1. ¿Chem eipi quiñe huerquen püllü, ca chumabüiñ?

 DUNGURUMEELMU quiñe cüme püllü, ¿eimi allcütuafuimi? Famülque mu quiñe cüme püllü dungumequefi “com troquiñche mu cüpalu, caque tuhun nielu, itrofill quehun dunguquelu, caque rume mollfüñ nielu”. Ca feipi: ‘Rume yamniefimün ca saquiafimün Chau Ngünechen. Püramyefimün tati deumalu ti huenu, ti mapu, ti lafquen ca tati hufco’ (Apoc. 14:6, 7). Com iñchiñ püramyeafiyiñ ta Jehová, quisu müten tati rüfngechi Dios. Ca ayüucüleiñ taiñ püramyeafiel quisu ñi adcünuelchi ruca mu.

2. ¿Chem am Jehová tañi templo espiritual? (Ca inaduamnge ti hudamngechi dungu “ Jehová ñi adcünuelchi ruca, ¿chem adentulelai?”).

² Taiñ poyeafiel Jehová coneltuleiñ reque Jehová ñi adcünuelchi ruca mu. Tüfa rüf ruca no, feimu ¿chem am tüfa? Com ñi adcünuel Jehová ñi poyengeal fachantü Jesús ñi lan ñi duam mu. Pablo doi nütramcai tüfa mu huirintuculelfilu pu cristiano Judea mapu mu. b

3, 4. Pablo bill raquiduami pu hebreo cristiano mu, ¿chemu?, ¿chumngechi quellubi (incabi)?

³ Pablo, ¿chumngelu huirintuculelfi pu cristiano Judea mu mülelu? Epu dungu mu peno. Hunelu mu, tañi yafültucuafiel. Petu tañi cristianongenon engün, quisu engün coneltuquefuingün pu judio ñi religion mu. Cristianongerpulu engün, tañi pu lonco ñi niequefel ¿ayentupelaeyu engün? ¿Chemu? Pu cristiano niequelafui quiñe ngillatuhue ruca cheu ñi poyengeal ta Jehová. Niequelafuingün quiñe altar, femngechi chalintucual culliñ engün,  sacerdote no rume niequelafuingün. Femngechi dungu rupalu, feitachi pu cristiano ¿huesa duampelafuingün? Müte maneluucülehuelafuingün chi Jehová mu (Heb. 2:1; 3:12, 14). Quiñeque ayüfuingün chi ñi huiñotual tañi cuifi religion.

⁴ Pablo, ¿ca chem dungu mu huirintuculelfi pu cristiano Judea mu? Pablo feipi quisu engün eluucülelai ñi quintuafiel doi falinque quimeltun Biblia meu “fütaqueche ñi iyael” reque felelu (Heb. 5:11-14). Quiñeque engün petu inaquefui Moisés ñi ley. Pablo feipieyu engün feiti chalintucun ñi feipin ti ley liftuñmangelayafui pu che ñi culpan, feimu mülefui ñi inahuenoafiel engün ti ley. Feimu Pablo quimelelfi doi falinque quimeltun Biblia mu. Feipifi Jesús ñi lan mu “doi cüme maneluhun” nieafuingün, femngechi doi fülconafuingün Jehová mu (Heb. 7:18, 19).

5. ¿Chem adümabüiñ, ca chemu?

⁵ Pablo feipifi pu cristiano chumngechi ñi poyequefiel Jehová feichi mu doicülei tañi femquefel cuifi mu pu judio. Chumngechi ñi poyequefiel Jehová pu judio cuifi mu ‘adentulefui tati felelu ñi cüpayal, huelu feichi dungu rüf femtripayai Cristo meu’ (Col. 2:17). ¿Chumngelu am feipi Pablo? Pu judio inaquefuingün ti ley ñi poyeafiel Jehová ca ñi perdonangeal tañi culpan. Huelu hunen siglo mu, Jehová doi cüme adcünui chumngechi tañi poyengeal. Feimu mülei taiñ quimtucual chumi Jehová taiñ perdonañmangeal taiñ culpan, femngechi taiñ cüme poyeafiel. Feula trürümafiyiñ pu judio chumngechi poyequefuingün Jehová cuifi ca chem adentulei famülque mu. Peafiyiñ ñi feipin Hebreos, femngechi quimafuiñ chumngechi adcünui Jehová ñi poyengeal.

6. ¿Chumal deumangi tati tabernaculo?

