1, 2. Pepicaucülenolmi tami bautizahual, ¿chemu hueya duamcülelaaimi? (Pebinge pu adentun hunen pagina mu).

 EIMI, ¿ayüafuimi tami fautizahual? Cümei tami femngechi raquiduamcülen. Huelu, ¿pepicaucüleimi tami femal? Pepicaucülen pilmi ca feipielmu pu loncolelu tami pepicaucülen, fautizaunge müten. Fautizahulmi, poyeafimi ta Jehová ca quisu fütra cümelcayaimu.

² Huelu pepicaucülelan pilmi cam feipingelmi tami pepicaucülenon, huesa duamlayaimi. Cüdaucülenge müten tami pepicaucülerpual.

3. Quiñe Etiopía huentru, ¿chem eipibi Felipe, ca chem ramtuhuabüiñ? (Hechos 8:36, 38).

³ (Papeltunge Hechos 8:36, 38). Quiñe huentru Etiopía tuhun-ngelu, ramtufi ta Felipe: “¿Chumngelu fautizangelayafun iñche?”. Feitachi huentru ayüfui tañi fautizahual. Huelu ramtuhuafuiñ: “¿Rüf pepicaucülefui ñi fautizahual tüfachi huentru?”.

4. Tati Etiopía huentru, ¿chumngechi pengeli tañi doi quimpoal?

⁴ Ti Etiopía huentru ‘Jerusalén meu miyahurquei ñi püramyeafiel ta Chau Dios’ (Hech. 8:27). ¿Feimu conpelai pu judio tañi religion mu? Quisu quimürpufi ta Jehová ca  ti Hebreo Huirintucun. Quimfilu rume, quisu ayüfui ñi doi quimal. Felipe pefilu rüpü mu tüfachi huentru, ¿chummequefui? Papeltumequefui Isaías ñi huirintucuel (Hech. 8:28). Tüfa pecan huirintucun nofel, falinque quimün niefui. Feitachi huentru quimfilu rume quiñeque Biblia ñi quimeltun, huelu fentecünulai tañi quimürpuel.

5. Tati Etiopía huentru tañi quimpoel, ¿chumi?

⁵ Feitachi huentru pecan huentru nofel, niefui autoridad. Quelluquefui tati reina Candace ca “adniequefui ñi falinque fillem” (Hech. 8:27). Feimu ti Etiopía huentru fentren cüdau niequefui. Femfulu rume, elcünuquefui ta tiempo ñi poyeafiel ta Jehová. Feitachi huentru re quimlafi müten ti rüf dungu, cüme inafi. Feimu tripai Etiopía mu, amui Jerusalén mu ñi püramyemeafiel ta Jehová. Alü camapulefui rume cheu tañi amual, huelu amui müten. Rume ayüniefui tañi püramyenieafiel ta Jehová üyeu.

6, 7. Tati Etiopía huentru, ¿chumi tañi doi piuqueyebel Jehová?

⁶ Felipe enseñalfi tüfachi Etiopía huentru falinque quimeltun. Quiñe dungu tüfa, Jesús tañi Mesías ngen (Hech. 8:34, 35). Com ñi quimürpuel Jesús mu ca com ñi femün mu ta Jesús, puhui tañi piuque mu. “Ayüfiñ tañi enseñalngeel, huelu iñche inayafiñ tañi religion judia müten” pilai. Huelu mai, doi piuqueyerpufi ta Jehová ca Jesús. Feimu tüfachi huentru eluhui ñi fautizahual ca ñi inanierpuafiel ta Jesús. Felipe inaduamfi ti Etiopía huentru ñi pepicaucülen, feimu fautizaeyu.

⁷ Eimi inaniefilmi ñi femün feitachi Etiopía huentru, pepicaucüleaimi tami fautizahual ca chem rume catrütulayaimu tami fautizahual. Feimu tati Etiopía huentru ayüfui tañi doi quimal, inafi com tañi quimürpuel ca doi piuqueyerpufi ta Chau Dios. Tüfachi troquiñ mu peaiñ chumngechi inayentuafuimi.

