1, 2. ¿Chumabüimi petu tami bautizaunon?

 RUPACHI quechu tripantu, doi millon che fautizahui. Fentrenque che quimürpufingün ta Jehová pichicalu müten engün, Timoteo reque (2 Tim. 3:14, 15). Quiñeque tremlu engün quimürpufingün ta Jehová. Quiñe cuse lamngen fautizahui 97 tripantu nielu.

² Eimi, ¿enseñalmequengeimi Biblia? Cam, ¿tami pu chau enseñalmequeimu Biblia? Raquiduammequeimi chi tami fautizahual, feita rume cümei. Huelu hune feipiafimi ta Jehová tami hultucual ñi mongen quisu mu. ¿Chumngechi femafuimi? Cüme pepicaucülelmi tami fautizahual, ¿chumngelu ngelai tami llicaleal? Tüfachi troquiñ mu peafiyiñ.

¿CHUMNGECHI HULABEL JEHOVÁ TAIÑ MONGEN?

3. Eipinge quiñe cuibique che hul-lu Jehová tañi mongen.

³ Biblia mu mülei quiñeque che hul-lu ñi mongen Jehová mu. Feichi pu che huichucünungei ñi serfiafiel ta Jehová. Por ejemplo, com pu Israel che huichucünungei Jehová ñi troquiñchengeal engün. Huelu ca mülefui quiñeque Israel che dullingelu ñi femal falinque dungu. Jehová dullifi ta Aarón tañi hunen lonco sacerdotengeal, feimu tañi tol meu yeniefui ti yamfal oro lamina huilüfcülelu (Lev. 8:9). Pu nazareo ca huichucünuhuingün. Tati dungun nazareo cüpai hebreo quehun mu, feipilei “huichucünungelu”. Feimu pu nazareo huichucünungeingün  ñi serfinieafiel ta Jehová. Moisés tañi ley feipifui ñi chumal engün tati pu nazareo, fei engün mülefui ñi cüme inanieafiel (Núm. 6:2-8).

4. 1) ¿Chumabüin taiñ hulabel Jehová taiñ mongen? 2) Jesús eipi taiñ illamuhual reque, ¿chem am tüba? (Pebinge adentun).

⁴ Feipin mu taiñ hulcünual taiñ mongen Jehová mu, eluucüleiñ taiñ inayafiel ta Jesús ca hunelu mu femal Jehová tañi ayüqueel. ¿Chumngechi femafuiñ? Jesús feipi: “Inei rume ayüle tañi inayaeteu, quisu illamuupe” (Mat. 16:24). Ñi feipin griego quehun mu ca feipiafui “ñi mongelenoal quisu tañi duam mu”, feimu famentuafiyiñ Jehová tañi ayüquenoel (2 Cor. 5:14, 15). Feimu famentuafiyiñ ñi femquen pu inaquefilu tañi huesaque illutun. Por ejemplo, tati pod cudumuhun (Gál. 5:19-21; 1 Cor. 6:18). Piuqueyefiliyiñ ta Jehová ca quimtuculiyiñ taiñ cümelcayaeteu tañi feipin, cüdautulayaiñ taiñ inanieafiel taiñ feipieteu Jehová (Sal. 119:97; Is. 48:17, 18). Quiñe peñi Nicholas pingelu feipi: “Jehová tañi huercün dungu trürümafuiñ quiñe malal reque carcel mu, tüfa catrütueiñmu ñi femal taiñ ayüqueel. Huelu ca trürümafuiñ quiñe malal zoologico mu, tüfa cuñiutucuafeiñmu pu trapial mu”.

5. 1) Quiñe che, ¿chumngechi hulabüi Jehová tañi mongen? 2) Tati hulün Jehová taiñ mongen ca bautizahun, ¿chemu trürlaingu? (Pebinge pu adentun).