⁶ Pu judio chumngechi poyequefuingün Jehová cuifi. Pablo nütramcai tati ngillatuhue tolto ruca Moisés ñi elcünuel 1512 tripantu petu ñi mülepanon Jesús (pefinge ti huifcülechi dungu “Pu judio chumngechi poyequefuingün Jehová cuifi, ¿chem adentulefui?”). Cuifi mu, pu Israel che trahuquefuingün ti ngillatuhue tolto ruca mu, femngechi tañi poyeafiel Jehová ca chalintuculelafiel culliñ (Éx. 29:43-46). Feitachi ngillatuhue tolto ruca pu Israel che miyahulquefuingün cheu rume tañi amun engün huellin mapu mu (Éx. 25:8, 9; Núm. 9:22). Huelu feitachi ngillatuhue tolto ruca, ¿chem adentulefui pu cristiano mu? Peafiyiñ.

7. ¿Chümül elelngi tati templo espiritual?

 ⁷ ¿Chem adentulefui? Ti ngillatuhue tolto ruca ñi elcünuel Moisés adentulei Jehová ñi adcünuelchi ruca. ¿Chumngelu feipiafuiñ tüfa? Pablo feipi feitachi ngillatuhue tolto ruca “adentulei ca pengelquei huenu mu müleyechi dungu”. Ca “adentulei fantepu müleyechi dungu” (Heb. 8:5; 9:9). Feimu Pablo huirintuculu tüfa, deu amulcünungei Jehová ñi adcünuelchi ruca. ¿Chumül elcünungei? Feichi 29 tripantu fautizaulu Jesús. ¿Chumngelu feipiyiñ? Feichi mu Jesús dullingei Chau Dios ñi nehuen mu ca ‘hunen lonco sacerdotengerpui’ Jehová ñi adcünuelchi ruca mu (Heb. 4:14; Hech. 10:37, 38). c

8, 9. Hebreos 7:23-27 tañi eipin, Jesús tati Sacerdote doicülelu, ¿chemu trürlai pu cuibique sacerdote mu?

⁸ Pu judio chumngechi poyequefuingün Jehová cuifi. Ti hunen lonco sacerdote dunguñpequefui ti pu che Jehová ñi adquiñ mu. Feichi elcünungelu ti ngillatuhue tolto ruca, dullingei ta Aarón ñi hunen lonco sacerdotengeal, tüfa tati hunelu. Huelu Pablo feipi: “Lalu pu sacerdote fentecünui tañi cüdau engün, feimu fentren sacerdote hueluconingün tañi cüdau mu” (papeltunge Hebreos 7:23-27). d Pu sacerdote culpan chengefuingün, feimu hune mülefui ñi hulal chalintucun quisu tañi culpan mu. Huelu Jesús doicülei tañi hunen lonco sacerdotengen, ¿chumngelu feipiafuiñ tüfa? Peafiyiñ.

⁹ ¿Chem adentulefui? Jesús tañi hunen lonco sacerdotengen ‘serfiquei ti rüfngechi tolto ruca Chau Jehová ñi deumael. Che ta deumalafi’ (Heb. 8:1, 2). Pablo feipi: “Jesús afquelai ñi mongen, feimu inei no rume hueluconquelai tañi sacerdotengen mu”. Cafei “lif chengei, püntütripalei pu culpafe che meu”. Ca “duamfal-lai ñi fill antü hulal chalintucun” chumngechi ñi femquefel pu sacerdote cuifi mu. Feula ngüneduamaiñ tati altar ca tati chalintucun ñi hulngequefel Israel mu.

10. Tati pu hulngequelu altar mu, ¿chem pengelquebüi?

¹⁰ Pu judio chumngechi poyequefuingün Jehová cuifi. Huecuntu ti ngillatuhue tolto ruca mülefui quiñe altar cobrengelu. Tüfa mu chalintuculelngequefui culliñ ta Jehová (Éx. 27:1, 2; 40:29). Huelu feichi culliñ chalintucungelu com liftuñmalayafui tati pu che ñi culpan (Heb. 10:1-4). Feichi chalintucun rumel hulngequelu adentulefui quiñe doi falichi chalintucun, fei tüfa com liftuñmayafi tati pu che ñi culpan.

