1. ¿Chemu ngüneduambali pepicaucüleal huebpale huedaque dungu?

 CÜME pepicaucüleliyiñ, montulaiñ taiñ mongen. Por ejemplo, ruparumele quiñe fütra nüyün, fei cüme pepicaucüleliyiñ, quisu montuafuiñ ca quelluafuiñ ñi montulngeal caquelu. Europa mapu mu quiñe troquiñche quelluchequelu feipi: “Pu che cüme pepicaucülele montulafui ñi mongen”.

2. ¿Chemu pepicaucüleaiñ acule bütra cutrancahun? (Mateo 24:44).

² Acurumeai ti “fütra cutrancahun” (Mat. 24:21). Fütra cuifi mu Jesús feipi taiñ cüme pepicaucüleal (papeltunge Mateo 24:44). Feimu acule feichi antü afmatulayaiñ. Cüme pepicaucüleliyiñ, cüdaungelayai taiñ montual ca quelluafuiñ caquelu ñi femal (Luc. 21:36).

3. Taiñ pepicaucüleal bütra cutrancahun mu, ¿chemu duambali nehuentuleal, bürenecheal ca piuqueyecheal?

³ ¿Chem quelluaiñmu taiñ pepicaucüleal acule ti fütra cutrancahun? Taiñ nehuencüleal, cutranpiuqueyecheal ca piuqueyecheal. ¿Chumngelu duamnieaiñ taiñ nehuencüleal? Huercüngeliyiñ taiñ feipiafiel pu che ñi condenangeal ca caiñetueliyiñmu tati pu che, mülei taiñ maneluhual Jehová mu taiñ quelluaeteu, feimu duamnieaiñ taiñ nehuencüleal (Apoc. 16:21). Ca, ¿chumngelu duamnieaiñ taiñ cutranpiuqueyecheal? Fütra cutrancahun mu taiñ pu peñi ca pu lamngen ñamümle engün com tañi nieel, cutranpiuqueyeafiyiñ fei quelluafiyiñ chem ñi faltalen engün (Hab. 3:17, 18). Ca, ¿chumngelu duamnieaiñ taiñ piuqueyecheal? Pu troquiñque gobierno quiñeucülele fei caiñetueliyiñmu, müleaiñ chi taiñ pu peñi ca pu lamngen iñchiñ quiñe pichi rupachi ruca mu. Feimu duamnieaiñ taiñ rume piuqueyeafiel taiñ pu peñi ca pu lamngen (Ezeq. 38:10-12).

4. ¿Chemu cüdahuaiñ taiñ nehuentuleal, bürenecheal ca piuqueyecheal?

 ⁴ Biblia feipieiñmu taiñ nehuencüleal, taiñ cutranpiuqueyecheal ca piuqueyecheal. Lucas 21:19 feipi: “Nehuentuucülemün, fei montuai tamün mongen”. Colosenses 3:12 feipi: “Cutranpiuqueyecheaimün”. Ca 1 Tesalonisenses 4:9, 10 feipi: ‘Chau Ngünechen mai ta quimeltueimünmeu tamün hueluconque piuqueyehual. Huelu pu peñi, yafültucuhuiyiñ, doi amulepe tamün piuqueyehun’. Feichi mu pu cristiano nehuencülefuingün, cutranpiuqueyechequefuingün ca piuqueyechequefuingün, huelu ngülamtungeingün femngechi dungu ñi femmequeal engün. Iñchiñ ca femngechi mülei taiñ femal. Feimu tüfachi troquiñ mu inaduamafiyiñ ñi femquefel pu hunenque cristiano ca chumngechi inayentuafuiñ engün. Femliyiñ, pepicaucüleaiñ acule ti fütra cutrancahun.

5. Pu hunenque cristiano, ¿chumingün tañi nehuentuleal?

⁵ Pu hunenque cristiano duamniefuingün tañi nehuencüleal (Heb. 10:36). Fei engün doi huesaque dungu mu rupaquefuingün tañi cristianongen mu. Fei engün caiñetuquefeyu pu loncolechi religioso judio, pu autoridadcülelu Roma mu ca quisu tañi familia cütu caiñetuquefeyu (Mat. 10:21). Ca ti trahunche mu mülequefui apostata coilaque dungu quimeltuquelu ca püntülquefilu ti trahunche, feimu pu peñi ca pu lamngen mülefui ñi eluucüleal engün ñi ngünencanoaeteu engün (Hech. 20:29, 30). Felen mu rume ti dungu, huelu nehuentuleingün (Apoc. 2:3). ¿Chem quellueyu? Raquiduamingün cuifique che poyequefilu Jehová, por ejemplo ñi rupan ta Job (Sant. 5:10, 11). Fei engün ca llellipuingün ñi elungeal nehuen (Hech. 4:29-31). Ca maneluucülequefuingün Jehová ñi eluaeteu cümeque dungu aguantale engün (Hech. 5:41).

