1, 2. Bautizaulu quiñe che, ¿chumngechi doi cümeletoi ñi mongen?

 QUIÑE che fautizaulu conelturpuquei Jehová tañi familia mu. Tati hueniyefilu Jehová rume ayühun-ngei. David reque, feipiquefingün ta Jehová: “Ayüucüleaiñ tami cümeque dungu taiñ llouqueel tami ruca meu, eimi tami ngillatuhue ruca” (Sal. 65:4).

² Jehová dulliquefi inei tañi hueniyeaeteu. Taiñ peel rupachi troquiñ mu, Jehová fülcontuquefi pu che eluulu tañi hueniyeaeteu. Hul-lu iñchiñ taiñ mongen Jehová mu ca fautizaulu ta iñchiñ, doi fülconqueiñ Jehová mu, fei Jehová eluaiñmu fentren cümelcan (Jer. 17:7, 8; Mal. 3:10).

3. ¿Chem balin-ngechi dungu bemabüiñ com pu bautizangelu? (Eclesiastés 5:4, 5).

³ Fautizahulmi eimi, eluhuaimi tami serfinieafiel ta Jehová, fentecünulayaimi. Mülei tami femürpual tami feipicünufiel ta Jehová ca püntütripalayaimi Jehová mu, dicümtucungelmi rume tami huesa femal cam huesaque dungu rupalmi rume (papeltunge Eclesiastés 5:4, 5). Ca inayafimi ta Jesús ca tañi huercün dungu (Mat. 28:19, 20; 1 Ped. 2:21). Feitachi troquiñ quelluaimu tami femal.

UPALE CÜDAUNGECHI DUNGU UME, ‘ABQUILPE TAMI INAABEL’ JESÚS

4. Com pu inanequetu Jesús yenebiiñ quiñe mamüll, ¿chemu eipiabüiñ tüba? (Lucas 9:23).

⁴ Rupan fautizahulmi, raquiduamlayaimi tami rupanoal huesaque dungu. Jesús feipifi tañi pu discipulo “fill antü eluupe ñi meñcu yenieal tañi orcon mamüll” (papeltunge Lucas 9:23). ¿Feipipei mai Jesús tañi pu discipulo  ñi rupayal re huesaque dungu mu? Feipilai. Jesús feipi tañi pu discipulo lloufule rume engün ta cümelcan, ca rupayafui huesaque dungu mu, quiñeque rume cüdaungeafui (2 Tim. 3:12).

5. Pu elcünobilu billque dungu Chau Dio ñi Ngünenel ñi duam mu, ¿chumngechi cümelcangingün?

⁵ Eimi tami testigongen mu caiñetueimu chi tami familia. Cam doyümfimi chi serfiafiel ta Jehová ti plata mu (Mat. 6:33). Jehová quimniei tami elel quisu mu (Heb. 6:10). Feimu rupaimi chi ñi feipiel ta Jesús. Quisu feipi: “Rüf feipihuayiñ, inei rume elcünule ruca, peñi, lamngen, ñuque, chau, yall cam lelfün iñche tañi duam ca ti cümeque dungu ñi duam mu, fantepu meu llohuai 100 rupa tañi niequefel: ruca, peñi, lamngen, ñuque, yall, lelfün ca rupayai caiñetuhun. Cafei cüpalechi antü meu llohuai rumel mongen” (Mar. 10:29, 30). Femi llemai, tami llohuelchi cümelcan feula, doi alürpui tami elcünuel mu (Sal. 37:4).