11. Jesús, ¿chem altar mu huli ñi mongen? (Hebreos 10:5-7, 10).

¹¹ ¿Chem adentulei? Jehová huercüi tañi fotüm ñi hulal tañi mongen com pu che ñi duam mu. Jesús quimniefui tüfachi dungu (Mat. 20:28). Feimu fautizaulu Jesús, chalintucuhui reque Chau Jehová ñi adquiñ mu, femngechi ñi femal tañi ayüqueel (Juan 6:38; Gál. 1:4). Quiñe altar mu reque chalintucuhui Jesús. Pu huentru deumalafi tüfachi altar. ¿Chem adentulefui tüfachi altar? Chau Dios tañi ayünieel. Fei, ¿chem ayüniefui Jehová?  Ayüniefui ta Jesús ñi hultucual ñi mongen. Feimu Jesús chalintucui tañi mongen “quiñe rupa müten”, femngechi com liftuñmayafiel tañi culpan com pu che ñi feyentueteu (papeltunge Hebreos 10:5-7, 10). Ngüneduamaiñ tati mülelu ponhui ti ngillatuhue tolto ruca mu.

12. ¿Iñi am pepi conquebüi caque mülehue tabernaculo mu?

¹² Pu judio chumngechi poyequefuingün Jehová cuifi. Caquelu ngillatuhue ruca deumangelu Jerusalén huaria mu ponhui trürcülefui ñi femngen ti ngillatuhue tolto ruca meu. Ponhui mülefui epu pieza. Quiñe, “Yamfal Mülehue” pingefui. Cangelu, “Doi Yamfal Mülehue”. Quiñe cortina püntülefui feichi epu mülehue (Heb. 9:2-5; Éx. 26:31-33). ¿Chem mülefui Yamfal Mülehue mu? Mülefui quiñe candelabro oro deumangelu, quiñe altar cheu lüpümngequen incienso ca tati mesa ti yamfal cofque engu. Pu dullingeelchi sacerdote müten conquefui tüfa mu ñi femal tañi cüdau (Núm. 3:3, 7, 10). ¿Chem mülefui tati Doi Yamfal Mülehue mu? Ti falin caja pengelquelu Chau Dios ñi eldungu re orongelu, fei adentulei ñi mülen Jehová tüfa mu (Éx. 25:21, 22). Ti hunen lonco sacerdote müten conquefui ti Doi Yamfal Mülehue mu quiñe rupa tripantu meu, feichi Antü ñi Liftungeal ti Culpan. Ti sacerdote yeniefui ti mollfüñ culliñ, fei cortina püle rupaquefui. Femngechi liftual quisu ñi culpan ca tati pu che ñi culpan (Lev. 16:2, 17). ¿Chem adentulefui ti  mülelu ngillatuhue tolto ruca mu? Chau Jehová cüme quimfalcünui tüfachi dungu, peaiñ (Heb. 9:6-8). e

13. ¿Chem pengeli tati lib mülehue ca tati yambal mülehue?

¹³ ¿Chem adentulei? 144.000 cristiano dullingei ñi sacerdotengeal Jesús engu. Fei engün müleai huenu meu, Chau Dios tañi saquin fotümngeai engün (Apoc. 1:6; 14:1). Ti Yamfal Mülehue mu adentucünungei pu dullinque cristiano Chau Dios ñi fotümyefiel engün petu mülelu mapu meu (Rom. 8:15-17). Tati Doi Yamfal Mülehue adentulei ta Chau Jehová ñi mülen huenu meu. ¿Chem adentulei ti cortina püntüniefilu ti epu mülehue? Tüfa ta Jesús ñi cuerpo mapu meu. Petu nielu tañi cuerpo mapu meu, elungelai ñi conpual huenu meu. Tañi hunen lonco sacerdotengerpual Jehová ñi adcünuelchi ruca mu, mülefui ñi elcünual tañi cuerpo. Jesús hulcünulu tañi cuerpo chalintucun reque, eluñmafi pu cristiano dullingelu ñi conpual huenu meu. Fei engün ca mülei ñi elcünual tañi cuerpo mapu mu, fei ñi conal huenu mu (Heb. 10:19, 20; 1 Cor. 15:50). Huiñomongetulu Jesús, conpui tati Doi Yamfal Mülehue Jehová tañi adcünuelchi ruca mu. Fei rupachi antü mu com pu dullinque cristiano mülepuai Jesús engu huenu mu.

