RAMTUN CA HUIÑOLDUNGUN 25
ÜLCANTUN 7 Jehová mu cüpai ñi nehuen
Tuculpaiñ Jehová mongeli
“¡Jehová mongeli!” (SAL. 18:46).
¿CHEM QUIMAIÑ?
Tuculpaliiñ Jehová mongeli, llohuaiñ cümelcan.
1. ¿Chem dungu quelluaiñmu elcünonoal taiñ cüdahuelquebel Jehová?
BIBLIA feipilei famülque mu ‘mülei cüdaungechi dungu ca cuñihun-ngei ta mongen’ (2 Tim. 3:1). Com pu che rupaquei huesaque dungu mu, huelu Chau Dios ñi pu chengen ca caiñetungequeiñ ca inantucungequeiñ. Feimu, ¿chem quelluafeiñmu taiñ serfinieafiel ta Chau Jehová? Raquiduamtucuaiñ Chau Jehová ñi “mongelechi Dios” ngen (Jer. 10:10; 2 Tim. 1:12).
2. Jehová, ¿chumngechi pengeli ñi mongelechi Chau Ngünechen ngen?
2 Chau Jehová rüfngei, quisu quimniei taiñ rupamequen ca eluucülei taiñ quelluaeteu (2 Crón. 16:9; Sal. 23:4). Raquiduamtuculiyiñ ñi mongelechi Dios ngen, cüme chaftuafiyiñ chem huesa dungu rume. Tüfa ñi femün ti lonco ülmen David, inaduamafiyiñ.
3. David eipilu “Jehová mongeli”, ¿chem quimeli?
3 David cüme quimfi ta Chau Jehová ca maneluuquefui quisu mu. Feimu ngillatufi tañi quelluaeteu inantucueteu mu ti lonco ülmen Saúl ca caquelu caiñe (Sal. 18:6). Chau Dios allcütueyu ñi llellipun ca montuleyu, feimu David feipi: “¡Chau Jehová mongelei!” (Sal. 18:46). Tüfa mu David re cüpa feipilai ñi mülen ta Chau Dios. Quiñe falin lifru feipi David pengeli ñi maneluucülen Chau Jehová mu ca quimniei Chau Dios ñi mongelen ca ñi rumel quelluquefiel tañi pu che. David quimniefui Chau Dios ngüneduamquei tañi rupamequen ca eluucülei tañi quelluaeteu. Tüfa quellueyu ñi poyenieafiel ca serfinieafiel ta Chau Jehová (Sal. 18:28, 29, 49).
4. Loncontuculiiñ Jehová ñi mongelechi Chau Ngünechen ngen, ¿chumngechi quellungeaiñ?
4 Maneluuliyiñ Chau Jehová ñi mongelechi Dios ngen, ayühunquechi cüdahuelafiyiñ com taiñ nehuen mu. Ca femngechi cüme chaftuafiyiñ chem huesa dungu rume. Cafei doi eluucüleaiñ taiñ fülcüleal quisu meu.
TATI MONGELECHI CHAU NGÜNECHEN NEHUENTUAIMU
5. ¿Chem quelluaiñmu llücanoal upaliiñ hueyaque dungu mu? (Filipenses 4:13).
5 Chau Jehová taiñ mongelechi Dios ngei ca eluucülei taiñ quelluaeteu. Raquiduamtucuniefiliyiñ tüfa, chaftuafiyiñ tati huesaque dungu, tunten-ngeafui rume. ¿Mülepei mai quiñe dungu Chau Ngünechen ñi pepilquenoel? No, quisu com nehuen niei, feimu nehuentucuaiñmu taiñ chaftuafiel chem huesa dungu rume (papeltunge Filipenses 4:13). Feimu llicalayaiñ rupan mu huesaque dungu. Chau Jehová quelluqueiñmu pichiquen dungu meu, doyelchi mai quelluaiñmu fütraque dungu mu.
