1, 2. Lot tañi antü, ¿chemu trüri taiñ antü mu?

 FAMÜLQUE mu pu che re huesaque dungu femquei. Ca femngechi che mülequefui Lot tañi antü mu. Feichi mu, “pu huesaque che quim yehuequelafui tañi huesaque femün mu”. Lot quimniefui Jehová ñi üdequefiel huesaque dungu, feimu “rume cutrantupiuquelefui” (2 Ped. 2:7, 8). Huelu Lot tañi yamquefiel mu Jehová ca ñi piuqueyeniefiel mu, inayentuquelafui huesaque che ñi femün, üdequefi huesaque dungu. Iñchiñ ca hualloñmanieiñmu huesaque che respetaquenofilu Jehová ñi feipin. Fei, ¿chem mülei taiñ femal taiñ connoal huesaque dungu mu? Taiñ piuqueyeniefiel Jehová ca taiñ yamniefiel (Prov. 14:2).

² Ti lifru Proverbios rume quelluaiñmu taiñ yamnieafiel ca piuqueyeafiel ta Chau Dios. Com iñchiñ, huentru, domo, hueche, füchache, com mülei ñi inaduamafiel cümeque ngülam mülelu tüfachi lifru mu.

3. Proverbios 17:3 tañi eipin, ¿chemu cuñiutuabüiñ taiñ piuque? (Pebinge pu adentun).

³ Jehová ngüneduamüñmaqueiñmu taiñ piuque. Fei quimnieiñmu taiñ chumngechi chengen ca pequei pu che tañi pequenoel, feimu rume falin-ngen taiñ cuñiutucuafiel taiñ piuque (papeltunge Proverbios 17:3). Inafiliyiñ Chau Dios tañi cümeque ngülam, fei ta piuqueyenieaiñmu (Juan 4:14). Ca femngechi eluulayaiñ taiñ huelulcanoaeteu coilaque dungu ñi feipiquen Huecüfü ca tañi pu che. Ca inayentulayafiyiñ huesaque che ñi femquen (1 Juan 5:18, 19). Doi fülmaniefiliyiñ Jehová, doi piuqueyeafiyiñ  ca doi respetayafiyiñ (1 Juan 4:9, 10). Turpu hueñancül-layafiyiñ ta Jehová, raquiduamlayaiñ rume taiñ culpayal quisu mu. Feimu eluhulmi tami femal huesaque dungu, raquiduamnge fente tami piuqueyeteu Chau Jehová, ca ramtuunge: “¿Chumngelu am huesa femafun ta Jehová ca hueñacülafiñ?”.

4. Quiñe lamngen tañi yamnebel Chau Dio, ¿chumngechi cuñiutueyu?

⁴ Peafiyiñ ñi rupan quiñe lamngen Marta b pingelu, mülelu Croacia mapu mu. Taiñ lamngen epe confui pod cudumuhun mu. Quisu feipi: “Cüdautun tañi cüme raquiduamal ca ñi chaftuafiel feitachi huesa dungu. Huelu fente tañi yamniefiel mu Jehová, conlan pod cudumuhun mu” pi. Marta raquiduami conle femngechi dungu mu, rume huesalcahuafui. Iñchiñ ca femngechi raquiduamaiñ. Quimtucunieaiñ conliyiñ huesaque dungu mu, rume hueñacülafiyiñ ta Jehová ca rumel poyehuelayafiyiñ (Gén. 6:5, 6).

5. Leo tañi upan, ¿chem quimeleleiñmu?

⁵ Yamniefiliyiñ Jehová, hueniyelayafiyiñ pu che huesaque dungu femquelu. Inaduamaiñ ñi rupan Leo, Congo mapu mu tuulu. Meli tripantu deu ñi fautizahun, nierpui huesaque compañ. Leo raquiduamquefui huesaque compañ ñi nien mu rume huelu huesaque dungu femnoli, culpalayan ta Jehová mu piquefui ñi raquiduam. Rupachi antü mu, tañi pu huesaque hueni huelulcaeyu. Leo eluhui tañi rume putual ca tañi conal pod cudumuhun mu. Fei Leo raquiduami com tañi quimeltueteu tañi pu chau testigongelu ca ñi ayüucülequefel ñi serfiniequefel Jehová. Fei Leo cüme raquiduamtui. Pu loncolelu quellueyu, fei huiñotui Jehová mu. Fachantü, Leo loncolerpui trahun mu  ca precursor especialngei. Feula rüf ayüucületui.

