1, 2. Salmo 25:14 tañi eipin, ¿chumaiñ taiñ cüme hueniyehual Jehová iñchiñ?

 ¿CHUMQUEI pu cümeque huenihuen? Piuqueyeuquei ca quelluuquei. Huelu, ¿chumafuiñ taiñ hueniyeafiel Jehová? Biblia feipi ayüliyiñ taiñ hueniyeafiel Jehová, mülei taiñ yamnieafiel (papeltunge Salmo 25:14).

² Tunten tripantu rume yenieliyiñ taiñ serfiniefiel Jehová, mülei taiñ respetanieafiel. Feimu tüfachi troquiñ mu peafiyiñ ¿chumngechi yamquefiyiñ ta Jehová? ¿Chem quelluafeiñmu taiñ yamnieafiel? Ca peafiyiñ ñi femün Abdías, Jehoiadá ca ti rey Jehoás.

3. Tati llücan, ¿chumngechi cuñiutueiñmu?

³ Yamniefiliyiñ ta Chau Dios cuñiutucuhuafuiñ taiñ huesa duamelnoafiel. Cuñiutucuhun mu, cüme raquiduamqueiñ chem dungu rume taiñ femal. Raquiduamnge tüfa: fütra huincul mu müleliyiñ, llicayafuiñ taiñ ütrüfnagal, feimu cuñiutucuuqueiñ. Ca femngechi cuñiutucuuqueiñ taiñ allfüluunoal ca cuñiutucuuqueiñ taiñ huesa pinoafiel ca huesa duamelnoafiel quiñe hueni.

4. ¿Chem ayüni Satanás?

⁴ Satanás ayüi taiñ llicanieafiel ta Jehová. Huecüfü feipiquei Jehová ñi illculequen müten, ayüquei taiñ castigayaeteu ca tutefal-lai piquei (Job 4:18, 19). Huecüfü ayüniei taiñ llicanieafiel Jehová ca tañi serfihuenoafiel.  Taiñ huelulcanoaeteu Huecüfü, mülei taiñ yamnieafiel ta Jehová, femngechi cuñiutucuhuaiñ taiñ huesa duamelnoafiel.

5. ¿Chem am yamnebel Chau Dio?

⁵ ¿Chumquei quiñe che yamquefilu Jehová? Piuqueyequefi ca chem huesa dungu rume femquelai, femngechi ñi hueniyenieafiel. Jesús yamquefi ta Jehová (Heb. 5:7). Jesús llicaniequelafui ta Jehová (Is. 11:2, 3). Huelu mai, rume piuqueyequefui ca inaniequefui tañi huercün dungu (Juan 14:21, 31). Jesús reque, iñchiñ ca rume yamnieafuiñ ta Jehová, ¿chumngelu am femqueiñ? Quisu am piuqueyechequelu, quimün-ngelu, norngelu ca nehuen-ngelu. Ca quimnieiñ quisu taiñ rume piuqueyenieteu. Ca inaduamüñmaqueiñmu chumngechi llouquefiel cümeque ngülam. Feyentufiliyiñ, ayühuelafiyiñ. Huelu feyentunofiliyiñ, hueñancülafiyiñ (Sal. 78:41; Prov. 27:11).

6. ¿Chem quelluaiñmu taiñ yamneabel Chau Dio? (Salmo 34:11).

⁶ Com iñchiñ mülei taiñ quimal chumngechi taiñ fütra yamnieafiel ta Jehová (papeltunge Salmo 34:11). ¿Chumngechi femafuiñ? Ngüneduamafuiñ Jehová tañi deumael. Pefiel mu Jehová tañi deumael, quimafuiñ ñi quimün-ngen, ñi nehuen-ngen ca taiñ piuqueyeteu, femngechi doi piuqueyerpufiyiñ ca yamnierpufiyiñ (Rom. 1:20). Quiñe lamngen Adrienne pingelu feipi: “Pefiel mu iñche Jehová ñi deumael, inaduamquefiñ fente ñi quimün-ngen, femngechi doi afmatuquefiñ. Ca quimürpun Jehová quimniei chumngechi tañi doi cümelcaleal iñche. Eluucülen chem no rume tañi famentunoaeteu Jehová mu, quisu am deumaeteu iñche”. Fei eimi tüfachi semana elcünuafuimi tiempo tami raquiduamtucunieafiel Jehová ñi deumael mu. Femülmi, doi respetanierpuafimi Jehová ca doi piuqueyerpuafimi (Sal. 111:2, 3).

