1. ¿Chem raquiduamabüi quiñeque peñi cam lamngen trahunche mu?

 RUME cüme dungu taiñ quimfiel “Jehová ayühuelqueyu tañi pu che” (Sal. 149:4). Huelu quiñeque che huesa duamafui chi, fei feipiafui: “Chau Jehová ayüucülei tañi pu che mu, huelu ¿iñche cai? ¿Ayühuelquefiñ ta Jehová?”. Ca femngechi ramtuhuingün quiñeque poyequefilu ta Jehová cuifi mu (1 Sam. 1:6-10; Job 29:2, 4; Sal. 51:11).

2. ¿Iñi engün am ayühulquebingün Jehová?

² Biblia feipieiñmu culpan chengefulu rume ta iñchiñ, huelu ayühuelafuiñ ta Jehová. ¿Chumngechi femafuiñ? Feyentuleaiñ Jesús mu ca fautizahuaiñ (Juan 3:16). Femngechi pengelafiyiñ ta caquelu che taiñ repentiutun taiñ culpan mu ca taiñ serfiafiel ta Jehová com taiñ mongen mu (Hech. 2:38; 3:19). Femün mu, hueniyerpuquefiyiñ ta Jehová ca ayühuelquefiyiñ. Serfiniefiliyiñ ta Jehová chumngechi taiñ feipicünufiel, quisu füreneaiñmu ca hueniyeaiñmu (Sal. 25:14).

3. ¿Chem pu ramtun ngüneduamaiñ tübachi papiltun mu?

³ ¿Chemu feipiquei quiñeque che ñi ayühuelquenofiel ta Jehová? ¿Chumngechi pengelelqueiñmu tañi ayüucülen ta iñchiñ mu? ¿Chem quelluafeiñmu taiñ maneluhual Jehová ñi ayüucülen iñchiñ mu?

¿CHEMU QUIÑEQUE CHE RAQUIDUAMQUI AYÜHUL-LABINGÜN JEHOVÁ?

4, 5. Balinolu troquiuliiñ, ¿chem loncontucuabüiñ?

⁴ Quiñeque iñchiñ pichicalu müten, falinolu troquiuquefuiñ (Sal. 88:15). Quiñe peñi Adrián pingelu feipi: “Turpu falintuuquelafun. Pichicalu müten iñche, ngillatuquefuiñ ta Jehová tañi pu familia ñi müleal ti hue mapu mu, huelu iñche mülenoalu fei mu troquiuquefun”.  Cangelu peñi Tony pingelu, tañi pu chau testigongelafui. Quisu feipi: “Turpu feipiquelafeneu tañi piuqueyeteu, ayüucülen tami femmequen mu piquelafeneu engu. Tañi pu chau raquiduamelquefeneu tañi turpu tutenoafiel engu”.

⁵ Quiñeque mu feipiliyiñ taiñ falinon, loncontucuaiñ Jehová mai cüpaleiñmu tañi troquiñche mu (Juan 6:44). Quiñeque mu iñchiñ ngüneduamuulayafuiñ chi taiñ cüme femmequen, huelu Jehová peñmaqueiñmu llemai ca quimnieñmaeiñmu taiñ piuque (1 Sam. 16:7; 2 Crón. 6:30). Feimu rüf maneluhuafuiñ Jehová taiñ falintuqueteu (1 Juan 3:19, 20).

6. Raquiduamlu Pablo tañi yabcan mu, ¿chum duamcüli?

⁶ Quiñeque iñchiñ petu huesa duamcüleafuiñ chi taiñ femün mu ta cuifi petu taiñ quimnofiel ta Jehová (1 Ped. 4:3). Caquelu peñi ca lamngen fentren tripantu yeniei ñi serfiquefiel ta Jehová, huelu quiñeque mu conturumequeyu huesa raquiduam, fei huesa duamqueingün. Eimi cai, ¿ca femngechi huesa duamquei tami piuque quiñeque mu? Femngechi dungu mu rupalmi, yafüluhuafuimi. Quiñeque poyequefilu ta Jehová cuifi mu ca femngechi dungu mu rupaingün. Quiñe tüfa tati apostol Pablo. Raquiduamlu tañi huelulcauquen mu, huesa duamquefui (Rom. 7:24). Pablo deu repentiutufui ca fautizaufui, huelu feipifui: “Com pu apostol mu, iñche tati doi falinolu” ca “iñche tati doi fütra culpafe” (1 Cor. 15:9; 1 Tim. 1:15).

