1. Pu chau ca ñuque cristianongelu, ¿chem ayüqui?

 PU CHAU ayüqueingün tañi pu yall ñi quimürpuafiel ca piuqueyerpuafiel ta Jehová. Chau Dios am pengequenolu, fei eimün pu chau ¿chumngechi quelluafuimün tamün pu yall ñi maneluhual Jehová mu ca ñi fülconal quisu meu? (Sant. 4:8).

2. Pu chau ca ñuque, ¿chumngechi quimelelabüimün tamün püchüqueche Jehová mu?

² Pu chau trür papeltufile Biblia tañi pu yall engün, quelluafui ñi doi fülconal Jehová mu (2 Tim. 3:14-17). ¿Ca chumngechi quellungeafui pu huechequeche? Ti lifru Proverbios pengeli chumngechi quiñe chau raquiduamelfi tañi fotüm ñi chumngen ta Jehová, ¿chumngechi femi? Nütramcafi com tañi deumael ta Jehová (Prov. 3:19-21). Feula peafiyiñ Jehová ñi deuman mu pu chau quimeltuafui tañi pu yall ñi chumngen ta Jehová.

3. Pu chau ca ñuque, ¿chumngechi quelluabüimün tamün püchüqueche?

³ Biblia feipi Chau Dios pengequelai, huelu “quimafuiñ ñi chumngen ngüneduamliyiñ chumngechi ñi deumael ti mapu. Taiñ quimal ñi chumngen, ngüneduamafuiñ ñi deumael” (Rom. 1:20). Eimün pu chau, tripalmün huecuntu tamün ruca mu, quimelelfimün tamün pu yall Jehová ñi deumael. Fei raquiduamelafimün ñi chumngen ta Jehová. Femngechi quimeltui ta Jesús. Fei, ¿chem quimürpuafuingün  pu chau Jesús ñi quimeltun mu? Peafiyiñ.

4. Jesús, ¿chumngechi quellubi tañi pu inanequetu? (Lucas 12:24, 27-30).

⁴ Jesús enseñalquefui tañi pu discipulo Jehová tañi deumael mu. Quiñe rupa feipifi engün tañi ngüneduamafiel pu üñüm ca ti rayülechi flor (papeltunge Lucas 12:24, 27-30). Jesús chem üñüm cam chem flor rume ta nütramcayafui tañi pu discipulo, huelu nütramcai quisu engün tañi quimnieelchi üñüm mu ca flor mu. Petu nütramcalu ta Jesús, tañi pu discipulo ¿peniepelafui ñi müpüuquiyahun pu üñüm ca ti flor ñi müleyen? ¿Ca chem femi Jesús rupan nütramcafilu tañi pu discipulo ti üñüm mu ca ti flor mu? Enseñalfi engün Chau Jehová ñi fürenechefengen ca ñi cüme piuquengen. Felei llemai, Jehová chumngechi ilelfi pu üñüm ca adelcacünuquefi fillque flor, ca femngechi femafi tañi pu poyequeteu.

5. Pu chau ca ñuque, ¿chem dungu deuman mu quimelelabimün tamün püchüqueche Jehová mu?

⁵ Pu chau, cüme inayentuafimün ta Jesús chumngechi ñi enseñachequen. ¿Chumafuimün? Nütramcayafuimün eimün tamün ayüelchi flor cam culliñ mu ca quimeltuafimün Jehová mu. Fei hula ramtuafuimün tamün pu yall: “¿Chem culliñ anta ayüqueimi? ¿Chem flor anta ayüqueimi?”. Feimu llemai eimün pu chau, nütramcafilmün tamün pu yall quisu engün tañi ayünieel mu, fei engün doi allcütuaimünmu ca doi ayüaingün tañi quimafiel ta Jehová.

