1. Jesús bemlu tañi hunen amatun dungu, ¿chem upaupalequebüi?

 RAQUIDUAMAIÑ ñi rupan cuifi 29 tripantu, hue conlu Jesús ñi amuldungun. Jesús, tañi ñuque ca tañi pu discipulo mangelngeingün quiñe mafün mu. Feitachi mafün ñi femngeal Caná pingechi huaria mu, püllelei Nazaret mu. Jesús ñi ñuque, María ¿hueniyepelafui ti novio ca ti novia ñi familia? ¿Feimu quelluquepelafi ñi atendeafiel pu mangelün che? Petu ñi celebrangen mu ti mafün, rupai quiñe dungu: afi pulcu. b Tüfa ¿yehuengepelafui familia mu? ¿Fentren che acupelai ti mafün mu? Fei María amui Jesús mu “ngehuelai pulcu” pifi (Juan 2:1-3). Fei ¿chumi Jesús? Femi quiñe afmatun dungu: co cüme pulcucünufi (Juan 2:9, 10).

2, 3. 1) Jesús, ¿chumngechi adümi tañi nehuen? 2) ¿Chemu manelbalngi ñi ngüneduamngeal Jesús tañi amatun dungu?

² Ñi mülepan mapu mu, Jesús femi fentren afmatun dungu. c Femngechi quellufi fentren che. Quiñe rupa Jesús elufi iyael 5.000 huentru, ca rupa mu elufi iyael 4.000 huentru. Feitachi epu rupa mu ca mülequefui domo ca pichiqueche, feimu ¿doi 27.000 che peno elufi  iyael? (Mat. 14:15-21; 15:32-38). Feichi antü mu, Jesús tremolfi fentren che nielu cutran (Mat. 14:14; 15:30, 31). Pu che pefilu Jesús ñi tremoltufiel pu cutran ca ñi ilelfiel fentren pu che, afmatulehueingün.

³ Tüfachi troquiñ mu, peaiñ quiñeque afmatun dungu ñi femün Jesús, quelluaiñmu taiñ doi maneluhual Jehová mu. Ca peaiñ Jesús ñi ñom piuquengen ca ñi cutranpiuqueyechequen, fei chumngechi inayentuafuiñ.

4. Ngüneduamliiñ Jesús tañi amatun dungu, ¿chem quimelelqueiñmu?

⁴ Inaduamliyiñ Jesús ñi femün afmatun dungu, fentrenque dungu quimürpuafuiñ Jesús mu, huelu ca quimürpuafuiñ Jehová mu. ¿Chumngelu? Jehová am elufilu ñi nehuen ta Jesús ñi femal afmatun dungu. Hechos 10:38 feipi: “Chau Ngünechen dullieyu quisu tañi nehuen mu, ca elueyu pepiluhun. Feimu huall mapu püle cümeque dungu femi, ca tremoltufi tati pu che ñi cutrancanieteu ti Huecüfü. Chau Ngünechen mülerquei Jesús engu”. Jesús com ñi feipin mu ca ñi femün mu, inayentufi tañi Chau ñi raquiduamcülen ca ñi chem duamcülen (Juan 14:9). Feimu feula peafiyiñ cüla dungu taiñ quimürpuafel Jesús ñi femün afmatun dungu.

5. ¿Chem nehuentueyu Jesús ñi bemal amatun dungu? (Mateo 20:30-34).

⁵ Jesús ca tañi Chau rume piuqueyenieiñmu. Mülepalu mapu mu, Jesús femi fentren afmatun dungu ñi quelluafiel pu cutrancaucülelu, femngechi pengeli ñi rume piuqueyechequen. Quiñe rupa epu trauma llellipueyu ñi quelluafiel (papeltunge Mateo 20:30-34). Jesús ñi cutranpiuqueyefiel mu engu, tremolfi. Griego quehun mu, tüfa raquiduameleiñmu Jesús pefilu tüfachi epu trauma, cutrantui ñi piuque. Jesús ca elufi iyael pu ngüñülelu ca tremoltufi pu lepra cutran nielu (Mat. 15:32; Mar. 1:41). ¡Felei llemai! Jesús reque, Jehová ca cutranpiuqueyequeiñmu. Fei engu rume piuqueyenieiñmu iñchiñ, ca rume hueñancüqueingün taiñ cutrancahun mu (Luc. 1:78; 1 Ped. 5:7). Jehová ca Jesús rume ayüniefi ñi afal com taiñ cutrancaqueteu.

