QUIMELÜN ÑI PAPILTUNGEAL 36
ÜLCATUN 89 Allcütufilmi ta Chau Dios, cümelcangeaimi
“Bemaimün Chau Dio ñi dungun”
“Re allcütulaaimün müten Chau Dio ñi dungu, doi mai bemaimün” (SANT. 1:22).
¿CHEM QUIMAIÑ?
Tübachi quimelün quelluaiñmu taiñ papiltobel Chau Dio ñi dungu bill antü. Cabei quelluaiñmu taiñ cüme ngüneduamal ca bemal taiñ papiltupel.
1, 2. ¿Chemu ayüucüliiñ pu cüdahuelquebilu Jehová? (Santiago 1:22-25).
JEHOVÁ ca tañi saquin Fotüm ayüqueingu taiñ ayüucüleal. Tati Salmo 119:2 feipi: “Ayüucülequei tati cüme inafilu quisu tañi huercün dungu, tati pu quintuquefilu ta quisu com tañi piuque mu”. Jesús ca feipi: “Doi ayühun niei pu allcütulu Chau Dios ñi dungu ca inaniefilu” (Luc. 11:28).
2 Jehová ñi pu che fentrenque dungu mu ayüucülequeiñ. Doi mai taiñ papeltuquefiel mu ta Biblia fill antü ca taiñ inaniefiel taiñ quimürpuel (papeltunge Santiago 1:22-25).
3. Taiñ inaabel mu Chau Dio tañi dungun, ¿chumngechi cümelcangeaiñ?
3 ¿Chem dungu mu cümelcaqueiñmu inaniefiel Chau Dios ñi Dungu? Quiñe dungu: ayühulquefiyiñ ta Jehová, feimu ayüucülequeiñ (Ecl. 12:13). Cafei doi cüme yeucüleiñ taiñ pu familia iñchiñ ca doi cüme hueniyeuqueiñ pu peñi, pu lamngen trahunche mu. ¿Femngechi rupaqueimi ta eimi? Pu che inaquenofilu Jehová ñi feipin conquei fentren huesaque dungu mu, huelu iñchiñ femquelaiñ. Chumngechi feipi ti lonco ülmen David, pu inaniefilu Chau Dios ñi huercün dungu “nieai fentren cümelcan” (Sal. 19:7-11).
4. ¿Chemu cüdaungeabüi inaal Chau Dio tañi dungun?
4 Quiñeque mu cüdaungei llemai inanieafiel Chau Dios tañi Dungu. Fentren duam niefuliyiñ rume, mülei ñi elcünual tiempo taiñ papeltuafiel ta Biblia, femngechi quimaiñ chem ñi ayüqueel ta Jehová taiñ femal. Feimu tüfachi troquiñ mu ngüneduamaiñ chem quelluafeiñmu taiñ papeltuafiel Biblia fill antü, chem quelluaiñmu taiñ raquiduamal taiñ papeltuel mu ca chumngechi cüme inayafuiñ.
ELQUIANTÜIMI TAMI PAPILTUBEL CHAU DIO TAÑI DUNGUN
5. ¿Chem billque duam niiñ?
5 Epe com iñchiñ Jehová tañi pu chengen fentren cüdau nieiñ, fentren falinque dungu femqueiñ, cüdauqueiñ iñchiñ taiñ mongeluhuam ca taiñ pu familia (1 Tim. 5:8). Fentren peñi ca lamngen cuidaquefi tañi pu fütaqueche ca tati cutrancülelu. Ca com iñchiñ cuidauqueiñ taiñ tremoleal. Cafei trahunche mu ca nieiñ fentrenque cüdau. Ti doi falin cüdau taiñ nieel fei taiñ amuldungual. Fentren cüdau nielu iñchiñ, fei ramtuhuafuiñ: “¿Chumafun tañi nieal tiempo ñi papeltuafiel ta Biblia, raquiduamal tüfa mu ca inayafiel?”.
6. ¿Chumabüimi tami papiltobel Biblia bill antü? (Pebinge tati adentun).
6 Iñchiñ taiñ cristianongen rume falin-ngei taiñ papeltuafiel ta Biblia, feimu mülei taiñ femal (Filip. 1:10). Ti salmo feipi: “Ayüucülechi che ayühuelqueyu Jehová ñi ley dungu, antü ca pun meu papeltuquei ñi ley ñochi dungun mu” (Sal. 1:1, 2). Felei llemai elcünuaiñ tiempo taiñ papeltuafiel ta Biblia. ¿Chem hora femafuiñ? Caque quiñeque iñchiñ quintuafuiñ chem hora taiñ papeltuafiel ta Biblia. Cüme dulliaiñ chem hora taiñ papeltuafiel ta Biblia, femngechi fill antü taiñ papeltuafiel. Quiñe peñi Víctor pingelu feipi: “Pulihuen papeltuquefiñ ta Biblia. Nehue ayüquelan tañi müte pulihuen huitrayal. Huelu feichi hora mu doi tüngcülequen, cañpüle amuquelai tañi raquiduam ca doi cüme loncontucuquen tañi papeltuel”. Eimi Víctor reque femqueimi chi. Ramtuunge: “¿Chem hora doi cümeafui tañi papeltuafiel ta Biblia?”.
