1. ¿Chem ayüqui Jehová taiñ bemal?

 QUIÑE curehuen rume ayüuquei hue choyün mu tañi pichiche. Rume piuqueyefingu ca ayüqueingu tañi tremcüleal. Tremnole, rume raquiduamcüleafuingu. Ca femngechi hue quimfiel mu ta Jehová iñchiñ, pichiche reque feleiñ, fei Jehová rume ayüuquei iñchiñ mu. Huelu ayüquelai taiñ rumel “pichiche reque” feleal (1 Cor. 3:1). Ca feipieiñmu taiñ “fütaqueche reque” raquiduamal, taiñ cüme cristianongerpual (1 Cor. 14:20).

2. ¿Chem ramtun huiñoldunguaiñ tübachi papiltun mu?

² Tüfachi troquiñ mu ngüneduamaiñ: ¿chem raquiduamquei ca chumquei quiñe cüme cristiano? ¿Chumafuiñ taiñ cüme cristianongerpual? ¿Chumngelu duamnieiñ taiñ cüme ngüneduamafiel Biblia, femngechi taiñ doi cüme hueniyeafiel Jehová? Ca, ¿chumngelu fente falin-ngei taiñ cuñiutucuhual?

¿CHEM AM QUIÑE CRISTIANO QUIMCHENGELU?

3. ¿Chem am quiñe cristiano quimchengelu?

³ Biblia mu, ti dungun “fütaqueche” griego quehun mu ca feipilei quiñe cristiano quimchengelu, cüme hueniyefilu ta Jehová ca nehuencülelu ñi feyentun (Efes. 4:13). Quiñe pichiche fentecünuquelai tañi tremün, doi mai fütachengerpuquei. Ca femngechi iñchiñ hueniyefiel mu ta Jehová, fentecünuquelaiñ. Tremcüleiñ reque, fei taiñ quim cristianongerpual (1 Tim. 4:15). Com iñchiñ, huechengeliyiñ cam fütaquechengeliyiñ rume, quim cristianongerpuafuiñ. ¿Chumngechi quimürpuafuiñ taiñ cüme cristianongen? Peafiyiñ.

4. ¿Chumqui pu cristiano quimchengelu?

⁴ Pu quimque cristiano inaquefingün com ñi feipieteu  ta Jehová. Quisu engün tañi ayüqueel müten femquelai. Culpafengefulu rume ca huelulcauqueingün, huelu eluucüleingün ñi femal Jehová tañi ayüqueel. Huengetui tañi chumngechi chengen ca eluucüleingün ñi raquiduamal Jehová reque (Efes. 4:22-24). Duamlaingün tañi com huirintuculelngeal engün tañi femal, doi mai eluhuingün ñi inayafiel cümeque ngülam mülelu Biblia mu. Ca ngüneduamlu engün tañi chumal, eluhuingün tañi huechunenturpual (1 Cor. 9:26, 27).

5. ¿Chem upaabüi pu cristiano petu quimchengenolu? (Efesios 4:14, 15).

⁵ Tati pu cristiano petu quimchengenolu inei rume ngünencayafeyu. Inanierpuafuingün pu “ngünencachefe ñi coilaque quimeltun”, feyentuafuingün tati coilaque noticia ca ñi feipiquen tati pu apostata (papeltunge Efesios 4:14, 15). a Ütrirchequei, cüme yeuquelai caquelu engün ca chem dungu mu rume lladcüfemqueingün. Cüdautuquei ñi famentuafiel ti huesaque dungu (1 Cor. 3:3).

6. Quiñe cristiano, ¿chumngechi quimchengepoqui? Eipinge quiñe inayentun (pebinge pu adentun).

⁶ Deu peiñ, Biblia pengeli chumngechi ñi quimchengerpun quiñe cristiano trürümngeafui tañi chumngechi tremcülerpuquen pu pichiqueche. Tati pu pichiqueche fentren dungu quimlaingün, feimu duamniei ñi adniengeal ca cuñiutucungeal engün. Rumelu quiñe calle mu rupapeyüm auto, tati ñuque huitratu rulmeafui tañi püñeñ. Doi pichi alühuele, quisu elcünuafeyu chi ñi rumeal ti calle mu, huelu feipiayu tañi epuñpüle adquintual. Alühuele, duamniehuelai tañi feipimequengeal, quisutu cuidahuafui. Ca femngechi rupayafui ti trahunche mu. Pu cristiano petu quimchengerpunolu duamniei ñi quelluaeteu pu quimque cristiano, femngechi ñi cüme femal engün ca ñi püntütripanoal ta Jehová mu. Huelu tati pu quimque cristiano cüme raquiduamafuingün  chem pin ta Biblia, femngechi ñi ayühuelafiel ta Jehová tañi femün mu.