6. Huechengelu David, ¿chumngechi tañi upan yabültucueyu ñi maneluhun Chau Jehová mu?
6 Epu dungu ñi rupan David quellueyu ñi doi maneluhual Chau Jehová mu. Peafiyiñ. Hueche huentrungelu, camañfengefui. Quiñe rupa quiñe trapial (leon) yeñmaeyu quiñe ufisa tañi chau ñi quechan mu. Ca rupa ca femi quiñe oso. Huelu David inantucufi ti trapial ca ti oso, fei montulfi ti ufisa. Iñche tañi nehuen mu femün pilai, doi mai quimniefui Chau Jehová ñi quellueteu (1 Sam. 17:34-37). David turpu ngoimanentulai ñi rupan, doi mai raquiduamniefi. Femngechi doi maneluucülefui Chau Dios ñi nehuentucunieaeteu.
7. ¿Chem dungu tuculpai David?, ¿chumngechi tüba quellueyu hueichaabel Goliat?
7 Quiñe antü, petu huechengelu David, pemefi Israel ñi troquiñ hueichafe. Fei ngüneduami pu hueichafe ñi llicalen. Ti fütra huentru Goliat feipifeipimequei: “¡Fachantü ayentuquefiñ pu Israel hueichafe!” (1 Sam. 17:10, 11). Pu hueichafe re raquiduamcülerqueingün ñi fütra huentrungen Goliat ca tañi feipimequen, feimu rumeñma pellqueleingün (1 Sam. 17:24, 25). Huelu David cüme raquiduam niei. Feipi Goliat ñi ayentumequefiel “mongelechi Ngünechen ñi pu hueichafe”, Israel ñi pu hueichafe müten no (1 Sam. 17:26). David raquiduamtucuniefi ta Jehová. Quisu quellueyu ñi montulafiel tañi pu ufisa, feimu feula ca maneluhui tañi quelluaeteu. Chau Jehová ñi quellun mu chaftufi ta Goliat ca hueufi (1 Sam. 17:45-51).
8. Upaliiñ hueyaque dungu mu, ¿chumabüiñ doi maneluhual Jehová mu? (Pebinge tati adentun).
8 David reque raquiduamtucuafiyiñ taiñ mongelechi Dios eluucülei taiñ quelluaeteu. Femngechi chaftuafiyiñ chem huesa dungu rume (Sal. 118:6). ¿Chumafuiñ taiñ doi maneluucüleal? Raquiduamtucunieafiyiñ ñi chumün Chau Dios cuifi meu. Biblia mu papeltuafuimi ñi chumün Chau Jehová ñi montulafiel tañi pu che (Is. 37:17, 33-37). Cafei jw.org mu papeltuafuimi chumngechi Chau Jehová quellumequefi tañi pu che famülque mu. Ca raquiduamafuimi chumngechi quisu quelluqueimu tami mongen mu. Iñche langümlafiñ quiñe oso cam quiñe trapial piafuimi chi. Huelu dungu no. Rüfcünu Chau Jehová femquei fentren dungu eimi mu. Mangeleimu tami hueniyeafiel (Juan 6:44). Cafei quisu tañi quellun mu amuleimi tañi rüpü mu. Chau Dios, ¿huiñoldungupelaeimu tami llellipun? ¿Puuchi antü mu quellupelaeimu am? ¿Yafültucupelaeimu rupan mu huesaque dungu mu? Ngillatufinge tami raquiduamtucunieafiel com tüfa. Raquiduamülmi chumngechi tami quellueteu Chau Jehová, doi maneluhuaimi tami quellunieaeteu.
Cüme chaftufiliyiñ huesaque dungu, ayühuelafuiñ ta Chau Jehová. Femnoliyiñ, hueñancülafuiñ. (Inaduamnge parrafo 8, 9).
9. Upaliiñ hueyaque dungu mu, ¿chem tuculpaaiñ? (Proverbios 27:11).
9 Raquiduamtuculiyiñ Chau Jehová ñi mongelechi Dios ngen, cüme raquiduam nieaiñ rupan mu huesaque dungu. Loncontucuaiñ ti doi falin dungu. Huecüfü feipiquei taiñ püntütripayal Chau Jehová mu rupaliyiñ huesaque dungu mu. Feimu taiñ femün mu ayühuelafuiñ cam hueñancülafuiñ ta Chau Dios (Job 1:10, 11; papeltunge Proverbios 27:11). Feimu püntütripalayaiñ Chau Jehová mu, femngechi pengelaiñ taiñ piuqueyefiel ca ñi coilatufengen ta Huecüfü. Fill huesaque dungu mu rupamequeimi chi, caiñetumequeimu chi ti gobierno, fillaleimi chi cam allcütungequelaimi chi amuldungun mu. Femngechi rupamequelmi, ngoimanentulayaimi: tami femün mu ayühuelafuimi ta Chau Jehová. Quisu femcünulayai tami rupayal chem tami pepi hueuquenofiel (1 Cor. 10:13). Quelluaimu tami nehuentuleal.