6. Bautizalngelmi hula, ¿chemu nehuentuhuaimi tami mupituquebel Jehová?

⁶ Rupan fautizahulmi rume, culpafe chengeaimi, feimu amuleai tami chaftuafiel huesaque raquiduam (1 Juan 2:16). Quiñeque mu ti apostol Pablo reque rupayafuimi. Quisu feipi: “Rüfcünu llemai tañi piuque mu ayüniefiñ Chau Ngünechen ñi ley. Quiñe ley ngüneniefi tañi raquiduam. Huelu caiñetuqueyu cangelu ley mülelu tañi cuerpo mu, tüfa tati culpan iñche mu mülelu, fei ngünenieneu” (Rom. 7:22, 23). Quiñeque mu huesa duamafuimi chi chaftumequefilmi huesaque raquiduam. Acordalmi tami feipicünufiel ta Jehová, femngechi doi nehuencünuhuaimi tami femnoal huesaque dungu.

7. ¿Chumngechi taiñ bautizahun quelluaiñmu taiñ püntütripanoal Jehová mu?

⁷ Iñchiñ hultuculu taiñ mongen ta Chau Jehová mu, quisutu illamuhuaiñ. ¿Chumngechi femqueiñ? Ayüfalngefule rume, famentuquefiyiñ Jehová ñi üdequeel (Mat. 16:24). Feimu ngüchaltucungeliyiñ taiñ huesa femal cam rupaliyiñ huesaque dungu mu, cüme quimnieiñ taiñ chumal: püntütripalayaiñ Jehová mu. Eluucüleiñ taiñ ayühuelafiel ta Jehová. Inayentuafiyiñ ta Job. Rupafulu rume huesaque dungu, feipi: “¡Lali rume, elcünulayan ñi nor piuquengen!” (Job 27:5).

8. Raquiduamliiñ taiñ eipicünobel Jehová, ¿chemu quelluaiñmu taiñ connoal hueyaque dungu mu?

⁸ Raquiduamliyiñ taiñ feipicünufiel ta Jehová, quelluaiñmu taiñ connoal huesaque dungu mu. Quiñe ejemplo, ¿quiñe huentru daquelcantuafui quiñe fütangechi domo? Cam, ¿quiñe domo daquelcantuafui quiñe curengeelchi huentru? Femlai llemai. Hulcünulu iñchiñ taiñ mongen Jehová mu, feipicünufiyiñ taiñ chumcaunorume taiñ femnoal. Eluuliyiñ taiñ foliluunoal feitachi huesaque raquiduam taiñ piuque mu, cüdautulayaiñ taiñ famentuafiel. Femliyiñ, famentuhuaiñ huesaque che ñi rüpü mu (Prov. 4:14, 15).

9. Raquiduamliiñ taiñ eipicünobel Jehová, ¿chemu quelluaiñmu taiñ doyümneal (hunentucual) Jehová ñi ayüquel?

⁹ Quiñe cüdau catrütueliyiñmu ñi amual com trahun, ¿llohuafiyiñ? Femlayaiñ. Cüme quimnieiñ chem cüdau no rume catrütulayaiñmu taiñ amual ta trahun mu. Feipilayaiñ llohuafun tati  cüdau, fei inaduaman tañi chumal tañi cüdahuelafiel ta Jehová. Inayentuafuiñ ta Jesús. Quisu eluucülefui tañi ayühuelafiel tañi Chau. Iñchiñ ca femngechi femaiñ. Nehuentun mu famentufemafiyiñ com ñi ayüquenoel ta Jehová. Iñchiñ deu eluntucuiñ Jehová mu (Mat. 4:10; Juan 8:29).

10. Jehová, ¿chumngechi quelluaiñmu taiñ inaneabel Jesús?

¹⁰ Huesaque dungu rupaliyiñ cam ngüchaltucungeliyiñ taiñ huesa femal, pengelafuiñ taiñ eluucülen taiñ inayafiel ta Jesús. Jehová quelluaiñmu taiñ femal. Biblia feipieiñmu: “Chau Ngünechen manelfali, fei femcünulayai tamün rupayal chem tamün pepi hueuquenofiel. Doi mai huesa rupalmün, quelluaimünmeu tamün hueutripayal ca tamün nehuentuleal” (1 Cor. 10:13).

