RAMTUN CA HUIÑOLDUNGUN 12
ÜLCATUN 77 Huilüfquei ti rüf dungu dumiñ mu
Bamentobiiñ rumiñ ca miyahuaiñ pelon mu
“Cuibi mu rumiñ reque belebüimün, Beula pelon reque belimün” (EFES. 5:8).
¿CHEM QUIMAIÑ?
Pablo ñi feipin Efesios capitulo 5 mu, fei taiñ famtripaleal ti dumiñ mu ca taiñ miyahual ti pelon mu.
1, 2. 1) Huirintuculelbilu pu Éfeso che, ¿chem upamequebüi Pablo? 2) ¿Chem ramtun ngüneduamaiñ?
PABLO presulelu Roma mu, ayüfui ñi yafültucuafiel tañi pu peñi ca lamngen. Feimu huirilelfi mufüque carta. Quiñe feitachi carta mandalelfi tati pu cristiano mülelu Éfeso mu feichi 60 ca 61 tripantu püle (Efes. 1:1; 4:1).
2 Feichi 50 tripantu püle, Pablo amuldunguyaufui ti cümeque dungu Éfeso mu (Hech. 19:1, 8-10; 20:20, 21). Pablo müna piuqueyefi tañi pu peñi ca lamngen, feimu ayüfui tañi quelluafiel ñi serfinieafiel ta Jehová engün. Feimu tañi carta mu feipifi ñi müleal engün pelon mu ca ñi famtripaleal ti dumiñ mu. ¿Chemu feipifi engün? Iñchiñ cai, ¿chem quimeltueiñmu Pablo ñi feipifiel tañi pu peñi? Feitachi troquiñ mu peafiyiñ tüfachi epu ramtun.
TRIPAIÑ RUMIÑ MU
3. Efesios 5 mu, ¿chem eipi Pablo?
3 Pablo feipifi tati pu cristiano Éfeso: “Cuifi dumiñ mu miyauquefuimün. Huelu feula quiñeucüleimün ta Ñidol eimün, feimu pelon mu müleimün” (Efes. 5:8). Tañi feipin mu ta Pablo, pengeli fente ñi norcünutufiel ñi mongen tati pu Éfeso che. Feula quimaiñ chemu Pablo feipifi: “Cuifi dumiñ mu miyauquefuimün”.
4. ¿Chemu eipiabüiñ pu Éfeso che rumiñ mu reque mülebüingün tañi huenupüramün mu?
4 Mülequefuingün coilaque religion mu. Petu tañi cristianongenon, pu Éfeso che fentren coilaque quimeltun niequefuingün. Éfeso huaria mu mülefui quiñe afmatufalchi ngillatuhue ruca ñi poyengeal quiñe coila diosa Ártemis pingelu. Fei mu amuquefui fentrenque che ñi püramyeafiel coilaque dios. Tüfachi ngillatuhue ruca reque deumangequefui ca fendengequefui pichique adentun, fentren plata hueungequei (Hech. 19:23-27). Cafei fentren che mülelu Éfeso mu adümcantuquefui ti calcu dungu (Hech. 19:19).
5. ¿Chemu eipiabüiñ pu Éfeso che rumiñ mu reque mülebüingün tañi hueda bemün mu?
5 Conquefuingün pod cudumuhun mu. Tati pu Éfeso che yehuequelafuingün rume tañi yenien mu femngechi mongen. Tati obra de teatro ca fiesta ñi femqueel tati religion nüucülequefui tati pod cudumuhun mu (Efes. 5:3). Tati pu che “duamcülelai engün chem ñi cümen ca chem ñi cümenon” (Efes. 4:17-19). Quimquenofulu engün am chem tañi cümen ca chem tañi cümenon Jehová tañi adquiñ meu, huesa duamquelafuingün tañi huesa femün meu ca raquiduamquelafuingün rume tañi huesa duamelafiel ta Jehová. Feimu Pablo feipi “dumiñmalei tañi raquiduam engün. Fei lloulayaingün ti mongen Chau Ngünechen ñi feipicünuel”.
