1, 2. 1) Quiñe cristiano ayüle curehuen-ngeal, ¿chem hune raquiduamai? 2) Epu che ayüle ñi curehuen-ngeal, ¿chumquingu?

 ¿AYÜAFUIMI tami nieal quiñe afcadi? Nieliyiñ cam nienoliyiñ rume quiñe afcadi, ayüucüleafuiñ. Huelu quiñeque peñi, lamngen ayüquei tañi fütangeal cam curengeal. Fei ayülmi tami nieal quiñe afcadi, hune mülei tami cüme hueniyeafiel Jehová. Mülei tami cüme quimuhual ca pepicaucüleaimi eluafiel chem ñi duamtunien tami afcadi (1 Cor. 7:36). a Femngechi cüme pepicaucülelmi, nieafuimi quiñe ayühun-ngechi curehuen.

² Quiñeque mu cüdaungei peal quiñe cüme afcadi tami nieafiel (Prov. 31:10). Ca quiñeque mu ayüfilmi quiñe huentru cam domo, huelu cüdautuafuimi chi tami feipiafiel tami ayüfiel. b Tüfachi troquiñ mu, peaiñ quiñe huentru cam quiñe domo ayüle tañi nieal quiñe afcadi, ¿chumafui tañi cüme dullial femngechi tañi doi cüme quimuhual engu? Ca peaiñ ti trahunche chumngechi quelluafeyu feichi duamnielu ñi nieal quiñe afcadi.

 ¿CHUMABÜIMI TAMI PEAL QUIÑE CÜME CHE TAMI CUREHUEN-NGEAL?

3. Petu quintunolu quiñe che ñi curehuen-ngeal, ¿chumabüi quiñe cristiano?

³ Petu tami quintunofiel inei engu tami niehual, hune raquiduamnge: “¿Chem che ayüniefun tañi nieafiel?”. Femnolmi, rulpacünuafuimi chi quiñe cüme che tami nieafiel cam huesa dulliafuimi chi tami compañ. Rüfcünu, quintuaimi quiñe che testigongelu (1 Cor. 7:39). Huelu ¿feica müten piafuimi? Femlai. Mülei tami ramtuhual: “¿Chem raquiduamcülen tañi mongen mu? ¿Chumngechi che am ta quintumequen? ¿Rume pedimequen chi?”.

4. Quiñeque ayünelu curehuen-ngeal, ¿chem ngillatuquebingün Jehová?

⁴ Ayülmi tami fütangeal cam curengeal, ¿deu llellipufimi ta Jehová tami quelluaeteu? (Filip. 4:6). Jehová quintulquelaeimu inei tami nieafiel, huelu duamtunieimu, feimu ayülei tami quelluaeteu. Feimu llellipuqueafimi chem tami duamtunieel ca tami raquiduamcülen (Sal. 62:8). Feipifinge tami tüng chengeal ca quimchengeal (Sant. 1:5). Quiñe peñi petu curengenolu Estados Unidos mu mülelu, Juan pingei, c feipi: “Iñche llellipuquefiñ ta Jehová chumngechi chengeal quiñe lamngen tañi nieafiel ca quelluen tañi quimafiel quiñe lamngen pifiñ. Ca feipiquefiñ tañi pepicaucüleal cüme huentrungeal” pi taiñ peñi. Quiñe lamngen Sri Lanka mapu mülelu, Tania pingei, feipi: “Petu quintumequeli inei tañi fütayeafiel, iñche feipiquefiñ Jehová tañi quelluaeteu ñi püntütripanoal quisu meu, tañi cüme raquiduamnieal  ca tañi ayüucüleal” pi. Huelu rupamequele chi antü cai, fei petu pelaimi inei no rume, quisulelaimi. Chau Jehová feipicünueimu tami eluaeteu com tami duamnieel, tami piuqueyeaeteu ca quelluaimu tami ayüucüleal (Sal. 55:22).

5. Ñi peal caque che piuqueyebilu Jehová, ¿chem quelluayu pu petu quidulelu? (1 Corintios 15:58; pebinge tati adentun).

⁵ Biblia ngülamtuqueiñmu taiñ ‘rume cüdaucüleal Ñidol tañi dungu mu’ (papeltunge 1 Corintios 15:58). Inafilmi feitachi ngülam, trahuluumequeafuimi fentren pu peñi, pu lamngen engün. Nieaimi cümeque hueni ca quimafuimi caquelu cauchu cüdauconcülelu Jehová mu. Cafei tami ayühuelfiel Jehová, ayühun mongen nieaimi.

6. Pu quintumequelu curehuen-ngeal, ¿chem tuculpaai?

⁶ Cuñiutucuunge, doyümquilnge tami mongen mu tami quintual afcadi (Filip. 1:10). Quiñe cristiano quisulele cam niele afcadi, ca ayüucüleafui tañi hueniyefiel Jehová (Mat. 5:3). Cafei petu tami cauchulen, doi fentren cüdau femafuimi Jehová ñi troquiñche mu (1 Cor. 7:32, 33). Feimu ngünamcaquilnge tami tiempo, cüdahuelfinge müten ta Jehová. Quiñe lamngen Jessica pingelu, Estados Unidos mu mülei, fei fütangei epe nielu 40 tripantu, feipi: “Cüpa fütangefun, huelu petu tañi femnon, hunentucuniefiñ tañi amuldungual, tüfa ayühueleneu”.