¿Chem hora doi cümefui eimi mu tami papeltunieafiel ta Biblia? (Inaduamnge parrafo 6).
NGÜNEDUAMNGE TAMI PAPILTUPEL
7, 8. ¿Chemu ngelai taiñ huente püle müten papiltunoal Biblia? Eipinge quiñe pengelün.
7 Papeltuqueimi chi quiñeque lifru, huelu ngoimanentuquefimi chem tami papeltuel. Ca femngechi femafuimi papeltulmi Biblia. Feimu mülei taiñ cuñiutucuhual. Feipiuqueiñ chi taiñ papeltuafiel mufüque capitulo antü mu. Cümei taiñ feipihual, eluhuaiñ taiñ femal (1 Cor. 9:26). Huelu ayüliyiñ taiñ cümelcayaeteu Chau Dios tañi Dungu re papeltulayafiyiñ müten, ¿ca chem mülei taiñ femal?
8 Raquiduamnge feitachi dungu mu: tati anümca duamniei ta co. Huelu rume mahunle, tati mapu apoafui co mu. Femngechi mahunle, cümelcalayafui tati anümca. Huelu pichique mahunle, doi cüme conafui co mapu mu, fei cüme tremafui tati anümca. Ca femngechi matumatu papeltulayafiyiñ ta Biblia, ñochiquechi femaiñ, femngechi conafui taiñ lonco mu ca inayafiyiñ taiñ mongen mu (Sant. 1:24).
Mahunün mu, confemquelai co mapu mu, ñochiquechi mai nagquei, femngechi tremai ta anümca. Ca femngechi ñochiquechi papeltuafiyiñ Biblia taiñ raquiduamal ca inayal ñi feipin. (Inaduamnge parrafo 8).
9. Huimtuleliiñ matu papiltobel Biblia, ¿chumabüiñ?
9 Inaduamuhulmi tami huenche müten tami papeltumequefiel Biblia, ¿chumaimi? Pichi fentecünuunge. Cüme raquiduamnge chem tami papeltumequefiel. Tüfa müte cüdaungelafui tati. Doi tiempo elcünuafuiñ taiñ raquiduamal cam fentren versiculo papeltulayafiyiñ, femngechi doi raquiduamafuiñ. Víctor, taiñ nütramcapeel parrafo 6 mu feipi: “Pichi papeltuquen. Quiñeque mu quiñe capitulo müten. Pulihuen papeltulu am iñche, com antü raquiduamquiyauquen tañi papeltuel mu” pi. Pichi papeltufulmi rume, loncontucuaimi: doi falin-ngei tami cüme raquiduamal tami papeltuel mu (Sal. 119:97; inaduamnge ti huichulechi dungu “ Tüfa ramtuhuaimi”).
10. Quiñe pengelün mu eipinge chumngechi bemabüimi tami papiltupel Biblia mu (1 Tesalonicenses 5:17, 18).
10 Papeltufilmi quiñeque versiculo, raquiduamaimi chumngechi tami inayafiel tami mongen mu. Petu papeltulmi, ramtuhuaimi: “¿Chumngechi inayafun tüfa fachantü cam caquelu antü mu?”. Por ejemplo, quintunge 1 Tesalonicenses 5:17, 18 (papeltunge). Raquiduamnge chumngechi entuqueimi tami llellipun. ¿Fill antü llellipuquen? ¿Piuque mu tripaquepei mai taiñ llellipun? ¿Chem dungu mu mañumtuquefiñ ta Jehová? Raquiduamafuimi cüla dungu mu tami mañumtuafiel ta Jehová. Pichin raquiduamliyiñ rume Biblia ñi feipin, quelluaiñmu taiñ cüme adümafiel ca taiñ inayal ñi feipin. Fei fill antü inafilmi tami quimürpuel Biblia mu, doi cüme cristianongerpuaimi.
ÑOCHIQUECHI BEMABÜIMI
11. ¿Chemu tami papiltupel Biblia müntuñmaabeimu tami nehuen? Eipinge quiñe pengelün.
