1. Pu cristiano huentru, ¿chumabüingün tañi cüme tripaal com ñi bemquen?

 PABLO feipifi pu Corinto che: ‘Pu peñi, pichiqueche reque raquiduamquelayaimün. Fei fütaqueche reque raquiduamqueaimün’ (1 Cor. 14:20). Com tati pu huentru cristianongelu inayafi feitachi ngülam, ¿chumngechi femafuingün? Mülei ñi inayafiel engün Chau Dios ñi huercün dungu, ca ñi inayal Biblia ñi ngülam tañi mongen mu (Luc. 2:52). Feimu eimün huecheque peñi, ¿chumngelu fente falin-ngei tamün cüme cristianongeal?

2, 3. Pu hueche peñi, ¿chemu müna balin-ngi tañi quim cristiano chengepoal?

² Taiñ pu peñi nieingün fentren cüdau tañi familia mu ca ti trahunche mu. Eimi hueche peñi, ¿raquiduampelafuimi tami femürpual falinque cüdau cüpalechi antü mu? Precursorngeafuimi, siervo ministerialngeafuimi cam loncolerpuafuimi trahunche mu. Ca raquiduamafuimi chi tami nieal domo ca nierpual pichiqueche (Efes. 6:4; 1 Tim. 3:1). Cüme cristianongelmi, diturpuafuimi com feitachi dungu. b

³ Feimu feula ngüneduamaiñ chem quelluafeimu tamün cüme cristianongeal, chem mülei tami adümuucüleal ca chumngechi pepicahuafuimi fillque dungu tami femafel cüpalechi antü mu.

4. ¿Cheu peabüimi cümeque inayentun? (Pebinge pu adentun).

⁴ Inaduamaimi inei tami inayentuafiel. Biblia nütramcai quiñeque huentru inayentufalngelu. Fei engün rume  piuqueyequefingün ta Jehová, ca femingün fillque dungu ñi cuidayafiel Jehová tañi pu che. Trahunche mu ca tami familia mu ca mülei peñi cüme cristianongelu (Heb. 13:7). Doi mai inayentuafimi ta Jesús (1 Ped. 2:21). Inaduamafimi tañi femquefel engün ca chem dungu doi ayüumaquefimi (Heb. 12:1, 2). Fei raquiduamnge chumngechi inayentuafuimi.

5. ¿Chumabüimi tami ngüneduamal com dungu ca chemu müna balin-ngi? (Salmo 119:9).

⁵ Eluucülenge tami cüme raquiduamal (Prov. 3:21). Quiñe huentru cüme raquiduamquelu matucauquelai, hune cüme raquiduamquei tañi chumal. Feimu eluunge tami femngechi chengeal. ¿Chumngelu falin-ngei? Famülque mu, pu huechequeche quisu tañi raquiduam müten inaqueingün ca ngüneuquelaingün (Prov. 7:7; 29:11). Cafei tami peel television mu, pelicula, internet ca redes sociales mu ca hueluraquiduamelafeimu. Fei, ¿chem quelluafeimu tami cüme raquiduamal? Hune, Biblia mu inaduamaimi chem raquiduamquei Jehová. Fei ramtuunge: “Inafili tüfa, ¿chumngechi quelluafeneu iñche?”. Fei femaimi cümeque dungu tami ayühuelafiel Jehová (papeltunge Salmo 119:9). Quim raquiduamülmi tami chumal, quelluaimu tami cüme cristianongeal (Prov. 2:11, 12; Heb. 5:14). ¿Chem dungu mu cüme raquiduamaimi tami chumal? Feula peaiñ epu dungu mu: 1) mülelmi pu lamngen eimün, ca 2) chumngechi tami tucutuuquen ca tami cupiluuquen.