⁵ ¿Chem mülei taiñ femal taiñ hultucual taiñ mongen Jehová mu? Llellipun mu feipiafiyiñ taiñ poyeafiel quisu müten ca taiñ doyümafiel quisu tañi ayüqueel taiñ mongen mu. Ca feipicünuafiyiñ taiñ piuqueyeafiel com taiñ  piuque mu, com taiñ mongen mu, com taiñ raquiduam ca com taiñ nehuen meu (Mar. 12:30). Femngechi ngillatufiliyiñ ta Jehová, Jehová müten allcütuaiñmu. Huelu fautizauliyiñ, com pu che mülelu fei mu peaiñmu. Feipifiel mu ta Jehová taiñ serfiafiel, tüfa müna falin-ngei. Mülei taiñ femal tañi feipicünufiel, Jehová ca ayüniei taiñ femal (Ecl. 5:4, 5).

¿CHEM QUELLUAIMU TAMI HULABEL JEHOVÁ TAMI MONGEN?

6. ¿Chemu quiñe che hulquebi Jehová tañi mongen?

⁶ Fente taiñ piuqueyeniefiel mu ta Jehová, feipicünufiyiñ taiñ rumel serfinieafiel. Huelu re huenche piuqueyelafiyiñ ta Jehová. Doi quimfiel mu ta Jehová ca tañi ayüqueel, doi piuqueyerpufiyiñ (Col. 1:9). Papeltufiel mu ta Biblia, cüme quimürpuimi cüla dungu: 1) rüfngei ñi mülen ta Jehová, 2) Jehová tañi nehuen mu deumangei ta Biblia, ca 3) Jehová adniefi tañi troquiñche ñi femal quisu tañi ayüqueel.

7. ¿Chem pengelabüi quiñe che petu ñi hulnobel Jehová tañi mongen?

⁷ Quiñe che ayüle ñi serfiafiel ta Jehová, mülei tañi hune quimafiel ti doi falinque quimeltun tripalu Biblia mu. Ca mülei ñi yenieal ñi mongen chumngechi ñi ayüqueel ta Jehová. Ca mülei ñi nütramcayafiel caquelu tañi quimürpuel (Mat. 28:19, 20). Com tañi piuque mu piuqueyefi ta Jehová ca ayüniei quisu müten tañi serfiafiel. Eimi, ¿femqueimi? Piuqueyefilmi ta Jehová, fautizaulayaimi tami ayühuelafiel tami enseñalqueteu  ta Biblia cam tami pu chau, cam femlayaimi müten tami pu hueni ñi fautizahun mu.

8. Mañumcüleal ca hulal mongen, ¿chemu quiñeucüli engu? (Salmo 116:12-14).

⁸ Raquiduamün mu com tañi femün ta Jehová eimi mu mañumtuquefimi, feimu eluquefimi tami mongen ñi poyeafiel (papeltunge Salmo 116:12-14). Biblia feipi: “Com tati cümeque dungu ca com tati tutengelu Chau Ngünechen mu cüpai” (Sant. 1:17). Chau Jehová huli tañi poyen Fotüm com iñchiñ mu, tüfa tati doi cüme dungu taiñ elueteu. Jesús hulün mu tañi mongen, feimu eimi hueniyerpuafuimi Jehová ca nierpuafuimi rumel mongen (1 Juan 4:9, 10, 19). Feimu llemai eluulu eimi tami serfiafiel ta Jehová, mañumtuquefimi tami piuqueyeteu ca com cümeque dungu tami elueteu (Deut. 16:17; 2 Cor. 5:15). Tüfachi dungu ngüneduamngei ti lifru ¡Rumel ayüucüleaimi! pingelu quimeltun 46 troquiñ 4. Ca mülei quiñe video feipingelu ¿Chem eluafuiñ ta Jehová?

¿PEPICAUCÜLIMI TAMI HULAL TAMI MONGEN CA BAUTIZAHUAL?