8. Juan 17:3 tañi eipin, ¿chumaimi?

⁸ (Papeltunge Juan 17:3). Fei tañi feipin Jesús, ¿quellupelaeimu tami estudiayal Biblia? Cafei tüfa quellueimu tami fentecünunoal tami papeltuafiel Biblia ca tami doi cüme quimafiel ta Chau Dios (Ecl. 3:11). Iñche com quimfiñ ta Biblia pilayafuiñ, fill antü hueque dungu ta quimürpuaiñ. Doi quimfiliyiñ ta Jehová, doi fülconcüleaiñ quisu mu (Sal. 73:28).

9. Hunenque quimelün taiñ quimpoel, ¿chumaiñ?

 ⁹ Hue papeltufilu iñchiñ ta Biblia, quiñeque dungu müten quimürpuqueiñ. Pablo huirintuculelfi pu hebreo che, fei feipi tañi deu quimürpuel engün ti “hunenque dungu” mülelu Chau Dios ñi dungu meu. Tüfa trürümngeafui tati lichi pütocoqueel pichiqueche (Heb. 5:12; 6:1). Huelu Pablo feipi taiñ quimnoafiel tati “hunenque dungu” müten mülelu Biblia mu. Iñchiñ taiñ cristianongen ca mülei taiñ quimal ti doi falinque quimeltun mülelu Biblia mu. Feimu llemai, rume cümei eimi tami cüme quimafiel ti hunenque quimeltun Biblia mu. Huelu eluunge tami doi quimchengeal, doi quimfinge ta Jehová ca tañi ayüqueel mu.

10. Quiñeque mu, ¿chemu cüdaungi tañi papiltual?

¹⁰ Quiñeque iñchiñ cüdautuqueiñ taiñ papeltual, ¿eimi ca femqueimi? Colegio mu cüme quim papeltulaimi chi, ca ayüquelaimi chi tami papeltual, adümquelafiñ piqueimi chi. Huesa duamquilnge, eimi müten rupaquelaimi femngechi dungu mu. Jehová quelluaimu llemai. Jehová doi cüme enseñayafeimu.

11. ¿Chemu am Jehová tati “Bütra quimeltuchebe”?

¹¹ Biblia feipi Jehová tañi fütra quimeltuchefengen (Is. 30:20, 21). ¿Chumquei Jehová tañi fütra quimeltuchefengen mu? Quisu piuqueyenquechi enseñaqueiñmu ca rume paciencia niei taiñ enseñayaeteu. Com tañi cüpa quimeteu, Jehová peñmaquefi cümeque dungu ñi piuque mu (Sal. 130:3). Cafei feipirumelayaiñmu taiñ femal taiñ pepi femnoel. Raquiduamnge, Jehová deumañmaeiñmu taiñ müllo (Sal. 139:14). Feimu ayüqueiñ taiñ quimal hueque dungu, Jehová ayüquei taiñ fentecünunoal taiñ quimürpual ca taiñ ayüucüleal taiñ quimürpuel mu. Feimu llemai, ayüumanieafimi Biblia ñi rüf dungu (1 Ped. 2:2). Eluucüleaimi fill antü tami papeltunieafiel ta Biblia (Jos. 1:8). Femlimi, Jehová quelluaimu. Fei ayüumanieafimi tami papeltufiel Biblia ca doi quimürpuaimi Jehová mu.

12. ¿Chemu cümi taiñ ngüneduamal Jesús ñi bemün?

¹² Raquiduamcüleaimi Jesús tañi yeniequeelchi mongen mu ca tañi femün mu. Cüme inayafimi tañi femün ta Jesús, femngechi müten cüme serfiafuimi Jehová rupalmi rume huesaque dungu mu (1 Ped. 2:21). Tüfa ta cüdaungei llemai. Jesús feipi chuchi rume ayülu tañi inayaeteu rupayai cüdaungechi dungu mu pi (Luc. 14:27, 28). Huelu Jesús quimniefui ñi püntütripanoal engün Jehová mu chumngechi ñi femün ta Jesús (Juan 16:33). Papeltuafimi ca cüme inaduamafimi com ñi femqueel ta Jesús ca eluhuaimi tami inayentuafiel tami mongen mu.

