QUIMELÜN ÑI PAPILTUNGEAL 34
ÜLCATUN 107 Chau Dios tañi piuqueyen inayentufali
Chumngechi pengelabüiñ piuqueyen ca cutranpiuqueyechen tati hueda yabcalu
“Chau Ngünechen piuqueyen mu cüpa quelluqueimu tami nor raquiduamtual” (ROM. 2:4).
¿CHEM QUIMAIÑ?
Chumqui pu loncolelu ñi quelluabel quiñe hueda yabcalu.
1. Quiñe che yabcale ¿chumabüi pemai?
RUPACHI chillcatun mu ngüneduampeiñ chem ñi rupan Corinto trahunche mu. Quiñe peñi culpalu, ti apostol Pablo ngülamtufi ti trahunche chem tañi femal. Feiti culpafe nor raquiduamtulai, feimu entungei ti trahunche mu. Huelu chumngechi feipi Romanos 2:4, Chau Dios quelluafui quiñe culpalu ñi repentiutual. Pu loncolelu, ¿chumngechi quelluafui pu culpafe ñi nor raquiduamtual?
2, 3. Quimliiñ quiñe che hueda yabcai, ¿chumaiñ? Ca, ¿chemu?
2 Pu loncolelu mülei ñi quimal chem ñi rupan, fei ñi quelluafiel ti culpalu. Quiñe peñi cam lamngen culpale, ¿chem chumafuiñ? Feipiafiyiñ tati culpalu ñi feipiafiel tati pu loncolelu ñi quelluaeteu (Is. 1:18; Hech. 20:28; 1 Ped. 5:2).
3 Huelu ti culpalu pinole ñi nütramcayafiel pu loncolelu, ¿chumafuiñ? Iñchiñ mülei taiñ feipiafiel pu loncolelu, femngechi ñi quellungeal tati culpalu, femngechi pengelaiñ taiñ piuqueyefiel taiñ peñi cam taiñ lamngen. Quimnieiñ pu loncolelu tañi quelluaeteu. Ti culpalu amulele tañi huesa femün, hueniyehuelayafui ta Chau Jehová, fei huesa dunguyengeafui ti trahunche. Piuqueyefiyiñ ta Chau Jehová ca tati culpalu, feimu feipiafiyiñ pu loncolelu cüdaungele rume (Sal. 27:14).
CHUMNGECHI QUELLUQUEBINGÜN PU LONCOLELU TATI HUEDA YABCALU
4. ¿Chumal trahuluhuabüi pu loncolelu tati yabcalu engün?
4 Quiñe che culpale, ti troquiñ loncolelu dulliai cüla loncolelu ñi quelluafiel ti culpalu. a Feichi pu loncolelu mülei ñi ñom piuquengeal. Eluule ñi quelluafiel ti culpalu, huelu obligalayafingün ñi nor raquiduamtual (Deut. 30:19). Pu loncolelu quimnieingün pu culpalu com repentiulayaingün chumngechi ñi nor raquiduamtun David (2 Sam. 12:13). Quiñeque ti pu culpalu dulliqueingün ñi allcütunoafiel ta Chau Jehová (Gén. 4:6-8). Femfulu rume, pu loncolelu rume ayünieingün quelluafiel ti culpalu ñi repentiutual. Pu loncolelu trahuluule quiñe che culpalu, ¿chem mülei ñi loncontucunieal?
5. ¿Chem tuculpaai pu loncolelu trahuluhualu tati yabcalu engün? (2 Timoteo 2:24-26; ca pebinge tati adentun).
5 Pu loncolelu quimniei Jehová ñi petu falintuniefiel ti culpalu (Luc. 15:4, 6). Feimu pu loncolelu huesa dungulafingün ca huesa duamel-lafingün ti culpalu. Raquiduamlaingün tañi ramtucayafiel müten ti culpalu, fei ñi entudungual. Doi mai inafingün ñi feipin 2 Timoteo 2:24-26 (papeltunge). Pu loncolelu piuqueyenquechi duamtuniefi ti culpalu, femngechi ñi quelluafiel nor raquiduamtual.
Quiñe camañfe reque, pu loncolelu chem rume femquei ñi quelluafiel ñamquiyauchi ufisa. (Inaduamnge parrafo 5).