9. Caque che matu bautizaule, ¿ca bemngechi bemabüimi?

⁹ Raquiduamafuimi chi tami petu pepicaucülenon tami fautizahual. Petu mülefui chi tami cüme elcünutuafiel tami mongen tami ayühuelafiel ta Jehová. Cam doi duamniefuimi chi ta tiempo tami doi maneluhual Chau Jehová mu (Col. 2:6, 7). Quiñeque estudiaquelu Biblia ca quiñeque huechequeche doi alüñmayafui tañi piuqueyerpuafiel ta Jehová, feimu doi duamnieingün tiempo ñi pepicaucüleal. Feimu ngüneduamuhuafuimi tami chumal tami fautizahurpual, huelu trürümuulayaimi caquelu mu (Gál. 6:4, 5).

10. Petu pepicaunolu troquihulmi, ¿chumabüimi? (Pebinge ti hudamngechi dungu “ Tami pu chau dunguquelu iñingen Jehová ngele”).

¹⁰ Raquiduamülmi tami petu pepicaucülenon tami fautizahual, amuleaimi tami femürpual. Llellipuafimi Jehová tami quelluaeteu tami cüme elcünutuafiel tami mongen (Filip. 2:13; 3:16). Rüfcünu llemai, Jehová allcütuaimu ca quelluaimu (1 Juan 5:14).

¿CHEMU QUIÑEQUE CHE ALÜÑMAQUI?

11. Jehová quelluaiñmu taiñ nor piuquengeal, ¿chumai?

¹¹ Quiñeque che pepicaucülefui ñi fautizahual, huelu eluucülelaingün tañi femal. ¿Chemu am? Quiñeque raquiduamafuingün: “Fütra culpali, huemünentungeafun trahunche mu”, feimu llicaqueingün tañi fautizahual. Huelu Biblia feipi Jehová eluaiñmu com taiñ duamnieel taiñ cüme miyahual tañi rüpü mu ca taiñ ayühuelafiel (Col. 1:10). Feimu llicalelayaimi, doi mai maneluucüleaimi tami quelluaeteu Jehová tami cüme femal. Jehová deu quellufi fentrenque che ñi famtripanoal tañi rüpü mu (1 Cor. 10:13). Feimu feipiafuiñ pichiquen che müten huemünentungequei trahunche mu. Jehová quelluquefi llemai tañi pu che.

12. ¿Chem quelluaiñmu taiñ bütra yabcanoal?

¹² Com iñchiñ am culpafe chengelu, feimu quiñeque mu huesa raquiduamafuiñ (Sant. 1:14). Huelu quisuque iñchiñ dulliafuiñ taiñ inayafiel feichi huesaque  raquiduam cam taiñ famentuafiel. Quiñeque che feipiquei pepi ngünengequelai taiñ raquiduam, huelu rüfngelai. Iñchiñ ngüneafuiñ llemai taiñ raquiduam. Feimu conrumepale huesaque raquiduam taiñ lonco mu, ngünehuafuiñ taiñ culpanoal. ¿Chem quelluaiñmu? Llellipunieafiyiñ Jehová fill antü ca papeltunieafiyiñ ta Biblia, amuaiñ trahun mu ca amuldunguaiñ. Rumel femliyiñ com tüfachi dungu, nehuencüleaiñ taiñ püntütripanoal Chau Jehová mu. Quisu taiñ duam mu femlayaiñ, Jehová mai quelluaiñmu (Gál. 5:16).

13. ¿Chemu inayentubali José?

¹³ Petu ñi acunon huesaque raquiduam taiñ lonco mu, raquiduamaiñ taiñ chumafel, femngechi femlayaiñ Jehová ñi üdequeel. Biblia mu mülei quiñeque che femngechi femlu. Quiñe fei ta José. Potifar ñi domo mufüque rupa feipieyu tañi cudumafiel, huelu José cüme quimniefui tañi chumafel, feimu famentufi tüfachi domo. Feipifi Potifar ñi domo: “¿Chumngechi huesa dungu femafun ca culpayafun Chau Dios mu?” (Gén. 39:8-10). Petu ñi chem pinoeteu rume Potifar ñi domo, José deu quimniefui ñi chumafel, feimu cüdautulai ñi famentuafiel tüfachi domo.

