1. ¿Chumcüli pu rüb huenupüramquebilu Jehová, ca chumabüiñ?

 FACHANTÜ mülei fentren millonque che quiñehun serfiquefilu ta Jehová ca femmequei cümeque dungu. Com engün coneltulei Jehová tañi troquiñche mu, quiñeucüleingün ca tüngcüleingün. Fei engün eluucüleingün rumel ñi serfiniefiel Jehová ca ñi püntütripanoal quisu mu. Ca eluucüleingün ñi fültucupayafiel Jehová mu fentren che, femngechi com quiñehun serfinieafiel Jehová.

2. ¿Chemu amatubali tübachi cüme beleal?

² Tüfachi mapu mu rume mülei huesaque dungu, üdehun ca cuñihun dungu mülei. Felelu rume, Jehová ñi duam mu püramyequefiyiñ tüngcülen ca quiñeucülen mu (1 Juan 5:19; Apoc. 12:12). Jehová quimniei Huecüfü ñi ngünenieel rume huesalcachequei. Huelu Jehová quelluquefi tañi pu che tañi cüme feleal, femngechi ñi ayühun mu serfinieaeteu. Ñi cüme felen Jehová tañi pu che, Biblia mu trürümngei quiñe ruca mu cheu “ñi ellcahual” ca “quiñe rayülechi lelfün reque cüme huitrucongelu” (Is. 4:6; 58:11). Feimu lle Jehová tañi quellun mu com iñchiñ ayüucülequeiñ ca cüme felequeiñ müleliyiñ rume afaelchi antü mu (Is. 54:14; 2 Tim. 3:1).

3. Isaías 65 ñi eipin, ¿chumngechi bemtripai cuibi mu?

³ Jehová, Isaías mu, feipicünui chem mongen ñi nieal engün ñi pu serfiqueteu. ¿Chumngechi huechutripai ñi feipicünuel Isaías capitulo 65? Hunelu mu, femtripai 537 tripantu petu ñi mülepanon Jesús. Feichi mu pu  judio repentiucülelu lifrecünungetuingün Babilonia mu ñi huiñotual Jerusalén huaria mu. Fei Jehová quellufi tañi pu che ñi cüme eltuafiel Jerusalén huaria. Ca cüme eltufingün Chau Dios ñi ruca ñi huiño püramyengetual ta Jehová (Is. 51:11; Zac. 8:3).

4. Isaías 65 ñi eipin, ¿chumngechi bemtripamequi?

⁴ Ñi feipin ta Isaías ca femngechi femtripai 1919 tripantu. Feichi mu, Jehová tañi pu che lifretripatuingün ti Fütra Babilonia, femngechi huall mapu mu doi fentren che conürpuingün Jehová ñi pu che mu. Com feitachi pu che eluhuingün ñi amuldungual, femngechi mülerpui fentren trahunqueche. Fentren huentru ca domo quehuafengequefulu ca pod mongen yeniequefulu, huelu huecünutui tañi mongen engün, femngechi ñi ayühuelafiel ta Chau Jehová (Efes. 4:24). Cüpalechi antü mu, tañi feipicünuel ta Isaías com femtripatuai feichi ayüfalngetule ti mapu, huelu famülque mu ca cümelcangeiñ. Feula peaiñ chem cümeque dungu llouqueiñ taiñ serfifiel mu Jehová, ca chumngelu turpu elcünulayafiyiñ.

RÜB HUENUPÜRAMÜN CÜMELCAQUEIÑMU

5. Isaías 65:13 ñi eipin, ¿chem cümelcan llouquiiñ?

⁵ Cüme feleiñ ca füshcüleiñ. Isaías trürümüñmafi ñi mongen ti pu serfiquefilu ta Jehová ca pu serfiquenofilu (papeltunge Isaías 65:13). Jehová eluniequefi tañi pu che com tañi duamnieel, femngechi ñi fülconcüleal engün quisu mu. ¿Chumngechi quelluqueiñmu? Eluniequeiñmu tañi nehuen, ti Biblia ca fillque quellu taiñ inaduamafiel ti Biblia, femngechi taiñ iyal, pütocoal ca taiñ ayüucüleal (ca ngüneduamnge Apocalipsis 22:17). Huelu pu serfiquenofilu Jehová ngüñüleingün, huihuleingün ca yehueleingün. Hueniyequelafi ta Jehová ca quimlafi engün (Amós 8:11).

