün taiñ peñi quelluaiñmu taiñ nehuencüleal (Heb. 13:7).

16. Taiñ peñi  Jennings ca tañi cure, ¿chem hueyaque dungu contupaeyu mu? (Santiago 4:14).

¹⁶ Fentren pu peñi ca pu lamngen conturumequeyu huesaque cutran. Peaiñ ñi rupan taiñ peñi Herbert Jennings. b Quisu ca tañi domo misionerolequefuingu Ghana mapu mu. Rume ayüucülequefuingu üyeu. Huelu quiñe antü peñmangei quiñe huesa cutran lonco mu. Ti peñi Jennings raquiduamquelafui femngechi dungu mu ñi rupayal, fei acordafi ñi feipin Santiago 4:14 (papeltunge). Quisu feipi: “Tañi domo iñchiu cüme raquiduamiyu tayu chumal, chalifiyu tayu pu hueni, fei tripatuyu Ghana mapu mu. Fei amutuyu Canadá mapu mu”. Üyeu taiñ peñi lahuentuñmangei. Rupafulu rume huesaque dungu mu engu, Jehová quellufi taiñ peñi Jennings ca tañi domo ñi cüdahuelnieaeteu.

17. Taiñ peñi Jennings ñi bemün, ¿chumngechi nehuentubi quiñeque peñi ca lamngen?

¹⁷ Ñi femün taiñ peñi Jennings ca tañi  domo, rume quellufi taiñ pu peñi ca pu lamngen. Quiñe lamngen feipi: “Inaduamlu tañi rupan ti lamngen nengümüñmaeneu tañi piuque. Quisu elcünui tañi misionerongeal fei tañi lahuentuhual, fei tüfa raquiduameleneu ñi huesa duamcülehuenoal tañi rupan iñche”. Quiñe peñi ca feipi: “Mari tripantu mu loncolefun trahunche mu, huelu peñmangen quiñe cutran tañi lonco mu, fei loncolehuelan trahunche mu. Falinolu troquiufun, feimu papeltufilu iñche ñi femquen caquelu peñi ca lamngen, huesa duamelquefeneu, huelu ñi femün ti peñi Jennings nehuentucueneu”. ¿Chem quimeltueiñmu tüfa? Ruparumeliyiñ huesaque dungu mu huelu cüme chaftufiliyiñ, quelluafuiñ caquelu che ñi femal. Taiñ femün mu, caquelu pu che inayentuafeiñmu chumngechi taiñ feyentulen ca taiñ nehuencülen (1 Ped. 5:9).

18. Quiñe lamngen Nigeria mu, ¿chem quimeleiñmu ñi bemün? (Ngüneduamnge ti adentun).

¹⁸ Fentren huesaque dungu ñi rupan rume huesalcaquefi pu peñi ca pu lamngen. Por ejemplo, ti COVID-19. Aculu tüfachi cutran, quiñe lantu domo Nigeria mapu mu mülelu pichin iyael ca pichin plata niefui. Quiñe antü quiñe taza de arroz müten niefui, fei afle tati arroz, ¿chem am iyaiñ? pieyu tañi püñeñ. Fei ti ñuque feipifi: “Nielaiñ ta plata ca nielaiñ ta iyael, inayentuafiyiñ ti domo Sarepta mu mülelu. Deumayaiñ pichilehuechi iyael ca maneluhuaiñ Jehová mu” (1 Rey. 17:8-16). Petu tañi inon engu, pu peñi ca pu lamngen yeleleyu iyael epu semana ñi nieafiel engu. Fei ti ñuque quimi Jehová tañi allcütuñmaeteu. Feimu, ¿chem quimeltueiñmu tüfa? Ruparumeliyiñ huesaque dungu mu, huelu maneluuliyiñ Jehová mu doi fülconaiñ quisu meu (1 Ped. 5:6, 7).

19. ¿Chem hueyaque dungu mu upai taiñ peñi Aleksey?

 ¹⁹ Famülque mu taiñ pu peñi ca pu lamngen inacangequeingün. Peaiñ ñi rupan taiñ peñi Alexéi Yershov, Rusia mapu mu mülelu. Taiñ peñi fautizahui 1994 tripantu, feichi mu fente catrütungequelafui pu testigo ñi cüdau. Huelu rupachi tripantu mu felehuetulai. 2020 tripantu mu pu soltau malocontufingün peñi Alexéi ñi ruca, fei yeñmangei tañi nieel. Quiñeque cüyen rupalu taiñ peñi feipingei ñi juiciangeal. Huelu fei müten no. Taiñ peñi Alexéi chillcatulquefui Biblia quiñe che doi quiñe tripantu, feitachi che ellcaquechi grabaquefeyu. Fei ti video ñi grabael ti che pengelngei juicio mu. Rume huesa femngefui ti peñi.

20. ¿Chumqui taiñ peñi Aleksey tañi nehuentual tañi hueniyehun Jehová mu?

²⁰ Ñi rupan taiñ peñi Alexéi quellueyu tañi doi hueniyeafiel Jehová. Ti peñi feipi: “Tañi domo iñchiu doi quiñentrür ngillatuquefiyu Jehová. Jehová ñi quellun mu müten chaftuquefiyu feitachi huesaque dungu. Tañi papeltuafiel mu ta Biblia quelluqueneu tañi huesa duamcülenoal. Raquiduamquen tañi rupan cuifique che serfiquefilu Jehová. Ñi rupan quiñeque che mülelu Biblia mu, pengeli fente falin-ngen taiñ tüngcüleal ca maneluhual Jehová mu”.

21. ¿Chem quimpoiñ tübachi quimelün mu?

²¹ ¿Chem quimürpuiñ tüfachi chillcatun mu? Quiñeque mu ruparumeafuiñ huesaque dungu mu, huelu maneluucüleliyiñ Jehová mu quelluaiñmu llemai. Chumngechi ñi feipin ti Salmo 34:19: “Fentren üllüfün dungu mu rupaquei ti nor che, huelu Jehová montulnieyu com tüfachi dungu mu”. Raquiduamcülelayaiñ müten taiñ rupaquen huesaque dungu mu, huelu mai chumngechi taiñ quelluqueteu Jehová. Feimu ti apostol Pablo reque feipiaiñ: “Itrofill dungu mu yafüluucülequen Chau Ngünechen ñi duam mu, fei eluqueneu nehuen” (Filip. 4:13).