6. Merita ñi bemün, ¿chem quimeleleiñmu?

⁶ Biblia mu ca taiñ publicacion papeltuafuiñ quiñeque che ñi nehuentulen mu. Ngüneduamliyiñ ñi femün engün, ca quelluaiñmu taiñ ca femngechi femal. Ngüneduamafiyiñ ñi rupan quiñe lamngen Merita pingelu, Albania mapu mu mülei. Quisu tañi familia caiñetueyu tañi testigongen mu. Fei feipi: “Biblia mu papeltulu iñche chem dungu ñi rupan ta Job, puhui tañi piuque mu. Fei quimlafui chumngelu ñi fente cutrancaucülen, huelu feipi: ‘¡Lali rume, elcünulayan ñi nor piuquengen!’ (Job 27:5). Iñche raquiduamquen Job doi huesaque dungu mu rupai iñche mu. Huelu iñche quimnien inei ñi cutrancaquefiel ta che, Job quimquelafui”.

7. Upanolmi ume bütraque huedaque dungu, ¿chumngechi pepicahuabüimi?

⁷ ¿Ca chem quelluaiñmu taiñ nehuentuleal? Llellipunieafiyiñ ta Jehová fill antü ca feipiafiyiñ chem mu taiñ raquiduamcülen (Filip. 4:6; 1 Tes. 5:17). ¿Feula huesa rupalepelaimi chi? Huelu huesa duamcülelmi cam illculelmi, ¿llellipuquefimi mai ta Jehová tami quelluaeteu? Llellipufilmi Jehová pichiquen dungu mu, fei ruparumelmi huesaque dungu mu cüpalechi antü mu, llellipufemafimi. Ca maneluucüleaiñ Jehová mu taiñ cüme quelluaeteu (Sal. 27:1, 3).

8. Lamngen Mira tañi bemün, ¿chem quimeleleiñmu? (Santiago 1:2-4). (Pebinge tati adentun).

⁸ Fachantü nehuencüleliyiñ taiñ rupan huesaque dungu mu, fei doi cüdaungelayai taiñ nehuentuleal acule ti fütra  cutrancahun (Rom. 5:3). ¿Chumngelu? Quiñeque peñi ca lamngen ñi aguantan mu huesaque dungu, doi nehuencünuhuingün ñi chaftuafiel cüpalechi doi huesaque dungu. Ñi pefiel mu Jehová chumngechi ñi quellueteu, doi maneluhuingün ñi quelluaeteu cüpalechi antü mu (papeltunge Santiago 1:2-4). Femngechi raquiduami quiñe lamngen Albania mapu mu, Mira pingelu. Quiñeque mu raquiduamquei inei no rume ñi rupaquen doi huesaque dungu fei reque. Huelu raquiduami chumngechi Jehová ñi quellueteu rupan mu 20 tripantu. Fei feipi: “Elcünulayan tañi serfiniefiel Jehová, fei tañi quellueteu fentren huesaque dungu ñi rupan mu”. Iñchiñ ca femngechi raquiduamafuiñ Jehová taiñ quelluniequeteu taiñ nehuencüleal. Chaftufilmi huesaque dungu tami rupalen, Jehová quimniei, fei eluaimu tami cümelcaleal (Mat. 5:10-12). Feula nehuencülelmi, fei acule ti fütra cutrancahun eluucüleaimi tami nehuencüleal.

9. Antioquía de Siria tañi trahunche, ¿chumngechi bürenechequingün?

⁹ Inaduamafiyiñ ñi femün pu cristiano Antioquía mu. Allcülu engün ñi mülen filla Judea mu, cutranpiuqueyefingün tañi pu peñi ca pu lamngen. Re müleduamlaingün müten, fei eluhuingün ñi quelluafiel. Feimu “tunte ñi pepi femün engün, adcünuingün ñi quellual pu peñi ca pu lamngen Judea mapu mülelu” (Hech. 11:27-30). Ñi rume camapulen engün, huelu eluhuingün ñi quelluafiel (1 Juan 3:17, 18).

