QUIMELÜN ÑI PAPILTUNGEAL 4
Jehová cümelcaqueiñmu taiñ trahuluhual Tuculpangeam mu
“Bemqueaimün tüba, beimu pengelaimün tamün raquiduamnemobel iñche” (LUCAS 22:19).
ÜLCATUN 19 Jesús ñi iyael ella pun mu
¿CHEM QUIMAIÑ? a
1, 2. ¿Chemu bill tripantu mu trahuluhuiiñ Tuculpangeam mu?
EPE 2.000 tripantu mu, huli ñi mongen ta Jesús iñchiñ taiñ duam mu, femngechi taiñ nieal rumel mongen. Quiñe antü petu ñi lanon, huercüfi tañi pu inanieteu ñi acordayafiel tañi lan, feipi ñi trahuluhual engün ca ñi rulpayafiel cofque ca pulcu (1 Cor. 11:23-26).
2 Feyentuquefiyiñ ta Jesús taiñ piuqueyeniefiel mu (Juan 14:15). Fill tripantu püllelepan mu Jesús ñi lan, doi llellipuqueiñ ca raquiduamqueiñ tañi hulün tañi mongen iñchiñ mu, femngechi pengelqueiñ taiñ falintufiel mu. Ca femngechi ayüucülequeiñ taiñ doi amuldungual taiñ mangelafiel fentren che ñi amual tüfachi falin trahun mu. Eluuquelaiñ chem no rume taiñ catrütuaeteu amual tüfachi falin trahun mu.
3. ¿Chem peaiñ tübachi quimelün mu?
3 Iñchiñ Jehová ñi pu chengen rume falintuquefiyiñ Jesús tañi lan. ¿Chumngelu feipiyiñ? 1) Acordaquefiyiñ Jesús tañi lan chumngechi ñi feipicünun Jesús taiñ femal. 2) Mangelquefiyiñ caquelu che ñi amual tüfachi falin trahun mu. Ca 3) amuqueiñ tüfachi falin trahun mu cüdaungele rume. Tüfachi troquiñ mu ngüneduamaiñ tüfachi cüla dungu.
TUCULPAIÑ JESUS ÑI LAN CHUMNGECHI QUIDU TAIÑ HUERCÜETU
4. 1) Bill tripantu mu, ¿chem rüb dungu allcütuaiñ hueupin mu? (Lucas 22:19). 2) ¿Chemu taiñ cüme quimpoal müna manelbalngi?
4 Fill tripantu trahuluuqueiñ ñi acordayafiel Jesús tañi lan. Feitachi falin trahun mu, allcütuquefiyiñ quiñe hueupin Biblia mu tripalu. ¿Chem nütramcangequei tüfachi hueupin mu? Feipingequei com che ñi duamnieel ñi montulngeal, ca Jesús ñi lan culliafui fentren che ñi culpan. Ca feipingei chem mu adentulei ti cofque ca ti pulcu, ca inei engün iyafui ti cofque ca putuafui ti pulcu (papeltunge Lucas 22:19, 20). Ti hueupin ca feipi pu che mongelealu mapu mu nieaingün quiñe cüme mongen (Is. 35:5, 6; 65:17, 21-23). Iñchiñ mülei taiñ falintuafiel feitachi cümeque dungu, ¿chumngelu am? Fentren che quimlafingün feitachi cümeque dungu, ca falintuquelafingün Jesús tañi lan. Feimu acordaquelafingün Jesús tañi lan chumngechi ñi feipicünun ta Jesús.
