1. Jehová, ¿chem mangelqueiñmu taiñ bemal? (Pebinge pu adentun).

 ¿INEI am llellipuafuiñ taiñ yafültucuaeteu ca taiñ cüme ngülamtuaeteu? Jehová llemai. Jehová ayüquei taiñ rumel llellipunieafiel. Feimu Biblia feipiquei: “Llellipulequeaimün” (1 Tes. 5:17). Llellipunieafiyiñ müten ta Jehová taiñ cüme adnieaeteu taiñ cüme femal (Prov. 3:5, 6). Tunten rupa mu rume llellipufiliyiñ ta Jehová, fei allcütunieaiñmu.

2. ¿Chem peaiñ tübachi quimelün mu?

² Jehová eluñmaqueiñmu taiñ llellipuafiel, feimu rume mañumniefiyiñ. Quiñeque mu fentren duam nieiñ taiñ femal, feimu cüdautuafuiñ taiñ llellipuafiel ta Jehová. Cafei mülefui chi taiñ doi cümelcayal taiñ llellipun. Fei, ¿chem quelluafeiñmu? Biblia llemai. Tüfachi troquiñ mu ngüneduamafiyiñ ñi femün ta Jesús, femngechi taiñ elcünual tiempo taiñ llellipuafiel Jehová. Ca peafiyiñ quechu dungu mu taiñ llellipuafiel Jehová, femngechi ñi doi cüme tripayal taiñ llellipun.

3. Jesús, ¿chem quimni cuibi mu?

³ Jehová rume falintuquei taiñ llellipun. Jesús cüme quimniefui tüfa, ¿chumngelu am? Petu ñi cüpanon mapu mu, Jesús quimniequefui Jehová chumngechi ñi allcütuñmaquefiel ñi llellipun tañi pu poyequeteu. ¿Inei engün am? Ana, David, Elías ca caquelu che (1 Sam. 1:10, 11, 20; 1 Rey. 19:4-6; Sal. 32:5). Feimu mülepalu mapu mu, Jesús quimeltufi tañi pu discipulo ñi llellipunieafiel ta Jehová (Mat. 7:7-11).

4. Jesús, ¿chem cüme inayentun elueiñmu?

 ⁴ Jesús rumel llellipuquefui tañi Chau, feimu inayentufali. Jesús rume duamngemequelu rume ca rume fentren che ñi hualloñmanieteu, huelu elquefui antü tañi llellipuafiel ta Jehová (Mar. 6:31, 45, 46). Jesús epe huntu huitraquefui tañi nütramcayafiel tañi Chau (Mar. 1:35). Quiñe rupa Jesús com pun llellipufi tañi Chau ñi dulliafiel tañi pu apostol, fütra falin dungu am ta tüfa (Luc. 6:12, 13). Cafei feichi pun petu ñi lanon, Jesús fentren rupa llellipufi ta Jehová quimnielu am ñi rupayal cüdaungechi dungu mu (Mat. 26:39, 42, 44).

5. ¿Chumngechi inayentuabiiñ Jesús?

⁵ ¿Chem quimeltueiñmu ñi femün ta Jesús? Fentren duamngemequeliyiñ rume, huelu mülei taiñ elcünual tiempo taiñ llellipuafiel Jehová. Por ejemplo, doi pulihuentu huitrayafuiñ taiñ llellipuafiel Jehová. Cafei alü punle rume, ca llellipuafuiñ taiñ huenu Chau. Femngechi entuliyiñ tiempo taiñ llellipual, pengelaiñ taiñ falintuquefiel ti llellipun. Peafiyiñ ñi rupan quiñe lamngen Lynne pingelu. Taiñ lamngen rume mañumcülei tañi llellipuquefiel Jehová. Quisu feipi: “Adümfilu iñche tañi nütramcayafiel Jehová chumül rume, fei cüme hueni troquifiñ ta Jehová ca eluhun tañi doi cüme llellipuafiel”. ¿Eimi cai? ¿Ca femngechi raquiduamqueimi chi? ¿Chumngechi am doi cüme llellipuafuiñ Jehová? Taiñ quimal peaiñ quechu dungu taiñ nütramcayafiel ta Jehová.