6. Cristopher tañi ñuque ñi bemün, ¿chem quimeleleiñmu?

⁶ Eimün pu chau, quintulayaimün quiñe lifru mu chumngechi tamün enseñayafiel tamün pu yall quiñe culliñ mu cam quiñe flor mu. Jesús femlai, quisu feipiyauquelai chumngechi ñi iquen pu üñüm ca chumngechi ñi tremquen ti flor. Tamün pu yall ayüafuingün chi ñi quimal femngechi dungu, huelu duamfal-lai tami com quimal. Quiñeque mu pichiquen nütramcan mu quimeltuafuimi tami pu yall Jehová tañi deumael mu. Peafiyiñ ñi rupan ta Christopher. Feipi: “Iñchiñ taiñ cüla peñihuen-ngen, pichiquen nütramcan mu taiñ ñuque enseñalquefeiñmu Jehová ñi deumael mu. Feipiquefeiñmu: ‘Ngüneltufimün fütraque mahuida, rume adi. ¿Afmatufalngenoafulu am ta Jehová?’. Ca amulu iñchiñ lafquen mu, taiñ ñuque feipiquefeiñmu: ‘Ngüneduamfimün ti fütraque reu cüpalelu, feita pengeleleiñmu tañi rume nehuen-ngen ta Jehová’. Pichiquen nütramcan mu rume, taiñ ñuque rume raquiduamelquefeiñmu”.

7. ¿Chumaimün tamün quimelelbel püchüqueche tañi ngüneduamal deuman mu?

⁷ Chumngechi ñi tremcülerpun tamün pu yall, quimeltulelafimün Chau Jehová ñi deumael mu ca ñi chumngen ta Jehová. Pefilmün tañi deumael ta Jehová, fei ramtuafuimün tamün pu yall: “Feita ¿chem enseñalqueimu Jehová mu?”. Inaduamlimi chem ñi raquiduamcülen tami yall, müna ayühuaimi (Mat. 21:16).

8. Pu Israel che miyaubüle tañi püchüqueche engün rüpü mu, ¿chumabüingün?

⁸ Jehová huercüfi pu Israel che nütramcayafiel tañi pu yall trecayaule rüpü mu (Deut. 11:19). Israel mapu mu trecayaule ta che rüpü mu, peafui fillque culliñ ca fillque flor. Feimu pu chau miyaufule feitachi rüpü mu, raquiduamelafui tañi pu  yall Jehová tañi deumael mu. Fachantü ti pu chau ca femngechi femafui, peafiyiñ.

9. Punitha ca Katya ñi bemün, ¿chem quimeleleimu?

⁹ Quiñe ñuque Punitha pingelu, mülei quiñe fütra huaria mu India mapu mu, feipi: “Pemefilu taiñ familia lelfün mu, tañi füta iñchiu allmalltuqueyu nütramcayafiel tayu epu püñeñ Jehová tañi deumael mu. Huaria mu com huaqueñcülelu auto mu ca fentren che miyaulu, feimu amun mu lelfün mu tayu epu püñeñ doi cüme ngüneduamafui Jehová tañi deumael” pi. Ca quiñe lamngen Katya pingelu feipi: “Cuifi tañi pu chau iñchiñ amuquefuiñ lelfün mu. Rumel acordaquefiñ tüfa. Pichicalu müten iñche, feipiquefeneu tañi huitracünuhual tañi ngüneduamafiel Jehová tañi deumael ca tañi raquiduamal ñi chumngen ta Jehová. Feimu müna mañumniefiñ engu” pi. Pu chau yefilmün tamün pu yall adcülechi lof mu, turpu ngoimalayaingün tüfa.

10. Cüdaungele tañi pu chau ca ñuque ñi tripaal bütra huariba mu, ¿chumabüingün? (Pebinge hudamngechi dungu “ Quellungeam pu chau”).

¹⁰ Eimün pu chau cüdautuafuimün chi tamün amual lelfün mu, fei ¿chumafuimün? Quiñe huentru, Amol pingelu, ca mülei India mapu mu. Quisu feipi: “Cheu tañi mülemum ta iñche, pu chau rume cüdauqueingün ca müna fali ti pasaje tañi amual lelfün mu. Huelu huaria mu, amuliyiñ plaza mu cam huecuntu tripaliyiñ taiñ ruca mu, ca ngüneduamafuiñ Jehová tañi deumael ca raquiduamafuiñ ñi chumngen ta Jehová” pi taiñ peñi. Pu chau, cüme ngüneduamülmün com tamün hualloñmanieteu, fei peaimün com Jehová tañi deumael, fei quimeltulelafuimün tamün pu yall (Sal. 104:24). Peafuimün üñüm, pichique pülü, fillque anümca ca fillque caquelu. Quiñe lamngen Karina pingelu Alemania mu mülelu, feipi: “Tañi ñuque müna ayüquefi tati flor. Fei  tripan mu tain pasiayal, rumel pengelelquefeneu ti fillque flor ñi mülen” pi taiñ lamngen. Pu chau, ca pengelelafuimün tamün pu yall fillque video ca publicacion nütramcalu Jehová tañi deumael mu. Feimu cheu rume mülele pu chau, nütramcayafui tañi pu yall Jehová tañi deumael mu. Pu chau ca nütramcayafui tañi pu yall ñi chumngen mu ta Jehová. Feula peaiñ quiñeque dungu.