6. Chau Dio, ¿chem nehuen elubi ta Jesús?

⁶ Jehová elufi nehuen ta Jesús ñi apümafiel huesaque dungu. Ñi femün mu afmatun dungu ta Jesús, pengeli ñi nien ta nehuen ñi apümafiel huesaque dungu iñchiñ taiñ femnoafel. Iñchiñ taiñ culpan chengen mu, cutranqueiñ ca laqueiñ. Huelu Jesús pengeli ñi nien ta nehuen taiñ lifrenentuaeteu ti culpan dungu mu (Mat. 9:1-6; Rom. 5:12, 18, 19). Cafei ñi femün mu afmatun dungu, Jesús pengeli ñi tremoltuafiel “fillque cutran” ca ñi huiñomongeltuafiel pu layelu (Mat. 4:23; Juan 11:43, 44). Jesús ca niei nehuen tañi tüngcünuafiel ti cürüftucu mahun ca ñi huehuafiel pu huesaque püllü (Mar. 4:37-39; Luc. 8:2). Müna cümei Jehová ñi elufiel nehuen ta Jesús ñi femal femngechi dungu.

7, 8. 1) Bempalu Jesús amatun dungu, ¿chumngechi maneluuqueiñmu? 2) Hue mapu mu, ¿chem amatun dungu üngümnimi (ingelnimi)?

⁷ Maneluucüleaiñ Jehová ngünenietufile mapu, com huechutripayai ñi feipicünuel. Jesús mülepalu mapu mu,  femi alünque afmatun dungu. Tüfa raquiduameleiñmu doi cümeque dungu ñi femal loncolele Jehová ñi Gobierno meu. Cümeque mongen nieaiñ, ngehuelayai cutran ca chem dungu no rume cutrancalayaiñmu (Is. 33:24; 35:5, 6; Apoc. 21:3, 4). Ngehuelayai filla. Fütraque nüyün ca fütraque cürüftucu mahun cutrancahuelayaiñmu (Is. 25:6; Mar. 4:41). Ca rume ayüucüleaiñ huiñomongetule taiñ familia layelu (Juan 5:28, 29). ¿Chem afmatun dungu ayüleimi tami peafiel hue mapu mu?

⁸ Cafei Jesús femlu afmatun dungu, ca pengeli ñi ñom piuquengen ca ñi cutranpiuqueyechequen. Iñchiñ mülei taiñ inayentuafiel ta Jesús. Taiñ doi quimal, peafiyiñ epu afmatun dungu ñi femün ta Jesús.

9. Quiñe ngapituhun mu (mabün), ¿chemu Jesús bemi quiñe amatun dungu? (Juan 2:6-10).

⁹ (Papeltunge Juan 2:6-10). Aflu ti pulcu mafün mu, Jesús ngelafui ñi femal chem no rume. Quiñe profecia no rume feipilai Jesús ñi pulcucünuafiel co, huelu Jesús raquiduami ñi chum duamcülen ti familia, ti novio ca ti novia. Raquiduamnge, afle ti pulcu tami mafün mu, ¿chum duamafuimi eimi? Yehueafuimi chi. Jesús ayülafui  femngechi dungu mu ñi rupayal ti familia, feimu cutranpiuqueyefi ca quellufi. 390 litro co doi cüme pulcucünufi. ¿Chumngelu fentren cüme pulcu deumai? Mülehuele, cangelu antü mu putungeafui feitachi pulcu. Cam ti hue curehuen fendeafui, femngechi ñi nieal ta plata. Ti hue curehuen, ¿müna mañumcülepelafui tañi femün ta Jesús?

