1, 2. 1) Taiñ ngüneduamal Jesús tañi mongen ca amuldungun, ¿chum duamelqueiñmu? 2) ¿Chem peabiiñ tübachi quimelün mu?

 LAN mu quiñe piuqueyenieelchi che, müna echamenoquefiyiñ. Ellaca mu, müna hueñancuqueiñ, doi hueñancuqueiñ pefiel mu tañi fente cutrancahun. Huelu rupachi antü mu, acordaquefiyiñ quiñeque dungu taiñ feipieteu ca tañi femün, fei ayühuelqueiñmu.

² Ca femngechi Jesús tañi lan mu hueñancülqueiñmu. Püllepan mu ñi acordayafiel Jesús tañi lan, doi raquiduamqueiñ ñi fente falin-ngen tañi lapan iñchiñ mu (1 Cor. 11:24, 25). Huelu raquiduamün mu Jesús tañi femün ca ñi feipin mu, ayühuelqueiñmu. Ca raquiduamqueiñ tañi chummequen ta Jesús ca tañi chumal cüpalechi antü mu, fei ta yafültucuqueiñmu. Raquiduamliyiñ com tüfachi dungu mu ca fente taiñ piuqueyenieteu Jesús, pengelaiñ taiñ mañumtufiel. ¿Chumngechi? Tüfachi troquiñ mu peafiyiñ.

3. ¿Chemu mañumcüliiñ Jesús tañi hulün mongen?

³ Raquiduamün mu Jesús tañi mongen mu ca tañi lan mu, mañumtuquefiyiñ. Jesús mülepalu mapu mu enseñalfi fentrenque che Chau Dios ñi Gobierno ñi com cüme elcünutual, rume falintuquefiyiñ feitachi falinque dungu. Jesús hulün mu tañi mongen, femngechi hueniyeafuiñ ta Jehová ca hueniyeafuiñ ta Jesús. Com tati pu feyentulu Jesús mu nieafui afnoachi mongen, ca petuafui tañi piuqueyenieelchi che yem huiñomongetule.  Feimu mañumtuquefiyiñ tañi hulün mu tañi mongen (Juan 5:28, 29; Rom. 6:23). Iñchiñ chumlafuiñ rume taiñ llohual feichi cümeque dungu. Iñchiñ ca cullilayafuiñ tañi femün mu engu (Rom. 5:8, 20, 21). Huelu mañumtuafuiñ tañi femün iñchiñ mu, ¿chumngechi? Peafiyiñ.

4. María Magdalena mañumcüli Jesús tañi bemetu, ¿chumi tañi pengelal tüba? (Pebinge adentun).

⁴ Peaiñ ñi chumün ta María Magdalena. María regle huesaque püllü niefui, feimu rume cutrancaufui. María raquiduamfui chi inei no rume tañi pepi quellunoeteu. Feimu Jesús entuñmaeteu tañi huesaque püllü ñi niequefel, ¿rume mañumcülepelai? Fei, ¿chumngechi pengeli tañi mañumtufiel? María inafi ta Jesús, cafei huli tañi tiempo, nehuen ca falinque chemcün ñi quelluafiel Jesús tañi amuldungucheal (Luc. 8:1-3). María mañumtufilu rume tañi femün Jesús quisu mu, huelu cüme quimlafui chi Jesús ñi lapayal com pu che mu, femngechi com tati pu feyentulu Jesús mu nieafui afnoachi mongen (Juan 3:16). ¿Ca chumi María ñi mañumtufiel Jesús? María püntütripalai Jesús mu. Clafaconcülelu Jesús orcon mamüll mu, fei María huitralepui fei mu, femngechi ñi yafültucuafiel ta Jesús ca caquelu pu discipulo (Juan 19:25). Lalu Jesús, María ca epu domo yeingün cüme nümün-ngechi lahuen ñi tuculelafiel Jesús ñi cuerpo (Mar. 16:1, 2). Jehová cümelcafi María tañi püntütripanon Jesús mu. Pichin che müten pefingün ta Jesús huiñomongetulu, María ca quiñeque discipulo müten. Feimu María rume ayühui tañi nütramcahun Jesús engu (Juan 20:11-18).