CHUMAIMI TAMI INANEABEL JESÚS

11. ¿Chumabüimi tami inaneabel Jesús? (Pebinge pu adentun).

¹¹ Jesús cüdahuelfi tañi Chau com tañi piuque mu. Tañi ngillatun mu rumel fülconcülei Jehová mu (Luc. 6:12). Tami inanieafiel ta Jesús deu tami fautizahun, mülei tami doi cüdauconcüleal Jehová mu. Biblia feipi: “Tunte amulele rume taiñ serfiquefiel ta Chau Dios, amulepe taiñ femmequen” (Filip. 3:16). Allcütuqueimi chi ñi femün quiñeque peñi ca lamngen ñi doi cüdahuelfiel ta Jehová. Amuingün chi tati Escuela ñi Pepicangeam pu Amuldunguquelu Ngünechen ñi Gobierno, cam amuingün chi cheu ñi doi duamfalngen amuldunguquelu. ¿Eluucüleimi tami femngechi femal? Yafüluunge  tami huechurpual. Pu peñi ca lamngen rumel quintuquei chumngechi ñi doi cüdahuelafiel ta Jehová (Hech. 16:9). Huelu pepilnolmi tami doi cüdahuelafiel ta Jehová, falinolu troquiuquilnge. Doi falin-ngei mai taiñ rumel nehuentuleal Jehová ñi rüpü mu (Mat. 10:22). Ngoimaquilnge Jehová rume ayüuquei taiñ rumel serfinieafiel com taiñ nehuen mu, femngechi rumel inanieafimi ta Jesús deu tami fautizahun mu (Sal. 26:1).

12, 13. Müna ayünolmi, ¿chumabüimi? (1 Corintios 9:16, 17; Pebinge hudamngechi dungu ‘ Tübachi epu dungu rüb quelluaimu’).

¹² ¿Chumafuimi cai piuque mu tripanole tami ngillatun? Ayühuelhuenoelmu cuifi reque papeltun Biblia ca amuldungun, ¿ca chumafuimi cai? Femngechi rupalmi, quelluhuelaeneu Jehová piquilnge. Culpan chengelu am iñchiñ, femngechi rupaqueiñ quiñeque mu. Müte ayühuelhuenoelmu tami poyefiel ta Jehová, raquiduamnge chumngechi ñi rupan apostol Pablo. Tunte yafüluuquefui rume inayafiel ta Jesús, quiñeque mu tañi piuque müte eluuquelafui ñi cüdahual (papeltunge 1 Corintios 9:16, 17). Feipi: “Huesa duam mu cüdauli, tüfa tañi elfalcünungen müten”. Feimu Pablo ayülafui rume ñi entual tañi cüdau quiñeque mu, huelu yafüluuquefui ñi entuafiel müten.

¹³ Ca femngechi inaquilnge quisu tami raquiduam tami dullial chem chumal, doi mai eluucülenge tami femal ti cümeque dungu yafüngehuenolmi rume. Müte ayünofilmi rume, huelu fentecünunolmi  tami femal cümeque dungu, rupachi antü mu doi ayühuelaimu. Deu tami fautizahun, amuleaimi tami papeltuafiel Biblia, ngillatuleaimi, amuaimi trahun mu ca amuldunguleaimi, femngechi inanierpuafimi ta Jesús. Femngechi yafüluucülelmi, tami pu peñi ca lamngen inaye yafüluhuaingün (1 Tes. 5:11).

“AMULEPE TAMÜN QUIDUQUE NGÜNEDUAMUHUAL”

14. ¿Chem dungu ngüneduamabüimi? (2 Corintios 13:5).