10. Taiñ pu peñi ca lamngen upale huedaque dungu mu, ¿chumngechi bürenecheabüiñ? (Pebinge tati adentun).

¹⁰ Ruparumele huesaque dungu, iñchiñ ca femngechi pengelaiñ taiñ cutranpiuqueyefiel taiñ pu peñi ca lamngen. ¿Chumngechi eluucüleafuiñ taiñ quellual? Feipiafuiñ pu loncolelu taiñ quelluntucual, hulafuiñ plata ñi amuleal Jehová ñi cüdau huall mapu mu cam ngillatuleafuiñ quiñeque rupalelu huesaque dungu mu (Prov. 17:17). b Raquiduamaiñ 2020 tripantu mu aculu ti huesa cutran COVID-19, fei elcünungei doi 950 Quelluconquechi Troquiñche ñi quelluafiel doi huesaque dungu rupalelu. Rume mañumfiyiñ pu quellulu tüfachi cüdau mu. Tañi cutranpiuqueyefiel engün pu peñi ca pu lamngen, elufingün tañi duamnieel, quellufingün ñi serfinieafiel ta Jehová ca quiñeque huiño deumaleltufi ñi ruca engün. Ca quiñeque Trahunhue Ruca ca deumatuingün (ca inaduamnge 2 Corintios 8:1-4).

11. Taiñ bürenechen mu, ¿chumngechi yamngeabüi ta Jehová?

¹¹ Ruparumen mu huesaque dungu, pu che ngüneduamquei taiñ cutranpiuqueyechequen ca taiñ quelluchequen. Inaduamafiyiñ ñi rupan 2019 tripantu mu Bahamas mapu meu. Rupalu ti fütra meulen Dorian pingelu, teifücafi quiñe Trahunhue Ruca. Petu huiño deumangetulu ti Trahunhue Ruca, pu peñi ramtufingün quiñe huentru tunten ñi cofrayal ñi quiñeque cüdau ñi femal. Fei ti huentru feipi: “Iñche rume afmatulehuequen chumngechi tamün femquefiel tamün pu hueni. Feimu quelluntucuan tüfachi cüdau mu. Iñche cofralayan tañi cüdau mu, material mu ca herramienta mu no rume” pi.  Fentrenque che quimlafingün ta Jehová, huelu quiñeque che inaduamquei ñi femquen ta pu testigo. Pengel-liyiñ taiñ cutranpiuqueyechen, quelluafuiñ caquelu pu che ñi fülconal Jehová mu. Jehová “rume fütra piuqueyechequei” (Efes. 2:4). Tüfa rume ayühuelqueiñmu.

12. Taiñ bürenechen, ¿chumngechi pepicaqueiñmu acule tati bütra cutrancahun? (Apocalipsis 13:16, 17).

¹² Acule ti fütra cutrancahun, ¿chumngelu mülei taiñ cutranpiuqueyecheal? Biblia feipi pu quelluntucuquenolu pu gobierno mu rupayaingün huesaque dungu, tüfa rupaquei fachantü ca rupayai ti fütra cutrancahun (papeltunge Apocalipsis 13:16, 17). Feimu pu peñi, pu lamngen duamnieaingün ñi quellungeal ñi nieal tañi duamnieel engün. Cutranpiuqueyecheliyiñ, Jesús cümelcayaiñmu cüpale tañi ramtucadungupayafiel pu che (Mat. 25:34-40).

13. Pu hunenque cristiano, ¿chumingün tañi doi piuqueyehual engün? (Romanos 15:7).

¹³ Hunen siglo mu, com pu cristiano piuqueyeuquefuingün. Huelu, ¿cüdaungelafui ñi pengeluhual piuqueyehun engün? Femlai. Peafiyiñ ñi rupan ti trahunche Roma mapu mu. Quiñeque judio tuhun-ngelu pichicalu quimeltungei Moisés ñi ley. Huelu ca mülefui peñi ca lamngen judiongenolu, fei engün cüpai fillque tuhun mu. Quiñeque esclavongefuingün chi, ca caquelu lifrelefuingün, cam quiñeque niefuingün esclavo cüdauquelu. Ñi caquerumen mu engün, fei ¿chem quelluafeyu ñi doi piuqueyehual engün? Pablo ngülamtueyu engün: “Hueluquentu llouniehuaimün ayühun mu” (papeltunge Romanos 15:7). ¿Chumngechi “llohuafuingün ayühun mu”? Mülefui ñi llohual engün piuqueyehun mu, chumngechi ñi mangelngequen quiñe che ruca mu cam ñi mangelngequen quiñe che ñi müleal tañi pu hueni engün. Pablo feipifi Filemón lefmaulu tañi esclavo ruca mu, huiñotule “cüme llohuafimi” pifi (Filem. 17). Ca Priscila ca Áquila doi quimfuingu Apolos mu, huelu cüme lloufingu ta Apolos (Hech. 18:26). Feichi pu cristiano caquerumefuingün rume, huelu eluulai feichi dungu ñi püntülaeteu engün. Huelu mai llohuingün ayühun mu.