TATI MONGELECHI CHAU NGÜNECHEN CÜMELCAAIMU
10. Tati mongelechi Chau Ngünechen, ¿chumabi tañi huenupüramquetu?
10 Chau Jehová fürenequefi tañi pu serfiqueteu (Heb. 11:6). Famülque mu eluqueiñmu tüngün ca ayühun. Cüpalechi antü mu eluaiñmu rumel mongen. Quimnieiñ Chau Jehová ayüniei taiñ füreneaeteu, femai llemai. Feimu com taiñ nehuen mu cüdahuelquefiyiñ chumngechi ñi femün tañi pu che cuifi mu. Peaiñ Timoteo ñi rupan (Heb. 6:10-12).
11. ¿Chem quellueyu Timoteo ñi bütra cüdahual trahunche mu? (1 Timoteo 4:10).
11 (Papeltunge 1 Timoteo 4:10). Timoteo maneluhui tañi mongelechi Dios meu. Rüf cüme quimniefui tañi füreneaeteu. Feimu nehuen mu cüdahuelquefi ta Chau Jehová ca caquelu che. ¿Chumi? Pablo ngülamtueyu ñi doi cüme quimeltuchefengeal, doi cüme hueupifengeal ca ñi inayentufalngeal huechequeche mu ca füchaqueche mu. Elfalcünulelngei ñi norümtucheal piuqueyen mu ca caquelu cüdaungechi dungu tañi femal (1 Tim. 4:11-16; 2 Tim. 4:1-5). Quiñeque mu Timoteo ñi femün quimngequelafui ca falintungequelafui, huelu maneluucülefui Chau Jehová ñi füreneaeteu (Rom. 2:6, 7).
12. Pu loncolelu, ¿chem quelluayu ñi bütra cüdahual? (Pebinge tati adentun).
12 Timoteo reque, pu loncolelu maneluuqueingün Chau Jehová ñi penieteu ca falintunieteu tañi cüdau. Inaduamquefingün ti trahunche, quimeltuchequeingün ca amuldunguqueingün. Huelu feica müten no. Quiñeque engün ca quelluntucuqueingün ñi deumayal Trahunhue Ruca cam rupalu fütraque huesaque dungu. Caquelu quelluntucuquefingün ti Troquiñ Pemequefilu pu Pitalconcülelu cam ti Troquiñ Huentru ñi Quellual pu Cutrancülelu Pital mu. Pu loncolelu quimnieingün Chau Jehová ngen-ngei ti trahunche mu, huentru no. Feimu cüdaumequeingün com piuque ca com nehuen mu. Maneluucüleingün Chau Jehová tañi füreneaeteu (Col. 3:23, 24).
Tati mongelechi Dios cümelcayaimu fente tami cüdaucülen trahunche mu. (Inaduamnge parrafo 12, 13).
13. Jehová, ¿chum duamcülequi pequelu taiñ cüdahuelquebel com piuque mu?
13 Com iñchiñ loncolelayafuiñ trahunche mu, huelu serfiafuiñ ta Chau Jehová caquerumechi dungu mu. Quisu falintuniefi taiñ cüdaumequen com piuque mu. Feimu falintuquei tami hulün plata, pichin hulafuimi rume. Yehuen chengeimi chi, huelu yafüluulu eimi tami huiñoldungual trahun mu, Chau Jehová ayüuquei. Cafei huesa femngelu eimi, Chau Dios ayüuquei tami perdonachequen mu. Ca femngechi cüdahuelnofilmi Jehová tunte tami ayüqueel, Chau Jehová falintuquei com tami pepi femün. Piuqueyeimu ca füreneaimu (Luc. 21:1-4).
ALÜTRIPALAAIÑ TATI MONGELECHI CHAU NGÜNECHEN MU
14. ¿Chumngechi alütripanol Jehová mu quelluqueiñmu cüme hueniyeabel quidu? (Ca pebinge tati adentun).