5. Jehová ca Jesús com tañi bemetu, ¿chumngechi mañumabiiñ?

⁵ Iñchiñ ca mañumtuafuiñ tañi femün mu Jehová ca Jesús iñchiñ mu. ¿Chumngechi? Hulafuiñ taiñ tiempo,  taiñ nehuen ca taiñ falinque chemcün ñi cüdahuelafiel Jehová. Cafei quelluntucuafuiñ ñi deumangeal ca cüme elcünungetual fillque ruca poyengeam ta Jehová.

6. ¿Chemu eipiabiiñ Jesús huli tañi mongen caque quiñeque iñchiñ?

⁶ Quimün mu fente taiñ piuqueyenieteu Jehová ca Jesús, ca femngechi iñchiñ piuqueyerpuafuiñ (1 Juan 4:10, 19). Cafei doi piuqueyerpufiyiñ engu inaduamün mu Jesús ñi lapan caque quiñeque iñchiñ mu. Ti apostol Pablo fente tañi mañumcülen, feipi: ‘Chau Ngünechen tañi Fotüm piuqueyeneu ca hulcünui tañi mongen iñche meu’ (Gál. 2:20). Jesús lalu iñchiñ mu, feimu Jehová fültucupaeiñmu taiñ hueniyeafiel (Juan 6:44). Jehová peñmaeimu cüme raquiduam tami piuque mu. Feimu tami hueniyeaeteu, huli tañi fotüm eimi mu. ¿Fei ta puupelai tami piuque mu? Raquiduamün mu tüfa, ¿doi piuqueyerpupelafimi Jehová ca Jesús? Feimu mülefui ñi ramtuhual: “Taiñ piuqueyeniefiel mu Jehová ca Jesús, ¿chumaiñ?”.

7. Chumngechi pengeli tati adentun mu, ¿chumabüiñ taiñ pengelbel taiñ piuqueyebel Jehová ca Jesús? (2 Corintios 5:14, 15; 6:1, 2).

⁷ Piuqueyefilu am iñchiñ Jehová ca Jesús, feimu eluucüleiñ taiñ piuqueyeafiel caquelu pu che (papeltunge 2 Corintios 5:14, 15; 6:1, 2). ¿Chumngechi pengelafuiñ taiñ piuqueyen? Amuldungulelafiyiñ com che. Chem tuhun-ngele rume ta che, pofrengefule, ricungefule, com pu che amuldungulelafiyiñ. Femliyiñ quelluntucuafuiñ ta Jehová. Jehová ayüniefui “itrofill che ñi montual ca ñi cüme quimürpuafiel ti rüf dungu” (1 Tim. 2:4).

8. ¿Chumngechi pengelabüiñ taiñ piuqueyebel pu peñi ca lamngen trahunche mu?

 ⁸ ¿Ca chumngechi pengelelquefiyiñ taiñ piuqueyefiel Jehová ca Jesús? Mülei taiñ piuqueyeafiel pu peñi ca pu lamngen (1 Juan 4:21). ¿Chumngechi femafuiñ? Quelluafiyiñ engün ñi rupan mu huesaque dungu mu. Yafültucuafiyiñ layeluule engün, pemeafiyiñ cutrancülele engün, ca huesa duamcülele engün nehuentucuafiyiñ (2 Cor. 1:3-7; 1 Tes. 5:11, 14). Llellipuafiyiñ quisu engün mu ca acordayaiñ “tati nor che ñi llellipun rume nehuen-ngei ca quelluchequei” (Sant. 5:16).

9. ¿Ca chem dungu chumaiñ taiñ pengelabel taiñ piuqueyebel pu peñi ca lamngen trahunche mu?

⁹ Eluhuaiñ taiñ cümelcaucüleal taiñ pu peñi, pu lamngen iñchiñ, femngechi pengelaiñ taiñ piuqueyeniefiel. Taiñ femal inayentuafiyiñ chumngechi ñi perdonachequen Jehová. Raquiduamaiñ tüfa mu, Jehová huli tañi fotüm taiñ perdonañmangeal taiñ culpan, ¿chemu am iñchiñ perdonalayafuiñ taiñ pu peñi, pu lamngen ñi huelulcan? Inayentulayafiyiñ ti huesa piuquengechi cüdaufe ñi nütramcael Jesús. Feitachi cüdaufe fentren plata defelequefui, huelu tañi ñidol perdonaeyu, feipieyu tañi cullinoal. Tüfachi cüdaufe tañi chaf cüdaufe defeniequefeyu pichin plata, huelu quisu perdonalafi (Mat. 18:23-35). Eimi yafcaucülelmi quiñe peñi cam quiñe lamngen eimün, amuaimi tami nütramcayafiel fei tamu cümelcautual. Femaimi petu ñi acunon ti trahun ñi acordangeal Jesús ñi lan (Mat. 5:23, 24). Femülmi pengelaimi tami piuqueyefiel Jehová ca Jesús.