10. Eipinge quiñeque dungu mülelu Juan capitulo 2 mu (pebinge tati adentun).

¹⁰ Cüme ngüneduamafiyiñ ñi feipin Juan capitulo 2. Versiculo 6 ca 7 pengeli Jesús ayülafui ñi afmatuaeteu pu che, feimu apol-lafi co meu ti meseng, doi mai huercüfi pu cüdauquelu ti mafün mu ñi femal. Versiculo 8 pengeli Jesús yelel-lafi pulcu tati adnielu ti mafün, doi mai feipifi pu cüdauquelu ñi femal. Jesús mallmaulai tañi pulcucünufiel mu ti co. “Putuaimün ti pulcu iñche tañi deumael” pilai.

11. Jesús tañi bemün, ¿chem quimeleiñmu?

¹¹ ¿Chem quimeltuafeiñmu Jesús tañi femün afmatufalchi dungu? Quimürpuafuiñ Jesús tañi ñom piuquengen. Jesús mallmaulai tañi pulcucünufiel ti co ca turpu mallmauquelafui tañi femürpun mu. Doi mai tañi ñom chengen mu, püramyeniefi tañi Chau müten (Juan 5:19, 30; 8:28). Inayentufiliyiñ Jesús ñi ñom piuquengen, mallmaulayaiñ taiñ femün mu. Fillque cüdau femafuiñ taiñ serfiafiel ta Jehová, huelu quisutu saquiulayaiñ, doi mai püramyenieafiyiñ ta Jehová (Jer. 9:23, 24). Com cümeque dungu femliyiñ, Jehová tañi quellun mu müten. Feimu fei müten püramyenieafiyiñ (1 Cor. 1:26-31).

12. Jesús tañi ñom piuquengen, ¿ca chumabüiñ taiñ inayentuabel?

¹² ¿Ca chumngechi inayentuafuiñ Jesús tañi ñom piuquengen? Raquiduamnge, quiñe loncolelu fentren tiempo rupaquei ñi quelluafiel quiñe hueche siervo ministerialngelu, femngechi ñi hulal tañi hunen hueupin. Rume cüme tripai ñi hueupin taiñ peñi, com pu che mülelu trahun mu ayüfingün ti hueupin. Quiñe peñi fülcontufi ti loncolelu, feipifi: “Müna cüme tripai ñi hueupin taiñ peñi, ¿felelai am?”. ¿Chumngechi lloudunguaeyu ti loncolelu? “Mai, femi llemai, iñche tañi quellufiel mu” ¿feipipeafui mai ti loncolelu? ¿Cam feipiafui ñom piuque mu: “Mai, cüme tripai tañi hueupin”? Ñom piuquengeliyiñ, ayüquelaiñ taiñ püramyengeal cümeque dungu taiñ femquen mu caquelu mu. Quimnieiñ Jehová taiñ peniefiel taiñ femquen ca ñi falintuquefiel, feimu rume ayüucülequeiñ (ca ngüneduamafuimi Mateo 6:2-4; Heb. 13:16). Taiñ inayentufiel mu ta Jesús ca taiñ ñom piuquengen mu, püramyequefiyiñ ta Jehová (1 Ped. 5:6).

13. Naín huariba püle, ¿chem pei Jesús? Ca ¿chumi? (Lucas 7:11-15).

¹³ (Papeltunge Lucas 7:11-15). Peafiyiñ chem dungu ñi femün ta Jesús. Quiñe rupa Jesús amulei rüpü mu ñi puhual Naín pingechi huaria mu. Tüfa püllelei Sunem pingechi huaria mu. Üyeu Eliseo huiñomongeltufi quiñe domo ñi püñeñ, doi 900 tripantu cuifi (2 Rey. 4:32-37). Epe puulu Naín pingechi huaria mu, Jesús pefi  pu che ñi entumequen quiñe la tañi rüngaltucuafiel. Tüfa quiñe lantu domo ñi quiñen püñeñ em, feimu tüfa rume hueñancün-ngei. Ti ñuque quisulelai, fentren che compañnieyu. Fei Jesús huitracünufi tati pu che yenielu ti la, fei femi quiñe afmatun dungu: huiñomongeltufi ti lantu domo ñi püñeñ. Tüfa tati hunen huiñomongetun ñi femel Jesús ñi nütramcael ti meli Evangelio, ca nütramcai Jesús ñi huiñomongeltufiel ca epu che.

