QUIMELÜN ÑI PAPILTUNGEAL 32
ÜLCATUN 44 Ti hueñancülelu ñi llellipun
Jehová ayüni com pu che ñi huiñoraquiduamal
“Jehová […] ayünelai iñi no ume tañi laal, doi mai ayüni com pu che ñi huiñoraquiduamal” (2 PED. 3:9).
¿CHEM QUIMAIÑ?
Peaiñ chumqui quiñe che huiñoraquiduamtulu, chemu bente balin-ngi taiñ huiñoraquiduamtual, ca chumngechi quelluquebi Chau Jehová pu che ñi huiñoraquiduamtual.
1. ¿Chumqui tati huiñoraquiduamtulu?
HUESA femliyiñ, rume falin-ngei taiñ repentiutual. Biblia feipi ti che repentiulu üdequefi tañi huesa femün, femhuequelai ca ayüquelai ñi huiño conal feichi dungu mu (inaduamnge ti Diccionario “nor raquiduamtual; huiñoraquiduamtual” Biblia mu mülelu).
2. ¿Chemu duambali taiñ huiñoraquiduamtual? (Nehemías 8:9-11).
2 Com iñchiñ mülei taiñ quimal fente falin-ngei taiñ repentiutual. ¿Chumngelu cai? Fill antü huelulcauqueiñ. Com iñchiñ Adán engu Eva mu cüpaiñ, feimu culpaqueiñ ca laqueiñ (Rom. 3:23; 5:12). Inei no rume iñche culpaquelan pilayafui. Ca femngechi rupaingün pu che doi feyentulelu. Quiñe tüfa ti apostol Pablo (Rom. 7:21-24). Huelu ngelai taiñ fill antü hueñancüleal taiñ culpafe chengen mu. Chau Jehová cutranpiuqueyechequei ca ayüniei taiñ ayüucüleal. Raquiduamaiñ ñi rupan pu judio Nehemías ñi antü mu (papeltunge Nehemías 8:9-11). Jehová ayüquelafui ñi rume hueñancüleal engün tañi culpan mu, doi mai ayühun mu ñi cüdahuelaeteu engün. Chau Jehová quimniei repentiuliyiñ ayüucüleaiñ. Feimu quimelqueiñmu taiñ repentiutual. Rüf repentiuliyiñ, maneluucüleiñ taiñ Fütra Chau taiñ cutranpiuqueyeateu ca perdonayaeteu.
3. ¿Chem ngütramcaaiñ tübachi papiltun mu?
3 Tüfachi troquiñ mu quimaiñ cüla dungu: 1) ¿chem quimelelfi Jehová pu Israel che tañi repentiutual? 2) ¿Chumngechi Jehová quelluquefi tati pu che ñi repentiutual? 3) ¿Chem quimelelfi Jesús tañi pu inanieteu tañi repentiutual?
JEHOVÁ ¿CHEM QUIMELELBI PU ISRAEL CHE TAÑI HUIÑORAQUIDUAMTUAL?
4. Tati huiñoraquiduamtun mu, Jehová ¿chem quimelelbi pu Israel che?
4 Pu Israel che feipicünuingün tañi inayafiel Jehová tañi ley. Jehová feipicünulelfi engün inaniefilmün tañi ley, cuñiutucuhuaiñ ca cümelcahuaiñ pifi. Feipicünufi: “Tüfachi huercün dungu tañi feipimequefiel fachantü müte cüdaungelai eimi mu ca ditufali” (Deut. 30:11, 16). Huelu feyentunofule engün ca püramyefule caquelu dios, Chau Ngünechen fürenehuelayafi pu Israel che ca cutrancahuaingün. Huelu ti ley ca feipi tüfa engün huiñotuafui Chau Jehová mu ca allcütuafui tañi dungun (Deut. 30:1-3, 17-20). Fei engün repentiuhuafui. Femfule, Jehová huiño hueniyeafeyu engün ca cümelcayafeyu.
5. Pu Israel che hueda bemlu, ¿chumquebüi Jehová? (2 Reyes 17:13, 14).
5 Pu Israel che fentren rupa caiñetufi engün ta Chau Jehová. Püramyefingün coilaque dios ñi adentun, huelu ca femingün caquelu rume huesa dungu, feimu rume cutrancahuingün. Huelu Jehová amulei tañi quellunieafiel engün. Huercüquefi tañi pu profeta, fei ñi quelluafiel engün ñi repentiutual ca ñi huiñotual Jehová mu (papeltunge 2 Reyes 17:13, 14).
6. Jehová, ¿chumngechi quellubi tañi pu che loncontucual ñi bente balin-ngen huiñoraquiduamtual? (Ca ngüneduamnge tati adentun).