7. Pu cristiano quimchengelu, ¿duamningün ñi quellungeal (incangeal)?

⁷ ¿Feipiafuiñ tati pu quimque cristiano ñi duamnienon tañi quellungeal? Femlai. Quiñeque mu quisu engün ca duamniei tañi quellungeal. Trürlaingün tati pu cristiano mu petu quimchengerpunolu. Quisu engün ayüquei tañi feipingeal tañi chumal engün, huelu pu quimque cristiano femquelaingün. Doi mai eluuqueingün ñi quelluaeteu ca ñi ngülamtuaeteu pu peñi ca lamngen doi quimchengelu. Femlu rume, quimtucunieingün “caque quiñeque iñchiñ juzgayaiñmeu Chau Ngünechen” (Rom 14:12).

8. ¿Trüringün com pu cristiano quimchengelu?

⁸ Tati pu quimque cristiano com trürlai tañi chumngechi chengen. Quiñeque rume nieingün quimün, caquelu doi nehuen piuquengei. Ca quiñeque rume poyechefengei, caquelu rume cutranpiuqueyechequei. Cafei trürlayafui tañi dulliel mu engün. Quiñeque mu tati Biblia feipinole chem chumngeal quiñe dungu mu, tati pu quimque cristiano trürlayafui tañi dulliel mu, huelu trür femngechi ayühuelafuingün ta Jehová. Femngechi rupale, tati pu quimque cristiano juzgauquelaingün, doi mai yafüluuqueingün tañi quiñeucüleal (Rom. 14:10; 1 Cor. 1:10).

¿CHUMABÜIÑ TAIÑ DOI CÜME CRISTIANONGEPOL?

9. ¿Chemu quiñe cristiano trürlai quiñe püchüche mu?

⁹ Feipiafuiñ tati pu pichiqueche quisu ngünehun tremquei, huelu femngechi femquelai tati pu cristiano. Tañi re rupan mu ta tripantu quimchengerpuquelai. Mülei fillque dungu ñi femal tañi quimchengerpual. Raquiduamaiñ tañi femün tati pu Corinto che. Quisu engün cüme llohuingün feitachi cümeque dungu, fautizahuingün, llohuingün Jehová tañi nehuen ca rume quimeltueyu tati apostol Pablo (Hech. 18:8-11). Huelu rupafulu rume quiñeque tripantu, quiñeque cristiano petu quimchengerpulafuingün (1 Cor. 3:2). ¿Chumafuiñ iñchiñ taiñ femnoal quisu engün reque? Peafiyiñ.

10. ¿Chumabüiñ taiñ doi cüme cristianongepol? (Judas 20).

¹⁰ Taiñ quim cristianongerpual, hunelu mu mülei taiñ ayünieal taiñ femal. Pu cüme duamcülelu tañi quimchengenon mu felecayai müten (Prov. 1:22). Caque quiñeque iñchiñ mülei taiñ eluucüleal taiñ doi hueniyeafiel ta Jehová. Feita iñchiñ taiñ cüdau tati, feimu inei no rume feipiyahul-layaiñmu taiñ femal (papeltunge Judas 20). Inaduamuhulmi tami petu quim cristianongerpunon, ngillatuafimi ta Jehová, fei eluaimu ‘tami yafüluucüleal ca tami cüpa cüdahual’ (Filip. 2:13).

