1, 2. ¿Chemu müna cümi chumngechi taiñ deumaetu Jehová?

 DOI ayüuqueiñ taiñ elufiel mu ta caquelu, femngechi deumaeiñmu Jehová (Hech. 20:35). Elungeliyiñ quiñe regalo cüme duamqueiñ, huelu doi ayüuqueiñ iñchiñ elufiliyiñ regalo quiñe che. Rume cümei femngechi taiñ deumaeteu Jehová, ¿chumngelu?

² Quisuque iñchiñ eluucüleafuiñ taiñ doi ayüucüleal. Quintuliyiñ chumngechi taiñ quelluafiel caquelu, doi cüme duamcüleaiñ. Afmatufali chumngechi taiñ deumaeteu Jehová (Sal. 139:14).

3. ¿Chemu Jehová tati ayühun-ngechi Chau Ngünechen ngi?

³ Jehová hunelei tañi duamtuchequen ca inei no rume doi hulquelai quisu mu. Quisu eluqueiñmu mongen, fei ñi duam mu “trecayauqueiñ, fei müleiñ tüfa mu” feipi ti apostol Pablo (Hech. 17:28). Cafei “com tati cümeque dungu ca com tati tutengelu Chau Ngünechen mu cüpai” (Sant. 1:17). Feimu Biblia feipi Jehová tati ‘ayühun-ngechi Chau Ngünechen ngei’ (1 Tim. 1:11).

4. ¿Chumabüiñ taiñ doi ayühun-ngechi chengeal?

⁴ Inayentufiliyiñ Jehová ñi cüme piuquengen, doi ayüucüleaiñ (Efes. 5:1). Tüfachi troquiñ mu inaduamaiñ ñi femün ta Jehová ca chumafuiñ mañumngenoliyiñ rume taiñ cümelcaquefiel pu che. Femngechi amuleai taiñ hulün ca doi ayüucüleaiñ.

 INAYENTUABIIÑ JEHOVÁ ÑI HULCHEBENGEN

5. ¿Chem chemcün eluqueiñmu Jehová?

⁵ Peaiñ quiñeque dungu Jehová tañi cüme piuquengen. Jehová eluqueiñmu com taiñ duamnieel. Nielafuiñ chi falinque chemcün, huelu eluqueiñmu com taiñ duamnieel, iyael, tacun ca ruca (Sal. 4:8; Mat. 6:31-33; 1 Tim. 6:6-8). Jehová obligangequelai ñi femal, ¿chumngelu femquei?

6. Mateo 6:25, 26, ¿chem quimeleleiñmu?

⁶ Jehová taiñ piuqueyenieteu, feimu com taiñ duamnieel eluqueiñmeu. Ngüneduamaiñ ñi feipin Jesús Mateo 6:25, 26 (papeltunge). Tüfa mu Jesús nütramcai pu üñüm mu. Feipi: “Nganquelai, cosechaquelai ca elquetranhue mu ngülümquelai ñi iyael. Huelu tamün Huenu Chau eluqueyu iyael”. Fei Jesús ramtui: “Eimün doi falimün pu üñüm mu, ¿felelai?”. ¿Chem cüpa quimeltui Jesús? Jehová doi falintuniefi tañi pu che ti pu culliñ mu. Jehová dapiniefi pu culliñ, feimu iñchiñ cüme quimnieiñ taiñ dapinieaeteu. Jehová chauyefiyiñ, piuqueyenieiñmu ca eluqueiñmu taiñ duamnieel (Sal. 145:16; Mat. 6:32).

7. ¿Chumngechi inayentuabüiñ Jehová ñi hulchebengen? (Pebinge pu adentun).

⁷ Jehová reque, piuqueyeniefiyiñ pu che, feimu eluquefiyiñ chem tañi duamnieel engün. ¿Quimimi eimi quiñe peñi, lamngen duamnielu iyael cam tacun? Jehová adnieafeimu eimi tami quelluafiel. Jehová ñi pu che cüme piuquengei, doi mai rupale huesaque dungu. Femngechi femingün aculu chi COVID-19 cutran. Quiñeque peñi, lamngen elufingün ta caquelu tañi iyael, tacun ca chem dungu ñi duamnieel engün. Ca fentren engün hulingün plata ñi quelluafiel pu peñi, pu lamngen huall mapu meu. Com tüfachi peñi inafi ñi feipilen Hebreos 13:16, feipi: “Ngoimalayaimün tamün femal cümeque dungu ca misauqueaimün tamün nieel caquelu che engün. Feichi dungu chalintucun reque felei, rume ayühuelquefi ta Chau Ngünechen”.

8. Jehová nehuentucuqueiñmu, beimu ¿chumabüiñ? (Filipenses 2:13).

 ⁸ Jehová eluqueiñmu nehuen. Jehová ñi nehuen afquelai, ca ayühunquechi quelluquefi tañi pu che ñi nehuentucuafiel (papeltunge Filipenses 2:13). ¿Llellipuquefuimi Jehová tami nehuentucuaeteu ñi femnoal huesaque dungu? ¿Feipiquefuimi tami nehuentuleal rupan mu huesaque dungu mu? ¿Cam tami cüme femal tami cüdau caque antü mu? Femngechi femülmi, fei huiñoldunguelmu Jehová, Pablo reque feipiafuimi: “Itrofill dungu mu yafüluucülequen Chau Ngünechen ñi duam mu, fei eluqueneu nehuen” (Filip. 4:13).