7. Huiñoduamtuleliiñ, ¿chem cüme quimniiñ?

⁷ Taiñ Huenu Chau feipicünui taiñ perdonayaeteu repentiutuliyiñ (Sal. 86:5). Feimu rüf piuque mu huesa duamliyiñ taiñ culpan mu, Jehová perdonayaiñmu. Quisu feipicünui ñi femal, fei femürpuai llemai (Col. 2:13).

8, 9. Raquiduamliiñ bemliiñ chem dungu ume ayühulabiiñ Jehová, ¿chem quelluaiñmu?

⁸ Com iñchiñ ayüqueiñ taiñ cüdahuelafiel ta Jehová com taiñ nehuen mu. Huelu quiñeque mu chumfuliyiñ rume, turpu ayühuel-layafuiñ ta Jehová piafuiñ. Quiñe lamngen Amanda pingelu, feipi: “Chumte cüdahuelfili rume ta Jehová, doi mülefui tañi cüdahual ñi ayühuelafiel troquiuquen. Feimu raquiduamcülequen tañi femal rume fentren dungu. Com enturpunofiel mu, huesa duamquen. ¿Ca huesa duamelpelafiñ ta Jehová? piquen”.

⁹ Chumliyiñ rume, turpu ayühuel-layafuiñ ta Jehová pilayaiñ. ¿Chem quelluafeiñmu? Loncontucunieaiñ, Chau Jehová dicümtucuquelaeiñmu taiñ hulal chem taiñ nienon. Com taiñ nehuen mu cüdahuelfiliyiñ ta Jehová, quisu rume falintuñmayaiñmu tunten-ngefule rume. Ca raquiduamafuiñ quiñeque che com ñi piuque mu serfiquefilu ta Jehová cuifi mu. Raquiduamaiñ Pablo mu. Quisu rume cüdaufui fentren tripantu. Fentrenque mapu mu amui, fei elcünui fentren trahunche. Huelu caletulu tañi mongen, fente cüdauhuequelafui. ¿Feipiafuiñ Pablo ñi ayühuelhuenofiel ta Jehová? ¡Femlai llemai! Pablo amulerpui tañi cüdahuelnieafiel ta Jehová, feimu quisu cümelcaeyu (Hech. 28:30, 31). Ca femngechi iñchiñ fente cüdahuelhuelafiyiñ chi ta Jehová, huelu Jehová doi falintuquei chemu taiñ femquen. Feula peafiyiñ chumngechi pengelqueiñmu Jehová tañi ayüucülen iñchiñ mu.

 ¿CHUMNGECHI PENGELI JEHOVÁ TAÑI AYÜUCÜLEN IÑCHIÑ MU?

10. Jehová, ¿chumngechi “dunguqueiñmu” tañi ayüucülen iñchiñ mu? (Juan 16:27).

¹⁰ Biblia mu. Chau Jehová pengelelquefi tañi pu che ñi piuqueyefiel ca ñi ayüucülen quisu engün mu. Biblia mu Jehová epu rupa feipifi ta Jesús: “Tüfa ta iñche tañi poyen Fotüm, iñche tañi ayühuelqueteu” (Mat. 3:17; 17:5). ¿Ayüafuimi tami ca femngechi feipiaeteu Jehová? Com iñchiñ ayüqueiñ taiñ feipingeal. Huenu mu feipinacümpalayaiñmu ta Jehová, huelu mai Biblia mu feipiqueiñmu. Jesús com tañi feipin ca tañi femün mu, inayentufi tañi Chau. Feimu papeltufiel mu iñchiñ Biblia mu Jesús ñi piuqueyenquechi dungufiel tañi pu discipulo, Jehová taiñ dungumequeteu troquihuaiñ (papeltunge Juan 16:27). Huelulcauquefulu rume tañi pu discipulo, Jesús feipifi tañi piuqueyefiel, feimu raquiduamafuiñ Jehová taiñ ca femngechi feipimequeteu (Juan 15:9, 15).

11. ¿Chem raquiduamlaabüiñ? (Santiago 1:12).

¹¹ Eluqueiñmu com taiñ duamnieel. Chau Jehová ayüquei taiñ quelluaeteu, feimu cuidaqueiñmu taiñ faltalenoal chem no rume. Huelu quiñeque mu Jehová catrütuquelaeiñmu taiñ rupayal huesaque dungu mu. Femngechi rupai ta Job (Job 1:8-11). Feimu rupan mu huesaque dungu mu, feipilayaiñ Jehová taiñ lladcütunieteu. Doi mai raquiduamaiñ taiñ pengelelafiel ta Jehová taiñ piuqueyefiel ca taiñ maneluucülen quisu mu (papeltunge Santiago 1:12). Rupaliyiñ huesaque dungu mu, inaduamaiñ chumngechi Jehová taiñ piuqueyenquechi quelluqueteu.