ELANTÜCÜNONGE TAMI CÜME NGÜNEDUAMABEL TI CHE

7. ¿Chemu cümeabüi elantücünoal ñi cüme ngüneduamabel ti che? (Proverbios 13:16).

⁷ Pefilmi quiñe huentru cam quiñe domo ¿pürüm feipiafimi tami ayüfiel? Femlai. Biblia ngülamtueiñmu ti quimche pengelquei quimün tañi femquen mu (papeltunge Proverbios 13:16). Feimu petu tami feipinofiel tami ayüfiel, hune cümeafui tami inaduamafiel tañi chumngechi chengen. Quiñe peñi Albert pingelu, feipi: “Eimi ayürumeafuimi quiñe che, huelu ca femngechi ayühuetulayafuimi. Feimu eluucülenge tami cüme inaduamafiel ti che, pürümquechi piuqueyeyu pilayafimi”. Ca dungu, cüme inaduamfilmi ti che, fei quimürpuafuimi ñi cüme afcadingenoafel.

8. ¿Chumabüi quiñe che ñi ngüneduamal tañi ayünelchi che? (Ca pebinge ti adentun).

⁸ Ramtuhuafuimi chi: “¿Chumngechi am cüme ngüneduamafuiñ ti che tañi ayüfiel?”. Trahunche mu, cam trahuluucülelmi caquelu che eimün, inaduamafuimi tañi chumngechi chengen, tañi chumquen ca tunte tañi hueniyefiel ta Jehová. ¿Chumngechi chengei tañi pu hueni? ¿Chem dungu mu nütramcaquei? (Luc. 6:45). ¿Ayüquepei mai tañi poyeafiel Jehová eimi reque? Nütramcayafuimi pu loncolelu quisu tañi trahunche mu, cam caquelu quimque cristiano tami feipiaeteu chumngechi chengen (Prov. 20:18). Ramtuafuimi engün: “¿Chem piquei pu che ñi chumngechi chengen?” (Rut 2:11). Huelu ngüneduamfilmi ti che, cuñiutucuhuaimi tami huesa duamelnoafiel ca tami inayahulnoafiel.

9. Petu dungunobilmi tami ayünel quiñe che, ¿chem hune cüme quimneaimi?

⁹ Petu tami feipinofiel tami ayüfiel, ¿tunten mu ngüneduamnieafimi ti che?  Pürüm feipifilmi ayüeyu, quim raquiduamlai piafeimu (Prov. 29:20). Ti che ngüneduamle tami ayüeteu, huelu alüñmalmi tami feipiafiel, ¿chumngelu am feipilaeneu? Quimlai tañi chumal piafui (Ecl. 11:4). Petu tami feipinofiel quiñe che tami ayüfiel, tüfa tañi afcadingeai pilayaimi. Huelu ¿chem mülei tami quimtucual? Quimtucuaimi eimi tami cüme pepicaucülepen mai ca ti che ñi cüme afcadingerpuafel.

10. Ayüelmu quiñe che huelu eimi ayünobilmi, ¿chumabüimi?

¹⁰ Ngüneduamülmi quiñe che tami ayüeteu, fei ayülei tami doi cüme quimaeteu, ¿chumafuimi eimi? Ayünofilmi cai, quimfalngepe tami duamnofiel, cümelayafui tami raquiduamelafiel ti che tami ayüfiel (1 Cor. 10:24; Efes. 4:25).

11. Eipingeliiñ inaal quiñe huimtun huiriconlelu parrafo mu, ¿chem loncontucuaiñ?

¹¹ Quiñeque püle, pu chau cam caquelu che dullilquefi tañi familia inei engün tañi niehual. Ca quiñeque püle, ti familia cam pu hueni quelluntucuquei tañi quimuhual epu che, femngechi ayüufule engu, novioucüleafuingu. Feipingeliyiñ taiñ femal cheu taiñ mülemum, raquiduamaiñ chem ñi duamnieel ca tañi ayüqueel caque quiñeque engu. Deu nielelfiliyiñ quiñe ayün taiñ hueni, ¿chumaiñ? Eluhuaiñ taiñ cüme quimafiel ñi chumngen ca tañi hueniyefiel Jehová. Doi falintulayafiyiñ tunten plata ñi nieel, ti educacion tañi nieel, doi mai tañi cüme hueniyefiel ta Jehová. Inei no rume obligalayafiyiñ tañi niehual engu, doi mai quisu engu mülei tañi niehual cam tañi femnoal (Gál. 6:5).

