1. ¿Chumngechi ramtungeabüiñ colegio cam cüdau mu?

 ¿CHUM duamqueimi quiñe tami pu compañ cüdau, colegio mu ramtuelmu tami feyentun mu? ¿Llicalequeimi? Fentrenque iñchiñ llicaqueiñ. Femngechi ramtungeliyiñ, quimafuiñ chem ñi raquiduamquen ti che ca chem ñi feyentuquen, femngechi quelluafeiñmu taiñ amuldungulelafiel. Huelu quiñeque mu, quiñeque che ramtuafeiñmu taiñ notucadunguaeteu müten. Femqueingün allcütun mu coilaque dungu iñchiñ mu (Hech. 28:22). Cafei ‘epe puucülei ñi afal mapu müleyechi dungu’, feimu pu che ‘pilai ñi cümelcautual caquelu che engün’ ca ‘illcufengeingün’ (2 Tim. 3:1, 3).

2. ¿Chemu cümi taiñ ñom piuquengeal?

² Quiñe che ramtueliyiñmu taiñ feyentun mu re notucadungual müten, ¿chem quelluaiñmu taiñ tüngcüleal? Taiñ ñom piuquengeal. Quiñe che ñom piuquengelu illcufemquelai. Cafei quintucadungungen mu cam quimnole chem tañi huiñoldungual, quim ngüneuquei (Prov. 16:32). Cüdautuafuiñ chi taiñ ñom piuquengeal, fei ¿chem quelluaiñmu taiñ femngechi chengerpual? Quiñe che ramtueliyiñmu taiñ notucadunguaeteu müten, ¿chem quelluaiñmu taiñ ñom piuquengeal? Pu chau, ¿chumngechi quelluafui tañi pu yall ñi incayal tañi feyentuel ñom piuque mu? Tüfachi troquiñ mu peafiyiñ.

3. Pu ñom piuquengechi che, ¿chemu piabüiñ ñi nehuen-ngen?  (2 Timoteo 2:24, 25).

³ Pu ñom piuquengechi che nehuen-ngeingün, ¿chumngelu feipiafuiñ? Duamfali ñi nehuen-ngeal ñi ngünehual ca tüngcüleal rupan mu cüdaungechi dungu mu. Cafei duamnieiñ ñi nieal Jehová tañi nehuen taiñ ñom piuquengeal (Gál. 5:22, 23). Ti dungun “ñom piuque” griego quehun dungu mu, trürümngeafui deu ñomümngechi cahuell. Ñomümngele rume ti cahuell, nehuencülequei. Iñchiñ ñom piuquengeliyiñ rume, nehuencülequeiñ. Iñchiñ taiñ duam mu femngechi felelafuiñ, llellipuaiñ Jehová taiñ eluaeteu tañi nehuen taiñ ñom piuquengeal. Fentren testigo ñom piuquengerpui, iñchiñ ca femngechi femafuiñ. Fentrenque taiñ pu peñi, pu lamngen quintucaduamngelu rume, pengelingün tañi ñom piuquengen. Ñi femün engün, quellufingün caquelu che ñi cüme raquiduamal pu testigo mu (papeltunge 2 Timoteo 2:24, 25). Eimi, ¿chumngechi ñom piuquengeafuimi? Peafiyiñ.

4. Isaac ñi bemün, ¿chem quimeleiñmu?

⁴ Biblia pengelquei ñi rume falin-ngen pu che ñi ñom piuquengeal. Peaiñ ñi rupan Isaac. Mülen mu Guerar mapu mu, tati pu Filistea che ütrireyu tañi doi cüme felen mu. Feimu pu Filistea che apolfingün trufür mu tañi poso. ¿Chumi ta Isaac? Isaac quehualai, cañpüle amutui ca deumaputui ca rünganco (Gén. 26:12-18). Huelu pu Filistea che ca feipingün: “¡Iñchiñngei tüfachi co!”. Femngechi dungu rupafulu rume Isaac, tüngcülefui (Gén. 26:19-25). ¿Chem quellueyu tañi ñom piuquengeal? ¿Inayentupelai tañi chumngen tañi chau? Abrahán ayüquelafui tañi quehuatuyahual. Ca Sara ñochi duamngefui ca ñom piuquengefui (1 Ped. 3:4-6; Gén. 21:22-34).