6. Pu loncolelu petu ñi trahuluunon tati yabcalu engün, ¿chumngechi pepicahuabüingün? (Romanos 2:4).
6 Pu loncolelu pepicahuingün tañi inayal Jehová tañi raquiduam. Loncontucuingün ñi feipin Pablo: “Chau Ngünechen piuqueyen mu cüpa quelluqueimu tami nor raquiduamtual” (papeltunge Romanos 2:4). Feimu pu loncolelu inayentufingün Jehová ñi piuqueyen quellufiel mu ti culpalu. Pu loncolelu camañfe reque feleingün. Eluhuingün tañi adnieaeteu Jesús, fei ñi cuidayafiel ti trahunche (Is. 11:3, 4; Mat. 18:18-20). Pu loncolelu ayünieingün ñi quelluafiel ti culpalu ñi nor raquiduamtual. Feimu petu ñi trahuluunon ti culpafe engün, llellipuafingün ta Chau Jehová. Cafei ngüneduamaingün Biblia ca taiñ fillque papel. Ca llellipuafingün ta Jehová ñi adümal chem ñi rupan ca ñi chum duamcülen ti che. Ca ramtuhuaingün: “¿Chem yeeyu ti che ñi culpaconal? ¿Chem yeeyu tañi femngechi raquiduamal?” (Prov. 20:5).
7, 8. Pu loncolelu trahuluule tati yabcalu engün ¿chumngechi inayentuabüingün Jehová ñi ñom duamngen?
7 Pu loncolelu inayentuquefingün Jehová ñi ñom piuquengen. Pu loncolelu loncontucuqueingün chem ñi femün Jehová tati culpalu cuifi. Quiñe tüfa ta Caín. Chau Jehová ñom piuque mu feipifi ta Caín chem ñi rupayal culpale. Ca feipifi tañi cümelcayaeteu feyentule (Gén. 4:6, 7). Cafei Chau Jehová huercüfi ta Natán ñi ngülamtuafiel ta David. Natán nütramcai quiñe dungu, femngechi ñi puhual David tañi piuque mu (2 Sam. 12:1-7). Cafei Jehová fentren rupa huercüi tañi pu huerquen ñi ngülamtuafiel pu Israel che tañi feyentunon mu (Jer. 7:24, 25). Chau Jehová üngümlai ñi pu che ñi nor raquiduamtual, fei tañi quelluafiel. Doi mai amulelu tañi culpan engün, feipifi tañi repentiutual.
8 Pu loncolelu inayentuquefingün ta Jehová, femngechi tañi quelluafiel pu culpalu. Chumngechi ñi feipin 2 Timoteo 4:2, ñom piuque mu norümtufingün pu peñi ca pu lamngen. Pu loncolelu ñi cüme quelluafiel quiñe che culpalu, mülei ñi ñom piuquengeal ca tüngcüleal. Huelu quiñe loncolelu illcule ca huesa duamcülele, doi cüdautuafui ti culpalu ñi nor raquiduamtual ca allcütual ti ngülam.
9, 10. Pu loncolelu, ¿chumngechi quelluabüingün tati yabcalu ñi ngüneduamal tañi hueda bemün mu?
9 Pu loncolelu ngüneduamaingün chem yeeyu ti che ñi culpayal. Ramtuafui: “Ti che, ¿ñochiquechi hueniyehuelafi ta Jehová? ¿Fentecünupei mai ñi papeltual Biblia ca amuldungual? ¿Fentecünui chi ñi llellipuafiel ta Jehová? ¿Elcünui chi huesaque raquiduam ñi conal tañi piuque mu? ¿Trahuluuquei chi huesaque compañ engu? ¿Chumquei ñi cüme rupaleal? Tañi huesa dulliel mu, ¿chum duamquei tañi piuque? ¿Quimniepei mai ñi chum duamcülen Chau Jehová tañi femün mu?”.
10 Pu loncolelu quintuaingün cümeque ramtun, femngechi raquiduamelafingün ti culpalu chumngelu ñi famtripalerpun Jehová mu. Huelu ramtulayafingün duamfalngenochi dungu, fei ñi yehuelcanoafiel. Doi mai piuqueyenquechi femaingün (Prov. 20:5). Inayentuafuingün ta Natán feichi raquiduamelfilu ta David. Pu loncolelu entuafuingün pengelün dungu ñi raquiduamelafiel ti culpalu, fei ñi quimal chemu huelulcahui. Ti che hue trahuluulu pu loncolelu engün, rume hueñancüafui tañi huesa dullin mu ca nor raquiduamtuafui.