14. ¿Chem quelluaiñmu taiñ bamentobel Jehová ñi üdequebel?

¹⁴ ¿Chumngechi inayentuafuiñ José ñi famentuafiel huesaque raquiduam? Petu taiñ nienon huesaque raquiduam, raquiduamafuiñ taiñ chumafel (Sal. 97:10; 119:165). Pepicahuaiñ taiñ famentufemafiel Jehová ñi üdequeel. Pichi raquiduamlayaiñ rume taiñ femal huesaque dungu, fei quelluaiñmu taiñ fütra culpanoal. Feimu acurumele huesaque raquiduam, quimaiñ taiñ chumal.

15. ¿Chumabüimi pengelal tami cüpa cüdahuelabel Jehová com tami piuque mu? (Hebreos 11:6).

¹⁵ Ngüneduamimi chi tami quimfiel ti rüf dungu ca ayünieimi tami serfiafiel ta Jehová, huelu petu pepicaucülenolu troquiuqueimi chi. Fei, ¿chumafuimi? Inayentuafuimi ta David, quisu llellipufi ta Jehová: “Cüme ngüneduamnieen, ahuem Chau Ngünechen, ca quimnieñmaen tañi piuque. Inaduamnieen, ca quimnieñmaen tañi raquiduamelnieteuchi dungu. Peñmaen chem huesa raquiduam  rume niefuli tañi piuque mu. Yenieaen afquenochi rüpü mu” (Sal. 139:23, 24). Hulcünulmi tami mongen Jehová mu ca fautizahulmi, pengelaimi tami cüpa serfiniefiel ta Jehová com tami piuque mu, fei cümelcayaimu (papeltunge Hebreos 11:6).

AMULEPE TAMI BÜLCONABEL JEHOVÁ

16, 17. ¿Chumqui Jehová ñi cüpalal pu dunguquelu iñingen Jehová tañi pu püñeñ, tati trahunche mu? (Juan 6:44).

¹⁶ Jesús feipi Jehová cüpalquefi pu che tañi troquiñche mu (papeltunge Juan 6:44). ¿Chum duamquei tami piuque quimfiel mu tüfa? Jehová peñmaquefi cümeque dungu tañi cüpalelchi che mu. Jehová rume falintuquefi caque quiñeque tañi pu serfiqueteu (Deut. 7:6). Eimi ca falintuqueimu.

¹⁷ Hueche, tami chau ca ñuque testigongele, raquiduamafuimi chi tami cüpalnoeteu ta Jehová. Quimfiñ ta Jehová tañi pu chau ñi quimeltueteu mu müten piafuimi chi, huelu inaduamfinge ñi chem pin ta Biblia: “Fülconmün Chau Ngünechen mu, fei fülconai ta eimün meu” (Sant. 4:8; 1 Crón. 28:9). Feimu eimi hune fülconülmi Jehová mu, fei quisu fülconai eimi mu. Jehová huallcünuquelaeimu, quisu falintuqueimu. Caque quiñeque che mülelu trahunche mu Jehová cüpalfi. Ca femngechi femquefi tati pu quimeltueteu tañi pu chau (ca ngüneduamafuimi 2 Tesalonicenses 2:13).

18. ¿Chem ngüneduamaiñ cüpalechi papiltun mu? (Salmo 40:8).

¹⁸ Hulcünulmi tami mongen Jehová mu ca fautizahulmi, inayentuafimi ta Jesús. Quisu ayühunquechi eluhui ñi femal chem rume tañi feipieteu Jehová (papeltunge Salmo 40:8; Heb. 10:7). Cüpalechi troquiñ mu, ngüneduamaiñ chem quelluafeimu tami serfinieafiel ta Jehová deu fautizahulmi.