5. Pu chau cam ñuque quimelabüingun tañi pu püchüqueche ñi doyümal tati ñom piuquengen, ¿chem pengeleimu tüba?

⁵ Pu chau, quimeltuafimün tamün pu yall ñi fente falin-ngen tañi ñom piuquengeal. Peafiyiñ ñi rupan quiñe hueche huentru 17 tripantu nielu. Tañi colegio mu ca amuldungun mu pequefui fentrenque che illcufemquelu. Huelu tañi chau ca ñuque quellueyu ñi ñom piuquengeal. Tati pu chau feipi: “Huesa feipingeliyiñ, illcufemafuiñ. Huelu nehuencülechi che doi ngüneuquei. Feitachi dungu quimürpui tayu fotüm”. Feimu ti hueche huentru quimürpui tañi ñom piuquengeal.

6. Ngillatubiliiñ Jehová, ¿chumngechi adcünoabeiñmu taiñ doi ñom piuquengeal?

⁶ Raquiduamnge tüfa mu. Quiñe che huesa dungule Jehová mu cam ayentuelmu ñi chem pin ta Biblia, ¿chem chumafuimi? ¿Chem quelluaimu tami ñom piquengeal? Feipiafimi ta Jehová tami eluaeteu tañi nehuen ca quimün. Huelu ngüneduamülmi tami cüme huiñoldungunon, ¿chumafuimi? Ca nütramcayafimi Jehová ca raquiduamnge chumngechi doi cüme huiñoldunguafuimi. Femülmi, Jehová eluaimu tañi nehuen tami doi ngünehual ca ñom piquengeal.

7. Caiñeltungele quiñe che, ¿chumngechi adcünoaiñmu ñi loncontucuneal quiñeque texto? (Proverbios 15:1, 18).

⁷ Quiñeque texto Biblia mu quelluaiñmu taiñ tüngcüleal rupan mu cüdaungechi dungu mu. Jehová tañi nehuen quelluaiñmu taiñ acordayafiel (Juan 14:26). Proverbios pingechi lifru mu, peafuiñ cümeque ngülam taiñ doi ñom piquengeal  (papeltunge Proverbios 15:1, 18). Ca pengelqueiñmu chumngelu falin-ngei taiñ tüngcüleal rupan mu cüdaungechi dungu mu (Prov. 10:19; 17:27; 21:23; 25:15).

8. Ramtucangeliiñ taiñ mupitun mu, ¿chem loncontucuneaiñ?

⁸ Quim ngüneduamliyiñ, quelluaiñmu taiñ ñom piuquengeal (Prov. 19:11). Quiñe che ramtueliyiñmu taiñ feyentun mu, loncontucuaiñ tüfa: iñchiñ quimlaiñ chumngelu am taiñ ramtucamequeteu. Feimu ngüneduamliyiñ chumngelu taiñ ramtucamequeteu, ngüneucüleaiñ taiñ lloudungufemnoafiel (Prov. 16:23).

9. ¿Chumi Gedeón caiñeltungepalu pu Efraín che?

⁹ Peafiyiñ ñi femün ta Gedeón. Gedeón amulu ñi hueichameafiel pu Madián che, feipifi quiñeque troquiñ Israel tañi compañaeteu, huelu feipilafi pu Efraín che ñi compañaeteu. Feimu pu Efraín che rume illcuingün. “¿Chumngelu feipimulaiñ?” pifingün ta Gedeón. Huelu, ¿chumngelu fente illcuingün? ¿Mallmaupelaingün? Huelu Gedeón eluhui ñi ngüneduamal chemu tañi illculen, feimu yamün mu huiñoldungufi engün. Femngechi dungufilu, “quisu engün tüngcülehueingün” (Juec. 8:1-3).

10. ¿Chumngechi ñom piuquengeaiñ ramtucangeliiñ taiñ mupitun mu? (1 Pedro 3:15).