6. Pablo eipi pu Éfeso che “beula pelon reque belimün”, ¿chemu?
6 Quiñeque tati pu Éfeso che tripaingün feichi huesaque dungu mu. Feimu Pablo feipifi: “Feula quiñeucüleimün ta Ñidol eimün, feimu pelon mu müleimün” (Efes. 5:8). Inafingün Jehová tañi dungu, feita quiñe pelontuhue reque adnieyu engün (Sal. 119:105). Famentufingün com tati coilaque religion ca ti pod cudumuhun, inayenturpufingün ta Jehová ca eluhuingün ñi poyeafiel ca ayühuelafiel (Efes. 5:1).
7. Pu Éfeso cristiano ñi upan, ¿chemu trüribi iñchiñ taiñ upaquen bachantü?
7 Ca femngechi iñchiñ petu taiñ quimnofiel ti rüf dungu, ca dumiñ mu reque mülequefuiñ. Quiñeque iñchiñ coneltuquefuiñ coilaque religion ñi fiesta mu, ca quiñeque pod mongen yeniequefui. Huelu quimfilu ta Jehová iñchiñ, norcünutuiñ taiñ raquiduam, fei yenietuiñ taiñ mongen chumngechi ñi ayüqueel ta Jehová. Fei tüfa rume cümelcaqueiñmu (Is. 48:17). Mülei taiñ famtripaleal ti dumiñ mu ca rumel miyahual ti pelon mu. Tüfa cüdaungeafui. Fei, ¿chem quelluafeiñmu? Peafiyiñ.
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Pablo ñi huirintuculelfiel tati pu Éfeso che, iñchiñ ca quelluqueiñmu fachantü. (Inaduamnge parrafo 7). b
BAMENTOBIIÑ RUMIÑ
8. Efesios 5:3-5 ñi eipin, ¿chem bamentuabüiñ Éfeso che?
8 (Papeltunge Efesios 5:3-5). ¿Chem mülefui ñi femal pu Éfeso che ñi famtripaleal pod cudumuhun mu? Mülefui ñi famentuafiel chem dungu rume ñi ayüquenoel ta Jehová. Ngelafui rume ñi nütramcayal pod cudumuhun mu. Pablo feipifi ñi femnoal com feitachi huesaque dungu tañi conal feichi “Chau Ngünechen ngünenietule ta mapu”.
9. ¿Chemu bamentuabüiñ billque dungu nüucülelu pod cudumuhun dungu?
9 Iñchiñ ca mülei taiñ cuñiutucuhual, femngechi connoal “falinochi dungu nüucülelu ta dumiñ meu” (Efes. 5:11). Rüfngei llemai, quiñe che allcütule, adquintuniele cam nütramcafile pod cudumuhun mu, cüdautulayafui tañi conal femngechi dungu mu (Gén. 3:6; Sant. 1:14, 15). Quiñe pais mu, fentrenque peñi ca lamngen coningün quiñe grupo internet mu. Fei mandaluuquefuingün mensaje. Ellaca mu nütramcaquefuingün Chau Jehová mu, huelu ñochiquechi nütramcalerpuingün Jehová tañi ayüquenoel mu. Rupachi antü nütramcarpuingün re cudumuhun mu. Tañi nütramcan mu femngechi dungu, fentren engün conürpuingün pod cudumuhun mu.
10. ¿Chem ayüqui Satanás? (Efesios 5:6).
10 Huecüfü afquentu ayüquefui taiñ huelulcayaeteu, femngechi taiñ quimnoal chem ñi cümen ca chem ñi cümenon (Is. 5:20; 2 Cor. 4:4). Fachantü ca felei dungu. Pu poyequenofilu ta Jehová cümelu troquiquefi ti pod cudumuhun, fei ayüquei iñchiñ taiñ ca femngechi raquiduamelaeteu (2 Ped. 2:19). Feimu lle fentren dungu ñi tripaqueel television, internet ca pelicula mu famtuculelqueiñmu Jehová tañi üdequeel. Huecüfü ca ayüfui taiñ raquiduamelaeteu pu pod mongen yenielu ñi cüme rupamequen müten ca ñi huesa tripaquenon ñi mongen mu engün (papeltunge Efesios 5:6).