10, 11. Pu loncolelu, ¿chumaingün tañi pengelabel tañi piuqueyebel Jehová ca Jesús? (1 Pedro 5:1, 2).

¹⁰ Tati pu loncolelu, ¿chumngechi pengelquei tañi piuqueyeniefiel Jehová ca Jesús? Mülei ñi piuqueyenquechi cuidayafiel Jesús tañi pu ufisa (papeltunge 1 Pedro 5:1, 2). Peaiñ ñi rupan Pedro. Pedro cüla rupa ellcañmai ñi quimniefiel ta Jesús. Pedro huesa duamfui, feimu ayüniefui ñi pengelelafiel ta Jesús ñi piuqueyeniefiel. Fei huiñomongetulu Jesús, ramtufi ta Pedro: “Simón, Juan ñi fotüm, ¿piuqueyeen cai?”. Fei hula feipifi: “Camañelen tañi pichique ufisa” (Juan 21:15-17). Feimu Pedro com tañi mongen mu cuidafi Jesús ñi pu ufisa. Tañi femün mu, pengeli tañi piuqueyeniefiel ta Jesús.

¹¹ Eimün pu loncolelu, ¿chumngechi inayafuimün ñi feipin Jesús? Feichi acordangele Jesús ñi lan doi cüdaucüleaimün. Camañfe reque cuidayafimün pu peñi ca pu lamngen, ca doi pemeafimün pu trahuhuequenolu ca pu amuldunguhuenolu (Ezeq. 34:11, 12). Cüme llohuafimün pu chillcatuquelu Biblia ca pu hue amulu tüfachi falin trahun mu. Iñchiñ maneluucüleiñ tañi conal Jehová ñi troquiñche mu engün, feimu cüme llouquefiyiñ.

12. Jesús tañi eipin petu tañi lanon mu, ¿chemu bütra piuquecünongeaiñ? (Juan 16:32, 33).

¹² Feichi pun petu ñi lanon ta Jesús, feipifi tañi pu discipulo: “Tüfachi mapu meu cutrancahuaimün. Huelu nehuen piuquecünuumün. Iñche ta hueucünufiñ mapu mülechi pu che”  (papeltunge Juan 16:32, 33). Jesús chaftufi tañi pu caiñe ca turpu püntütripalai Jehová mu, ¿chem quellueyu? Quisu maneluucülefui Jehová mu. Jesús cüme quimniefui tañi pu discipulo ñi rupayal huesaque dungu mu, feimu feipifi ta Jehová tañi cuidayafiel engün (Juan 17:11). Quimfiel mu ta tüfa, nehuentucuqueiñmu. Jehová doi nehuen-ngei chem caiñe mu rume (1 Juan 4:4). Quisu com penieñmaeiñmu taiñ rupamequen. Maneluuliyiñ quisu mu, nehuen piuquecünuhuaiñ ca chaftuafiyiñ chem huesaque dungu rume.

13. José de Arimatea, ¿chumngechi pengeli tañi bütra piuquecünongen?

¹³ Peaiñ ñi rupan ta José, Arimatea huaria tuulu. Feitachi huentru rume respetaquefeyu tati pu judio, quisu coneltulefui ti Sanedrín mu, pu judio ñi corte mu. Huelu Jesús mülepalu mapu mu, José llicalefui, feimu ellcaquechi amuquefui tañi pemeafiel ta Jesús (Juan 19:38). José ayüfui ñi quimeltuel ta Jesús, huelu inei no rume quimquelafui. Quisu llicalefui tañi respetahuenoaeteu pu judio. Huelu Biblia feipi lalu ta Jesús, José “nehuen piuquecünuhui, fei pemefi ta Pilato ñi elungeal Jesús ñi cuerpo”, femngechi tañi rüngalafiel (Mar. 15:42, 43). Tañi femün mu ta José, com che quimürpui tañi inaquefiel Jesús.