14 Cüme hueniyefiliyiñ Chau Jehová, püntütripalayaiñ quisu mu. Ngüneduamaiñ José ñi rupan. Quisu quimniefui Chau Jehová ñi ngüneduamüñmaqueteu tañi femquen, cafei cüpa hueñancülquelafi. Feimu eluulai ñi conal pod cudumuhun mu (Gén. 39:9). Ca femngechi cüpa hueniyefiliyiñ ta Chau Jehová, elantücünuaiñ taiñ llellipuafiel ca chillcatuafiel Biblia. José reque cüme hueniyefiliyiñ Chau Dios, cüpa hueñancül-layafiyiñ chem meu no rume (Sant. 4:8).
Fülmaniefilmi ti mongelechi Dios, quelluaimu tami püntütripanoal quisu meu. (Inaduamnge parrafo 14, 15).
15. Pu Israel che hueyaque dungu bemlu anquen mapu mu, ¿chem quimelün entuaiñ? (Hebreos 3:12).
15 Tati pu raquiduamtucunienofilu Chau Jehová ñi mongelechi Dios ngen, müchai müten püntütripayafuingün quisu mu. Peaiñ ñi rupan pu Israel che mülelu huellin mapu mu. Quimniefuingün ñi rüf mülen ta Chau Jehová, huelu maneluulaingün ñi eluaeteu tañi duamnieel. Ramtuingün: “¿Rüfcünu llemai Chau Jehová mülepei mai iñchiñ meu?” (Éx. 17:2, 7). Feimu lle chafturpufingün ta Chau Dios. Feimu cüpa inayentuquelafiyiñ engün (papeltunge Hebreos 3:12).
16. ¿Chem catrütuabüi taiñ mupitunebel Jehová?
16 Famülque mu cüdaungei fülcüleal Chau Jehová mu. Fentren che ngelai Dios piqueingün ca cümelcalei pu inanofilu Chau Dios ñi feipin troquiafuiñ. Feimu cüdautuafuiñ taiñ maneluucüleal Chau Dios mu. Ngelai Dios feipirumelayaiñ, huelu ¿quellupeafeneu mai? ramtuhuafuiñ chi. Fei tüfa rupai ti huentru ñi huirintucufiel ti Salmo 73. Pei ñi cümelcalen pu inanofilu Chau Dios ñi feipin, cutrancaulaingün rume. Feimu ngünam serfiniefiñ chi ta Chau Jehová pi (Sal. 73:11-13).
17. ¿Chem quelluaiñmu alütripanoal Jehová mu?
17 Ti huirintucufilu ti salmo, ¿chem quellueyu ñi cüme raquiduamtual? Ngüneduami chem ñi rupayal pu püntütripalu Chau Jehová mu (Sal. 73:18, 19, 27). Ca raquiduami chumngechi cümelcangequei tañi serfifiel mu ta Chau Dios (Sal. 73:24). Iñchiñ ca femngechi ngüneduamafuiñ com tati cümeque dungu taiñ elueteu Chau Jehová ca raquiduamaiñ ñi chumlerpuafel taiñ mongen serfinofiliyiñ. Femliyiñ, doi eluucüleaiñ taiñ püntütripanoal Chau Jehová mu. Fei chumngechi ñi feipin ti huirintucufilu ti salmo, iñchiñ ca feipiaiñ: “Iñche cai, cümei ñi fülconcülen Ngünechen mu” (Sal. 73:28).
18. ¿Chemu llücalaaiñ chem upaai cüpalechi antü mu?
18 Serfiquefiyiñ ta Chau Ngünechen, “fei mongelei ca rüfngei” (1 Tes. 1:9). Feimu cüme chaftuafuiñ chem huesa dungu rume. Chau Dios duamtunieiñmu ca eluucülequei taiñ quelluaeteu. Cuifi mu femi, fantepu ca femai. Pichiñma mu müleai fütra cutrancahun turpu ñi pengequenoel, huelu quisulelayaiñ (Is. 41:10). “Feimu rume maneluucüleafuiñ, fei feipiafuiñ: ‘Chau Jehová quelluqueneu. Llicalayan’” (Heb. 13:5, 6).
ÜLCANTUN 3 Jehová eluqueiñmu nehuen ca maneluhun