6. Quiñe hueche huentru cüme ngüneduambi com dungu, ¿chumngechi pengeli tañi yamnebel pu lamngen?

⁶ Quiñe hueche huentru cüme raquiduamquelu respetayafi pu domo. Ayüfile quiñe domo, ayüafui chi tañi cüme quimafiel. Tüfa ta huesa dungu no. Huelu quiñe hueche raquiduamcülenole tañi nieafiel quiñe domo, cuñiutucuhuai ñi chem feipifiel ca ñi chem huirintuculelquefiel quiñe domo. Femngechi ti lamngen ¿ayüniepelaeneu ti hueche? pilayai. Femngechi ti hueche pengelai tañi quim raquiduamquen (1 Tim. 5:1, 2). Ti hueche miyaule quiñe lamngen  engu, quisuyaulayaingu, quiñe quim cristiano mülei tañi compañnieaeteu, femngechi huesa dunguyengelayai ti lamngen (1 Cor. 6:18).

7. Quiñe hueche huentru cüme ngüneduamquebilu com dungu, ¿chumabüi tañi cüme adelcaleal?

⁷ Quiñe hueche ca pengelafui ñi raquiduamquen Jehová reque chumngechi ñi tucutuuquen ca peinetuuquen. Epe com pu deumaquelu tacun ca tati hulquelu propaganda yamquelafingün ta Jehová, ca pod mongen yeniequeingün, feimu fentren tacun pichi rupaquei ca domo tacun reque felequei. Fei quiñe hueche, ¿chumngechi cüme dulliafui tañi tucutuhual ca cupiluhual? Raquiduamai chem ñi ayüqueel ta Jehová, ca inayafi ñi femqueel quimque peñi. Ca ramtuhuafui: “Chumngechi ñi tucutuuquen ca cupiluuquen, ¿pengelquepen mai ñi nien cüme raquiduam? ¿Respetaquepefiñ mai caquelu che ñi raquiduam feitachi dungu mu? ¿Pengelquepen mai tañi poyequefiel ta Chau Jehová?” (1 Cor. 10:31-33; Tito 2:6). Cüme raquiduamülmi, pu peñi ca pu lamngen yamnieaimu ca Chau Jehová falintuaimu.

8. Quiñe hueche peñi, ¿chumngechi quimpoabüi tañi manelbal chengeal?

⁸ Manelfal chengeaimi. Femngechi chengelmi, cüme femaimi com tami elfalcünungeel (Luc. 16:10). Raquiduamaimi ñi femün ta Jesús. Jesús femi com tañi feipieteu tañi Chau, cüdaungefulu rume. Quisu rume piuqueyequefui com che, doyelchi mai tañi pu discipulo, feimu eluhui tañi hulal ñi mongen com pu che mu (Juan 13:1). Jesús reque, eluhuaimi tami femal com cüdau tami feipingeel. Quimnolmi chumngechi tami femal, ñom piuque mu feipiafimi quimque peñi tami quelluaeteu. Re tami feipingeel müten femlayaimi (Rom. 12:11). Cüme huechunentuaimi tami cüdau Jehová ngealu reque, pu huentru no (Col. 3:23). Quiñeque mu, huelulcahuaimi. Huelu femlimi, ñom piuque mu feipiaimi tami huelulcahun (Prov. 11:2).

9. Quiñe hueche peñi, ¿chemu cüme pepicahuabüi?

⁹ Eimi hueche, ayülmi tami cüme cristianongeal, mülei tami adümuhual fillque dungu mu. Tüfa quelluaimu tami doi nieal cüdau trahunche mu, tami peal cüdau ñi mongeluhuam, ca tami cüme yehual caquelu engün. Ngüneduamaiñ quiñeque dungu tami adümuhual.

10, 11. Hueche peñi, cüme papiltulmi ca huirintuculmi, ¿chumngechi cümelcaqueimu ca cümelcaquebi tati trahunche? (Salmo 1:1-3; pebinge tati adentun).

¹⁰ Quim cüme papeltuaimi ca cüme huiriaimi. Biblia feipi quiñe che cüme papeltufilu Biblia ca raquiduamquelu tañi feipin mu, ayüucüleai (papeltunge Salmo  1:1-3). Quiñe che fill antü papeltufile Biblia, quimai chem ñi raquiduamquen ta Jehová. Femngechi cüme raquiduamai ca cüme inayafi (Prov. 1:3, 4). Ti huentru femlu, müna falintungequei ti trahunche mu, ¿chumngelu am?

