1, 2. 1) ¿Chem am tati yabcan ca chumngechi huehuabiiñ? (Pebinge “Balin dungu”). 2) ¿Chem peaiñ billque papiltun mülelu tübachi revista mu? (Pebinge dungu “Tati papiltulelu ñi quimal”).

 ¿AYÜAFUIMI tami quimal tunte tami piuqueyenieteu Jehová? Taiñ quimal, cümeafui taiñ estudiayal Chau Dios ñi femün taiñ montulaeteu ti culpan ca lan dungu meu. a Ti culpan quiñe caiñe reque felei, iñchiñ taiñ duam mu pepi chaftulayafuiñ. Taiñ culpafe chengen mu com larpuqueiñ (Rom. 5:12). Huelu mülei cüme dungu: rüf maneluuqueiñ Chau Jehová taiñ montulaeteu ti culpan dungu mu.

² Jehová doi 6.000 tripantu yeniei ñi quelluniefiel che tañi hueniyeaeteu culpafengelu rume engün. ¿Chumngelu? Rume piuqueyenieiñmu. Chau Jehová deumafilu müten pu che, rume piuqueyefi. Feimu eluucülequei ñi femal fütraque dungu taiñ quelluaeteu ñi chaftuafiel ti culpan dungu. Chau Dios quimniei ti culpan yeaiñmu taiñ layal. Femlu rume ayüquelai inei no rume ñi layal, doi mai taiñ nieal rumel mongen (Rom. 6:23). Ca ayüniei eimi tami rumel mongeleal. Tüfachi chillcatun mu inaduamaiñ cüla ramtun: 1) ¿chumi Jehová tañi eluafiel quiñe maneluhun pu che? 2) Cuifi mu, ¿chumi pu  che ñi ayühulafiel ta Jehová culpafengelu rume engün? Ca 3) ¿chumi Jesús ñi montulafiel pu che ti culpan ca lan dungu mu?

¿CHUMI JEHOVÁ TAIÑ ELUETU MANELUHUN?

3. Adán, Eva engu, ¿chumngechi yabcabengepoingu?

³ Chau Jehová deumafilu ta Adán Eva engu ayüniefui tañi ayüucüleal. Feimu elufi ñi niehual engu, elufi cüme mülehue ca falin cüdau: ñi apolafiel ti mapu pu che mu ca com mapu ñi adelcaleal ti Edén reque. Quiñe dungu müten pedifi ñi femnoal engu, femülmu layaimu pifi. Huelu quimnieiñ chem ñi rupan. Quiñe huesa püllü piuqueyenofilu pu che ca Jehová no rume ngüchaltucufi Adán engu Eva ñi allcütunoafiel ta Jehová. Fei engu feyentufingu ta Huecüfü, fei culpaingu Chau Jehová mu. Feichi mu müten coni tañi cutrancahun, fücharpuingu ca larpuingu (Gén. 1:28, 29; 2:8, 9, 16-18; 3:1-6, 17-19, 24; 5:5).

4. Jehová, ¿chemu üdenebi tati yabcan? ¿Chemu quelluqueiñmu taiñ hueichaabel? (Romanos 8:20, 21).

⁴ Ñi rupan Edén mu pengeli Jehová ñi rume üdequefiel ti culpan dungu. Ti culpan püntünentuqueiñmu Chau Jehová mu, feimu larpuqueiñ (Is. 59:2). Huecüfü üdequefi ta Chau Jehová ca tati pu che, feimu ngüchaltucufi Adán ca Eva ñi culpayal, ca amulei ñi ngüchaltucuchequen famülque mu. Huecüfü, ¿raquiduampelai tañi hueutripan Edén mu? Femi chi. Huelu quimtuculai fente ñi piuqueyechequen ta Chau Jehová. Catrütulafi chem ñi ayüqueel Jehová Adán ca Eva ñi pu cüpanche mu. Quisu rume piuqueyefi pu che, feimu feichi mu müten elufi quiñe maneluhun com pu che (papeltunge Romanos 8:20, 21). Jehová quimniefui quiñeque che tañi piuqueyeaeteu ca allcütuaeteu, feimu elufi feichi che ñi fülcontuaeteu ca ñi montulngeal culpan ca lan dungu meu. ¿Chumngechi femafui?

5. ¿Chumi Jehová taiñ nieal maneluhun? (Génesis 3:15).

⁵ (Papeltunge Génesis 3:15). Feica müten Chau Jehová feipicünui ñi apümcayafiel ti Huecüfü ca huli maneluhun. Feipicünui ñi müleal quiñe cüpanche ñi montulafiel pu che. Feitachi cüpanche norümtuafi com huesaque dungu ñi femün ta Huecüfü Edén lof mu (1 Juan 3:8). Huelu ti cüpanche mülefui ñi cutrancahual, ti Huecüfü allfülayu ca langümayu. Chau Jehová quimniefui ñi rume cutrancahual tañi piuque. Huelu eluhui ñi femal pu che ñi duam mu, femngechi ñi montulafiel engün ti culpan ca lan dungu mu.