6 Pu Israel che inanofilu Chau Jehová ñi feipin, Jehová huercülelquefeyu tañi pu profeta ñi norümafiel ca ngüfetuafiel engün. ¿Chumngechi femi? Chau Ngünechen adniefi ta Jeremías ñi feipiafiel pu Israel che: ‘Ahuem Israel, eimi trencül piuquengeimi, huiñotunge. Illcunquechi leliulayaiñ. Iñche manelfalngen. Rumel illculelayan. Eimi caiñetufimi tami Chau Ngünechen Jehová, feimu culpan tati piaimi’ (Jer. 3:12, 13). Jehová adniefi ta Joel ñi feipiafiel engün: “Com tamün piuque mu huiñotuaimün iñche mu” (Joel 2:12, 13). Huercüfi ta Isaías ñi feipial: “Liftuhuaimün; entufimün iñche tañi adquiñ mu tamün huesaque femqueel; femhuelayaimün huesaque dungu” (Is. 1:16-19). Ca huercüfi ta Ezequiel ñi feipial: ‘¿Ayühulqueneu am quiñe huesa che ñi lan? ¿Ayülayafun am ñi elcünual tañi rüpü, femngechi ñi mongeleal? Cüme duamelquelaeneu lan mu quiñe che. Feimu huiñotuaimün iñche mu, fei mongeleaimün’ (Ezeq. 18:23, 32). Chau Jehová ayüniei pu che ñi rumel mongeleal. Feimu repentiule ta che, Jehová rume ayüuquei. Huelu Jehová re esperaquelai müten tañi huiñotual ta che. Peafiyiñ chumngechi quelluquefi.
Tañi pu huerquen mu Jehová quelluquefi tañi pu che ñi repentiutual. (Inaduamnge parrafo 6, 7).
7. Oseas tañi domüche engu ñi upan mu, Jehová ¿chem quimelelbi tañi pu che?
7 Peaiñ ñi rupan ti profeta Oseas pingelu ca tañi domo Gómer. Tüfachi domo ñihuañpefi tañi füta ca rupachi antü elcünufi, fei amui ca huentru engu. Huelu “turpu cacünutulayai tañi mongen” ¿pipei mai Jehová? Femlai. Fei pequefilu ta piuque, feipifi ta Oseas: “Huiño amunge, poyefinge ti domo ñi poyequeteu ca huentru ca ñihualuumequei, chumngechi Jehová poyequefi tañi troquiñ Israel inaquefilu engün rume caquelu pu dios” (Os. 3:1; Prov. 16:2). Loncontucuaiñ, Gómer amulefui tañi fütra culpamequen. Huelu Jehová feipifi ta Oseas ñi perdonayafiel ca ñi huiñotual tañi domo engu. a Tüfachi dungu mu ñi rupan Oseas, Jehová pengelelfi tañi pu che tañi chum duameleteu engün. Amulelu rume engün tañi fütra culpamequen, Chau Jehová fentecünulai tañi piuqueyefiel. Amulei ñi mandalelfiel huerquen ca quelluquefi engün ñi repentiutual ca ñi cüme elcünutual tañi mongen. Quimfali, Jehová ngüneduamquei chem ñi mülen piuque mu. Huelu Chau Jehová, ¿quelluafui quiñe che ñi repentiutual petu tañi fütra culpamequen? (Prov. 17:3). Peafiyiñ.
JEHOVÁ, ¿CHUMNGECHI QUELLUQUEBI PU YABCALU ÑI HUIÑORAQUIDUAMTUAL?
8. Jehová, ¿chumngechi quellubi Caín ñi huiñoraquiduamtual? (Génesis 4:3-7; ca pebinge tati adentun).
8 Adán engu Eva tañi hunen püñeñ ñi nieel engu fei ta Caín. Tañi chau rulpaleleyu ti culpan, feimu culpafengefui. Cafei Biblia feipi: ‘Caín tañi femün huesalcalerquei’ (1 Juan 3:12). Feimu peno Jehová “cüme lloulafi ta Caín ca tañi chalintucun”. Huelu Caín cüme elcünutulai tañi raquiduam. Doi mai, “rume illcui ca rume huesa duamnagi”. Feimu, ¿chumi Chau Jehová? Nütramcafi ta Caín (papeltunge Génesis 4:3-7). Jehová piuqueyen mu dungufi Caín. Fei feipifi cüme femülmi, iñche cümelcayayu pifi. Amulele tami illculen, huesa femafuimi pifi. Huelu Caín allcütulafi ta Jehová. Fei eluulai ñi repentiutual. ¿Chumi am Jehová? Huesa femün mu caquelu che, “quellulayafiñ ñi repentiutual” ¿pipei mai? Femlai llemai.