11. Müna balin-ngi inaal Efesios 5:7 ñi eipin, ¿chemu?, ¿chumngechi Angela ñi upan pengeli tüba? (Pebinge pu adentun).
11 Huecüfü ayüquei taiñ nieal huesaque compañ, femngechi taiñ doi cüdautual taiñ poyeafiel ta Jehová. Feimu Pablo feipifi pu Éfeso che ñi hueniyenoafiel pu huesaque dungu femquelu. Ca feipifi: “Inaconlayaimün tañi femün engün” (Efes. 5:7). Iñchiñ doi mülefui taiñ cuñiutucuhual pu Éfeso che mu. ¿Chumngelu? Fachantü ca conafuiñ redes sociales mu taiñ cüme rupayal caquelu che iñchiñ. Peaiñ ñi rupan taiñ lamngen Ángela, a Asia mu mülelu. Quisu inaduami ti redes sociales ñi rume cuñihun-ngen. Feipi: “Ñochiquechi caletui tañi raquiduam, fei hula huesa duamhuelan tañi hueniyefiel quiñeque che inaquenofilu Jehová ñi cümeque ngülam. Huesa dungu no troquiuquefun inanoafiel Jehová ñi huercün dungu tañi mongen mu” pi. Huelu quiñeque loncolelu quellueyu tañi cüme raquiduamtual. Taiñ lamngen ca feipi: “Feula fente raquiduamquelan redes sociales mu, doi mai Chau Jehová mu”.
Cümeque hueni nieliyiñ, cüdautulayaiñ taiñ inayal Jehová tañi ngülam. (Inaduamnge parrafo 11).
12. ¿Chumabüin taiñ inaabel Jehová ñi huercün dungu?
12 Tati pu che feipifule rume “tati pod cudumuhun huesa dungu no tati”, iñchiñ quimnieiñ tañi huesa dungungen. Eluulayaiñ taiñ ngünencangeal (Efes. 4:19, 20). Ramtuhuaiñ: “¿Cuñiutucuuquen tañi huenicantunoafiel tañi pu compañ cüdau mu, colegio mu cam caquelu che respetaquenofilu Jehová tañi ngülam? ¿Nehuencünuuquen ñi incayafiel Jehová tañi huercün dungu feipingeli rume ñi yamchequenon?”. Ca cuñiutucuhuaiñ inei taiñ hueniyeafiel ti trahunche mu (2 Tim. 2:20-22). Acordayaiñ, quiñeque che mülelu ti trahunche mu quellulayafeiñmu taiñ püntütripanoal Jehová mu.
AMULEPE TAIÑ MIYAHUN PELON MU
13. ¿Chumabüiñ taiñ ‘bemal pu che miyaulu pelon mu reque’? (Efesios 5:7-9).
13 Pablo ca feipifi pu Éfeso che: “Tati pu che miyauquelu pelon mu reque, ca femngechi femqueaimün” (papeltunge Efesios 5:7-9). ¿Chumngechi femafuiñ? Cheu rume miyauliyiñ ca chummequeliyiñ rume, cüme yenieaiñ taiñ cristianongen. Taiñ femürpual, fillque dungu quelluaiñmu. Quiñe tüfa, cüme papeltunieafiyiñ Biblia ca taiñ publicaciones. Papeltuliyiñ, cüme ngüneduamafiyiñ Jesús ñi femün ca tañi quimeltun (Prov. 6:23; Juan 8:12).
14. ¿Chumngechi quelluqueiñmu Jehová tañi nehuen?
14 Pu che taiñ hualloñmanieteu yeniei pod mongen. Feimu duamnieiñ Jehová tañi nehuen, femngechi taiñ miyahual pelon mu reque (1 Tes. 4:3-5, 7, 8). Jehová tañi nehuen quelluaiñmu taiñ inanoafiel huesaque raquiduam chaftuquefilu Jehová tañi ayüqueel. Ca quelluaiñmu “taiñ cüme piuquengeal fillque dungu mu, taiñ nor dungu femal ca taiñ miyahual rüf dungu mu” (Efes. 5:9).
15. ¿Chumabüiñ taiñ llohual Jehová tañi nehuen? (Efesios 5:19, 20).
15 Jesús feipi Jehová “eluafi ñi nehuen feichi che ñi llellipuqueteu” (Luc. 11:13). Feimu mülei taiñ llellipuafiel ta Jehová taiñ eluaeteu ñi nehuen. Jehová ca eluqueiñmu tañi nehuen trahuluhun mu taiñ pu peñi, pu lamngen iñchiñ (papeltunge Efesios 5:19, 20). Jehová tañi nehuen ñi duam mu quelluaiñmu taiñ ayühuelafiel ta Jehová taiñ mongen mu.