11. Taiñ doi cüme cristianongepol, ¿chumngechi quelluqueiñmu Jehová? (Efesios 4:11-13).

¹¹ Jehová feipiquelaeiñmu quisu taiñ duam mu taiñ quimchengeal. ¿Chemu feipiafuiñ? Quisu elueiñmu pu loncolelu trahunche mu, fei engün quelluqueiñmu taiñ doi hueniyeafiel ta Jehová ca taiñ inayentuafiel ta Cristo (papeltunge Efesios 4:11-13). Chau Jehová ca eluqueiñmu tañi nehuen, femngechi taiñ raquiduamal Cristo reque (1 Cor. 2:14- 16). Cafei elueiñmu tati meli Evangelio Biblia mu, feita enseñalqueiñmu ñi chumün Jesús mülepalu mapu mu. Iñchiñ inayentufiliyiñ Jesús tañi femün, chumngechi tañi dungun ca chumngechi ñi raquiduamquen, femngechi quim cristianongerpuaiñ.

MÜNA BALIN-NGI TAIÑ DOI QUIMÜN NIEAL

12. ¿Chem am tati “hunenque quimelün Cristo mu”?

¹² Papeltufiel mu Biblia iñchiñ, feyentuiñ “tati hunenque dungu taiñ quimelelngeel ta Cristo meu”. ¿Chem coneltulei tüfachi quimeltun meu? Nor raquiduamtual taiñ culpan mu, feyentual Chau Ngünechen mu, tati fautizahun ca ñi huiñomongetual pu layelu (Heb. 6:1, 2). Com tati pu cristiano mülei ñi quimafiel tüfachi falinque quimeltun. Feimu Pedro quimeltufilu pu che feichi Pentecostés mu, nütramcafi feichi dungu (Hech. 2:32-35, 38). Cristo tañi discipulongeal, mülefui taiñ feyentual tüfachi quimeltun mu. Feimu Pablo feipi feyentunolu tati huiñomongetun mu, rüfngechi cristianongelayafui (1 Cor. 15:12-14). Felei llemai, tüfachi quimeltun rume falin-ngei, huelu taiñ quim cristianongerpual mülei taiñ doi quimün nieal.

13. ¿Chumaiñ taiñ bemal Hebreos 5:14 ñi eipin? (Pebinge pu adentun).

¹³ Ca femngechi mülei taiñ adümafiel feichi quimeltun “fütaqueche ñi iyael” reque felelu. ¿Chem am tüfa? Tüfa mu coneltulelai müten Jehová tañi ley, ca coneltulei Jehová tañi ngülam, feita pengelqueiñmu chem ñi raquiduamqueel ta Jehová. Taiñ cümelcayaeteu feitachi quimün, papeltuafiyiñ Biblia, raquiduamaiñ taiñ papeltuqueel mu ca inayafiyiñ taiñ mongen mu. Femliyiñ, ayühuelafiyiñ ta Jehová taiñ femqueel mu (papeltunge Hebreos 5:14). b

14. Pablo, ¿chumngechi quellubi pu Corinto che tañi doi cüme cristianongepol?

 ¹⁴ Mülenon mu quiñe ley Biblia mu, tati pu quim cristianongenolu quimquelaingün tañi chumal engün. Quiñeque raquiduamqueingün “tripanolu am Biblia mu, chumafuiñ rume” piqueingün. Caquelu, “doi cümeafui ñi elungeal quiñe ley” piafuingün. ¿Femngechi dungu mu rupapelaingün pu Corinto che? Fei engün quimlafuingün ñi ingeafel cam ingenoafel tati ilo chalintuculelngelu tati pu coilaque dios. Feimu feipifingün chi ta Pablo ñi elcünuel quiñe ley. Pablo feipilaeyu tañi chumal engün, doi mai feipieyu caque quiñeque tañi dullial engün. Feimu quimeltulelfi fillque ngülam tripalu Biblia mu, femngechi ñi cüme duamcüleal engün tañi dulliel mu ca ñi huelulcanoafiel ta caquelu che (1 Cor. 8:4, 7-9). Pablo quellufi tati pu Corinto che ñi quim cristianongerpual engün. Ngelafui tañi feipingeal chem tañi chumal engün, doi mai mülefui quisu tañi raquiduam mu ñi ngüneduamal engün.

