1. Jesús, ¿chem eipibi tañi pu inanequetu? ¿Chem ngülamtubi?

 PICHI faltalehuelu ñi layal, Jesús tañi pu discipulo ramtueyu: “Epe puucülele ñi afal mapu meu müleyechi dungu, ¿chem pengeai?” (Mat. 24:3). ¿Chumngelu ramtuingün? Fei engün ayüfuingün chi ñi quimal chumül ñi apümcangeal Jerusalén huaria ca tañi templo. Fei Jesús feipieyu: “Inei no rume quimlai chem antü ca chem hora ñi cüpayal iñche, pu cümeque püllü huenu mülelu ca ti Fotüm no rume. Ti Chau müten quimniei”. Jesús feipilai chem ñi rupayal pu judio ñi antü mu müten, ca feipi ñi rupayal famülque mu. Fei ngülamtufi tañi pu discipulo ñi “llihuatuleal engün” (Mar. 13:32-37).

2. Pu cristiano che, ¿chemu trepeluucüleabüingün?

² Pu hunenque cristiano judio mülefui tañi llihuatuleal engün, femle engün montuafuingün. Jesús feipifi engün chem dungu ñi rupayal petu ñi apümcangenon chi huaria ca tati templo. Feipifi: “Pefilmün ta Jerusalén ñi hualloñmanieteu pu soltau, quimaimün ñi püllelepan tañi apümcangeal ti huaria” (Luc. 21:20, 21). Tati allcütufilu com ñi feipieteu Jesús lefmahuingün huincul püle, fei montuingün.

3. ¿Chem ngüneduamaiñ tübachi quimelün mu?

 ³ Pichilehuei ñi afal huesaque dungu. Feimu iñchiñ ca mülei taiñ nieal cüme raquiduam ca taiñ llihuatuleal. Feimu taiñ pefiel mu com ñi ruparupangen mapu mu, ¿chem raquiduam nieaiñ? ¿Chumngechi quisutu ngüneduamuhuafuiñ? Pichin tiempo ñi mülen mu, ¿chem eluhuaiñ taiñ femal? Com tüfa peafiyiñ tüfachi troquiñ mu.

4. ¿Chemu cüme quimabüiñ bill dungu upalelu mapu mu?

⁴ Cümei taiñ ngüneduamal chem ñi ruparupangen huall mapu mu, femngechi taiñ inaduamafiel ñi femtripaquen Biblia ñi feipin. Jesús feipi chem ñi rupayal pichi faltale ñi apümcangeal huesaque dungu (Mat. 24:3-14). Ti apostol Pedro feipi taiñ cüme ngüneduamal tati profecia Biblia mu ñi femtripamequen, femngechi taiñ doi maneluhual (2 Ped. 1:19-21). Cafei Apocalipsis 1:1 feipi: “Fei tüfa Jesucristo ñi quimfalcünuel. Chau Dios elufi tüfachi dungu ta Jesús, femngechi ñi pengelelafiel tati pu serfiquefilu ta Chau Dios chem dungu ñi rupayal pichiñma mu”. Feimu cümefui taiñ quimal chem tañi rupamequen com mapu mu ca tati profecia ñi femtripamequen. Ayüafuiñ chi taiñ nütramcayafiel feichi dungu mu taiñ pu peñi ca pu lamngen.

5. Ngütramcaliiñ pu pelon dungu mu, ¿chemu cüñiutucuhuabiiñ? ¿Ca chumabüiñ? (Pebinge pu adentun).

⁵ Nütramcaliyiñ chumngechi ñi huechurpumequen feitachi profecia, cuñiutucuhuaiñ. ¿Chumngelu? Ayüafuiñ chi taiñ nütramcayal chem dungu ñi rupayal, huelu feipiyauliyiñ quisu taiñ raquiduam, quiñeucülehuelayai taiñ trahunche. Por ejemplo, allcütuafuiñ pu politico huall mapu mu chumngechi ñi cüme elcünutual huesaque dungu, fei ñi cümelcaletual pu che. Fei, ¿chumafuiñ? Pürüm feipilayaiñ ñi huechutripamequen ti profecia mülelu 1 Tesalonicenses 5:3, doi mai ngüneduamafiyiñ hueque dungu ñi feipiqueel Jehová tañi troquiñche. Tüfa ta nütramcayafiyiñ taiñ pu peñi ca pu lamngen, femngechi ti trahunche doi quiñeucüleai (1 Cor. 1:10; 4:6).