6. Joel 2:21-24 ñi eipin, ¿chem dungu eluqueiñmu Jehová, chem pengelqui, ca chumngechi cümelcaqueiñmu?

⁶ Joel feipicünui Jehová eluafi tañi pu che com ti iyael ñi duamtunieel: fün quetran, pulcu ca oliva aceite. Tüfa pengeli Jehová eluafi tañi pu che com tañi duamtunieel tañi cüme feyentuleal (Joel 2:21-24). Taiñ antü meu Jehová ca eluqueiñmu cümeque iyael reque. Eluqueiñmu Biblia, fillque publicacion, taiñ pagina internet, trahun ca fütraque trahun. Tüfa fill antü quelluqueiñmu, femngechi taiñ cüme feleal ca füschümpiuqueleal reque.

7. ¿Chemu bente ayüucüli taiñ piuque? (Isaías 65:14).

⁷ Ayüucüleiñ taiñ cüme felen mu. Pu cristiano rume mañumniefiyiñ Jehová com taiñ elueteu, feimu ‘ayühun mu huaqueñcüleiñ taiñ cüme piuquengen meu’ (papeltunge Isaías 65:14). ¿Chumngelu fente ayüucüleiñ? Rume yafültucueiñmu Biblia tripachi rüf dungu ca Jehová ñi feipicünuel. Cafei nieiñ quiñe cüme maneluhun cüpalechi antü meu Jesús tañi lan mu. Ayühun mu nütramcaqueiñ tüfachi dungu taiñ pu peñi ca lamngen iñchiñ (Sal. 34:8; 133:1-3).

8. ¿Chemu quimbalngi pu rüb huenupüramquebilu Jehová?

⁸ Jehová tañi pu che quimfalcülei tañi quiñeucülen ca piuqueyehun mu (Col. 3:14). Taiñ piuqueyehun raquiduamelqueiñmu chumlerputual taiñ mongen  ti hue mapu mu: doi piuqueyehuaiñ ca doi quiñeucüleaiñ. Quiñe lamngen hue quimfilu müten pu testigo feipi: “Tañi pu familia no rume iñche ayühuelquelafeneu. Hue quimfilu iñche pu testigo, inaduamün chumngechi rüf piuqueyeuquei ta che”. Feimu llemai com tuchi duamnielu ñi ayüucüleal coneltulepe Jehová tañi pu che mu. Quiñeque che quimnofilu Jehová huesa dunguyeafeiñmu, huelu Jehová ca com tañi pu poyequeteu quimniei taiñ cüme femquen (Is. 65:15).

9. Billque dungu taiñ cutrancaquetu mu, ¿chumai Jehová? (Isaías 65:16,17).

⁹ Cüme duamcüleiñ. Isaías 65:14 feipi pu pinolu ñi serfiafiel Jehová ‘ngümayaingün tañi cutrantupiuquelen meu, ca eyütuaingün fente tañi hueñancün mu’. Jehová tañi pu che ca cutrancauquei, huelu Jehová elueyu maneluhun. Feipi: “Com ti hueñancün dungu ñi rupaquefel cuifi, ngoimanentungeai. Ellcaleai iñche tañi nge mu” (papeltunge Isaías 65:16, 17). Cüpalechi antü mu, Jehová apümafi com huesaque dungu ca quelluaiñmu taiñ ngoimanentuafiel com taiñ hueñancün.

10. ¿Chemu mañumcülimi tami trahuluhual pu peñi pu lamngen? (Pebinge ti adentun).

¹⁰ Rupaliyiñ rume huesaque dungu mu huelu amuliyiñ ta trahun mu, cüme duamcüleiñ. Trahun mu ngoimanentutuqueiñ huesaque dungu taiñ rupan. Fei iñchiñ, ¿chumngechi quelluntucuafuiñ ñi quiñeucüleal ca ñi tüngcüleal Jehová ñi troquiñche? Eluhuaiñ taiñ adnieaeteu Jehová ñi nehuen, femngechi pengelaiñ piuqueyehun, ayüucüleaiñ, tüng chengeaiñ, fürenecheaiñ ca ñom chengeaiñ (Gál. 5:22, 23). Rume mañumcüleiñ taiñ coneltulen Jehová tañi pu che meu. Püntütripanoliyiñ tañi troquiñche mu, peaiñ Jehová chumngechi femürpuai tañi feipin ñi deumayal “hue huenu ca quiñe hue mapu”.