14. Bill raquiduamcüleliiñ pu che tañi eipin, ¿chumaiñ?

¹⁴ Eimi, ¿quiñeque mu llicalequeimi José reque? Colegio mu cam cüdau mu, ¿llicaleimi tami feipial tami Dunguquelu Ineingen Jehová ngen? Ramtuuqueimi chi: “Amuldunguli, fautizauli ¿chem piaeneu ta che?”. ¿Feimu llicaimi tami amuldungual ca fautizahual? Femngechi raquiduamülmi, fentecünulayaimi tami femal cümeque dungu. Ngillatuafimi ta Jehová com tami piuque mu, feipiafimi tami eluaeteu ta nehuen tami llicanoal. Inaduamülmi tami quellueteu ta Jehová, doi nehuencünuaimi (Is. 41:10, 13).

15. Pu inanequetu müna ayüucülingün tañi pebel Jesús tañi huiñomongetun, ¿chumingün? (Lucas 24:52, 53).

¹⁵ Lalu Jesús, tañi pu discipulo hueñancülefuingün. Raquiduamnge tañi chum duamcülen. Lai tañi cüme hueni ca femtripalai tañi raquiduamquefel engün, feimu ¿huesa duamcülepelaingün? (Luc. 24:17-21). Huelu Jesús peufaluutueteu engün, Jesús quellueyu engün chumngechi ñi femtripamequen  ti profecia Biblia mu, ca elueyu quiñe falin cüdau (Luc. 24:26, 27, 45-48). Fei 40 antü rupalu, Jesús püratui huenu. Fei tati pu discipulo hueñancülehuetulaingün, rume ayüucületuingün. Quimlu engün tañi huiñomongetun ta Jesús ca ñi quelluaeteu engün ñi femal tañi cüdau, rume ayühueleyu engün. Fente tañi ayüucülen mu, fentecünulaingün ñi poyeafiel Jehová (papeltunge Lucas 24:52, 53; Hech. 5:42).

16. ¿Chumngechi inaabiñ Jesús tañi pu inanequetu tañi bemün?

¹⁶ ¿Chumngechi inayentuafuiñ Jesús tañi pu discipulo? Ayühunquechi serfiafiyiñ Jehová fill antü. Taiñ femal, hunentucuafiyiñ ta Jehová taiñ mongen mu. Adcünuafuiñ taiñ tiempo cüdau mu, femngechi taiñ amuldungual, amual trahun mu ca papeltual taiñ pu familia iñchiñ fill semana. Quiñeque che ayüquelai tañi nieal falinque chemcün, femngechi tañi doi cüdahual trahunche mu cam ñi amuldungual cheu ñi doi duamniengeel quellu. Duamnieiñ nehuen taiñ serfinieafiel ta Jehová, huelu doyümfiliyiñ Jehová taiñ mongen mu, quisu cümelcayaiñmu (Prov. 10:22; Mat. 6:32, 33).

17. Upamequele Tuculpangeam Jesús tañi lan, ¿chumabüiñ? (Pebinge adentun).

¹⁷ Epechi aculniefiyiñ martes 4 conchi abril mu ñi acordayal Jesús tañi lan. Huelu esperalayaiñ feichi antü müten taiñ raquiduamal Jesús ñi mongen ca tañi lan mu ca fente taiñ piuqueyenieteu Jehová ca Jesús. Fei raquiduamcüleaiñ müten tüfachi dungu mu petu ñi femngenon tüfachi falin trahun ca deu rupale. Papeltuaiñ ca raquiduamaiñ ti troquiñ “Ñi femün ta Jesus petu faltalu kiñe semana tañi layal” tripalu Taiñ Mongen ca Taiñ Amuldunguqueel, ti papel taiñ pepicahuam abril 2019, pagina 4. Petu papeltufilmi chem tañi rupan ta Jesús, papeltuafuimi quiñeque troquiñ Biblia. Femngechi doi mañumcüleaimi, doi piuqueyeafimi ta Jehová ca Jesús, nehuen piuquecünuhuaimi ca ayüucüleaimi. Raquiduamnge chumngechi pengelafuimi tami mañumcülen. Eimi acordafilmi, falintufilmi ñi femün ta Jesús, quisu ayüucüleai eimi mu (Apoc. 2:19).