15. Pablo, ¿chumngechi quellubi pu Hebreo che tañi doi cüme cristianongepol?

¹⁵ Pablo ñi huirintuculelfiel tati pu hebreo elueiñmu ca quiñe falin quimeltun. Tati pu hebreo che poyequefuingün ta Jehová, huelu eluulaingün tañi doi hueniyeafiel. Feimu Pablo feipieyu: “Huiño duamtunieimün tamün lichitual, fütaqueche ñi iyael no” (Heb. 5:12). Llouhuelafingün tati hueque quimeltun ñi hulün ta Jehová tati trahunche mu (Prov. 4:18). ¿Chumngelu feipiafuiñ? Lalu ta Cristo, fentepui Moisés tañi ley. Huelu rupafui rume 30 tripantu, quiñeque cristiano judio tuhun-ngelu petu feipimequefuingün tañi inangeal Moisés tañi ley (Rom. 10:4; Tito 1:10). Fütra cuifi rume rupafui, huelu quisu engün petu duamtuquefuingün tati ley. Feimu Pablo huirilelfi pu hebreo ñi quimtucual engün tüfachi falinque quimeltun Biblia meu. Ca quellufi engün ñi ngüneduamal tati hueque quimeltun. Ñi poyeafiel ta Jehová duamnielafui ñi inayafiel Moisés tañi ley, doi mai ñi feyentual ta Jesús mu. Cafei quellufi ñi nehuencüleal  ca ñi amuldunguleal caiñetungen mu rume (Heb. 10:19-23).

¿CHEMU CUÑIUTUCUHUABÜIÑ?

16. ¿Ca chumabüiñ?

¹⁶ Yafüluhuaiñ taiñ quim cristianongerpual, huelu fentecünulayaiñ taiñ doi hueniyeafiel ta Jehová, feimu mülei taiñ cuñiutucuhual (1 Cor. 10:12). Mülei taiñ ngüneduamuhual, femngechi taiñ doi cüme cristianongerpual (2 Cor. 13:5).

17. Tati chillca huirintuculelngelu pu Colosas che mu, ¿chem quimeleleiñmu?

¹⁷ Pablo huirintuculelfilu pu Colosas che, ca ngülamtufi tañi quimchengerpual ca ñi rumel amuleal tañi doi hueniyeafiel ta Jehová. Feitachi pu cristiano deu quimchengefuingün, huelu Pablo feipieyu ñi cuñiutucuhual tañi ngünencanoaeteu coilaque dungu (Col. 2:6-10). Epafras ca cüme quimniefui tati pu Colosas che, fei llellipuquefui quisu engün mu tañi rumel quimchengeal (Col. 4:12). ¿Chem quimeltueiñmu tüfa? Pablo ca Epafras cüme quimniefui re femngechi quimchengerpuquelai ta che, doi mai mülei ñi yafüluhual ca ñi quelluaeteu Jehová. Quisu engu ayüniefui pu Colosas che ñi rumel quim cristianongerpual rupafule rume huesaque dungu mu.

18. Quiñe cristiano quimchengelu cuñiutucuunole, ¿chem upaabüi? (Pebinge ti adentun).

¹⁸ Pablo ca feipi quiñe quim cristiano cuñiutucuunole, femafui huesaque dungu, fei hueniyehuelayafeyu ta Jehová. Pinole ñi allcütuafiel ta Jehová, rume püntütripayafui quisu mu, fei eluulayafui ñi repentiutual ñi perdonangeal. Cümecünui tati pu hebreo che ñi rupanon femngechi dungu mu (Heb. 6:4-9). ¿Fachantü cai? Tati pu amuldunguhuequenolu ca tati pu huemünentungelu ñom piuquengele ca repentiutule, perdonangeafui. Huiñotule Jehová mu engün, duamniei tañi quellungeal (Ezeq. 34:15, 16). Feimu pu loncolelu feipiafui quiñe quim peñi cam lamngen ñi quelluafiel pu huiñotulu Jehová mu, femngechi ñi hueniyetuafiel.

19. ¿Chumaiñ?

¹⁹ Amuleaimi tami quim cristianongeal. Doi quimafimi falinque quimeltun Biblia mu mülelu, ca eluhuaimi tami doi inayentuafiel Jehová tañi raquiduam. Deu quim cristianongelmi, amuleaimi tami rumel hueniyenieafiel ta Jehová.