11 Papeltufiel mu Biblia, ngüneduamafuiñ fentren dungu taiñ femal ñi cüme elcünutual taiñ mongen. Feimu huesa duamafuiñ quiñeque mu. Raquiduamaiñ tüfa mu: lunes antü mu papeltuimi quiñeque versiculo pengeli ngelai taiñ dullintuchenoal (Sant. 2:1-8). Huelu ngüneduamimi tami pichi dullintuchequen, fei eluhuimi tami cacünutual tami raquiduam. Feita rume cüme dungu fel. Fei martes antü mu, ca papeltuimi quiñeque versiculo feipilu taiñ cuñiutucuhual chumngechi taiñ dunguquen (Sant. 3:1-12). Fei ngüneduamuhuimi quiñeque mu huesa entuqueimi tami feipin ca piuqueyenquechi dunguquelaimi. Fei eluhuimi tami yafültucucheal tami feipin mu. Fei miercoles antü papeltuimi quiñeque versiculo feipilu ngelai taiñ coneltunoal ñi chumquen pu poyequenofilu ta Jehová (Sant. 4:4-12). Feimu eluhuimi tami cuñiutucuhual chem tami allcütuqueel, papeltuqueel ca tami pequeel. Fei jueves antü mu, huesa duamafuimi fentren dungu mu mülei tañi norümtuutual piafuimi.
12. Duamnelmi norümtual quiñeque dungu, ¿chemu abeluulaaimi? (Pebinge tati quimal dungu).
12 Duamnielmi quiñeque dungu tami norümtual, huesa duamlayaimi. ¿Chumngelu am? Inaduamuhulmi tami norümtual quiñeque dungu, pengelaimi tami ñom piuquengen ca tami cüme piuquengen. Ñom piuquengechi che papeltun mu Biblia, eluuquei tañi norümtual chem dungu rume tañi mongen mu. a Ca loncontucuaimi: iñchiñ taiñ cristianongen, rumel mülei taiñ ‘huecünutual taiñ chumngechi chengen’ (Col. 3:10). ¿Chem quelluafeimu tami inanieafiel Biblia ñi ngülam?
13. ¿Chem ngülam inaabüimi? (Pebinge pu adentun).
13 Com dungu cüme elcünufemtulayafimi, huelu mai pichiquen femaimi (Prov. 11:2). Tüfa mu mülei quiñe ngülam: huirintucuaimi com dungu tami norümtual tami mongen mu. Huelu com norümtufemlayafimi, ñochiquechi femaimi. ¿Chem dungu hune norümtuafuimi?
Müchai müten com inafemlayafimi ñi feipin Biblia, huelu mai ñochiquechi femaimi. (Inaduamnge parrafo 13, 14).
14. ¿Chem hune bemabüimi?
14 Hune norümtuafuimi quiñeque dungu tami müte cüdautuquenoel cam norümtuafuimi quiñeque dungu tami doi duamnieel. Deu quimimi chem dungu tami norümtual, ¿chumafuimi? Quintuafuimi informacion taiñ publicacion mu. Conafuimi INTERNET MÜLEYECHI LIFRU Watchtower cam ti Guía de estudio para los testigos de Jehová. Llellipuafimi ta Jehová “eluen nehuen ca quelluen tañi cüpa cüdahual” piafimi (Filip. 2:13). Fei hula, inayaimi tami quimürpuel. Ngüneduamülmi tami cüme elcünutun tami raquiduam, amuleai tami norümtuhun. Femngechi doi cüdautulayaimi tami femal caquelu dungu.
MUPITUNGE CHEM TAMI EIPIETU BIBLIA
15. ¿Chemu pu cüdahuelquebilu Jehová trürlaingün caquelu che mu? (1 Tesalonicenses 2:13).
15 Fentrenque che alünque rupa papeltuquefi Biblia. Huelu rüf feyentuquelai tañi feipin, inaquelafingün tañi mongen mu ca cüme elcünuquetulai tañi mongen mu. Huelu Jehová tañi pu che femquelai. Pu cristiano hunen siglo reque, iñchiñ quimnieiñ tati Biblia Chau Dios ñi Dungu tati. Feimu inaquefiyiñ ñi feipin ta Biblia taiñ mongen mu (papeltunge 1 Tesalonicenses 2:13).
16. ¿Chem quelluaiñmu taiñ bemal Chau Dio ñi dungun?
16 Quiñeque mu, cüdaungei taiñ papeltuafiel Biblia ca inayafiel ñi feipin. Nielaiñ chi tiempo taiñ papeltuafiel cam huenche mu müten papeltuquefiyiñ, raquiduamquelaiñ ñi feipin ta Biblia. Ca ngüneduamliyiñ fentren dungu taiñ norümtuutual, huesa duamafuiñ. Chumte cüdautufulmi rume, Jehová quelluaimu. Hunelu mu, eluhuaimi tami quelluaeteu ta Jehová. Allcütulayafimi müten ñi feipin ta Biblia, doi mai inayafimi tañi feipin. Doi papeltufilmi Biblia ca feyentufilmi, doi ayüucüleaimi (Sant. 1:25).
ÜLCATUN 94 Mañumcüleiñ Ngünechen ñi Dungu mu
a Pefinge ti video Pu huechequeche ñi feipin: Papeltuafiel Biblia jw.org mu.