6. Apocalipsis 4:10, 11 tañi eipin, ¿chem dungu llohuai Jehová müten?

⁶ Püramyeafiyiñ ta Jehová. Ti apostol Juan quiñe vision mu pengelelngei 24 loncolelu püramyemequefingün Jehová huenu meu. Fei engün feipifingün Jehová: ‘Eimi mülei tami püramyengeal ca yamniengeal’ (papeltunge Apocalipsis 4:10, 11). Pu cümeque püllü ca püramyequefingün ta Jehová. ¿Chumngelu am femqueingün? Mülelu engün am huenu meu Chau Jehová engün, feimu  cüme quimniefingün. Cafei quimfilu engün am ñi chumquen ta Jehová, feimu quimfingün ñi chumngechi chengen. Feimu ayühunquechi püramyequefingün (Job 38:4-7).

7. Taiñ ngillatun mu, ¿chumngechi huenupüramquebiiñ Jehová?

⁷ Iñchiñ ca mülei taiñ püramyeafiel Jehová llellipun mu. ¿Chumngechi femafuiñ? Feipiafiyiñ chem mu taiñ afmatuquefiel ca taiñ piuqueyefiel. Chillcatuyüm Biblia, raquiduamaiñ chem dungu mu afmatulqueiñmu Jehová mu (Job 37:23; Rom. 11:33). Raquiduamliyiñ tüfa, fei ¿ayüupelayai taiñ piuque? Feimu feipiafiyiñ Jehová llellipun mu. Ca püramyeafuiñ Jehová taiñ quelluqueteu mu iñchiñ ca com taiñ pu peñi ca pu lamngen. Jehová rume duamtunieiñmu iñchiñ, feimu quelluqueiñmu (1 Sam. 1:27; 2:1, 2).

8. ¿Chem dungu mu mañumabiiñ Jehová? (1 Tesalonicenses 5:18).

⁸ Mañumafiyiñ ta Jehová (papeltunge 1 Tesalonicenses 5:18). Llellipun mu mañumafuiñ Jehová com cümeque dungu taiñ eluqueteu, Jehová mu am cüpalu com cümeque dungu (Sant. 1:17). Mañumafuiñ ta Jehová com tañi deumael mu. Cafei taiñ elueteu mu mongen, taiñ familia, cümeque hueni ca ti maneluhun. Ca mañumafuiñ Jehová taiñ hueniyeteu.

9. ¿Chemu cüdaungi mañumchengeal?

⁹ Quiñeque mu cüdautuafuiñ taiñ mañumafiel Jehová llellipun mu. ¿Chumngelu am? Famülque mu pu che mañumquelai. Raquiduamqueingün quisu engün tañi ayüqueel müten, huelu mañumquelaingün. Feimu mülei taiñ cuñiutucuhual. Taiñ llellipun mu re pedilayafiyiñ müten ta Jehová taiñ eluaeteu cümeque dungu, huelu ca mülei taiñ mañumafiel com taiñ eluqueteu (Luc. 6:45).

10. Quiñe lamngen, ¿chem quellueyu (incaeyu) tañi mañumchengeal? (Pebinge adentun).

¹⁰ Mañumfengeliyiñ, chaftuafiyiñ rupaliyiñ huesaque dungu. La Atalaya 15 conchi enero 2015 tripantu mu, nütramcai ñi rupan quiñe lamngen Kyung-sook pingelu. Taiñ lamngen contueyu cancer cutran tañi ponon meu. Taiñ lamngen feipi: “Quimelngelu iñche ñi nien cancer, rume huesa duamün, fei rume llican”. Huelu taiñ lamngen nehuentuhui. ¿Chem quellueyu? Fill pun llellipuquefui Jehová petu ñi cudunon. Fei mañumniefi Jehová quechu dungu mu ñi rupan quiñe antü meu. Tañi femün taiñ lamngen, tüngnacümqueyu ca eluhui ñi pengelelafiel ta Jehová ñi piuqueyeniefiel. Taiñ lamngen quimtucui Jehová chumngechi quelluquefi tañi pu che rupalu engün  huesaque dungu mu. Ca ngüneduami taiñ mongen mu doi mülei cümeque dungu huesaque dungu meu. Ca femngechi iñchiñ rupaliyiñ rume huesaque dungu mu, ca mañumafuiñ Jehová fentren dungu mu. Tüfa quelluaiñmu taiñ nehuencüleal ca tüngcüleal.