14. Hebreos 9:12, 24-26 tañi eipin, Jehová tañi templo espiritual, ¿chemu doicüli?

¹⁴ Jehová adcünui chumngechi ñi poyengeal fachantü, feimu hulcünui tañi fotüm chalintucun reque. Cafei elcünufi ñi hunen lonco sacerdotengeal. Feimu llemai, tüfa ta doicülei chumngechi pu judio poyequefuingün ta Chau Dios. Cuifi, ti hunen lonco sacerdote conpui ti Doi Yamfal Mülehue pu huentru ñi deumael ca yeniequefui pu culliñ ñi mollfüñ. Huelu Jesús “huenu mu conpui” tati doi yamfal mülehue mu: tañi Chau ñi adquiñ mu. Femngechi chalintucui quisu tañi culpan-ngenochi mongen Jehová ñi adquiñ mu, femngechi “ñi apümcayafiel ti culpan dungu” (papeltunge Hebreos 9:12, 24-26). Jesús ñi chalintucun com liftuñmaquefi pu che ñi culpan. Feula ngüneduamaiñ com iñchiñ püramyeafuiñ ta Chau Jehová tañi adcünuelchi ruca mu: tuchi llohualu mongen huenu meu cam ti mapu meu.

15. ¿Iñi engün cüdauqui tabernaculo tañi patio mu?

¹⁵ Pu judio chumngechi poyequefuingün Jehová cuifi. Ti ngillatuhue tolto ruca mu mülefui quiñe patio lepün püle malaltuculelu. Tüfa mu pu sacerdote femquefui tañi falin cüdau. Patio mu mülefui quiñe fütra altar cobre deumangelu, tüfa mu lüpümngequefui chalintucun. Ca mülefui quiñe fütra lafatorio cobre deumangelu, tüfa mu pu sacerdote cüchacuhuquefui ca cüchanamunquefui fei ñi femal tañi cüdau (Éx. 30:17-20; 40:6-8). Rupachi antü mu, deumangei caquelu ngillatuhue ruca, huecuntu ngillatuhue ruca püle ngerquei quiñe fütra patio. Tüfa mu pu che sacerdotengenolu ca püramyeafui ta Chau Dios.

16. ¿Iñi engün cüdauqui caque quiñeque patio templo espiritual mu?

¹⁶ ¿Chem adentulefui? Pu dullingelu sacerdotengeaingün huenu meu Jesús engu, huelu petu mülelu mapu mu cüdauqueingün Jehová ñi adcünuelchi ruca  ñi lepün püle. Feichi lafatorio mülequefulu ngillatuhue ruca mu raquiduamelqueyu pu dullinque cristiano ñi lifcüleal tañi raquiduam ca tañi mongen, femngechi ñi cüme hueniyeafiel ta Chau Jehová. Com pu cristiano ca mülei ñi femal. Ti “fütra troquiñche” quelluquefilu pu dullingelu, ¿cheu püramyequefi ta Chau Dios? Serfiqueingün mapu meu Jehová ñi adcünuelchi ruca huecuntu patio püle. Juan feipi ti fütra troquiñche ‘huitralerquei engün itrotripa Chau Ngünechen ñi ülmen huancu meu. Antü ca pun meu serfiquefingün ta Chau Ngünechen tañi ruca mu’ (Apoc. 7:9, 13-15). Mañumquefiyiñ ta Chau Jehová taiñ elueteu ñi serfiafiel tañi ruca ñi adcünuel.

17. ¿Chem hulabüiñ Jehová?

¹⁷ Com pu cristiano hulafuiñ taiñ nehuen, taiñ tiempo ca taiñ falinque fillem taiñ serfiafiel ta Chau Jehová. Ti apostol Pablo feipifi tati pu hebreo che: ‘Rumel püramyenieafiyiñ ta Chau Ngünechen. Tüfa ta chalintucun reque felei taiñ eluafiel ta Chau Ngünechen, hun mu huldunguqueiñ tañi üi pu che ñi adquiñ meu’ (Heb. 13:15). Jehová elueiñmeu taiñ serfiafiel, ¿chumngechi mañumafuiñ? Com taiñ nehuen mu cüdahuelqueafiyiñ.

18. Hebreos 10:22-25 tañi eipin, ¿chem elcünolaabüiñ?, ¿chem ngoimalaabüiñ?

¹⁸ (Papeltunge Hebreos 10:22-25). Af meu, Pablo feipifi pu hebreo che ñi fentecünunoal ñi llellipuafiel ta Chau Jehová, amuldungucheal taiñ nieelchi maneluhun, trahuluhual ca hueluconque yafültucuhual “doyelchi mai püllelepalu cai Chau Dios ñi antü”. Ti cüme püllü taiñ nütramcael ellaca mu, ca epu rupa feipi: “¡Chau Ngünechen mai ta püramyefinge!” (Apoc. 19:10; 22:9). Rume falin-ngei taiñ femal tüfa. Feimu llemai, ti falin dungu taiñ quimürpuel Jehová ñi adcünuelchi ruca mu turpu ngoimaquelayaiñ. Rumel falintuqueafiyiñ ñi serfinieafiel taiñ Chau Jehová.