12. Dimitri tañi upan, ¿chem quimeleleiñmu?

¹² Peaiñ ñi rupan quiñe peñi Dimitri pingelu Asia mapu mu. Fentren cüyen rupai tañi niehuenon cüdau. Fei eluhui tañi doi amuldungual, femngechi ñi pengelelafiel ta Jehová ñi maneluucülen quisu mu. Huelu doi alün cüyen rupalu, pelai quiñe cüdau no rume. Rupachi antü mu cutrani, fei huitrahuelai tañi ngütantu mu. Fente tañi rupamequen huesaque dungu mu, huesa fütangelu ca huesa chaungelu troquihui, feimu ayühuelhuelafiñ ta Jehová pilefui ñi raquiduam.  Huelu quiñe antü, tañi pichi ñahue huirintucui quiñe papel mu Isaías 30:15, feipilu: “Tüngcülelmün ca maneluucülelmün ta iñche meu, nehuentuleaimün”. Yelelfi, fei feipifi: “Chau, hueñancülelmi, papeltuafimi”. Femngechi Dimitri inaduami Jehová tañi duam mu tañi pu che cüme felei, niei iyael ca tacun. Quisu feipi: “Mülefui tañi tüngcüleal ca maneluucüleal müten tañi Chau Jehová mu”. Femngechi rupamequelmi, Jehová ca quelluaimu ca eluaimu nehuen.

13. ¿Chumngechi pengelabeiñmu Jehová tañi ayüucülen iñchiñ mu?

¹³ Taiñ quellueteu pu peñi ca lamngen. Feichi doi duamnielu quellu iñchiñ, Jehová adnieafui pu peñi ca lamngen taiñ yafültucuaeteu. Femngechi dungu rupai quiñe lamngen Asia mu mülelu. Quisu niehuelai cüdau ca cutranrumei. Rupachi antü mu, tañi füta culpai, fei loncolehuetulai ti trahunche mu. Taiñ lamngen feipi: “Quimlafun chemu tañi rupamequen com feitachi huesaque dungu mu. Huesa femün chi pilefun, feimu ayühuelhuenofilu ta Jehová troquihun”. Fei taiñ lamngen llellipufi ta Jehová, pengelelen tami piuqueyeniefiel pifi. Jehová huiñoldungueyu tañi llellipun. ¿Chumngechi femi? Quisu feipi: “Tati pu loncolelu nütramcaeneu, feipieneu Jehová tañi piuqueyenieteu”. Ca rupachi antü mu, ca feipifi ta Jehová tañi quelluaeteu. Taiñ lamngen ca feipi: “Feichi antü mu müten, llohun quiñe carta tañi mandaleteu tañi pu lamngen. Papeltufilu iñche, ngüneduamün Jehová tañi allcütueteu”. Felei llemai, Jehová yafültucuqueiñmu taiñ pu peñi ca lamngen mu, femngechi pengeli tañi ayüucülen iñchiñ mu (Sal. 10:17).

14. Jehová, ¿ca chumi ñi pengelal tañi ayüucülen iñchiñ mu?

 ¹⁴ Duamnien mu iñchiñ ta ngülam, Jehová adcünuquefi pu peñi ca lamngen taiñ ngülamtuaeteu, femngechi ca pengelquei tañi ayüucülen iñchiñ mu. Cuifi mu, Jehová adcünufi tati apostol Pablo ñi huirilelafiel mari meli carta tati pu cristiano. Feichi carta mu, Pablo piuqueyenquechi norümtufi engün. ¿Chemu Jehová huercüfi ta Pablo ñi ngülamtuafiel? Jehová am piuqueyechequelu, feimu ngülamtuquefi tañi pu che quiñe cüme chau reque (Prov. 3:11, 12). Feimu quiñe peñi cam quiñe lamngen ngülamtueliyiñmu Biblia mu, Jehová lladcütuniepelaeneu pilayaiñ. Femngechi pengelelqueiñmu taiñ piuqueyenieteu (Heb. 12:6).