6. 2 Pedro 3:11-13 tañi eipin, ¿chem quimeleleiñmu?

⁶ (Papeltunge 2 Pedro 3:11-13). ¿Chumngelu mülei taiñ cüme ngüneduamafiel ti profecia? Ti apostol Pedro feipieiñmu: “Raquiduamtucunieafimün Chau Jehová ñi antü”. Iñchiñ ayülaiñ taiñ quimal chem antü ca chem hora mu ñi acual Armagedón. Huelu mai petu ñi acunon feichi antü, ayüqueiñ taiñ ‘femal lif cümeque dungu ca taiñ serfiafiel ta Chau Ngünechen com piuque meu’ (Mat. 24:36; Luc. 12:40). Taiñ femal, mülei taiñ ngüneduamuhual chem ñi mülen taiñ piuque mu ca taiñ femquen.

7. ¿Chumabüiñ taiñ trepeluucüleal? (Lucas 21:34).

⁷ Jesús feipifi tañi pu discipulo ñi inaduamal ñi chem rupamequen com mapu mu, huelu ca feipifi tañi ‘quisutu ngüneduamuhual engün’ (papeltunge  Lucas 21:34). ¿Chumngechi quisutu ngüneduamuhuafuiñ? Cuñiutucuucüleaiñ chem rume famentuafeteu Jehová mu, feimu famentuafiyiñ llemai. Femngechi Jehová piuqueyenieaiñmu (Prov. 22:3; Jud. 20, 21).

8. Pablo, ¿chem ngülamtubi pu cristiano che?

⁸ Ti apostol Pablo feipi tati pu cristiano ñi quisutu ngüneduamuucüleal engün. Pu Éfeso che feipifi: “Rume cuñiutuculemün, huedhued che reque miyaulayaimün, quimche reque miyahuaimün” (Efes. 5:15, 16). Huecüfü chumquei rume taiñ püntünentuaeteu Jehová mu. Feimu Biblia feipieiñmu taiñ rumel loncontucunieafiel Chau Jehová ñi ayünieel, femngechi taiñ chaftuafiel tati Huecüfü (Efes. 5:17).

9. ¿Chumngechi quimniiñ Jehová tañi ayüquel iñchiñ ngelu?

⁹ Biblia feipilaeiñmu com taiñ famentuafeteu ta Jehová mu. Jehová Biblia mu com feipiquelaeiñmu taiñ chumal ca taiñ femnoal. Feimu taiñ cüme femal, mülei taiñ quimtucual chem ñi ayünieel ta Jehová. ¿Chumngechi femafuiñ? Papeltunieafiyiñ ta Biblia ca raquiduamaiñ taiñ papeltuel mu. Feimu quimtuculiyiñ tañi ayünieel ta Jehová ca ñi raquiduamqueel ta Jesús, fei quimche reque miyahuaiñ (1 Cor. 2:14-16). Quiñeque mu quimfemqueiñ chem taiñ huesalcayafeteu, huelu ca quiñeque mu femquelaiñ. Feimu mülei taiñ cuñiutucuhual.

10. ¿Chem cuñihun-ngechi dungu bamentuaiñ?

¹⁰ ¿Chem huesaque dungu ngelai taiñ femal? Daquelcantuyaulayaiñ, icaulayaiñ ca putucaulayaiñ pulcu. Huesa pilayafiyiñ ta caquelu che taiñ huesa duamelafiel. Pelayaiñ quehuatun dungu ca podngechi dungu (Sal. 101:3). Huecüfü quintuyahulquei reque taiñ püntünentuaeteu Jehová mu (1 Ped. 5:8). Fei cuñiutucuunoliyiñ, conafui taiñ piuque mu huesaque dungu. Por ejemplo, ütrirchefengeafuiñ, diñmatufengeafuiñ, üderpuafuiñ ta che ca mallmahuafuiñ (Gál. 5:19-21). Ellaca mu, huesa dungu no piafuiñ. Huelu cuñiutucuunoliyiñ ca famentufemnoliyiñ, taiñ piuque mu foliluhuafui reque feitachi huesaque dungu ca rume huesalcayafeiñmu (Sant. 1:14, 15).

11. ¿Chem dungu hueyalcaabeiñmu ca chemu bamentuaiñ?