7. Tati ngillatun, ¿chumngechi quelluaiñmu taiñ yamnebel Jehová?

⁷ Rumel llellipufiliyiñ Jehová, tüfa quelluaiñmu taiñ doi yamnierpuafiel. ¿Chumngelu feipiafuiñ? Raquiduamnge tüfa, doi quimafuiñ ta Jehová llellipuniefiliyiñ. Cafei llellipufiliyiñ Jehová taiñ eluaeteu nehuen, fei acordaqueiñ fente tañi nehuen-ngen. Ca mañumtufiliyiñ Jehová tañi hulün mu tañi fotüm, acordaqueiñ fente taiñ piuqueyeteu Jehová. Ca rupaliyiñ huesaque dungu mu llellipufiliyiñ Jehová taiñ chaftuafiel, acordaqueiñ fente ñi quimün-ngen. Com tüfa quelluaiñmu taiñ doi yamnieafiel Jehová ca taiñ chumnoal rume femngechi taiñ famentuunoal Jehová mu.

8. ¿Chumaiñ taiñ yamnequebel Jehová?

⁸ ¿Ca chem quelluafeiñmu taiñ yamnieafiel ta Jehová? Biblia mu inaduamafiyiñ cümeque femün ca huesaque femün quiñeque che cuifi mu. Feula peafiyiñ ñi femün epu che poyequefilu Jehová: Abdías ca ti hunen lonco sacerdote Jehoiadá. Ca peaiñ ñi femün ti rey Jehoás, ellaca mu cüme serfiquefui Jehová, huelu rupachi antü mu serfihuelafi.

9. Abdías tañi yamnebel Chau Dio, ¿chumngechi quellueyu? (1 Reyes 18:3, 12).

⁹ Biblia feipi: “Abdías rume yamniequefui ta Jehová” (papeltunge 1 Reyes  18:3, 12). b Abdías fente tañi yamniefiel mu Jehová, manelfalngefui ca nor huentrungefui. Feimu ti rey elfalcünueyu tañi ülmen ruca (ca ngüneduamnge Nehemías 7:2). Abdías ca nehuen piuquengefui. Abdías ñi antü mu ngüneniequefui ti rey Acab, tüfachi rey doi huesaque dungu femi caquelu rey mu (1 Rey. 16:30). Cafei Acab ñi domo Jezabel pingelu, poyequefui ti coila dios Baal. Ca fente tañi üdefiel mu Jehová, Jezabel ayüquelafui tañi poyengeal ta Jehová Israel mu, langümfi cütu fentren profeta (1 Rey. 18:4). ¿Müna cüdautupelafui Abdías tañi poyeafiel Jehová?

10. Abdías, ¿chumngechi pengeli tañi bütra piuquengen?

¹⁰ ¿Chumngechi pengeli Abdías tañi nehuen piuquengen? Quiñechi, Jezabel inacafi Jehová tañi pu profeta ñi langümafiel engün, fei ¿chumi Abdías? Ellcafi pataca profeta: quiñe püle ellcafi 50 profeta, cañpüle ca 50, fei eluhui tañi eluafiel co ca cofque (1 Rey. 18:13, 14). Jezabel quimfule tañi femün ta Abdías, langümafui. Fei Abdías, ¿llicalepelafui? Ayülafui tañi langümngeal. Huelu doi piuqueyefui Jehová ca tañi pu serfiqueteu cuñiutucufulu rume ñi mongen.