5. Lalu hula pu apostol, ¿chumi pu che tañi tuculpaabel Jesús ñi lan?
5 Lalu epe com pu apostol, quiñeque coilaque cristiano conpaingün ti trahunche mu (Mat. 13:24-27, 37-39). Fei engün eluhuingün ñi ‘quimeltual huelulcalechi dungu. Fei ngüchaltucufingün tati pu feyentulelu tañi inayaeteu engün’ (Hech. 20:29, 30). ¿Chem dungu quimeltuingün feitachi coilaque cristiano? Quiñe dungu, fei ta Jesús fentren rupa mülefui ñi chalintucual ñi mongen. Huelu Biblia feipi Jesús “quiñe rupa müten chalintucui tañi mongen, fei ñi famentuafiel fentren che ñi culpan” (Heb. 9:27, 28). Fentren che feyentuingün feitachi coila quimeltun. Feimu amuqueingün fill semana iglesia mu ñi acordayafiel Jesús tañi lan. Tüfa mu mülei pulcu ca cofque. Feitachi pu che raquiduamqueingün ti cofque Jesús tañi cuerpongen, ca ti pulcu Jesús tañi mollfüñngen. Fei engün raquiduamqueingün Jesús chalintucuquei ñi mongen fill semana. Caquelu religion fill semana trahuluuquelaingün ñi acordayafiel Jesús tañi lan, ca cüme quimlafingün chumngelu ñi lapan Jesús. Quiñeque che raquiduamelquefi caquelu che Jesús ñi lan perdonañmalayafui pu che ñi culpan, feimu fentren che ramtuuquei: “¿Rüf quellupeafeneu mai Jesús ñi lan?”. Huelu pu rüfngechi cristiano quelluquefingün pu che ñi quimafiel engün chumngelu Jesús ñi lan ca ñi acordayafiel. Peafiyiñ tüfa.
6. 1872 tripantu mu, ¿chem quimpai quiñeque papiltuquelu Biblia?
6 Feichi 1870 tripantu, taiñ peñi Russell ca caquelu che eluhuingün tañi chillcatual ta Biblia. Fei engün ayüfuingün ñi quimal ti rüf dungu Jesús ñi lan mu ca chumngechi ñi acordangeal. Fei 1872 tripantu mu, quimürpuingün Jesús ñi hulün mu ñi mongen ñi montulafiel com pu che. Femngechi eluhuingün ñi quimeltuafiel com pu che diario mu, lifru meu ca revista mu. Fei pichin antü mu ñi rupan mu, fei engün eluhuingün ñi acordayafiel Jesús ñi lan quiñe rupa müten tripantu mu chumngechi ñi femquefel pu cristiano hunen siglo mu.
7. Hunenque papiltuquelu Biblia tañi ngüneduambel, ¿chumngechi cümelcaqueiñmu?
7 Tañi quimürpuel pu chillcatulu Biblia cuifi mu, ¿chumngechi quelluqueiñmu famülque mu? Jehová ñi quellun mu, quimürpuiñ ñi fente falin-ngen Jesús ñi lan ca chumngechi taiñ cümelcayaeteu cüpalechi antü meu (1 Juan 2:1, 2). Ca quimürpuiñ Biblia mu ñi mülen epu rume maneluhun: quiñeque che ñi müleal huenu meu ca fentren che ñi müleal mapu meu (1 Ped. 3:18; 1 Juan 4:9). Ca femngechi iñchiñ, mangelquefiyiñ com pu che ñi acordayafiel Jesús ñi lan chumngechi ñi huercüel ta Jesús.
MANGELQUIIÑ CAQUELU CHE JESÚS TAÑI TUCULPANGEAM
Feichi acordangele Jesús ñi lan, ¿chumngechi quelluntucuafuiñ ñi mangelngeal pu che? (Inaduamnge parrafo 8 puulu 10). d
8. ¿Chumquiiñ taiñ mangelquebel caquelu che Jesús tañi Tuculpangeam? (Pebinge pu adentun).
8 Fentren tripantu mangelquefiyiñ pu che ñi amual ñi acordayafiel Jesús ñi lan. 1881 tripantu mu, pu peñi ca pu lamngen mülelu Estados Unidos mu mangelngei ñi trahuluhual quiñe peñi ñi ruca mu ñi acordangeal Jesús ñi lan. Ti ruca mülefui Allegheny, Pensilvania mapu mu. Rupachi tripantu mu, caque quiñeque trahunche trahuluhuingün ñi acordayafiel Jesús ñi lan. Fei marzo 1940 tripantu mu, eluhuiyiñ taiñ mangelafiel com pu che ñi amual feitachi falin trahun mu. 1960 tripantu mu, Betel huirintucui mangelün fei huercülelfi pu trahunche ñi mangelafiel com pu che ñi amual ti falin trahun mu. Feichi tripantu mu ca fachantü mangelngequei rume fentrenque che ñi acordayafiel Jesús ñi lan. ¿Chumngelu fente cüdauqueiñ taiñ mangelafiel com pu che?
9, 10. Taiñ mangelquebel caquelu che Jesús tañi Tuculpangeam, ¿iñi engün cümelcangingün? (Juan 3:16).
9 Mangelquefiyiñ pu che ñi quimal engün Jehová ca Jesús chem ñi femün iñchiñ mu (papeltunge Juan 3:16). Ayüleiñ ñi allcütual engün feichi trahun mu, femngechi ñi quimafiel ta Jehová ca ñi poyerpuafiel. ¿Ca inei engün quellueyu feitachi trahun? Peafiyiñ.