¹⁴ Tami deu fautizahun mu falin-ngei quisutu ngüneduamuhual (papeltunge 2 Corintios 13:5). Ngüneduamuunge, ¿fill antü papeltuniefimi Biblia? ¿Ngillatuqueimi, amuqueimi trahun mu ca amuldunguqueimi? Quintunge chumngechi tami doi ayühuelaeteu ca cümelcayaeteu tüfachi meli dungu. Ramtuhuafuimi: “¿Quim quimeltun Biblia ñi falin dungu? ¿Chumafun tañi doi ayühuelaeteu ti amuldungun? Tañi fillque ngillatun, ¿rüfcünu piuque mu tripaquei? Tañi ngillatun, ¿pengelquepei mai com piuque mu ñi maneluuquen Jehová mu? ¿Yafüluuquen tañi amual com trahun meu? Trahun mu, ¿chumafun tañi cañpüle amunoal ñi raquiduam ca ñi doi cüme huiñoldungual?”.

15, 16. ¿Chem quimeleleiñmu Robert tañi bemün?

¹⁵ Ca cümeafui tami ngüneduamuhual chem mu pürüm hueluraquiduamelngeafuimi. ¿Chumngelu falin-ngei taiñ femal? Peaiñ quiñe dungu rupan taiñ peñi Robert pingelu. Quisu feipi: “Nielu iñche 20 tripantu, rangiñ antü cüdauquefun. Quiñe antü deu cüdaulu iñche, mangeleneu quiñe compañ domo tañi ruca mu. ‘Quisulen tañi ruca mu, cüme rupayayu’ pieneu. Ellaca mu amulayan, ca duam nien pifiñ müten. Fei hula cüme dungufiñ, feipifiñ chumngelu tañi amunoal”. Taiñ peñi Robert cümecünui ñi famentufiel feitachi domo. Huelu fei hula ñochiquechi raquiduami tañi doi cüme huiñoldunguafel. Quisu feipi: “Doi nehuencünuhurqueafulu ta iñche, chumngechi femi ta José feichi famentufilu Potifar tañi domo (Gén. 39:7-9). Rüfcünu, ¿chumngelu chi pürüm famentulafiñ? pilehuetun. Tañi femngechi rupan mu, ngüneduamün tañi doi fülcontuafiel ta Jehová”.

 ¹⁶ Ca femngechi eimi deu tami famentufiel mu quiñe huesa dungu, inayentuafuimi ta Robert. Ramtuhuafuimi: “¿Rume cüdautupen mai tañi famentuafiel?”. Pürümquechi cüme lloudungunolmi huesa duamquilnge, doi mai ayüunge tami cüme ngüneduamuhun chumngechi tami doi cüme raquiduamal. Ngillatufinge ta Jehová tami nehuencünuhual, fei hula doi yafültucuhuaimi tami feyentuafiel ta Jehová (Sal. 139:23, 24).

17. Taiñ bemquel mu, ¿chumngechi huenupüramngeabüi Jehová tañi üi?

¹⁷ Huelu fentepuulai Robert tañi rupan. Quisu ca feipi: “Iñche famentufilu tañi compañ cüdau, hueutripaimi pieneu. Ramtufiñ, ¿chem pin am tüfa? Ti domo feipieneu: ‘Quiñe hueni testigongefulu feipieneu pu testigo mangelngele ñi femal huesaque dungu, ellcanquechi femquei müten’. Feimu ‘ngünencayafiñ tañi compañ pifun’ pieneu ti domo. Rume ayühun famentufiel ti domo podümüñmanofiel Jehová tañi üi”.

18. Bautizangelmi hula, ¿chumaimi? (Pebinge hudamngechi dungu “ Tübachi epu papiltun rübcüno quelluaimu”).

¹⁸ Feichi hultucuimi tami mongen Jehová mu ca fautizahuimi, pengelqueimi tami püramyeñmayafiel tañi üi chem dungu rume rupale. Rüfcünu, Jehová quimniei chem huesaque dungu mu tami rupamequen ca tami cüpa ngünencamequengequen. Fei lelinieimu tami yafüluuquen ca elunieaimu ñi nehuen tami cüme femal (Luc. 11:11-13). Felei llemai, Jehová quelluaimu inanieafiel ta Jesús deu tami fautizaucülen mu.