13. ¿Chem ngillatuquebimi Jehová ca chemu?

¹³ Apol-layaiñ taiñ lonco ta quimün mu müten, huelu feitachi quimün yeaiñmu taiñ doi piuqueyerpuafiel ta Jehová ca doi maneluhual quisu mu (1 Cor. 8:1-3). Doi quimürpufilmi ta Jehová, quelluen tañi doi feyentuleal piafimi (Luc. 17:5). Fei Jehová quelluaimu. Tami feyentun mu Jehová mu, quelluaimu tami pepicaucülerpual tami fautizahual (Sant. 2:26).

14. Pedro tañi eipin, ¿chemu balin-ngi inaal taiñ quimpoel?

¹⁴ Ti apostol Pedro feipi ñi rume falin-ngen taiñ inayafiel taiñ quimürpuel. Fei nütramcai tañi femün ta Noé. Jehová feipifi ta Noé quiñe fütra mangiñ co mu ñi apümafiel com huesaque che. Noé ca tañi familia quimün mu müten tüfachi dungu montul-layafuingün. Noé ca tañi familia femingün tañi feipieteu ta Jehová. Petu ñi acunon ti fütra mangiñ co, eluhuingün ñi deumayafiel quiñe fütra huampo ruca tañi montual engün (Heb. 11:7; 1 Ped. 3:20). Pedro feipi: “Ñi rupan feichi mu trürümafuiñ tati fautizahun. Ti fautizahun montulqueiñmu” (1 Ped. 3:21). Feimu pepicaumequelmi tami fautizahual, trürümafuimi tañi femün ta Noé. ¿Chumngechi pepicahuafuimi tami fautizahual?

15. ¿Chem am rübngechi huiñoduamtun?

¹⁵ Mülei tami huiñoduamtual huesaque dungu tami femquefel ta cuifi (Hech. 2:37, 38). Rüf repentiulimi, norümtuaimi tami raquiduam. Famentuafimi com huesaque dungu Jehová tañi üdequeel. Femhuelayaimi pod cudumuhun, pütremtuhuelayaimi ca huesa pihuelayafimi caquelu che (1 Cor. 6:9, 10; 2 Cor. 7:1; Ef. 4:29). Cüdautulmi tami elafiel feitachi huesaque raquiduam, fentecünulayaimi. Nütramcayafimi tami enseñalqueteu Biblia cam tati pu loncolelu tami quelluaeteu. Eimi huechengelmi, petu mülelmi tami chau ñi ruca mu, feipifinge tami chau tami quelluaeteu. Quisu quelluafeimu tami femhuenoal huesaque dungu, femngechi tami fautizahurpual.

16. Tami ayühulabel Jehová, ¿chumaimi?

¹⁶ Femqueaimi cümeque dungu tami poyeafiel Jehová. Amuaimi trahun mu ca coneltuaimi fei mu (Heb. 10:24, 25). Elungelmi tami amuldungual, fill cüyen femaimi llemai. Doi tripalmi tami amuldungual, doi ayühuelaimu (2 Tim. 4:5). Huechengelmi, mülelmi tami chau ñi  ruca mu, ramtuunge: “¿Tañi chau mai feipipeneu fill antü tañi amual trahun mu ca tañi amuldungual? ¿Cam quisu tañi duam mu femquen?”. Quisu tami duam mu femlimi, pengelaimi tami feyentulen Jehová mu, tami piuqueyeniefiel ca tami mañumniefiel. Femngechi pengelaimi tami com piuque mu serfiniefiel ta Jehová (Heb. 13:15; 2 Ped. 3:11). Ayühunquechi serfifilmi ta Jehová, fei rume ayühuai tami femquen mu (ca ngüneduamafuimi 2 Corintios 9:7). Iñchiñ rume ayüucüleiñ taiñ ayühuelafiel ta Jehová.