10 Iñchiñ ca mangelquefiyiñ serfihuenofilu ta Jehová ca feipiquefiyiñ Jehová petu piuquentucunieimu. Fentren che serfihuenofilu Jehová huelu amun mu feitachi falin trahun mu, raquiduamingün ayühunquechi ñi cüdahuelquefel ta Jehová. Peafiyiñ ñi rupan ta Mónica. b Fei amuldunguhuequelafui, huelu aculu ti pandemia COVID-19 huiño amuldungutui. Fei 2021 tripantu mu, amui ti falin trahun mu tañi acordangeal Jesús ñi lan. Quisu feipi: “Tüfachi trahun rume falin-ngei iñche mu. 20 tripantu rupai amuldunguhuequelafun quiñe che no rume, fei feula amuldungun ca mangelfiñ engün tañi acordayafiel Jesús ñi lan. Com piuque mu femün, rume mañumquefiñ ta Jehová ca Jesús tañi femün iñche mu” (Sal. 103:1-4). Amule cam amunole rume feitachi falin trahun mu pu che, mangelquefiyiñ müten tañi amual engün. Quimnieiñ Jehová tañi rume falintuquefiel taiñ femün.
11. ¿Chumngechi Jehová cümelcaquebi taiñ cüdau taiñ mangelquebel pu che Tuculpangeam mu? (Ageo 2:7).
11 Jehová cümelcaquefi ti cüdau taiñ mangelfiel mu pu che ñi amual feitachi falin trahun mu. Raquiduamnge tüfa mu, 2021 tripantu mu ñi mülen mu rume ti COVID-19, rume fentren che amuingün ñi acordayafiel Jesús ñi lan. 21.367.603 che amuingün. Jehová falintuquefui ñi amun fentrenque che, huelu doi falintuquefi caque quiñeque che ñi amun (Luc. 15:7; 1 Tim. 2:3, 4). Mangelfilu iñchiñ ta pu che feitachi falin trahun mu, Jehová quelluqueiñmu taiñ peafiel cüme piuquengechi che (papeltunge Ageo 2:7).
CÜDAUNGEBÜLE UME, TRAHULUQUIIÑ TUCULPANGEAM MU
Eluuliyiñ taiñ acordayafiel Jesús ñi lan, Jehová cümelcayaiñmu. (Inaduamnge parrafo 12). e
12. ¿Chem dungu cüdaungeabüi taiñ trahuluhual Tuculpangeam mu? (Pebinge adentun).
12 Jesús feipicünui taiñ rupayal rume huesaque dungu mu. Taiñ familia caiñetuafeiñmu, inacayafeiñmu caquelu, müleafui hueichan ca huesaque cutran (Mat. 10:36; Mar. 13:9; Luc. 21:10, 11). Com tüfachi dungu cüdaungeafui taiñ amual ti trahun mu Jesús tañi lan ñi acordangeal. Fentren pu peñi ca pu lamngen rupan mu rume feitachi dungu mu, acordaquefingün Jesús tañi lan. ¿Chumngechi quellueyu Jehová?
13. ¿Chumngechi Jehová cümelcabi Artiom ñi bemün?
13 Carcel mu mülelu engün. Taiñ pu peñi carceltucungelu eluuqueingün tañi acordayafiel Jesús ñi lan. Peafiyiñ ñi femün taiñ peñi Artiom. 2020 tripantu mu ñi acordangeal Jesús ñi lan, taiñ peñi cerrantucungei quiñe pichi catrüntucu mu ca quechu presu tuculelngei fei mu. Femngechi mu rume, pünefi chem tañi nieel tañi adentucünuafiel ti cofque ca ti pulcu, fei huli ti hueupin. Huelu mülei quiñeque dungu, tañi pu compañ mülelu catrüntucu mu pütremtuquefuingün ca re huesaque dungu feipiyauquefuingün. Fei Artiom pedifi tañi pu compañ ñi femnoal feitachi huesaque dungu quiñe hora mu, femngechi Artiom cüme acordayafui Jesús tañi lan. Tañi pu compañ feipieyu: “Felei, femlayaiñ”. Fei Artiom feipifi engün: “¿Iñche quimeltuhuafuiñ chumngechi ñi acordangequen Jesús tañi lan?”. “No, iñchiñ duamlafiyiñ” pingei ta Artiom. Huelu deu ñi nentun ñi hueupin ta Artiom, tañi pu compañ ayüfuingün tañi doi quimal engün.