Jehová quellufi ta Caín ñi repentiutual, ca feipifi cüme femülmi iñche cümelcayayu pifi. (Inaduamnge parrafo 8).
9. Jehová, ¿chumngechi quellubi David ñi huiñoraquiduamtual?
9 Jehová rume piuqueyeniefi ta David. Fei “ayühuelmaeneu tañi piuque” pi (Hech. 13:22). Huelu David fütra culpai. Cudumfi ca huentru ñi domo. Ca langümfalfi ti huentru. Chumngechi feipi Moisés ñi ley, David mülefui ñi layal tañi femün mu (Lev. 20:10; Núm. 35:31). Huelu petu repentiunolu rume David, Jehová ayüfui ñi quelluafiel. b Feimu huercüfi ta Natán tañi nütramcayafiel. Natán entui quiñe pengelün dungu ñi puhual David ñi piuque mu. Fei hula David ngüneduami ñi culpan Jehová ñi adquiñ mu, fei repentiutui (2 Sam. 12:1-14). Huirintucui quiñe salmo, femngechi pengeli ñi huesa duamcülen (Sal. 51, encabezamiento). Feichi salmo yafültucuquefi fentren che culpalu ca quelluquefi engün tañi repentiutual. Rume mañumcüleiñ Jehová ñi quellufiel ta David tañi repentiutual.
10. Raquiduamqueyüm iñchiñ, Jehová ñochiduamngi ca ayüni ulpacünoal taiñ yabcan ¿chum duamcülequiiñ?
10 Chau Jehová üdequefi com culpan dungu (Sal. 5:4, 5). Quisu quimniei taiñ culpafe chengen. Ca fente tañi piuqueyechequen, ayülei taiñ quelluaeteu culpaliyiñ. Jehová ca quelluquefi pu fütra culpalu ñi repentiutual ca tañi fülcontuaeteu. Müna yafültucuqueiñmu tañi femquen Chau Jehová. Raquiduamnieaiñ Jehová ñi ñom piuquengen ca chumngechi perdonachequei. Femliyiñ, püntütripalayaiñ fei mu, ca culpaliyiñ feica müten repentiutuaiñ. Feula peaiñ chumngechi Jesús quimelfi tañi pu inanieteu ñi repentiutual.
JESÚS, ¿CHEM QUIMELELBI TAÑI PU INANETU TATI HUIÑORAQUIDUAMTUN MU?
11, 12. Jesús, ¿chem pengelün mu quimeli Jehová ayüni ulpacünoal taiñ yabcan? (Pebinge tati adentun).
11 Puulu chi antü ñi cüpayal ti Mesías mapu mu, Chau Jehová adniefi ta Juan ti Fautizachefe ñi huldungulelafiel ta che fei ñi repentiutual engün. Cafei Jesús eluulu ñi huldungual, ca quimelelfi ta che fente ñi falin-ngen repentiutual (Mat. 3:1, 2; 4:17).
12 Amuldunguyaulu Jesús, quimelelfi pu che chumngechi tañi Chau eluuquei tañi perdonacheal. Jesús, ¿chumngechi quimeltui tüfa? Nütramcai quiñe chau mu ca tañi fotüm. Feichi fotüm tripai tañi ruca mu ca eluhui ñi femal huesaque dungu. Huelu rupalu ta antü, ti hueche cüme raquiduamtui fei huiñotui. ¿Chumi tañi chau? Jesús feipi: “Petu alü camapu ñi cüpalen ti hueche, tañi chau puquintueyu, rume cutranpiuqueyeyu. Fei lefi ñi trafmeafiel, pancoeyu ca piuqueyen mu truyueyu”. Ti fotüm quimlafui tañi chau ñi perdonayaeteu. Feimu “tami cüdaufe reque troquituaen” pifi. Huelu ti chau ayüfui ñi perdonayafiel tañi fotüm ca ñi huiño mületual tañi familia mu. Ca feipi: ‘Tañi fotüm ñamquiyauquefui, huelu huiñotui’ (Luc. 15:11-32). Mülelu huenu mu Jesús, fentren rupa pequefui chi chumngechi Jehová cutranpiuqueyefi pu culpalu repentiulu engün. Feimu tüfachi pengelün dungu mu pengeli fente tañi cutranpiuqueyechequen Chau Jehová.
Jesús entulu tañi pengelün dungu, feipi ti fotüm ñamquiyauquefulu huiñotui. Fei ti chau lefi tañi pancoafiel tañi fotüm. (Inaduamnge parrafo 11, 12).
13, 14. Tati huiñoraquiduamtun mu, Pedro ¿chem quimpoi ca chem quimelelbi caque che? (Ca pebinge tati adentun).