11. Jesús tañi pu inanequetu, ¿chemu duamningün ñi bütra piuquengeal?

¹¹ Llellipuafiyiñ Jehová taiñ eluaeteu nehuen, femngechi taiñ amuldungual. Jesús petu ñi amutunon huenu mu, feipifi tañi pu inanieteu: “Huldunguaimün iñche meu Jerusalén püle, com Judea, Samaria ca huall mapu püle” (Hech. 1:8; Luc. 24:46-48). Rupachi antü mu, pu loncolechi judio presuntucufingün Pedro ca Juan, yengeingu Sanedrín meu. Fentecünuaimu tamu amuldungun pingeingu ca aneltungeingu (Hech. 4:18, 21). Fei, ¿chumingu Pedro ca Juan?

12. Hechos 4:29, 31 tañi eipin, ¿chumingün pu inanequetu?.

¹² Aneltungelu engu, Pedro ca Juan feipifingu pu loncolechi religioso: “Chau Dios ñi adquiñ mu, ¿cümepei mai allcütuafiel ta eimün, huelu allcütunoafiel ta Chau Dios? Eimün ta huiñoldungumün. Huelu iñchiñ fentecünulayaiñ taiñ huldungual chem taiñ peel ca chem taiñ allcütuel” (Hech. 4:19, 20). Lifrecünungelu engu, Pedro ca Juan trahuluhuingün caquelu pu discipulo engün. Fei llellipufingün ta Jehová, femngechi tañi femal Jehová tañi ayüqueel. Feipingün: “Nehuen piuquecünuhuaiñ taiñ huldungual tami huercün dungu”. Jehová allcütueyu ñi llellipun engün (papeltunge Hechos 4:29, 31).

13. Jin-hyuk tañi bemün, ¿chem quimeleleiñmu?

¹³ Pu autoridad feipieliyiñmu taiñ amuldunguhuenoal, inayentuafuiñ ñi chumün pu discipulo cuifi mu, fei amuldunguleaiñ. Peaiñ ñi femün taiñ peñi Jin-hyuk. Taiñ peñi eluulai ñi coneltual ejercito mu, feimu presuntucungei. Fei carcel mu elfalcünulelngei ñi yelelafiel iyael ca fillque fillem pu quisulequechi presu, huelu ngelafui ñi nütramcayafiel engün Biblia mu no rume. Taiñ peñi llellipufi ta Jehová ñi llicanoal ca chumngechicünual ñi amuldungual (Hech. 5:29). Quisu feipi: “Jehová allcütuñmaeneu ñi llellipun, elueneu quimün ca nehuen tañi amuldungual. Fentren presu quimeltulelfiñ Biblia, quechu minuto mu müten dunguquefuiñ caque quiñeque presu. Pun meu huirintucuquefun carta, fei ca antü meu hulquefuiñ chi carta”. Iñchiñ ca maneluhuafuiñ Jehová taiñ quelluaeteu taiñ amuldunguleal. Feimu taiñ peñi reque, llellipuafiyiñ Jehová taiñ eluaeteu nehuen ca quimün.

14. ¿Chem quelluaimu tami huehuabel billque cüdaungechi dungu? (Salmo 37:3, 5).

¹⁴ Llellipuafiyiñ Jehová taiñ chaftuafiel huesaque dungu. Com iñchiñ rupaleiñ fill cutrancahun dungu mu. Quiñeque iñchiñ layeluuhuiyiñ, cutrancüleiñ, hueñancüleiñ cam inacangequeiñ. Ca com tüfa doyelcülei ñi rupan ti pandemia ca ñi mülen hueichan. Feimu nülalelfinge tami piuque ta Jehová. Quiñe hueni reque feipifinge ta Jehová chem tami raquiduamcülen, fei maneluhuaimi Jehová meu tami quelluaeteu (papeltunge Salmo 37:3, 5).