6. ¿Chem ngütramcaaiñ tübachi papiltun mu?

⁶ Feula inaduamaiñ ñi feipin Proverbios capitulo 9. Tüfa mu nütramcangei epu domo mu. Quiñe adentulei ti quimün, cangelu domo cüme raquiduamquelai. c Feitachi epu domo mangelfingu com pu quimnolu. Feipifingu: “Cüpamün, ipafimün tañi cofque” pifingu (Prov. 9:1, 5, 6, 13, 16, 17). Com quelluaiñmu inaduamfiliyiñ Proverbios capitulo 9. Huecüfü tañi pu che re raquiduamcülequei müten tañi femal pod cudumuhun ca tañi peafiel podngechi dungu (Efes. 4:19). Feimu rume falin-ngei taiñ yamnieafiel Jehová ca taiñ püntüleal huesaque dungu mu (Prov. 16:6). Feula inaduamaiñ chumlerpuquei ñi mongen inafilu ti epu domo: ti quim raquiduam nielu ca ti quim raquiduamnochi domo.

7. Proverbios 9:13-18 tañi eipin, pu llouquelu “tati domüche cüme raquiduamquenolu” ñi mangelün, ¿chem upaqui? (Pebinge tati adentun).

⁷ Feula peafiyiñ ñi feipin ti “domo cüme raquiduamquenolu” (papeltunge Proverbios 9:13-18). Fei huirarquei: “¡Com ti quimnolu cüpape fau!” pi. Femngechi mangelquefi pu quim raquiduamnolu ñi imeal quiñe cüme iyael. Huelu pu lloufilu ñi mangeleteu ti domo rume huesa tripaingün. Biblia feipi pu mangelün che “ñi mülen Rüngan mu”. Cafei Proverbios 2:11-19 nütramcai quiñe domo conquelu pod cudumuhun mu, feipingei tañi ruca concülei lan dungu mu. Ca Proverbios 5:3-10 nütramcai cangelu domo huesaque dungu femquelu. Feipingei “ñi trecan üncü amufemi Rüngan mu”.

8. Pu allcütuquelu “tati domüche cüme raquiduamquenolu”, ¿chumabüi?

⁸ Com pu che ñi mangeleteu “ti domo cüme raquiduamquenolu” mülei ñi cüme raquiduamal ñi llohuafiel ti mangelün cam ñi llounoafiel. Iñchiñ ca mülei ñi raquiduamal tüfa mu. Quiñe ejemplo, feipingeliyiñ ñi conal pod cudumuhun mu cam perumeliyiñ quiñe podngechi adentun, mülei taiñ cüme raquiduamal chem taiñ femal.

9, 10. ¿Chemu bamentuabiiñ podngechi cudumuhun?

⁹ Rume falin-ngei taiñ connoal pod cudumuhun  mu, ¿chumngelu? Peafiyiñ ñi feipin Proverbios. Ti quim raquiduamnochi domo feipi: “Hueñen co cochüi”. ¿Chem mu adentulei ti “hueñen co”? Biblia trürümfi ti curehuen ñi cudumuhun mu quiñe füshcülechi co reque felei (Prov. 5:15-18). Jehová eluñmafi ti rüfngechi curehuen ñi nieal lifngechi cudumuhun. Huelu ti “hueñen co” ¿adentulepelai podngechi cudumuhun mu? Pu conquelu pod cudumuhun mu respetaquelafingün Chau Dios tañi ley. Feichi pu che ellcaquechi femqueingün feitachi dungu chumngechi ñi femquen quiñe hueñefe. Raquiduamqueingün inei no rume tañi penoeteu, feimu rume cochülu troquiquefingün tati “hueñen co”. Huelu inei no rume encañalayafui ta Jehová, quisu com peniei. Ca hueniyehuenofilu Jehová, rume huesa tripai ñi mongen (1 Cor. 6:9, 10). Huelu fei müte no.