YABCABENGELU UME PU CHE TRIPALU BIBLIA MU, ¿CHUMQUINGÜN ÑI AYÜHULABEL CHAU DIO?

6. ¿Chumingün mupitulechi che ñi bülconal Jehová mu?

⁶ ¿Chumngechi pu culpafe che fülconafui Chau Jehová mu? Ñochiquechi quimeltui tüfachi dungu. Deu culpalu Adán Eva engu, ti hunen che feyentufilu ta Jehová fei ta Abel. Quisu piuqueyefi ta Chau Jehová, ayüfui tañi ayühulafiel, feimu huli quiñe chalintucun ta Chau Jehová mu. Quisu camañfengefui, feimu chalintuculelfi quiñeque ufisa. Fei Chau Dios “cüme lloufi ta Abel ca tañi chalintucun” (Gén. 4:4). Rupachi tripantu, Noé ca caquelu piuqueyefilu Jehová ca hulingün chalintucun,  femngechi ayühulfingün (Gén. 8:20, 21). Tüfa pengeli pu che culpafe chengelu rume, hueniyeafui ca ayühulafui ta Chau Jehová. b

7. Abrahán tañi inayentubalchi mupitun, ¿chem quimeleleiñmu?

⁷ Abrahán rume feyentulefui Jehová mu. Chau Dios feipifi ta Abrahán ñi chalintucual tañi fotüm Isaac, ¡tüfa rume cüdaungefui! ¿Rume cutrantupelai Abrahán femal tüfachi dungu? Femlu rume, eluucülei tañi feyentuafiel ta Jehová. Deu eluucülelu ñi langümafiel tañi fotüm, Chau Jehová catrütueyu. Huelu ñi femün ta Abrahán pengeli quiñe falin dungu: Chau Jehová fente ñi piuqueyeniefiel tati pu che, eluhui ñi chalintucual tañi saquin Fotüm (Gén. 22:1-18).

8. Ñi hulün pu Israel che cuibi mu, ¿chem pengelqui? (Levítico 4:27-29; 17:11).

⁸ Rupalechi tripantu, Chau Jehová elufi pu Israel che Moisés tañi ley. Feipifi ñi chalintucual culliñ, femngechi ñi perdonañmangeal tañi culpan (papeltunge Levítico 4:27-29; 17:11). Tüfachi chalintucun pengeli Jehová ñi femal quiñe doi cüme chalintucun, femngechi montulafui com pu che tati culpan mu. Chau Ngünechen feipifi tañi pu huerquen ñi huirintucual inei am feitachi cüpanche cüpayalu, fei ta Chau Dios ñi saquin Fotüm, fei mülefui ñi cutrancahual ca layal. Trürümngeafui quiñe chalintucuelchi ufisa reque (Is. 53:1-12). Raquiduamnge: Chau Jehová huli tañi saquin Fotüm ñi montulafiel com pu che, ca eimi llemai, ti culpan ca lan dungu mu.

¿CHUMI JESÚS TAÑI MONTULABEL PU CHE?

9. Juan tati Bautizachebe ñi eipin, ¿chem pengeli? (Hebreos 9:22; 10:1-4, 12).

⁹ Hunen siglo mu, Juan ti Fautizachefe pefi ta Jesús ca feipi: “Tüfa mu mülei feichi Cordero reque felelu Chau Dios ñi hulcünuel, fei ñi montulafiel com pu che ñi culpan mu” (Juan 1:29). Femngechi pengeli Jesús fei tati feipicünuelchi cüpanche. Jesús hulafui tañi mongen quiñe chalintucun reque, femngechi ñi montulngeal pu che ti culpan ca lan dungu meu (papeltunge Hebreos 9:22; 10:1-4, 12).

10. Jesús cüpai pu yabcabe ñi duam mu, ¿chumngechi pengeli tüba?

¹⁰ Jesús duamtuniefi pu che huesa duamcülelu tañi culpan mu, feimu feipifi tañi inayaeteu. Jesús quimniefui tati culpan ñi duam mu pu che rume cutrancauquei, feimu quellufi pu che cutrancaulu tañi culpan mu. Quisu ta feipi: “Pu tremolelu duamlai lahuentuchefe, huelu pu cutrancülelu duamniei llemai”. Ca feipi: “Iñche cüpan pu culpafe ñi raquiduamtual engün, huelu pu nor che troquiuquelu no” (Mat. 9:12, 13). Jesús pengeli tüfa tañi mongen mu. Quiñeque ejemplo: quiñe domo rume huesa duamcülelu tañi culpan mu, fülcontufi ta Jesús. Tañi cülleñu meu cüchuñmaeyu tañi namun. Fei Jesús piuqueyen mu perdonafi (Luc. 7:37-50). Cafei Jesús quimniefui ti Samaria domo pod mongen yeniefui, huelu quimeltufi falinque dungu (Juan 4:7, 17-19, 25, 26). Pu che lai ti culpan ñi duam mu, huelu  Jehová elufi nehuen ta Jesús ñi huiñomongeltuafiel huentru, domo ca pichiqueche (Mat. 11:5).