¹¹ Pu peñi ca pu lamngen duamnieingün ñi ngülamtungeal ca ñi quimeltungeal Biblia mu (Tito 1:9). Feimu eimi, cüme quim huirilimi ca cüme papeltulmi, cüme pepicayafuimi tami hueupin ca hulafuimi cümeque comentario tami yafültucuafiel ta caquelu che. Cafei petu estudialmi, huirintucuafuimi ti doi falinque dungu tami ayüfiel, fei ca antü inaduamafuimi. Cafei trahun mu, fütraque trahun mu, allcütulmi quiñeque hueupin, ca huirintucuafuimi tami ayüelchi dungu. Com tami huirintucuel quelluaimu tami doi maneluhual Jehová mu, ca tami yafültucuafiel caquelu che.

12. ¿Chem quelluaimu tami cüme allcütual ca dungual caque che mu?

¹² Cüme allcütuaimi ca cüme nütramcayaimi. Pu quimque peñi mülei ñi cüme allcütual ca entendeafiel ñi chumlen ta caquelu (Prov. 20:5). Ngüneduamülmi caquelu che chumngechi ñi dunguquen, tañi ange, ca chumngechi nengümuuquei, quimafuimi ñi chumlen feichi che. Feimu mülei tami inafül nütramcayafiel ti che, peñmayafiel tañi ange. Huelu re telefono müten nütramcafilmi pu che, cüdautuafuimi tami nütramcacheal. Feimu eluunge tami nütramcayafiel pu che, telefono mu cam mensaje mu müten no (2 Juan 12).

13. ¿Ca chem dungu quimpoabüi quiñe hueche peñi? (1 Timoteo 5:8; pebinge tati adentun).

¹³ Cüdahuaimi tami mongeluhuam. Quiñe quim cristiano mülei ñi cüdahual tañi mongeluhuam quisu ca tañi pu familia (papeltunge 1 Timoteo 5:8). Quiñeque mapu mu, pu chau quimelelfi tañi pu yall chem mu tañi cüdahual. Caquelu mapu mu, colegio mu enseñalngequei chumngechi ñi nieal quiñe cüdau tañi mongeluhuam (Hech. 18:2, 3; 20:34; Efes. 4:28). Com nehuen mu cüdahuaimi ca deumayaimi com tami cüdau, femngechi pengelaimi tami cüme cüdaufengen, cüdautulayaimi tami peal quiñe cüdau ca ñamümlayafimi. Inafilmi com tati ngülam taiñ ngüneduampeel tüfachi troquiñ mu, femngechi doi cüme pepicaucüleaimi mongen mu. Peaiñ quiñeque dungu tami femafel.

14. ¿Chem quelluabüi quiñe hueche huentru tañi huneltu cüdahuelabel Jehová tañi mongen mu?

¹⁴ Fill antü cüdahuelafimi ta Jehová. Fentren pu peñi cüme cristianongelu huechengelu müten eluhuingün ñi cüdahuelafiel ta Jehová fill antü. Precursorngelmi, quelluaimu tami cüdahual caquerumechi che engün ca ñi cüme püneafiel tami plata (Filip. 4:11-13). Hunelu mu, precursor auxiliarngeafuimi, fei rume quelluquefi pu che ñi precursor regularngerpual. Precursorngelmi, ca mangelngeafuimi ñi femal caquelu cüdau, coneltuafuimi deumarucan mu cam cüdahuafuimi Betel mu chi.

15, 16. Quiñe hueche peñi duamnele quelluquelu cam loncolelu trahunche mu ngeal, ¿chumabüi?

¹⁵ Siervo ministerialngeafuimi cam loncolerpuafuimi trahunche mu. Com pu peñi mülei ñi pepicaucüleal ñi loncolerpual trahunche mu. Biblia feipi pu peñi ayülu ñi loncolerpual trahunche mu “müna cüme cüdau ayüniei” (1 Tim. 3:1). Petu ñi loncolenon trahunche mu, hune siervo ministerialngeafui. Tati pu siervo ministerial quelluntucuquei pu loncolelu tañi cuidayafiel tati pu peñi ca pu lamngen. Pu siervo ministerial ca pu loncolelu ñom piuque mu quelluquefi tati pu peñi ca pu lamngen, ca ayühun mu amuldunguqueingün. Quiñe hueche mari regle tripantu müten niele cam doi chi siervo ministerialngeafui. Ca quiñe hueche epu mari tripantu niele müten loncolerpuafui trahunche mu.