11. Bentren peñi ca lamngen huall mapu mu, ¿chumngechi inayentubingün Abdías tañi bemün? (Pebinge tati adentun).

¹¹ Famülque mu, fentrenque testigo cheu tañi mülen catrütungequei tañi amuldungual engün. Fei, ¿chumingün? Respetaquefilu rume pu autoridad, Abdías reque fentecünuquelai tañi serfiafiel Jehová engün (Mat. 22:21). Doi yamquefingün Chau Dios engün pu huentru mu, femngechi pengelquefingün tañi yamniefiel Chau Dios (Hech. 5:29). Fei engün fentecünuquelaingün tañi amuldungual ca trahuluhual, ellcaquechi femquefulu engün rume (Mat. 10:16, 28). Ca raquiduamaniequefi tañi pu peñi ca pu lamngen ñi nieal com tañi duamnieel, femngechi ñi hueniyenieafiel  ta Jehová. Peafiyiñ ñi rupan Henri, África mapu mu. Cheu ñi mülen taiñ peñi catrütungequefui ñi amuldunguhuenoal pu testigo. Feichi mu, Henri eluhui ñi yelelafiel tañi pu peñi, pu lamngen fillque lifru ca papel. Fei feipi: “Iñche yehuen chengefun. Tañi yamniefiel mu müten ta Jehová, nehuencünuuquen” pi taiñ peñi. Eimi ca nehuencünuhuafuimi yamnierpufilmi ta Jehová.

12. Jehoiadá ca tañi cure, ¿chumngechi pengeli engu ñi nor piuquengen?

¹² Ti hunen lonco sacerdote Jehoiadá yamniequefui ta Jehová, feimu nor piuque mu femi Jehová ñi ayüqueel ca feipifi ta caquelu ñi poyeafiel ta Jehová. Jehoiadá ñi antü mu, Jezabel ñi püñeñ, Atalía pingelu, langümfalfi com pu reyngeafulu, quenü tañi pu nieto langümfalfi. Femngechi ñi reinacünungeal Judá mapu mu. Feitachi domo müna huesa chengefui, feimu fentrenque che llicaniequefeyu (2 Crón. 22:10, 11). Huelu Jehoiadá ca tañi domo montulfingu quiñe pichiche reyngeafulu, Jehoás pingequefui. Ellcafingu ca tremümfingu, femngechi David quiñe tañi pu cüpanche ñi reyngerpual. Jehoiadá eluhui ñi femal Jehová ñi ayüqueel, feimu huitracünuulai, Atalía llicafalfulu rume (Prov. 29:25).

13. Jehoiadá, ¿chumngechi huiño pengeli tañi nor piuquengen?

¹³ Jehoás regle tripantu nielu, Jehoiadá ca cüme dungu femi. Cüme tripafule, reycünungeafui ta Jehoás, David tañi cüpanche. Huelu cüme tripanofule, langümngeafui. Huelu Jehová ñi quellun mu, com cüme tripai. Tati pu loncolelu ca pu Leví che quellufingün ta Jehoiadá, feimu reycünufi ta Jehoás ca langümfi ta Atalía (2 Crón. 23:1-5, 11, 12, 15; 24:1). Jehoiadá ca eldungucünufi tati pu che ca ti rey ñi serfinieafiel müten ta Jehová, fei com tati pu che feipi ñi femal engün (2 Rey. 11:17). Jehoiadá ca elcünufi quiñeque huentru puerta mu, femngechi ñi connoal Jehová ñi ruca mu inei no rume podcülelu (2 Crón. 23:19). Femngechi Jehoiadá nor piuque mu femi Jehová ñi ayüqueel.

14. ¿Chem cümelcan llohui Jehoiadá?

¹⁴ Jehová feipicünui ñi yamafiel tuchi tañi yameteu. Femngechi femfi ta Jehoiadá (1 Sam. 2:30). Jehová adcünufi ñi huirintucungeal com ñi femün Jehoiadá Biblia mu, femngechi taiñ inayentuafiel (Rom. 15:4). Ca lalu Jehoiadá, rüngaltucungei cheu ñi rüngalngen pu rey (2 Crón. 24:15, 16).

15. Jehoiadá tañi upan, ¿chem quimeleleiñmu? (Pebinge pu adentun).

¹⁵ Ñi rupan ta Jehoiadá quelluqueiñmu taiñ yamnieafiel ta Jehová. Pu loncolelu Jehoiadá reque, cüme inaduamnieafui pu trahunche, femngechi tañi quelluafiel (Hech. 20:28). ¿Pu füchalu cai? ¿Chem quimürpuafingün Jehoiadá mu? Yamniefile engün Jehová, Jehová quisucünulayaeyu, doi mai quelluaeyu ñi femal cümeque dungu. Pu huecheque che quimürpuafingun Jehová ñi cüme troquifiel ta Jehoiadá. Femngechi ca femafui pu huecheque che, yamnieafui pu füchalelu, doi mai fentren tripantu yenielu ñi serfiquefiel Jehová (Prov. 16:31). Ca com iñchiñ quimeltuafeiñmu ñi femün pu loncolelu ca pu Leví che ñi quellufiel Jehoiadá, feimu cüme inayafiyiñ taiñ pu adnieteu (Heb. 13:17).