¹⁰ ¿Ca chem dungu mu rupaquei pu conquelu pod cudumuhun mu? Yehueafuingün chi, quisu falintuhuequelaingün. Domongele, niepüñeñafui tañi ayünofiel rume. Ca huesalcaquefi tañi pu familia. Ca conturumeafeyu huesa cutran, fei langümafeyu. Ca hueniyehuelafingün rume ta Jehová (Prov. 7:23, 26). Feimu Proverbios 9:18 feipi ti quim raquiduamnochi domo tañi pu mangelel “ñi mülen Rüngan mu”. Feimu quim raquiduamnieliyiñ, famentuafiyiñ ñi mangelün ti domo cüme raquiduamquenolu. Huelu, ¿chumngelu am fentrenque che allcütuquefingün? (Prov. 9:13-18).

11. ¿Chemu huedangi taiñ peal pornografia?

¹¹ Fentrequen che pequei pornografia, femngechi allcütuquefingün ti quim raquiduamnochi domo ñi mangelün. Quiñeque che raquiduamquei huesa dungu no peafiel podngechi adentun, huelu felelai. Pequefilu podngechi adentun quisu huesalcahuingün, quisu falintuuhuequelaingün ca rume cüdautuquei ñi elcünuafiel. Quiñe che pequefilu podngechi adentun, rume cüdaungei ñi ngoimayafiel ca ñi nentuafiel ñi raquiduam mu. Pengen mu podngechi adentun, doi huesaque illutun niei pu che (Col. 3:5; Sant. 1:14, 15). Femngechi fentren pu che conquei podngechi cudumuhun mu.

12. Huebpaumele quiñe hueda adentun, ¿chumabüiñ?

¹² ¿Chem mülei taiñ femal perumeliyiñ quiñe podngechi adentun? Mülei taiñ cañpüle lelihulfemal. ¿Chem quelluaiñmu? Quimtucuaiñ taiñ doi falin-ngen taiñ hueniyeafiel Jehová. Ca mülei quiñeque adentun pornografiangenolu, huelu ca huesa raquiduamelafeiñmu. Ca mülei taiñ famentufemafiel, ¿chumngelu? Ngelai taiñ raquiduamal rume taiñ connoal podngechi cudumuhun mu (Mat. 5:28, 29). Quiñe loncolelu David pingelu Tailandia mapu mu feipi: “Ramtuuquen, ¿cüme duamquepei mai Jehová ñi pefiel tüfachi adentun pornografiangenon mu rume? Fei quelluqueneu tañi femal cümeque dungu”.

13. ¿Chem dungu quellueiñmu taiñ cüme bemal?

¹³ Yamniefiliyiñ Jehová cüme raquiduamaiñ chem taiñ femal. Feimu Proverbios 9:10 feipi: “Quiñe che ñi quimchengeal, hunelu mülei tañi rume yamnieafiel ta Jehová”. Feula nütramcayaiñ cangelu domo ñi nütramcael Proverbios capitulo 9. Tüfachi domo adentulei “ti rüfngechi quimün”.

14. Proverbios 9:1-6 mu, ¿ca chem mangelün eipi?

¹⁴ (Papeltunge Proverbios 9:1-6). Tüfa mu mülei taiñ mangeleteu Chau Jehová. Quisu mu am cüpalu “ti rüfngechi quimün” (Prov. 2:6; Rom. 16:27). Proverbios nütramcai quiñe fütra ruca mu nielu regle orcon. Tüfa pengeli Chau Jehová cüme llouquefi com pu che ayülu ñi quimchengeal.

15. Chau Dio, ¿chem mangel elueiñmu?

¹⁵ Proverbios capitulo 9 nütramcai quiñe domo mu adentulelu “ti rüfngechi quimün”. d Ñi femün tüfachi domo pengeli Chau Jehová ñi cüme piuquengen ca eluqueiñmu fentren cümeque dungu. ¿Chumngelu feipiafuiñ? Tüfachi domo cüme pepicafi ti ilo, pulcu ñi cüme llohuafiel tañi pu mangelün che (Prov. 9:2). Feitachi domo ca feipifi tati pu quim raquiduamnolu: “Cüpamün, ipafimün tañi cofque” (Prov. 9:4, 5). ¿Chumngelu llohuafuiñ feichi mangelün? Jehová ayüniei taiñ quimchengeal ca taiñ cuidanieaeteu. Jehová ayüquelai taiñ cutrancahual conliyiñ huesaque dungu mu. Feimu Biblia feipi Jehová “eluafi cüme quimün tati pu norngelu” (Prov. 2:7). Yamniefiliyiñ Jehová, eluucüleaiñ taiñ ayühuelafiel. Cafei allcütuñmayafiyiñ tañi cümeque ngülam ca inayafiyiñ (Sant. 1:25). Tüfachi dungu ayühuelqueiñmu.