16. ¿Chem quelluaiñmu taiñ cüme bemal? (Efesios 5:10, 17).
16 Taiñ dullial chem chumal taiñ mongen mu, mülei taiñ ngüneduamal chem ñi ayünieel ta Chau Jehová, fei eluhuaiñ taiñ femal (papeltunge Efesios 5:10, 17). Quintuaiñ Biblia mu chem ngülam quelluafeiñmu, femngechi quimaiñ chem ayüquei Jehová tañi femal. Inaniefiliyiñ tüfachi cümeque ngülam, cüme dulliaiñ taiñ chumal.
17. ¿Chumabüiñ taiñ ngünamnoal taiñ tiempo? (Efesios 5:15, 16. Pebinge ti adentun).
17 Pablo ca feipifi tati pu Éfeso che: “Ngünamcaquelayaimün tamün tiempo” (papeltunge Efesios 5:15, 16). Huecüfü ayüquei fentren duam taiñ nieal, femngechi taiñ nienoal tiempo taiñ serfiafiel ta Jehová (1 Juan 5:19). Quiñeque cristiano tañi ngüneduamnon mu rume doyümürpuafui tati plata, tañi nieal doi estudio ca ñi doi cüdahual, fei raquiduamhuelayafui chi chumngechi ñi doi serfiafiel ta Chau Jehová. Femngechi rupaliyiñ, pengelafuiñ taiñ raquiduamcülen chumngechi ñi raquiduamquen pu poyequenofilu ta Chau Jehová. Tati plata, ti cüdau ca tati estudio huesa dungu no fel tati. Huelu ngelafui taiñ doyümafiel taiñ mongen mu. Feimu ngünamcalayaiñ taiñ tiempo, doi mai doyümaiñ ñi cüdahuelafiel Jehová, femngechi miyahuaiñ ti pelon mu.
Tati pu cristiano Éfeso mu eluucülequefui tañi amuldungual engün, femngechi ngünamcaquelafui tañi tiempo. (Inaduamnge parrafo 17).
18. ¿Chumi Donald?
18 Quintuaiñ chumngechi taiñ doi cüdahuelafiel ta Jehová. Femngechi femi taiñ peñi Donald mülelu Sudáfrica mapu mu. Quisu feipi: “Ngüneduamuhun, fei feipifiñ ta Jehová tañi quelluaeteu tañi doi amuldungual. Ngillatufiñ tañi cüdaunoal com antü, femngechi tañi doi nieal tiempo tañi amuldungual. Jehová quellueneu tañi peal femngechi cüdau. Femngechi tañi domo iñchiu eluhuiyu tayu precursorngeal”.
19. ¿Chumabüiñ taiñ inaabel Pablo ñi billque ngülam?
19 Pablo tañi carta rume quellupelafi tati pu Éfeso che ñi püntütripanoal ta Jehová mu. Iñchiñ ca femngechi rume quelluafeiñmu llemai. Pablo tañi huirintucuelchi carta ngülamtuqueiñmu taiñ cüme dullial taiñ pu hueni, ca chem taiñ peel ca chem taiñ allcütuqueel. Ca quelluqueiñmu taiñ papeltunieafiel ta Biblia, femngechi taiñ inayafiel ti rüf dungu. Ca pefiyiñ fente falin-ngei taiñ llohual Jehová tañi nehuen, femngechi taiñ doi cüme cristianongerpual. Inaniefiliyiñ Pablo ñi ngülam, ayühuelafiyiñ ta Jehová. Com femliyiñ ta tüfa, famtripaleaiñ ti dumiñ mu, fei rumel miyahuaiñ ti pelon mu.
¿CHEM PIMI CAI?
-
¿Chem am “pelon”ca “rumiñ” eipingelu Efesios 5:8?
-
¿Chumabüiñ taiñ bamentobel “rumiñ”?
-
¿Chumabüiñ taiñ ‘bemal pu che miyaulu pelon mu reque’?
ÜLCATUN 95 Doi huilüfquei ti quimün
a Tüfachi troquiñ mu, ca üi tuculelngei ta quiñeque che.
b ¿CHEM PENGELI TI ADENTUN? Quiñe fütra cuifi papel nielu ti carta ñi huirintuculelfiel Pablo pu Éfeso che.