11. Pu yabcabe, ¿chemu ayübüingün müleal Jesús engün?

¹¹ Jesús duamtufi ca cutranpiuqueyefi pu che, feimu pu culpachi che ca ayüniefui engün ñi fülmayafiel ta Jesús (Luc. 15:1, 2). Cafei Jesús saquifi pu che ñi cüme femün mu ca fürenefi tañi feyentulen quisu meu (Luc. 19:1-10). Jesús inayentufi tañi Chau ñi cutranpiuqueyechequen (Juan 14:9). Jesús tañi feipin mu ca tañi femün mu pengelqueiñmu ñi chumngen ta Jehová. Quisu piuqueyeiñmu ca cüpa quelluqueiñmu taiñ chaftuafiel ti culpan. Jesús duamtufi pu culpachi che, feimu ayünieingün ñi norümtual ñi mongen ca ñi inayafiel (Luc. 5:27, 28).

12. Jesús , ¿chem quimeli tañi lan mu?

¹² Jesús cüme quimniefui chem ñi rupayal. Fentren rupa feipifi tañi pu inanieteu ñi hultucungeal ca langümngeal orcon mamüll meu (Mat. 17:22; 20:18, 19). Ca quimniefui tañi lan mu montulafui pu che ñi culpan, chumngechi feipicünui Juan ti Fautizachefe ca tati pu profeta. Ca feipi: “Itrofill che cüpalyeafiñ iñche mu” (Juan 12:32). Pu che feyentufile Jesús ca inaniefile ñi femün, ayühulafui ta Chau Jehová ca ‘lifrenentungeafui culpan dungu mu’ (Rom. 6:14, 18, 22; Juan 8:32). Jesús nehuen  piuquengefui ca eluhui ñi cutrancahual ca layal, femngechi taiñ montulaeteu (Juan 10:17, 18).

13. ¿Chumngechi lai Jesús? Ca tañi lan, ¿chem quimeleiñmu Jehová mu? (Pebinge pu adentun).

¹³ Jesús presungei, lucatungei, dalluntucungei, condenangei ca cutrancangei. Fei pu soltau clafantucueyu quiñe orcon mamüll mu, fei langümngei. Jesús nehuen piuquecünuhui cutrancaufulu rume. Huelu Jehová doi cutrancahui pefiel mu tañi saquin Fotüm ñi cutrancaumequen. Nehuen-ngefulu rume montul-lafi, ¿chumngelu? Taiñ piuqueyenieteu mu. Jesús feipi: “Chau Ngünechen fente ñi piuqueyefiel mapu müleyechi pu che, hulcünui tañi quiñen Fotüm. Femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16).

14. ¿Chem quimeleleimu Jesús tañi hulün?

¹⁴ Jesús tañi chalintucun quimfalcünui Jehová ñi piuqueyeniefiel com pu che. Ca pengeli eimi tami rume piuqueyeteu. ¿Chumngelu feipiafuiñ? Chau Jehová rume cutrancahui ñi hulal tañi saquin Fotüm tami montulaeteu ti culpan ca lan dungu mu (1 Juan 4:9, 10). Ayüniei taiñ quelluaeteu com iñchiñ taiñ serfinieafiel, ca cüpalechi antü mu taiñ culpafe chengehuenoal.

15. Jesús tañi hulün, ¿chumabüiñ taiñ cümelcaatu?

¹⁵ Chau Jehová huli tañi Fotüm, femngechi taiñ perdonangeal taiñ culpan. Huelu, ¿chem mülei taiñ femal taiñ cümelcayaeteu? Juan ti Fautizachefe ca Jesús feipingu chem taiñ femal: “Püllelepai Chau Dios ñi ngünenietual ta mapu, feimu nor raquiduamtumün” (Mat. 3:1, 2; 4:17). Feimu mülei taiñ repentiuhual taiñ culpan mu, fei taiñ perdonangeal ca hueniyeafiel ta Chau Jehová. Huelu, ¿chem mülei taiñ femal taiñ repentiuhual? Culpafe chengeliyiñ rume, ¿chumngechi ayühulafuiñ ta Jehová? Cüpalechi troquiñ mu huiñoldunguaiñ tüfachi ramtun.