11. ¿Chum duamcüleabüiñ taiñ rüb huenupüramquebel Jehová? (Isaías 65:18, 19).

¹¹ Mañumcüleiñ ca yafüluuqueiñ. Isaías feipi chumngelu Jehová ñi pu che ayüucülequei. Quisu tañi duam mu llemai cüme felequeiñ (papeltunge Isaías 65:18, 19). Rüfcünu, Jehová adniequeiñmu quelluafiel pu che ñi quimürpuafiel ta Jehová ca ñi coneltual tañi troquiñche mu. Ayüucüleiñ taiñ quimfiel  ti rüf dungu, feimu ayüqueiñ taiñ quimelelafiel caquelu pu che (Jer. 31:12).

12. Papiltuqueyüm eimi Isaías 65:20-24 ñi eipin, ¿chum duamcülimi ca chemu?

¹² Com iñchiñ coneltulelu Jehová tañi pu che mu nieiñ quiñe maneluhun, feimu rume mañumcüleiñ. Fentren cümeque dungu mületuai ti hue mapu mu. Biblia feipi: “Fei mu mülehuelayai pichiqueche pichin antü mu mongelealu, ca mülehuelayai fütaqueche lalu petu ñi puunon tañi antü”. “Deumarucayaingün, ca fei mu müleaingün, anümaingün ofad ca iñmuaingün ñi fün”. ‘Ngünam cüdaulayaiñ’ Jehová am taiñ quelluaeteu. Cuñihun-ngechi dungu mülehuelayai, ayüucüleaiñ ca cüme mongen nieaiñ. Jehová quimai chem taiñ duamnieel ‘petu taiñ llellipunofiel rume’. Cafei Jehová eluaiñmu com taiñ duamnieel (Is. 65:20-24; Sal. 145:16).

13. Isaías 65:25 ñi eipin, ¿chumngechi pengeli chem dungu cacünoabüi pu che tañi huenupüramabel Jehová?

¹³ Tüngcülequeiñ. Fentren che huapo cullin reque felequefuingün, huelu Jehová ñi quellun mu cacünutuingün tañi mongen, ñom chengetuingün (papeltunge Isaías 65:25). Yafüluhuingün tañi cüme chengetual (Rom. 12:2; Efes. 4:22-24). Iñchiñ, Jehová tañi pu chengen, culpan chengeiñ ca fillque tuhun-ngeiñ. Femfulu rume, Jehová ñi duam mu, quiñeucüleiñ, piuqueyeuqueiñ ca tüngcüleiñ (Tito 2:11). Taiñ Chau Jehová Com Nehuen Nielu femürpuquei tüfa.

14. Quiñe peñi tañi mongen mu, ¿chumngechi bemtripai Isaías 65:25?

¹⁴ ¿Rüfcünu feingepei mai quiñe che cacünutuafel tañi mongen? Mai, feingei. Peaiñ ñi rupan quiñe huentru. Nielu 20 tripantu, quehuatufengefui ca pod mongen yeniequefui. Fentrenque rupa carceltucungei, hueñei auto ca caquelu huesaque dungu femquefui, rumel quehuatuyauquefui. Huelu quimeltungei Biblia ñi rüf dungu ca eluhui ñi amual ta trahun mu, feimu ngüneduami quiñe rume falin dungu tañi femal: tañi poyeafiel ta Jehová quiñentrür pu peñi ca pu lamngen engün. Tüfachi huentru fautizahui, fei raquiduamquei chumngechi ñi femtripan Isaías 65:25 quisu tañi mongen mu. Auca cullin reque felequefui, feula ñom piuquengetui ufisa reque.

15. ¿Chemu quelluabiiñ caque che tañi conal tati rüb huenupüramün mu, ca chumquiiñ?

¹⁵ Isaías 65:13 ellaca mu feipi: “Tüfa ñi feipiel tati Ñidol Ngünechen Jehová”. Com tañi feipicünuel femtriparpuquei (Is. 55:10, 11). Iñchiñ taiñ serfiquefiel Jehová tüngcülen mu ca quiñeucülen mu rüf femtripamequei. Jehová elcünui quiñe saquin troquiñche tañi püramyeaeteu. Taiñ coneltulen tüfachi fütra familia mu, feimu tüngcüleiñ hualloñmanieliyiñmu rume huesaque dungu (Sal. 72:7). Feimu duamnieiñ quelluafiel fentrenque che conpayal Jehová tañi troquiñche mu. Fei, ¿chem chumaiñ? Quelluafiyiñ ñi inanierpuafiel ta Jesús (Mat. 28:19, 20).