16. Jehoás, ¿chumngechi pengeli tañi hueniyenobel Chau Dio?

¹⁶ Huechengelu Jehoás, eluhui ñi poyeafiel Jehová tañi quellueteu mu Jehoiadá (2 Rey. 12:2). Huelu lalu ta Jehoiadá, Jehoás eluhui ñi allcütuafiel pu loncolelu Judá mu, huelu fei engün serfihuelafingün ta Jehová. Feimu ti rey ca pu che eluhuingün ñi poyeafiel adentun ca poyengequeelchi mamüll (2 Crón. 24:4, 17, 18). Cutrantupiuquefeteu rume tüfa, Jehová fentecünulai tañi huercülelafiel profeta tañi pu che. Por ejemplo, ti profeta Zacarías. Quisu ca sacerdotengefui, Jehoiadá tañi fotümfel ca Jehoás tañi primo. Femfulu rume, allcütulafingün. Jehoás langümfalfi cütu ta Zacarías. Quim mañumlai ta Jehoás, com tañi quellueteu Zacarías ñi pu che ngoimanentufi reque (2 Crón. 22:11; 24:19-22).

17. Jehoás, ¿chem upai?

¹⁷ Jehová feipi ñi illamcangeal tañi pu illamcaeteu (1 Sam. 2:30). Jehoás yamniehuelafi ta Ngünechen, feimu rume huesalcahui. Pu Siria hueichafe pichin-ngefulu rume, hueufingün Jehoás ñi fütra ejercito, fei Jehoás allfülcangefui. Amutulu pu Siria che, Jehoás epu tañi cüdaufe langümeyu tañi langümfiel mu ta Zacarías. Fente tañi huesa chengen mu Jehoás, rüngalngelai rume cheu ñi rüngalngemüm pu rey (2 Crón. 24:23-25; ca pefinge ti nota de estudio “hijo de Baraquías”, tripalu Mateo 23:35 huincadungun mu).

18. Jeremías 17:7, 8 tañi eipin, ¿chumaiñ taiñ inayentunoabel Jehoás?

 ¹⁸ Raquiduamnge: quiñe anümca müte nienole folil, cülüyahuafui, nehuencülequelai. Duamniefui quiñe mamüll ñi cülüyaunoal. Jehoás feitachi anümca reque felefui. Quisu tañi duam mu nehuencülelafui, duamniefui ti sacerdote Jehoiadá tañi ngüneduamnieaeteu, femngechi tañi nehuencüleal. Lalu ta Jehoiadá, Jehoás eluhui ñi allcütuafiel coilaque dungu pu apostata mu cüpalu, femngechi püntütriparpui Jehová mu. ¿Chem enseñaleiñmu ñi femün ta Jehoás? Feyentulayafiyiñ ta Jehová taiñ familia cam ti trahunche ñi femün mu müten. Caque quiñeque iñchiñ mülei taiñ cüme hueniyeafiel ta Jehová. ¿Chumngechi femafuiñ? Papeltufiliyiñ ta Biblia, raquiduamliyiñ taiñ papeltuel mu ca llellipufiliyiñ Jehová fill antü. Femngechi doi piuqueyerpuafiyiñ ca yamnierpuafiyiñ ta Jehová (papeltunge Jeremías 17:7, 8; Col. 2:6, 7).

19. ¿Chem ayüni Jehová?

¹⁹ Jehová turpu feipilayaiñmu taiñ femal fütraque dungu taiñ pepilnoel. Quisu feipieiñmu müten taiñ femal tañi huiriconcülen Eclesiastés 12:13 mu: “Rume yamniefinge tati rüfngechi Ngünechen ca inaniefinge tañi huercün dungu, tüfa müten mülei ñi femal com pu che”. Yamniefiliyiñ ta Jehová chem huesaque dungu rume rupaliyiñ, chaftuafuiñ ca nehuencüleafuiñ Abdías ca Jehoiadá reque. Femliyiñ, inei no rume püntünentulayaiñmu Jehová mu.