CHUMNGECHI NOVIO CONAL

12. Ayülmi eipiabel quiñe che tamu novio conal, ¿chumabüimi?

¹² ¿Chumngechi feipiafuimi quiñe che tami doi quimafiel? d Caquelu che tami adquiñ mu cam telefono mu nütramcayafuimi, cüme quimfalcünulelafimi tami ayüfiel ca tami doi  cüme quimafiel (1 Cor. 14:9). Duamle tañi hune raquiduamal, elufinge tiempo (Prov. 15:28). Huelu pinole, cüme llohuafimi tami feipiaeteu.

13. “Ayüneyu” eipingelmi, ¿chumabüimi? (Colosenses 4:6).

¹³ ¿Chumafuimi quiñe che feipielmu tami ayüeteu? Feichi che cüdautufui chi tami feipiaeteu, feimu cüme lloudunguafimi (papeltunge Colosenses 4:6). Duamülmi tami hune raquiduamal, feipiafimi. Müte alüñmalayaimi tami lloudunguafiel (Prov. 13:12). Eimi ayünolmi tami miyahual feichi che engu, cüme quimfalcünulelafimi tami femnoal. Peafiyiñ ñi rupan quiñe peñi, Austria mapu mu mülei, Hans pingelu. Quiñe lamngen feipieyu tañi doi cüme quimuhual engu, huelu Hans pilai. Feipi: “Yamün mu feipifiñ tañi pinon. Pürüm feipifiñ, femngechi tañi raquiduamelnoafiel ñi ayüniefiel. Feichi mu, ca cuñiutucuuquen tañi chem piafiel ca tañi chumal”. Huelu eimi ca ayünielmi tami novioucüleal feichi che engu, feipiafimi. Ca nütramcahuaimu chumngechi yenieal tamu dungu. Com caquerumelu am pu che, feimu caquerumeafui tamu raquiduam tüfachi dungu mu.

¿CHUMNGECHI QUELLUABÜIÑ PU PETU QUIDULELU?

14. Taiñ quelluabel pu petu quidulelu, ¿chumabüiñ?

¹⁴ ¿Chumafuiñ ñi quelluafiel pu cauchulelu ayülu ñi nieal afcadi? Hunelu mu, cuñiutucuhuaiñ taiñ chem piafiel (Efes. 4:29). Ramtuhuafuiñ: “¿Ayetuquefiñ tati ayülu ñi curengeal? Pefiel mu quiñe peñi ca quiñe lamngen cauchulelu ñi nütramcamequen, ¿raquiduamfemquen tañi ayüniehun engu?” (1 Tim. 5:13). Feipilayafiyiñ eimi duamnieimi quiñe compañ pilayafiyiñ. Hans, taiñ nütramcapeel, feipi: “Quiñeque peñi feipiquei: ‘¿Chemu am curengelaimi? Müte huechelehuelaimi, quisulehueaimi’. Femngechi feipingele pu cauchulelu, falinolu ca dicümtucumequengelu troquihuafuingün”.  Feimu doi cümeafui taiñ yafültucuafiel pu cauchulelu (1 Tes. 5:11).

15. 1) Romanos 15:2 ñi eipin, ¿chem hune loncontucuaiñ taiñ quelluabel pu quidulelu? (Ca pebinge tati adentun). 2) ¿Chem quimelün entuabüimi tati video mu? (Pebinge tati quimal dungu).

¹⁵ Raquiduamliyiñ epu che tañi cüme curehuen-ngeafel, ¿chumafuiñ? Raquiduamüñmayafiyiñ ñi chum duamcülen engu, chumngechi feipilei Biblia (papeltunge Romanos 15:2). Quiñeque cauchulelu ayüquelai tañi quintuyahulelngeal afcadi, iñchiñ mülei taiñ yamafiel (2 Tes. 3:11). Quiñeque ayüquei tañi pichi quellungeal, huelu quelluafiyiñ feipieliyiñmu müten taiñ quelluafiel (Prov. 3:27). e Ca quiñeque ayüquei tañi quellungeal, huelu pilai tañi chalintuculelngeal quiñe che. Quiñe lamngen Lydia pingelu fütangenolu, Alemania mu mülelu, feipi: “Mangelafuimi ti epu che ñi cüme rupayal caquelu lamngen engün, femngechi quimuhuafuingu”.

16. Pu petu quidulelu, ¿chem tuculpaai?

¹⁶ Nieliyiñ rume afcadi cam quisuleliyiñ rume, com iñchiñ ayüucüleafuiñ (Sal. 128:1). Ayülmi tami nieal afcadi huelu petu penolmi, cüdahuelniefinge müten ta Jehová. Quiñe lamngen Sin Yi pingelu, Macao mapu mu, feipi: “Ti hue mapu mu rumel müleafuimi tami afcadi eimu, feimu feula pichiñmayai tami quisulen. Feimu ayüucüleaimi tami cauchulen”. Huelu deu pelmi quiñe che, fei novioucülelmu, ¿chem quelluafeimu ñi cüme tripayal tamu dungu? Ca troquiñ mu peafiyiñ.