¹¹ Ca cuñiutucuhuaiñ taiñ nienoal huesaque hueni. Raquiduamnge: nieimi chi quiñe compañ cüdau mu testigongenolu. Tañi cüme raquiduamal pu testigo mu, huenicantuafimi. Quiñeque mu, amuafuimi chi tami iyal feichi che eimu. Rupachi antü huimafuimi chi tami femal. Quiñeque mu, nütramcayafeimu podngechi dungu mu, eimi huesa duamafuimi. Fei rupachi antü mu, huimtuafuimi ti nütram ñi nieel tami compañ, fei huesa duamelhuelayafeimu. Quiñe antü tami compañ mangeleimu tamu tripayal. Fei fente tami tripan tami compañ engu, fei reque raquiduamürpuimi. Fei pichiñma mu, eimi femürpuaimi quisu reque. ¿Chem quimeltueiñmu tüfa? Cümei taiñ huenicantuafiel pu che, huelu ngelai taiñ fentren tiempo rupayal feichi che iñchiñ. Femliyiñ inayenturpuafuiñ, feimu mülei taiñ cuñiutucuhual (1 Cor. 15:33). Fei  quisutu ngüneduamuuliyiñ chumngechi ñi feipin Jesús, fentren tiempo rupalayaiñ pu poyequenofilu ta Jehová iñchiñ (2 Cor. 6:15). Inaduamliyiñ chem taiñ huesalcayafeteu, famentufemafiyiñ.

12. Petu ñi acunon abalchi antü, ¿chumingün pu inanequetu?

¹² Petu ñi apümcangenon Jerusalén ca ti templo, Jesús ayülafui tañi pu discipulo ñi anücünuhual müten, elufi quiñe falin cüdau. Huercüfi engün ñi amuldungual “Jerusalén püle, com Judea, Samaria ca huall mapu püle” (Hech. 1:6-8). Fentren cüdau niefuingün, femngechi cüdaule engün ngünamcalayafuingün tañi tiempo.

13. ¿Chemu cüme elquiantüaiñ? (Colosenses 4:5).

¹³ (Papeltunge Colosenses 4:5). Rume falin-ngei taiñ cuñiutucuhual taiñ ngünamcanoal taiñ tiempo, ¿chumngelu am? Biblia feipi com iñchiñ ‘huesa ruparumeafuiñ’ (Ecl. 9:11). Fei larumeafuiñ.

14, 15. ¿Chumngechi cüme elquiantüaiñ? (Hebreos 6:11, 12) (pebinge adentun).

¹⁴ ¿Chumafuiñ taiñ ngünamcanoafiel  taiñ tiempo? Femaiñ Jehová tañi ayüqueel ca doi hueniyeafiyiñ (Juan 14:21). Inayaiñ ñi feipin Biblia: “Nehuentulemün, rume cüdaucüleaimün Ñidol tañi dungu mu” (1 Cor. 15:58). Femngechi acule Jehová tañi antü cam laliyiñ rume, huesa duamcülelayaiñ, ngünamcaiñ taiñ tiempo pilayaiñ (Mat. 24:13; Rom. 14:8).

¹⁵ Jesús quelluniefi tañi pu discipulo ñi amuldungual ti cümeque dungu huall mapu mu. Taiñ trahun mu ca taiñ publicacion mu Jesús pepicaqueiñmu taiñ amuldungual ca eluqueiñmu com taiñ duamnieel taiñ femal feitachi cüdau (Mat. 28:18-20). Feimu, ¿chumaiñ iñchiñ? Com nehuen mu amuldunguaiñ ca quimeltuafiyiñ tati pu che. Ca llihuatuleaiñ petu acunole Jehová ñi antü. Inayaiñ ñi feipin Hebreos, femngechi ‘rumel maneluucüleaiñ ñi femtripayal chem taiñ üngümnieel’ (papeltunge Hebreos 6:11, 12).

16. ¿Chumabüiñ bill iñchiñ?

¹⁶ Jehová deu quimniei chem hora ca chem antü mu ñi apümcayafiel com tañi ngünenieel ta Huecüfü. Acule feichi antü, Jehová huechurpuai com tati profecia ñi feipicünuel Biblia mu. Alüñmalu troquiafuiñ, huelu Jehová ñi antü alüñmalayai llemai (Hab. 2:3). Feimu eluucüleaiñ tañi feipin Miqueas 7:7, feipi: “Jehová ñi duam meu upeutulean. Ca cüme raquiduam mu maneluucülean Chau Ngünechen ñi duam mu, iñche tañi montulqueteu”.