16. Alain yamnebi Chau Dio, beimu, ¿chem bemi ca chumngechi tripai?

¹⁶ Yamniefiliyiñ ta Jehová, cümeque dungu femaiñ. Inaduamaiñ ñi rupan ta Alain. Quisu quiñe loncolelu ca profesorngei. Fei feipi: “Colegio mu quimeltungequei ti sexualidad. Fei tañi pu chaf profesor pequeingün pelicula pengelquelu pornografia ñi pepicahual engün. Huelu iñche ñi piuqueyeniefiel ca ñi yamniefiel mu Jehová, famentuquefiñ feitachi pelicula. Ca feipifiñ tañi pu chaf profesor chumngelu ñi pequenofiel feitachi pelicula”. Femngechi ñi femün mu Alain, inaniefi “ti quimün ñi rüpü” (Prov. 9:6). Quiñeque tañi pu compañ afmatulehuingün, eluhuingün ñi papeltuafiel Biblia ca ñi amual trahun mu.

17, 18. Pu llouquelu “tati rübngechi quimün” ñi mangelün, ¿chumngechi cümelcangingün? Ca ¿chem llohuaingün? (Pebinge tati adentun).

¹⁷ Jehová adentucünufi tüfachi epu domo taiñ quimeltuaeteu chumngechi ayühun-ngechi mongen taiñ nieal. Quiñeque  che allcütuquefi tati quim raquiduamnienochi domo, femngechi tañi conal pod cudumuhun mu. Fei engün pichin mu müten cüme rupaqueingün, huelu raquiduamquelaingün chumlerpual ñi mongen. Tañi femün mu engün, larpuaingün (Prov. 9:13, 17, 18).

¹⁸ Pu allcütuquefilu ti domo adentulelu “ti rüfngechi quimün” cüme tripaquei ñi mongen. Fei engün nieingün com tañi duamnieel ñi fülmanieafiel Jehová, feimu ayüucüleingün (Is. 65:13). Jehová feipieiñmu: “Cüme allcütumuan, ca iñmuaimün tati cümelu, fei müna ayüumayaimünmeu tati rüf falinque dungu” (Is. 55:1, 2). Petu quimürpuiñ taiñ falintuafiel Jehová ñi ayüqueel ca taiñ üdeafiel Jehová ñi üdequeel (Sal. 97:10). Ca ayühunquechi mangelquefiyiñ caquelu pu che ñi allcütuafiel “ti rüfngechi quimün”. Chumngechi ñi feipiel Biblia, “alüpüralechi lof huaria mu mülelu” huirarcüleiñ reque: “¡Com pu quimnolu cüpape fau!”. Com iñchiñ ca com pu lloufilu feitachi mangelün rume cümelcangeiñ famülque mu. Ca inaniefiliyiñ feitachi “quimün ñi rüpü”, rumel mongeleaiñ cüpalechi antü mu (Prov. 9:3, 4, 6).

19. Eclesiastés 12:13, 14 tañi eipin, ¿chumabüiñ? (Pebinge hudamngechi dungu “Chumngechi quelluqueiñmu taiñ yamnebel Jehová”).

¹⁹ (Papeltunge Eclesiastés 12:13, 14). Müleiñ epe afcülechi antü mu ca hualloñmanieiñmu re huesaque che. Huelu iñchiñ eluucüleaiñ taiñ yamnieafiel ta Jehová. Femngechi cuñiutuucuhuaiñ taiñ piuque, conlayaiñ pod cudumuhun mu ca fülconcüleaiñ Jehová mu. Taiñ yamniefiel mu ta Jehová ca taiñ piuqueyefiel mu, feimu mangelquefiyiñ fentrenque che ñi allcütuafiel “ti rüfngechi quimün”.