¹⁰ Quiñe compañ cüdau cam colegio mu  ramtuafeiñmu chumngelu taiñ inaniefiel ñi feipin Biblia chem ñi cümen ca chem ñi cümenon. Iñchiñ huiñoldunguafuiñ, huelu ca yamnieafiyiñ chem ñi raquiduamquen caquelu che (papeltunge 1 Pedro 3:15). Femngechi ramtungeliyiñ, ¿re ayüpelai ñi notucadungual? pilayaiñ. Doi mai raquiduamaiñ chumngelu taiñ ramtueteu ti che ca chem ñi raquiduamelnieteu. Chem ramtungeliyiñ rume, cüme lloudunguaiñ. Femngechi femliyiñ, cacünutuafui chi ñi raquiduam ti che. Feimu llemai loncontucuaiñ: huesa pieliyiñmu rume ti che, rumel mülei taiñ cüme lloudunguafiel (Rom. 12:17).

11, 12. 1) Petu taiñ huiñoldungunon quiñe dungu, ¿chumabüiñ? (Ca inaduamge ti adentun). 2) Ramtucangeliiñ cumpleaños cam pu homosexual mu, ¿chumabüiñ?

¹¹ Raquiduamaiñ quiñe taiñ compañ cüdau mu ramtueliyiñmu chumngelu anta fiestaquelaiñ cumpleaño mu. ¿Chem raquiduamafuiñ petu taiñ huiñoldungunon? Raquiduamaiñ chumngelu taiñ ramtueteu. ¿Raquiduamafui chi taiñ religion eluquelaeiñmu taiñ cüme rupayal? Cam raquiduamafui chi taiñ celebraquenon cumpleaño, cüme yeucülehuelayafuiñ taiñ pu compañ iñchiñ. Feimu, ¿chumafuiñ? Mañumafuiñ taiñ raquiduamanieteu. Ca feipiafuiñ: “Iñche ca ayüquen com taiñ cüme yeucüleal”. Taiñ feipifiel mu feitachi che, cüme duamelafuiñ chi ca cüme nütramcayafuiñ ñi feipin Biblia cumpleaño mu.

¹² Ca femngechi femafuiñ ramtungeliyiñ ca dungu mu. Raquiduamnge tüfa, quiñe compañ colegio mu feipiafeimu: “Cümelai ñi raquiduamquen pu testigo pu homosexual mu”. ¿Chumngelu chi femngechi feipi? Cüme quimlafui chi ñi raquiduamquen pu testigo. Quiñe tañi pu hueni ca tañi familia chi homosexualngei, ¿feipiquepelaingün iñchiñ taiñ üdequefiel pu homosexual? Feimu cümeafui taiñ feipiafiel iñchiñ taiñ piuqueyefiel com pu che ca yamquefiyiñ (1 Ped. 2:17). b Feipifiliyiñ, tati che eluucüleafui taiñ allcütuaeteu, femngechi feipiafuiñ chumngechi quelluqueiñmu ñi feipin ta Biblia.

13. Quiñe che eipile “pu quimchengenolu müten mupituqui Chau Dio mu”, ¿chumngechi quimelelabüimi?

¹³ Quiñe che feyentunole taiñ feipifiel, iñche quimnien ñi raquiduamcülen pilayaiñ (Tito 3:2). Raquiduamnge tüfa, quiñe compañ colegio mu feipile: “Pu huedhuedcülelu müten feyentuquei Chau Dios mu”. ¿Pürüm feipiafuimi tañi fentren quimün evolucion mu ti che? Femlai, femngechi feipiafui chi tañi allcütuel mu müten. Feimu nütramcafiliyiñ evolucion mu, rüf quellulayafiyiñ. Fei mandalelafuiñ informacion jw.org mu ñi quimal Chau Dios ñi deumael. Fei pefile, eluhuafui taiñ nütramcayaeteu. Pengelfiliyiñ taiñ yamniefiel, doi eluhuafui ñi quimal Biblia ñi dungu mu.

14. Quiñe peñi, ¿chumngechi quimelelbi tañi compañ ñi cüme raquiduamal pu Testigo mu?

¹⁴ Peafiyiñ ñi femün quiñe hueche Niall pingelu. Quisu feipi: “Quiñe compañ colegio mu feipiquefeneu tañi testigongen mu feyentuquelan ciencia mu, re epeu müten feyentuqueimi piquefeneu”. Niall ayüquefui ñi feipiafiel tañi compañ chem ñi feyentuqueel, huelu tañi compañ allcütulaeyu. ¿Chumi ti hueche? Pengelelfi jw.org mu ti troquiñ “Ciencia dungu ca tati Biblia”. Rupachi antü mu,  Niall inaduami tañi compañ ñi papeltufiel ti pagina, fei nütramcahurpuingu chumngechi ñi huefpan ti mongen. Iñchiñ ca femngechi, Niall reque, nieafuiñ cümeque nütram caquelu che iñchiñ.