13 Ñi femün mu Jesús, Pedro quimürpui chumngechi Chau Jehová perdonaquefi pu culpalu repentiulu engün. Pedro fentren rupa huelulcahui, huelu Jesús perdonaeyu. Pedro cüla rupa feipi tañi quimnofiel ta Jesús. Fei hula rume huesa duami tañi femün mu (Mat. 26:34, 35, 69-75). Huelu quisulelu Pedro, Jesús peufaluhueyu huiñomongetulu (Luc. 24:33, 34; 1 Cor. 15:3-5). Jesús quimniefui Pedro ñi repentiutun, feimu yafültucufi ca quimfalcünulelfi ñi perdonafiel.
14 Pedro repentiutui ca perdonangei. Feimu enseñalfi caquelu che tüfachi dungu mu. Rupalu ti fiesta Pentecostés pingelu, Pedro feipifi fentren judio ñi langümfiel engün ti Mesías. Huelu piuqueyen mu feipifi engün: “Nor raquiduamtumün ca huiñotumün Chau Ngünechen meu, femngechi rulpacünungeai tamün culpan. Fei Jehová llemai füshcümai tamün piuque” (Hech. 3:14, 15, 17, 19). Femngechi Pedro pengeli ñi chumquen pu repentiutulu. Mülei ñi cüme elcünutual tañi raquiduam, elcünual tañi huesa femquen ca femal Chau Dios ñi ayüqueel. Pedro feipi Chau Jehová com perdonañmayafi pu judio ñi culpan. Acordahuelayafi tañi culpan engün. Fentren tripantu rupalu, Pedro feipifi pu cristiano: “Chau Ngünechen ñom piuquengei eimün meu, fei ayünielai ta inei no rume ñi apümcangeal. Ayüniei ta com pu che ñi nor raquiduamtual” (2 Ped. 3:9). Ayüfali tati, fütra culpaliyiñ rume, huelu repentiuliyiñ Chau Jehová perdonayaiñmu.
Pedro repentiutui, feimu Jesús perdonaeyu ca quimfalcünuleyu tañi piuqueyefiel. (Inaduamnge parrafo 13, 14).
15, 16. 1) Ulpacünoñmangelu Pablo ñi yabcan, ¿chem quimpoi? (1 Timoteo 1:12-15). 2) ¿Chem peaiñ cüpalechi papiltun mu?
15 Pablo petu tañi cristianongenon, fentren huesaque dungu femi. Inacafi ca huesalcafi Cristo ñi pu discipulo. Feichi mu, fentren che “turpu cüme elcünutulayai tañi mongen” feipipelai engün. Huelu Jesús cüme quimniefui Pablo ñi cüme elcünutuafiel tañi raquiduam ca tañi repentiutuafel. Jehová ca Jesús peñmafi ñi cüme piuquengen ta Pablo. Jesús feipi: “Iñche ta dullifiñ tüfachi huentru” (Hech. 9:15). Ca femi quiñe afmatun dungu ñi quelluafiel ta Pablo ñi repentiutual (Hech. 7:58–8:3; 9:1-9, 17-20). Rupalu ta antü, Pablo repentiutui fei cristianongerpui ca Jesús apostolcünueyu. Pablo rumel mañumquefui Jehová ca Jesús ñi cutranpiuqueyeteu (papeltunge 1 Timoteo 1:12-15). Feimu Pablo feipifi pu peñi ca pu lamngen: “Chau Ngünechen piuqueyen mu cüpa quelluqueimu tami nor raquiduamtual” (Rom. 2:4).
16 Quiñe rupa, Pablo quimürpui Corinto trahunche mu quiñe che coneltulefui pod cudumuhun mu. Fei feipifi ti trahunche ñi chumal engün. Ñi feipin Pablo quimeleiñmu Chau Jehová ñi piuqueyechequen ca norümtuchequen. Ca quimeleiñmu fente ñi falin-ngen cutranpiuqueyecheal. Ngüneduamaiñ ñi femün Pablo cüpalechi troquiñ mu.
ÜLCATUN 33 Elcünunge tami duam Jehová mu
a Chau Jehová feipifi ta Oseas müten ñi femngechi femal. Fachantü Chau Jehová obligaquelafi pu che ñihuañpengelu ñi müleal tañi afcadi engu. Cafei Jehová adcünufi tañi Fotüm ñi quimeltual pu ñihuañpengelu dulliafui ñi hudayafiel tañi afcadi cam tañi femnoal (Mat. 5:32; 19:9).
b Inaduamnge ti troquiñ “¿Qué significa para usted el perdón de Jehová?” tripalu La Atalaya 15 conchi noviembre 2012, pag. 21-23, parr. 3-10.
c Com tüfachi tripantu rupai petu ñi mülepanon Jesús.