15. Upalu inchiñ cüdaungechi dungu, ¿chumngechi quelluqueiñmu ti ngillatun? (Eipinge quiñe inayentun).

 ¹⁵ Fentecünunoliyiñ taiñ llellipuafiel Jehová, quelluaiñmu taiñ chaftuafiel chem huesaque dungu rume (Rom. 12:12). Jehová quimniei chumngechi ñi rupalen tañi pu serfiqueteu ca allcütuñmaquefi tañi llellipuqueteu engün (Sal. 145:18, 19). Peaiñ ñi rupan quiñe precursora Kristie pingelu, 29 tripantu niei. Taiñ lamngen quiñeque huesaque cutran conturumeeyu. Fente ñi huesalcan, contueyu depresion cutran. Rupachi antü mu, tañi ñuque ca huesa cutrani. Feichi huesa cutran mu layai pingei. Taiñ lamngen Kristie feipi: “Rume llellipuquefiñ ta Jehová tañi eluaeteu nehuen, caque antü mu tañi yafülaeteu. Cüme adcünufiñ tañi antü tañi serfiafiel Jehová. Faltaquelafun trahun mu ca amul chillcatuquefun Biblia. Doi huesa rupalelu iñche, rume quellueneu tañi llellipufiel Jehová. Püraduamelquefeneu Jehová tañi fülmanieteu. Jehová allcütuñmaeneu ñi llellipun. Pürüm tremofemtulan, huelu elueneu ñi tüngcüleal ñi piuque” pi taiñ lamngen. Feimu loncontucuaiñ: “Chau Jehová quimniei chumngechi ñi montulafiel tati pu che ñi serfiqueteu com piuque mu” (2 Ped. 2:9).

16. Taiñ nehuenduamquebel hueyaque dungu, ¿chemu duamniiñ Jehová tañi quellun?

¹⁶ Llellipuafiyiñ ta Jehová taiñ connoal huesaque dungu meu. Culpafe chengelu am iñchiñ, cüdautuqueiñ taiñ famentuucüleal huesaque dungu meu. Fei Huecüfü ca ngüchaltucuniequeiñmu taiñ femal huesaque dungu. ¿Chumngechi huesa raquiduameleiñmu Huecüfü? Por ejemplo, ayüniefui taiñ adngelluhual podngechi dungu meu. Cuñiutucuunoliyiñ, contuafeiñmu huesaque  illun, femliyiñ culpayafuiñ Jehová mu (Mar. 7:21-23; Sant. 1:14, 15).

17. ¿Ca chem dungu bemaiñ taiñ huehuabel hueyaque dungu? (Pebinge pu adentun).

¹⁷ Quisuque nielaiñ nehuen taiñ famentuucüleal huesaque dungu meu. Duamnieiñ Jehová taiñ quelluaeteu. Jesús quimeltueiñmu taiñ feipiafiel Jehová llellipun meu: “Quellumuiñ ñi connoal huesaque dungu mu, doi mai montulmuiñ Huecüfü meu” (Mat. 6:13). Jehová ayüquei taiñ quelluaeteu, huelu iñchiñ mülei taiñ ngillatuafiel. Fei ca müten no, mülei taiñ famentuucüleal huesaque dungu meu. Papeltulayafiyiñ ca allcütulayafiyiñ Huecüfü ñi pengelqueelchi huesaque dungu (Sal. 97:10). ¿Chumafuiñ taiñ cuñiutucunieal taiñ piuque ca nieal cümeque raquiduam? Papeltual ta Biblia, amual trahun mu ca taiñ amuldungual. Femliyiñ tüfa, Jehová quelluaiñmu taiñ femconnoal huesaque dungu meu (1 Cor. 10:12, 13).

18. Com iñchiñ, ¿chumaiñ?

¹⁸ Famülque mu afaelchi antü meu, doi mülei taiñ llellipuafiel Jehová taiñ fülconcüleal quisu meu. Fill antü mülei taiñ llellipuafiel Jehová com piuque mu. Jehová ayüquei taiñ nülanentual reque taiñ piuque llellipufiliyiñ (Sal. 62:8). Püramyenieafiyiñ ca mañumnieafiyiñ com taiñ cümelcaqueteu. Llellipuafiyiñ taiñ eluaeteu nehuen, femngechi taiñ amuldungual ca taiñ quelluaeteu chaftual com huesa rupan ca taiñ connoal huesaque dungu mu. Chem no rume ca inei no rume catrütuquenoeliyiñmeu taiñ llellipuafiel Jehová. Jehová, ¿chumngechi llohuñmaqueiñmu taiñ llellipun? Cangelu troquiñ mu peafiyiñ.