15. Pu chau cam ñuque, ¿chumngechi pepicahuaingün tañi pu püchüqueche ñi lloudungual ñom piuque mu?

¹⁵ Pu chau mülei ñi quelluafiel tañi pu yall chumngechi ñi incañpeafiel tañi feyentun ñom piuque mu (Sant. 3:13). Pu chau, papeltumequelmün tamün familia eimün, quelluafimün tamün pu yall ñi quimcantual ramtungerumele engün colegio mu. Ca quelluafuimün ñi adümcantual chumngechi tañi huiñoldungual. Ca quelluafimün ñi ñom piuque mu dungual, femngechi doi ayüafuingün ñi quimal tañi pu compañ (pefinge ti huichulechi dungu “ Adümcantuafimi tami familia eimün”).

16, 17. Pu huechequeche hune pepicaule, ¿chumngechi adümabeyu?

¹⁶ Pu familia trür pepicaule, tüfa quelluafui pu hueche hune quisu tañi doi feyentual ca ñi nütramcayafiel caquelu ñi feyentun mu. ¿Chem püneafui pu hueche tañi pepicahual? Jw.org mu huincadungun mu mülei ti troquiñ “Jóvenes” ca ti troquiñ “Ponlo por escrito” pingelu. Feita quelluquefi pu hueche tañi feipial quisu tañi adümuhun mu chem ñi feyentun. Pu familiahuen ca peafuingün ti troquiñ “Pu huechequeche ñi ramtuqueel”, feita quelluaeyu tañi incayafiel tañi feyentun ñom piuque mu, fei pu che eluhuafui ñi allcütual.

¹⁷ Peafiyiñ chem quellufi quiñe hueche Matthew pingelu. Feitachi hueche estudialu tañi familia engün, pepicauquefuingün. Quisu feipi: “Raquiduamquefuiñ  chem tañi ramtungeal colegio mu, quintuquefuiñ chumngechi tañi huiñoldungual ca adümcantuquefuiñ iñche tañi feipial. Cüme quimnien chumngelu tañi feyentuqueel, feimu tüngcülen ca ñom duam mu huiñoldunguafun”.

18. Colosenses 4:6 ñi eipin, ¿chem am doi balintuneabiiñ?

¹⁸ Quiñeque mu, cüme quimfalcünuliyiñ rume taiñ feyentun, pu che ca lloulayafui taiñ feipifiel. Huelu ñom piuquengeliyiñ taiñ dunguafiel, pu che eluhuafui taiñ allcütuaeteu (papeltunge Colosenses 4:6). Raquiduamnge tüfa mu. Epu che aucantumequele pelota mu nehuentu ütrüfelfile, nülayafui ti pelota. Huelu ñochi ütrüfelfile, fei amuleafui ñi aucantun. Ca femngechi ñochi duam mu nütramcafiliyiñ ti che, allcütuai ca amuleai ti nütram. Huelu ti che re ayüle taiñ notucadunguaeteu ca ayentuaeteu, fentecünuafuiñ taiñ nütramcan (Prov. 26:4). Huelu alün che femquelai tüfa, eluuquei taiñ allcütuaeteu.

19. ¿Chemu cümi taiñ ñom piuquengeal?

¹⁹ Ñom piuquengeliyiñ, feita rume quelluaiñmu. Llellipuafimi ta Jehová tami quelluaeteu, femngechi tami ñom piuquengeal quintucaduamngelmi cam rupalmi cüdaungechi dungu meu. Ñom piuquengelmi, ti che trürnole ñi raquiduam eimi meu, notucadungulayafimi. Respetahun meu huiñoldungulmi ti che ca ñom piuque mu, cacünutuafui chi ñi raquiduam pu testigo mu ca tati Biblia mu. Feimu rumel pepicaucülenge tami huiñoldungual “ñom piuque ca rume yamün meu” (1 Ped. 3:15). Rume cümei tami ñom piuquengeal.