11. Pu chau ca ñuque, ¿chumngechi quellubimün püchüqueche ñi quimal Jehová ñi piuqueyen?

¹¹ Eimün pu chau nütramcayafuimün tamün pu yall quiñe culliñ chumngechi cuidaquefi tañi pichique coñi, femngechi quimafuingün Chau Dios ñi piuqueyechefengen (Mat. 23:37). Ca nütramcayafuimün ñi caquerumen ca ñi ayüfalngen Jehová tañi deumael. Karina taiñ nütramcael feula, feipi: “Tripan mu tañi ñuque iñchiu, feipiquefeneu ‘ngüneltufinge, caquerumei tati flor ca müna adi. Tüfa pengeli Chau Jehová taiñ piuqueyenieteu’ piquefeneu. Famülque mu petu ngüneduamquefiñ ñi caquerumen tati flor, ti fillque color ñi mülen ca com ñi fente cüme deumangen. Feita acordalqueneu Jehová taiñ fente piuqueyenieteu”.

12. Pu chau ca ñuque, ¿chumngechi quellubimün püchüqueche ñi quimal Jehová ñi quimün? (Salmo 139:14; pebinge cabei pu adentun).

¹² Eimün pu chau, ca enseñayafimün tamün pu yall Chau Dios ñi nien fentren quimün (Rom. 11:33). Feipiafuimün ti co huenuluuquei tromü reque. Feitachi tromü cañpüle amuquei, fei yequefi feitachi co, femngechi cañpüle ñi mahunal (Job 38:36, 37). Ca nütramcayafuimün ñi fente cüme deumangen taiñ cuerpo (papeltunge Salmo 139:14). Peafiyiñ ñi chumün quiñe chau, Vladimir pingelu. Fei feipi: “Quiñe antü tañi fotüm ütrünagi bicicleta mu, fei allfüluhui. Rupachi tiempo mu tremotui. Fei tañi domo iñchiu feipifiyu tañi fotüm Jehová deumafi taiñ cuerpo ñi quisu tremotual. Inei rume femlayafui tüfa, Chau Dios müten. Ti auto chocangele, quisu cüme elcünuutulayafui. Femngechi tañi fotüm quimürpui Chau Dios ñi quimün trürümfalngelai”.

13. Pu chau ca ñuque, ¿chumngechi quellubimün püchüqueche ñi quimal Jehová ñi nehuen? (Isaías 40:26).

 ¹³ Jehová mangelqueiñmu taiñ ngüneltupüramal huenu mu, femngechi taiñ peñmayafiel fente tañi nehuen-ngen. Quisu tañi nehuen mu nengümuuquelai ti huangülen (papeltunge Isaías 40:26). Eimi chau, eimi ñuque, feipiafuimi tami pu yall ñi ngüneltupüramal huenu mu, fei ñi raquiduamal tañi pequeel. Quiñe lamngen Taiwán mu mülelu, Tingting pingelu, feipi: “Pichicalu iñche tañi pu compañ colegio mu dicümtucuquefeneu tañi feyentunoafiel ta Jehová. Fei iñche rume raquiduamcülefun. Fei quiñe rupa tañi ñuque iñchiu tripayu tayu pasiameal camapu ti huaria mu. Quiñe pun, tañi ñuque iñchiu ngüneltupüramiyu huenu, com trelüngcülefui ca cüme pefiyu com ti pu huangülen. Fei tañi ñuque feipieneu: ‘Chau Jehová tañi nehuen mu deumafi com ti huangülen, ca femngechi eluafeimu nehuen tami chaftuafiel huesaque dungu ca püntütripanoal quisu mu’ pieneu tañi ñuque. Ngüneduamfilu iñche com Jehová tañi deumael, fei eluhun tañi doi cüme quimafiel ca tañi serfiafiel rumel mu”.