14. Anna tañi büta engu, tañi piuqueyebel pu peñi ca pu lamngen, ¿chumingu?

¹⁴ Doi quimfiliyiñ ca hueniyefiliyiñ taiñ pu peñi ca lamngen, ca pengelelafiyiñ taiñ piuqueyeniefiel. Femliyiñ, fei engün ca piuqueyenieaiñmu (2 Cor. 6:11-13). Peafiyiñ ñi rupan Anna ca tañi füta. Fei engu huercüngeingu ñi amual África Occidental mu, huelu pichin rupalu acurumei ti COVID-19. Feimu pepi trahuluulafuingu pu peñi ca pu lamngen engün. Fei, ¿chumngechi pengelingu ñi piuqueyechequen? Internet mu nütramcafingu pu peñi ca pu lamngen, femngechi ñi doi cüme quimafiel engün. ¿Chumngelu femingu? Anna feipi: “Tañi familia iñchiñ rupan mu huesaque dungu mu ca cümeque dungu mu, pu peñi ca pu lamngen pengelelqueiñmu taiñ piuqueyenieteu. Turpu ngoimalayafiñ tüfa, feimu ca eluucülequen tañi piuqueyecheal”. Pu peñi ca pu lamngen müna ayühuingün tañi femün tüfachi curehuen. Femngechi fei engün ca eluhuingün ñi mütrümafiel ca ñi mandalelafiel mensaje.

15. Lamngen Vanessa tañi bemün, ¿chem quimeleleiñmu? (Pebinge tati adentun).

¹⁵ Trahunche mu caquerume peñi, lamngen mülei ca fillque tuhun-ngei. ¿Chem  quelluafeiñmu taiñ doi piuqueyeafiel engün? Ngüneduamafiyiñ ñi cüme piuquengen engün. Peafiyiñ ñi rupan Vanessa, Nueva Zelanda mapu mu mülelu. Taiñ lamngen ayüquelafui ñi chumngechi chengen quiñeque peñi ca lamngen trahunche mu, feimu cüme yeuquelafuingün. Huelu famentuulai fei engün mu, doi trahuluhui fei engün mu. Femngechi quimürpui Jehová chumngelu ñi piuqueyefiel engün. Vanessa feipi: “Tañi füta huercüngei ñi huitrancontuafiel pu trahunche, feimu doi quimfiyu fillque lamngen, com caquerumeingün. Feula cüme yeuquen com pu lamngen mu. Rume ayüuquen ñi müleal caque lamngen trahunche mu. Jehová ca rume ayüquefi, feimu cüpalquefi fillque tuhun-ngechi che quisu mu”. Feimu, ¿chumngechi pengelafuiñ taiñ piuqueyeniefiel pu peñi ca pu lamngen? Eluhuaiñ taiñ peafiel engün chumngechi ñi pequeteu ta Jehová (2 Cor. 8:24).

16. Tati bütra cutrancahun mu, ¿chemu duambalngeai tati piuqueyechen?

¹⁶ Acule ti fütra cutrancahun, mülei taiñ piuqueyeafiel taiñ pu peñi ca pu lamngen. ¿Chumngelu? Peafiyiñ Jehová ñi feipifiel pu Israel che maloncontungelu Babilonia, femngechi ñi montual engün: “Amunge, iñche tañi pu che, concülenge ponhui ti catrüntucu ruca mu, ca racümcünunge ti hulngiñ tami furi püle. Pichintu ellcaucülenge fentepuule ñi rupan tati fütra illcun” (Is. 26:20). Acule ti fütra cutrancahun, ¿ca femngechi inapelayafiyiñ tüfachi dungu? Feitachi catrüntucu ruca, ¿adentulepelai taiñ trahunche? Feimu fütra cutrancahun mu serfifiliyiñ Jehová taiñ pu peñi ca pu lamngen iñchiñ, fei quisu cuñiutucuaiñmu. Feimu llemai, feula mülei taiñ doi piuqueyeafiel taiñ pu peñi ca pu lamngen, femngechi montuaiñ.

17. Pepicaucüleliiñ, ¿chem bemabüiñ acule tati bütra cutrancahun?

¹⁷ Acule “Jehová ñi fütra antü”, cüdaungechi dungu rupayai huall mapu mu (Sof. 1:14, 15). Iñchiñ Jehová ñi pu chengen ca rupayaiñ cüdaungechi dungu mu. Huelu cüme pepicaucüleliyiñ, tüngcüleaiñ ca quelluafiyiñ caquelu pu che. Nehuencüleliyiñ, chaftuafiyiñ chem huesa dungu rume. Cutranpiuqueyecheliyiñ, eluhuaiñ taiñ quelluafiel taiñ pu peñi ca pu lamngen chem ñi faltalen engün. Ca piuqueyefiliyiñ taiñ pu peñi ca pu lamngen feula, ca piuqueyenieafiyiñ cüpalechi antü mu. Femliyiñ, Jehová eluaiñmu rumel mongen, femngechi cutranhuelayaiñ ca rupahuelayaiñ huesaque dungu mu (Is. 65:17).