17, 18. ¿Chem dungu quelluaimu tami bautizahual ca chemu? (Proverbios 3:3-6).

¹⁷ Petu pepicaulimi tami fautizahual, rupayaimi chi huesaque dungu mu. Quiñeque che ayentuafeimu chi ca caiñetuafeimu chi (2 Tim. 3:12). Quiñeque mu, cüdautuqueimi chi tami elal huesaque raquiduam tami niequefel cuifi, ¿huesa duamquepelaimi? ¿Chumcaunorume fautizaulayan troquiuquepelaimi? ¿Chem quelluafeimu? Tami piuqueyefiel mu ta Jehová.

¹⁸ Tami piuqueyefiel Jehová doi fali chem dungu mu rume (papeltunge Proverbios 3:3-6). Com piuque mu piuqueyefiliyiñ ta Jehová, elcünulayafiyiñ chem dungu rupafuliyiñ rume. Biblia fentrenque rupa feipi Chau Dios rüf piuqueyequefi tañi pu che ca turpu elcünuquelafi (Sal. 100:5). Jehová reque am deumangelu iñchiñ, fei inayentuafuiñ (Gén. 1:26). ¿Chumngechi inayentuafuiñ Jehová ñi piuqueyechequen?

19. Tami mañumabel Jehová, ¿chumaimi? (Gálatas 2:20).

¹⁹ Mañumnieafimi ta Jehová (1 Tes. 5:18). Fill antü ramtuhuaimi: “¿Chumngechi pengelelqueneu tañi piuqueyenieteu ta Jehová?”. Fei llellipun mu mañumfinge ta Jehová com tañi femün eimi mu. Pablo reque, raquiduamnge Jehová fente tami piuqueyenieteu eimi, cümeque dungu femquei eimi mu (papeltunge Gálatas 2:20). Eimi, ¿ca femngechi piuqueyefimi ta Jehová? Piuqueyefilmi Jehová, famentuafimi ca nehuencüleaimi  huesaque dungu mu ca fentecünulayaimi tami serfinieafiel Jehová.

20. ¿Chem am hulal tami mongen Jehová mu ca chemu balin-ngi tami bemal?

²⁰ Rupachi antü mu fente tami piuqueyefiel ta Jehová, llellipun mu feipiafimi tami rumel serfinieafiel. Deu elufilu tami mongen ta Jehová, ngen-ngeai eimi mu. Ca feipicünufimi Jehová tami turpu püntütripanoal quisu mu rupalmi rume huesaque dungu mu. Feitachi llellipun rume falin-ngefui, quiñe rupa müten feipingequei. Tami mongen mu fentren cümeque dungu ta femaimi, huelu tami hulcünun mu tami mongen ta Jehová mu trürümfal-lai (Sal. 50:14). Huecüfü chumai rume tami püntünentuaeteu Jehová mu, huelu eluulayaimi tami huehuaeteu (Job 27:5). Tami piuqueyefiel ta Jehová femürpuaimi tami feipicünufiel, rumel serfinieafimi ca turpu püntütripalayaimi quisu mu.

21. Tami bautizahun, ¿bentepouqui tami doi quimpoal Jehová?

²¹ Rupan llellipulu eimi tami hulcünuel tami mongen Jehová mu, feipiafimi pu loncolelu tami fautizahual. Fautizaulimi, fantepuhui tañi cüdau pilayaimi. Mülei tami serfiafiel Jehová com tami mongen mu. Feimu amulepe tami doi piuqueyenierpuafiel ta Jehová. Raquiduamaimi chem mu tami cüdahuafel, femngechi pepicaucüleaimi tami fautizahual. Feichi antü tami fautizahual rume ayühun-ngeai. Huelu fei müten no, amulepe tami piuqueyeniefiel ta Jehová ca tañi fotüm Jesús rumel mu.