¿CHUMNGECHI QUELLUABIIÑ CAQUE CHE TAÑI CONAL TATI RÜB HUENUPÜRAMÜN MU?

16. ¿Chemu ayüabüi quiñe che ñi conal tati rüb huenupüramün mu?

¹⁶ ¿Chem mülei taiñ femal iñchiñ caquelu che ñi ayühunquechi conpayal Jehová ñi troquiñche mu? Inayentuafiyiñ  ta Jehová, fei obligaquelafi pu che tañi serfiaeteu, huelu mai piuqueyen mu fültucupaquefi (Juan 6:44; Jer. 31:3). Cüme piuquengechi che deu quimfilu Jehová fente ñi piuqueyeteu ca ñi chumngechi chengen, fei pürüm ayüquei tañi fülconpayal quisu mu. Feimu taiñ cüpalafiel caquelu che Jehová ñi troquiñche mu, ¿chumngechi chengeaiñ?

17. ¿Chumngechi quelluabiiñ caque che tañi conal tati rüb huenupüramün mu?

¹⁷ Iñchiñ pengel-liyiñ taiñ piuqueyehun ti trahunche mu, femngechi caquelu che cüpa conpayai Jehová tañi troquiñche mu. Cuifi mu, quiñeque che feyentuquenolu feipifingün pu cristiano Corinto mu: “Rüfcünu llemai Chau Ngünechen mülerquei ta eimün meu” (1 Cor. 14:24, 25; Zac. 8:23). Feitachi pu che, ¿hue amupelai trahun mu, feimu femngechi feipingün? Ca femngechi duamqueiñ pu che ñi femngechi raquiduamal hue amulu taiñ trahun mu. Feimu falintufali tüfachi ngülam: “Com eimün cüme yeucülemün” (1 Tes. 5:13).

18. ¿Chemu ayüabüi quiñe che ñi conal Jehová tañi pepicaucülechi trahunche mu?

¹⁸ Mülei taiñ cüme peafiel taiñ pu peñi, pu lamngen chumngechi penieyu Jehová. Peñmayafiyiñ tañi cüme piuquengen engün ca inaduamlayafiyiñ tañi huelulcauquen, cüpalechi antü mu huelulcauhuelayaingün. Inayafiyiñ feitachi ngülam: “Duamtuniehuaimün, cutranpiuqueyehuaimün, ca hueluquentu perdonahuaimün com piuque mu” (Efes. 4:32). Femngechi yafcauliyiñ taiñ pu peñi, pu lamngen iñchiñ, cümelcaucüleaiñ piuqueyehun mu. Femngechi com pu che duamlu tañi piuqueyengeal  ayüaingün tañi conal Jehová tañi troquiñche mu. a

ELCÜNOLAAIÑ RÜB HUENUPÜRAMÜN

19. 1) Quiñeque che huiñotulu rüb huenupüramün mu, ¿chem eipingün? (Pebinge hudamngechi dungu “ Huiñotuingün Jehová tañi trahunche mu”). 2) ¿Chumaiñ? (Pebinge tati adentun).

¹⁹ ¡Müna cüme dungu coneltuleal Jehová tañi troquiñche mu! Famülque mu, doi fentren che püramyequefi ta Jehová, doi quiñeucüleiñ ca piuqueyeuqueiñ. Rumel mañumnieafiyiñ Jehová elueteu tañi troquiñche ca ñi cüme felen. Pu che ayüle ñi füshcüleal, ayüucüleal, tüngcüleal ca cüme duamcüleal, coneltulepe Jehová tañi troquiñche mu ca turpu famentuuquilpe. Cuñiutucuhuaiñ, Huecüfü quintuyahuli chumngechi taiñ ngünencayaeteu ca püntünentuaeteu Jehová ñi troquiñche mu (1 Ped. 5:8; Apoc. 12:9). Turpu eluulayaiñ taiñ ngünencayaeteu. Eluhuaiñ com taiñ piuque mu ñi lifcüleal, quiñeucüleal, piuqueyeucüleal ca tüngcüleal Jehová tañi troquiñche.