CAQUELU DUNGU TAIÑ QUIMAL JEHOVÁ AYÜUCÜLI IÑCHIÑ MU

15. Jehová, ¿iñi engün elubi tañi nehuen, ca chem cüme quimniiñ?

¹⁵ Jehová eluquefi tañi nehuen com ti pu che tañi ayühuelqueteu (Mat. 12:18). Ramtuhuaiñ: “Tañi chumngechi chengen, ¿pengelquepen mai tañi nien Jehová tañi nehuen? Tañi quimfiel mu ta Jehová, ¿doi ñochi duam chengetun ca doi niequetun ta paciencia?”. Doi cüme chengerpuliyiñ taiñ nien mu Jehová tañi nehuen, doi quimfalcüleai Jehová tañi ayüucülen iñchiñ mu (inaduamnge ti huichulechi dungu “‘ Chau Ngünechen ñi nehuen adniefilu ta che’, ¿chumngechi chengei?”).

16. 1 Tesalonicenses 2:4 ñi eipin, Jehová, ¿iñi engün elbalcünobi amuldungol? Tüba, ¿chum duamelqueiñmu?

¹⁶ Jehová elfalcünufi pu che tañi ayühuelqueteu ñi amuldungual ti cümeque dungu (papeltunge 1 Tesalonicenses 2:4). Peafiyiñ ñi rupan quiñe lamngen Jocelyn pingelu. Quiñe antü huitralu pulihuen, ngañhuadcülefui. Quisu feipi: “Yafüngehuelafun ca falinolu troquiufun. Huelu iñche precursorangen, mülefui tañi amuldungual feichi antü. Llellipufiñ ta Jehová, fei tripan”. Amuldunguyaulu, nütramcafi quiñe domo Mary pingelu. Ti domo rume cüme allcütueyu, fei eluhui tañi quimeltulelngeal ta Biblia. Quiñeque cüyen rupalu, Mary feipifi ta Jocelyn: “Feichi antü rumelu tañi ruca mu, iñche llellipumequefuiñ ta Chau Dios tañi quelluaeteu”. ¿Chem raquiduameleyu tüfachi dungu ta Jocelyn?  Quisu feipi: “Feipieneu reque ta Jehová iñche tañi ayühuelfiel”. Rüfcünu mai, com che allcütulayaiñmu amuldunguyahun mu. Huelu eluucüleliyiñ taiñ amuldungulelafiel pu che, rume ayühuelafiyiñ ta Jehová.

17. Vicky ñi eipin, ¿chem quimeleleiñmu montuluhun mu? (Salmo 5:12).

¹⁷ Jesús tañi lan mu, Jehová perdonaquefi feichi che tañi ayühuelqueteu (1 Tim. 2:5, 6). Huelu quiñeque peñi, lamngen feyentulefui rume Jesús tañi lan mu ca fautizaucülefui rume, ayühuelquenofilu ta Jehová troquiuqueingün. Femngechi dungu mu rupaliyiñ, ¿chem quelluafeiñmu? Iñchiñ taiñ pu chengen maneluulayafuiñ taiñ chem pieteu taiñ piuque, huelu maneluhuafuiñ llemai Jehová mu müten. Jehová nor che troquiquefi pu feyentulu Jesús tañi lan mu, ca cümelcaquefi (papeltunge Salmo 5:12; Rom. 3:26). Quiñe lamngen Vicky pingelu rume quellueyu raquiduamlu Jesús tañi lan mu. Quisu feipi: “Fentreñma mu Chau Jehová cutranpiuqueyeneu. [...] Iñche feipiquefun reque ta Chau Dios: ‘Eimi piuqueyelayafen, tami Fotüm ñi lan puulayafui tañi rulpacünungeal iñche tañi culpan’”. Huelu feitachi lamngen raquiduamlu Jesús tañi lan mu, inaduami Jehová tañi piuqueyenieteu. Ca femngechi iñchiñ raquiduamliyiñ Jesús tañi lan mu, fei inaduamaiñ Jehová taiñ piuqueyenieteu ca ñi ayüucülen iñchiñ mu.

18. Amulele taiñ piuqueyebel Chau Dio, ¿chem tuculpaaiñ?

¹⁸ Cüme inafiliyiñ rume taiñ peel tüfachi troquiñ mu, quiñeque mu huesa duamafuiñ, fei ¿ayühuelquepefiñ mai ta Jehová? piafuiñ. Femngechi dungu mu rupalmi, loncontucuaimi Chau Jehová fürenequefi “tañi piuqueyenieteu” (Sant. 1:12). Feimu doi fülconaimi Jehová mu ca ngüneduamnienge chumngechi pengelelqueimu Jehová tañi ayüucülen eimi mu. Ngoimanentulayaimi, “Chau Dios camapulelai caque quiñeque iñchiñ meu” (Hech. 17:27).