11. Jesús, ¿chumquebi pu yabcabe?
11 Pu loncolelu yafüluuquei ñi inayentuafiel ta Jesús. Jesús entui quiñe cüme ramtun, fei ñi raquiduamelafiel ta Saulo tañi huesa femün mu. Feipifi: “Saulo, Saulo ¿chumngelu caiñetumequeen?” (Hech. 9:3-6). Ca acordafi feichi domo Jezabel pingelu, “üngümnierquefiñ ñi nor raquiduamtual” pi (Apoc. 2:20, 21).
12, 13. Pu loncolelu, ¿chumngechi eluabüingün antü tati yabcalu ñi huiñoraquiduamtual? (Ca pebinge tati adentun).
12 Pu loncolelu inayentufingün ta Jesús, feimu matu feipilayaingün ti culpafe ñi repentiunon. Quiñeque culpalu hue trahuluule pu loncolelu engün, nor raquiduamtuafuingün. Huelu caquelu alüñmayafui. Pu loncolelu trahuluhuafui tati culpafe engün doi quiñe rupa. Ti culpafe hue trahuluulu raquiduamafui tañi ngülamtungeel, fei ñom piuque mu llellipuafui ta Chau Jehová tañi perdonayaeteu (Sal. 32:5; 38:18). Ti culpalu ca rupa trahuluulu, doi eluucüleafui ñi norcünutual tañi raquiduam.
13 Pu loncolelu cutranpiuqueyefingün ti culpalu, femngechi tañi nor raquiduamtual. Llellipunieafingün ta Chau Jehová tañi quelluaeteu ñi cüme tripayal tañi cüdau ca maneluuqueingün ti culpalu ñi repentiutual (2 Tim. 2:25, 26).
Pu loncolelu doi quiñe rupa trahuluhuafuingün ti culpalu engün, femngechi eluquefi tiempo ñi nor raquiduamtual. (Inaduamnge parrafo 12).
14. ¿Iñi am mañumtuabüiñ ñi huiñoraquiduamtun quiñe che?, ¿chemu?
14 Pu culpalu nor raquiduamtule, rume ayühun-ngei (Luc. 15:7, 10). ¿Inei ñi duam mu ti che repentiutui? ¿Pu loncolelu? Femlai tati. Raquiduamtucuaiñ ñi feipin Pablo: “Chau Dios eluafui feichi pu che ñi nor raquiduamtual” (2 Tim. 2:25). Chau Jehová müten quelluafui quiñe cristiano ñi norümtual tañi raquiduam ca chem ñi mülen tañi piuque mu. Chem huentru no rume femlayafui. Pablo ca feipi nor raquiduamtulu quiñe che doi cüme adümuuquei Biblia ñi feipin, quimcontuquei ca famentuquefi Huecüfü ñi ngünencan (2 Tim. 2:26).
15. Pu loncolelu, ¿chumngechi amultucuabüingün ñi quellunebel tati huiñoraquiduamtulu?
15 Quiñe che nor raquiduamtulu, pu loncolelu peyahulmequefi ñi yafültucuafiel. Ca quelluafingün ñi chaftual Huecüfü ñi ngünencan ca ñi femal cümeque dungu (Heb. 12:12, 13). Felei llemai, pu loncolelu entudunguquelaingün chem ñi femün ti culpalu. Huelu, ¿chem duamnieafui ñi quimal ti trahunche?
“COM PU CHE ÑI ADQUIÑ MU NORÜMTUBINGE TATI PU YABCAQUELU”
16. Pablo eipilu “com pu che ñi adquiñ mu”, ¿chem pin tüba? (1 Timoteo 5:20).
16 (Papeltunge 1 Timoteo 5:20). Loncolelu am Timoteo, Pablo feipieyu: “Com pu che ñi adquiñ meu norümdungufinge tati pu culpaquelu”. ¿Chem cüpa feipi Pablo? Pu peñi ca lamngen quimlu ti culpan dungu, fei engün mülei ñi quimelelngeal ñi norümtungen ti culpalu. Quiñeque pefingün chi chem ñi femün ti culpalu, caquelu ti culpalu feipieyu chi chem ñi femün. Feichi pu che müten pu loncolelu feipiayu ñi norümtungen ti culpalu, feipingelayafui com ti trahunche.