14. Eipinge quiñeque dungu mülelu Lucas capitulo 7 mu (pebinge tati adentun).

¹⁴ Cüme ngüneduamafiyiñ ñi feipin Lucas capitulo 7. Versiculo 13 pengeli Jesús deu ñi pefiel mu ñi lladcülen ti domo, “cutranpiuqueyefi”. Jesús ¿pepelafi ti ñuque ñi ngümangümangen? Fei Jesús ca cutrantupiuquei. Jesús re huesa duamlai müten, pengelelfi ti domo ñi cutranpiuqueyefiel. Jesús piuqueyen mu feipifi ti domo: “Ngelai tami ngümayal”, fei hula quellufi. Versiculo 14 ca 15 pengeli Jesús huiñomongeltufi ti domo ñi püñeñ.

15. Jesús tañi bemün, ¿chem quimeleiñmu?

¹⁵ ¿Chem quimeltueiñmu tüfachi afmatun dungu Jesús tañi femel? Mülei taiñ cutranpiuqueyeafiel pu layeluuchi che. Iñchiñ huiñomongeltulayafuiñ pu lachi che, huelu Jesús reque cüme inaduamafuiñ chem mu taiñ quelluafiel pu layeluuchi che. Taiñ feipin ca femün mu quelluafiyiñ ca yafültucuafiyiñ, femngechi pengelaiñ taiñ cutranpiuqueyefiel engün (Prov. 17:17; 2 Cor. 1:3, 4; 1 Ped. 3:8). d Pichin dungu rume femliyiñ cam feipifiliyiñ, rume yafültucuafuiñ.

16. Chumngechi pengeli tati adentun, ¿chem quimeleiñmu quiñe lamngen tañi bemün?

¹⁶ Peaiñ ñi femün quiñe lamngen.  Quiñe rupa trahun mu ülcantungei quiñe ülcantun huiñomongetun mu. Fei ti lamngen pefi quiñe ñuque ñi ngümangümangen, ti ñuque lai tañi domo püñeñ. Ti lamngen pefilu, fülcontufi ti ñuque tañi trür ülcantual engu. Ti ñuque rume mañumi tañi mülepun trahun mu feichi antü, feipi: “Trahunhue ruca mu taiñ pu lamngen yafültucuqueiñmu, feimu rume piuqueyefiñ engün”. Jehová falintuñmaqueiñmu taiñ cutranpiuqueyefiel pu che “hueñancülelu ñi piuque”, pichin quellufiliyiñ rume (Sal. 34:18).

17. ¿Chem quimeltuiñ tübachi quimelün mu?

¹⁷ Inaduamfiliyiñ afmatun dungu ñi femel ta Jesús mülelu Biblia mu, rume yafültucuafeiñmu. ¿Chem quimeltueiñmu tüfa? Jehová ca Jesús rume piuqueyechequei. Jesús niei nehuen com ñi apümafiel huesaque dungu. Ca maneluucüleafuiñ Chau Dios ngünenietule mapu com femtripayai tañi feipicünuel. Inaduamliyiñ ñi femün Jesús, raquiduamaiñ chumngechi taiñ inayentuafiel. Papeltulmi eimi cam tami familia eimün, estudiayafuimün caquelu afmatun dungu ñi femel ta Jesús. Com tami quimürpuel nütramcayafuimi caquelu che, femngechi entuaimi rume cümeque nütram caquelu che engu (Rom. 1:11, 12).

18. Cüpalechi semana, ¿chem ngüneduamaiñ?

¹⁸ Epe aflu ñi mongen mapu mu, Jesús ca huiñomongeltufi quiñe cüme hueni. Meli antü niefui ñi lalen mu. Cüpalechi troquiñ mu peaiñ chem quimeltueiñmu ñi femün ta Jesús ca chumngechi quelluqueiñmu doi maneluhual ti huiñomongetun mu.