14. Bütra cutran COVID 19 mu, ¿chumi Jehová tañi pu che tañi tuculpabel Jesús ñi lan?
14 Mülen mu rume ti COVID-19. Mülen mu tüfachi huesa cutran, pepi trahuluulaiñ taiñ acordayafiel Jesús ñi lan, huelu ca femngei tüfachi falin trahun. c ¿Chumngechi am? Fentrenque trahunche trahuluhuingün internet mu. Huelu quiñeque lof mu ngelai internet, ¿chumngechi femingün pu peñi ca pu lamngen? Allcütufingün ti hueupin television mu cam radio mu. Ca quiñeque Betel ruca grabafingün ti hueupin doi 500 quehun mu com che ñi allcütuafiel. Fentrenque peñi ca lamngen camapu mülelu yelelngei tüfachi grabacion ñi allcütuafiel engün.
15. Sue tañi bemün, ¿chem quimeleleiñmu?
15 Quiñeque che caiñetuqueyu tañi familia. Feimu fei engün cüdautuqueingün tañi amual ti falin trahun mu ñi acordangeal Jesús ñi lan. Peafiyiñ ñi rupan quiñe domo papeltuquefilu ta Biblia, Sue pingelu. 2021 tripantu mu, quiñe antülehuelu ñi femngeal feitachi falin trahun, tüfachi domo feipifi tañi quimeltulelqueteu ta Biblia: “Amulayan ti trahun mu. Amuli, tañi familia illcutuafeneu engün” pifi. Taiñ lamngen papeltuleyu Lucas 22:4 ca feipieyu: “Huesaque dungu mu rupaliyiñ, mülei taiñ inayentuafiel ta Jesús. Ngillatuafimi ta Jehová, maneluhuaimi quisu mu com tami piuque mu” pieyu. Cangelu antü mu, feitachi domo pepicai cofque ca ti pulcu, fei pefi ti grabangeelchi hueupin pulihuen Jesús tañi lan ñi acordangeal jw.org mu. Feichi pun ti domo quisulei tañi pieza mu, fei allcütufi ti falin hueupin. Fei tüfachi domo feipifi tañi quimeltuqueteu Biblia: “Cüme ngülam eluen huiya, com tañi piuque mu eluhun tañi allcütuafiel ti hueupin, fei Jehová quellueneu. Rume ayüucülen ca mañumcülen” pi. Eimi, ¿ca femngechi dungu mu rupamequeimi Sue reque? Huelu, ¿maneluhuafuimi Jehová tami quelluaeteu?
16. Amuliiñ Tuculpangeam mu, ¿chemu quimniiñ Jehová cümelcaaiñmu mai? (Romanos 8:31, 32).
16 Jehová falintuquei iñchiñ taiñ acordafiel mu Jesús tañi lan. Iñchiñ mañumfiliyiñ tañi femün iñchiñ mu, Jehová cümelcayaiñmu (papeltunge Romanos 8:31, 32). Tüfachi tripantu eluhuaiñ taiñ amual feitachi falin trahun mu ca doi cüdahuelafiyiñ ta Jehová.
ÜLCATUN 18 Mañumcüleiñ tati montulchen mu
a Martes 4 conchi abril 2023 tripantu mu, com huall mapu mu acordangeai Jesús ñi lan. Fentren che amualu tüfachi falin trahun mu turpu amuquelafuingün. Ca fentrenque testigo amuquenofulu fentren tripantu, feula amuaingün. Fentrenque che ruparupangei huesaque dungu mu, huelu eluhuaingün tañi acordayafiel Jesús ñi lan. Chem dungu rupalmi rume, Jehová cümelcayaimu acordafilmi Jesús tañi lan.
b Tüfachi troquiñ mu, ca üi tuculelngei ta quiñeque che.
c Cafei jw.org quintuafuimi “Conmemoración del 2021” huincadungun mu.
d ¿CHEM PENGELI TI ADENTUN? Feichi 1960 ca fantepu nieiñ taiñ mangelafiel ta pu che ñi acordayafiel Jesús ñi lan engün. Feitachi mangelün amulei ñi doi cümelcalerpun. Papel mu ca electronico chemcün mu nieiñ.
e ¿CHEM PENGELI TI ADENTUN? Quiñeque peñi ca lamngen tüngcülenon mu rume tañi lof, huelu acordaquefingün müten Jesús tañi lan.