17. Alünque che quimle ñi yabcan quiñe che, ¿chem quimbalchi dungu eipingeai trahunche mu?, ¿chemu?
17 Quiñeque mu, fentren che trahunche mu deu quimniei ñi huesa femün ti culpalu cam quimürpuafuingün. Femngechi dungu rupale, quiñe loncolelu quimelelafi com ti trahunche ñi norümtungen ti peñi cam lamngen. ¿Chemu? Pablo feipi “femngechi caquelu che cuñiutucuhuai”, fei ñi culpanoal.
18. Quiñe bautizalechi hueche petu nienolu 18 tripantu hueda yabcale, ¿chumai pu loncolelu? (Ca ngüneduamnge tati adentun).
18 Quiñeque mu quiñe fautizaucülechi hueche fütra culpayafui, huelu petu nienole mari pura tripantu, ¿chumai pu loncolelu? Epu loncolelu trahuluhuai ti hueche engu ca tañi cristiano chau ca ñi ñuque. b Pu loncolelu ramtuafi ti hueche ñi pu chau chem chumingu ñi quellunieafiel tañi yall ñi nor raquiduamtual. Ti hueche norcünutule tañi raquiduam, ¿chumai pu loncolelu? Feipiafingün tañi pu chau ñi quelluafiel tañi yall. Feimu duamfal-lai pu loncolelu ñi doi ngüneduamafiel ti dungu. Pu loncolelu quimnieingün Chau Dios ñi elcünuel tati pu chau ñi piuqueyenquechi norümtuafiel ñi pu yall (Deut. 6:6, 7; Prov. 6:20; 22:6; Efes. 6:2-4). Rupachi antü mu, pu loncolelu ramtuafingün tati epu chau ñi quelluniefiel tañi yall ca ñi chum amulen. Huelu ti hueche amulele tañi huesa femmequen, ¿chumafui pu loncolelu? Cüla loncolelu trahuluhuai ti hueche engu ca tañi pu chau ñi ngüneduamafiel ti dungu.
Fütra culpale quiñe hueche, epu loncolelu trahuluuquei ti hueche ca tañi chau engu testigongelu. (Inaduamnge parrafo 18).
‘CHAU JEHOVÁ MÜNA PIUQUEYECHEBENGI CA CUTRANPIUQUEYECHEQUI’
19. Pu loncolelu ñi quelluabel tati yabcalu, ¿chumngechi inayentuquebingün Chau Jehová?
19 Chau Jehová elfalcünufi pu loncolelu ñi cuñiutucuafiel ti trahunche tati pu huesa femquelu (1 Cor. 5:7). Huelu ca mülei ñi quelluafiel ti huesa femquelu tañi repentiutual. Cafei maneluuqueingün tati che ñi cüme raquiduamtual. ¿Chumngelu femingün? Tañi inayentufiel “Chau Jehová ñi rume poyechefengen ca ñi cutranpiuqueyechen” (Sant. 5:11). Femngechi femi tati apostol Juan, piuqueyen mu feipi: “Saquin pu hueni, huirintuculeluhuiyiñ tüfachi dungu tamün culpanoal. Huelu quiñe che culpale, nieiñ inei taiñ quelluaeteu: Jesucristo. Nor chengei, quiñentrür tañi Chau engu mülei” (1 Juan 2:1).
20. ¿Chem ngüneduamaiñ quiñelehuechi papiltun mu?
20 Huelu quiñeque cristiano piquelai ñi nor raquiduamtual, müna huesa. Femngechi dungu rupale, entungeai trahunche mu. ¿Chumai pu loncolelu? Cangelu troquiñ mu peafiyiñ.
ÜLCATUN 103 Pu loncolelu, yehun reque feleingün
a Cuifi feipiquefuiñ quiñe troquiñ loncolelu ramtucadunguafilu ti culpalu, huelu feula femngechi feipilayaiñ, ¿chumngelu? Pu loncolelu ramtucadunguquelafingün müten ti culpalu.
b Ti hueche cristianongenole ñi pu chau, niele quiñe testigo pariente fei compañayu. Nienole, fei compañayu tati quimeltueteu Biblia cam quiñe peñi cam lamngen ñi manelquefiel.