¹⁶ Biblia feipi ñi chumngechi chengerpual pu peñi ayülu ñi loncolerpual cam siervo ministerialngeal. Quiñe peñi piuqueyefile ta Jehová, tañi pu che ca ti trahunche, eluhuai ñi pepicaucülerpual (1 Tim. 3:1-13; Tito 1:6-9; 1 Ped. 5:2, 3). Feimu eimi peñi, ayülmi tami loncolerpual cam siervo ministerialngeal, inaduamnge caque quiñeque dungu ñi feipin Biblia, ca llellipuafimi ta Jehová tami pepicaucülerpual. c

17. Tañi cüme bütangeal ca cüme loncoleal tañi familia mu, ¿chumngechi pepicahuabüi quiñe hueche huentru? (Pebinge tati adentun).

¹⁷ Curengeafuimi, fei loncoleafuimi tami familia mu. Chumngechi feipi Jesús, quimque peñi quiñeque eluuquei ñi curengenoal (Mat. 19:12). Huelu ayülmi tami nieal ta domo, mülei tami cüme fütangeal ca loncoleal tami familia mu  (1 Cor. 11:3). Jehová ayüquei tati pu huentru ñi piuqueyenieafiel tañi domo, tañi cuidayafiel ca tañi eluafiel com tañi duamnieel, ñi cüme hueniyeafiel, ca quelluafi ñi fülmanieafiel ta Jehová (Efes. 5:28, 29). Tüfachi troquiñ mu, ngüneduamiyiñ quiñeque dungu. Por ejemplo, tami cüme raquiduam nieal, respetanieafiel pu domo ca tami manelfal chengeal. Tüfa quelluaimu tami cüme fütangeal ca tami cüme loncoleal tami familia mu.

18. ¿Chumngechi pepicahuabüi quiñe hueche huentru tañi cüme chaungeal?

¹⁸ Chaungerpuafuimi. Curengelmi, nierpuafuimi yall. Tami cüme chaungeal, inayentuafuimi Jehová ñi cüme chaungen (Efes. 6:4). Jehová feipiquefi tañi Fotüm Jesús tunte tañi piuqueyefiel ca ñi ayüucülen quisu mu (Mat. 3:17). Chaungerpulmi, feipiafimi tami yall tami piuqueyefiel. Ca cüme femle engün, saquifinge. Pu chau inayentuquefilu Jehová, quelluquefingün tañi pu yall ñi cüme cristianongerpual. ¿Chumngechi pepicahuafuimi fachantü tami cüme chaungeal? Pengelelafimi tami pu familia ca ti trahunche tami piuqueyeniefiel engün. Feipiafimi engün tami piuqueyefiel ca tami falintuniefiel (Juan 15:9). Tüfa quelluaimu tami cüme chaungeal, ca rume falin-ngeaimi Jehová ñi adquiñ mu, tami familia ca ti trahunche mu.

19, 20. ¿Chumabüi quiñe hueche peñi tañi quim cristiano chengeal? (Pebinge pu adentun hunen pagina mu).

¹⁹ Eimi hueche peñi, müchai müten cüme cristianongerpulayaimi. Mülei tami inayentuafiel pu quimche, cüme raquiduamaimi, manelfal chengeaimi, adümuhuaimi fillque dungu mu ca pepicahuaimi tami femal fillque dungu cüpalechi antü.

²⁰ Pütrünque dungu inaduamimi tami femal, fei ¿com feman chi am tañi quimürpuel? piafuimi. Huelu femafuimi llemai, Jehová quelluaimu (Is. 41:10, 13). Pu peñi ca pu lamngen trahunche mu ca quelluafeimu. Cüme cristianongerpulmi chumngechi ñi ayüqueel ta Jehová, rume ayüucüleaimi. Hueche, rume piuqueyehuiyiñ. Eluucülenge tami cüme cristianongeal, fei Chau Jehová cümelcanieaimu (Prov. 22:4).