14. Pu chau ca ñuque, ¿chumngechi quellubimün püchüqueche ñi quimal Jehová ayühun-ngechi Chau Dio ngen?

¹⁴ Jehová com tañi deuman mu pengeleleiñmu tañi ayühun-ngechi Ngünechen ngen. Pu cientifico pequefi epe com tati pu culliñ aucantuquei engün, pu üñüm ca pu challhua (Job 40:20). Tati pu pichique ñarqui rume aucantufengeingün. Pu trehua ca femngechi aucantufengeingün. Tami pu yall ¿pequepelafui chumngechi ñi aucantuquen feitachi pu culliñ? Pefiel mu, fei ayüuqueingün. Feimu llemai, eimün pu chau, ca pefilmün ñi aucantumequen feitachi pu culliñ, feipiafimün tamün pu yall Chau Dios ñi ayühun-ngechi Ngünechen ngen (1 Tim. 1:11).

15. Pu chau ca ñuque, ¿chumabüimün ñi quimal tamün püchüqueche ñi raquiduamcülen? (Proverbios 20:5; pebinge tati adentun).

¹⁵ Quiñeque mu ti pu hueche cüdautuquei ñi nütramcayal chem ñi rupamequen.  Eimün pu chau femngechi rupamequelmün, ¿chumafuimün chem ñi raquiduamcülen tamün yall? (papeltunge Proverbios 20:5). Quiñeque mu, ti pu chau nütramcauquei tañi pu yall engün cheu tañi doi tüngcülen engün. Quiñe chau Taiwán mapu mülelu, Masahiko pingei, feipi: “Tripalu iñchiñ taiñ pasiameal inafül huincul cam inafül lafquen, doi tüngcülequeingün taiñ pu yall. Femngechi tañi domo iñchiu doi cüdautuquelayu tayu nütramcayafiel ca chem ñi raquiduamcülen engün”. Cafei taiñ lamngen Katya, taiñ nütramcael parrafo ailla mu, feipi: “Tripan mu iñche colegio mu, tañi ñuque yequefeneu quiñe adcülechi parque mu. Iñche rume cüme duamquefun üyeu. Fei feipiquefiñ tañi ñuque tañi rupamequen colegio mu ca tañi raquiduamelnieteu”.

16. Pu chau, ñuque ca püchüqueche tañi trür ngüneduamabel Jehová tañi deuman, ¿chumabüimün?

¹⁶ Com ti familia ngüneduamfile Jehová tañi deumael, fei rume ayühuaingün, doi quiñeucüleaingün ca doi piuqueyehuaingün. Biblia feipi mülei “quiñe antü taiñ ayeleal” ca quiñe antü taiñ rüncüyahual (Ecl. 3:1, 4, nota). Jehová elcünui adelcalechi lof taiñ ayüucüleal. Quiñeque familia ayüquei ñi amual ayüfalchi parque mu, lelfün mu, mahuida ca ti lafquen. Pu pichiqueche ayüquei tañi lefquiyahual, tañi aucantual ca ñi peafiel tati fillque culliñ ca ayüquei tañi hueyelal engün lafquen mu cam leufü mu. Feimu feipiafuiñ nieiñ fentrenque dungu taiñ ayüumayaeteu Jehová tañi deumael mu.

17. Pu chau ca ñuque, ¿chemu quelluabüimün püchüqueche tañi ngüneduamabel Jehová tañi deuman?

¹⁷ Tati hue mapu mu, pu chau ca pu pichiqueche doi ngüneduamafingün Jehová tañi deumael ca rume ayühuaingün. Llicahuelayafiyiñ tati pu culliñ, quisu engün ca llicahuelayaiñmu (Is. 11:6-9). Rume fentren tiempo nieaiñ taiñ ngüneduamafiel com ñi deumael ta Jehová (Sal. 22:26). Esperalayaimün ñi acual feichi antü tamün nütramcayafiel tamün pu yall Jehová ñi deumael mu. Feula eluhuaimün tamün femal. Femlimün, tamün yall ti rey David reque feipiaingün: ‘Ahuem Jehová, eimi tami femquen mu trürümfalngelai chem meu no rume’ (Sal. 86:8).