9. Taiñ nehuen mu, ¿chumngechi inayentuabüiñ Jehová ñi hulchebengen? (Pebinge tati adentun).

⁹ Jehová com nehuen niei. Iñchiñ trürlaiñ Jehová mu, elulayafuiñ nehuen caquelu che quisu reque. Huelu femfule rume, inayentuafuiñ Jehová ñi cüme piuquengen, taiñ nehuen mu quelluafuiñ caquelu, ¿chumafuiñ? Mülele quiñe peñi, lamngen füchalu cam cutrancülelu, ngillalelmeafuiñ chem tañi duamnieel ca quelluafuiñ tañi liftulelafiel ruca. Cafei quelluntucuafuiñ ñi liftuafiel ca cüme elcünutuafiel ti Trahunhue Ruca. Femngechi femliyiñ, rume quelluafuiñ pu peñi, pu lamngen.

10. Taiñ eipin mu, ¿chumngechi nehuentucuabüiñ caquelu?

¹⁰ Loncontucunieaiñ: taiñ feipin mu yafültucuafuiñ caquelu pu che. ¿Quimimi inei tañi duamnieel ñi yafültucungeal? Yafüluunge, pemeafimi, mütrümafuimi telefono mu cam huercülelafuimi pichi carta cam mensaje. Duamfal-lai fentren dungu tami feipiafiel, doi mai tripayal piuque mu. Fei pichin dungu mu quelluafuimi ñi püntütripanoal Jehová mu ca ñi nehuencüleal (Prov. 12:25; Efes. 4:29).

11. Jehová, ¿chumqui tañi quimün mu?

¹¹ Jehová eluqueiñmu quimün. Ti apostol Santiago feipi: “Müte nienolmün quimün, llellipuqueafimün ta Chau Ngünechen, fei llohuaimün quimün. Chau Ngünechen com piuque mu hulquei alün dungu, fei lladcütuquelafi tuchi tañi llellipueteu” (Sant. 1:5). Chumngechi feipilei tüfachi versiculo, Jehová ellcanacümquelai tañi quimün, quimelelfi ta  caquelu. Ca huesa duamelquelaeiñmeu feipifiliyiñ taiñ eluaeteu ñi quimün, doi mai feipiqueiñmu taiñ ngillatuafiel (Prov. 2:1-6).

12. ¿Chumabüiñ taiñ quimelelbel caquelu cristiano?

¹² ¿Inchiñ cai? Taiñ quimün, ¿quimelelafuiñ pu che Jehová reque? Femaiñ llemai (Sal. 32:8). Nieiñ fentren dungun taiñ quimelelafiel pu che. Quelluafuiñ pu hue amuldunguquelu ñi doi cüme amuldungual. Pu loncolelu ñom piuque mu quellufingün pu siervo ministerial ca pu peñi ñi femal fillque cüdau ñi elungeel trahunche mu. Ca fentren peñi, lamngen deumarucafe pepicafingün caquelu ñi cüdahual Trahunhue Ruca mu cam caquelu edificio cheu ñi püramyengequen Jehová.

13. Quimelelbiliiñ caquelu, ¿chumngechi inayentuabüiñ Jehová?

¹³ Pepicafiliyiñ caquelu, inayentuafiyiñ ta Jehová. Chumngechi ngüneduampeiñ, Jehová hulquei tañi quimün ayühunquechi. Iñchiñ ca femngechi ayüqueiñ ñi quimelelafiel caquelu. Ellcanacümquelaiñ taiñ quimün, “müntuñmayalu ñi cüdau” pilayaiñ. “Iñche quisutu adümuhurpun, caquelu ca fempe” pilayaiñ. Jehová ñi pu che femngechi raquiduamquelai. Doi mai ayühunquechi quimeltuquefiyiñ caquelu iñchiñ taiñ quimün. Ca yafüluuqueiñ com taiñ piuque mu taiñ pepicayafiel engün (1 Tes. 2:8). Iñchiñ ayüuqueiñ fei engün ca femngechi ‘pepicaucüleal ñi quimeltucheal’ (2 Tim. 2:1, 2). Com quelluucüleliyiñ taiñ quimün mu, müleai ayühun ca doi quimchengeaiñ.

CAQUELU BALINTULAI TAIÑ BEMQUEL TROQUIBILIIÑ

14. Cümelcaquebilu iñchiñ caquelu, ¿chumquingün?

¹⁴ Quiñeque mu iñchiñ cümelcafilu ta caquelu, doi mai taiñ pu peñi ca lamngen, fei engün feipiafuingün ñi mañumün engün. Huirintuculelafeiñmu quiñe pichi papel cam caquelu dungu femafuingün (Col. 3:15). Tüfa ñi femün engün iñchiñ cüme duamafuiñ.

15. Mañumngenoliiñ ume, ¿chem tuculpaaiñ?

¹⁵ Quiñeque che pengel-layafeiñmu tañi mañumcülen. Quiñeque mu elcünuafuiñ tiempo, taiñ nehuen ca taiñ chemcün taiñ quelluafiel quiñeque che, huelu feiti che turpu mañumlai piafuiñ. Fei, ¿chem quelluafeiñmu taiñ huesa duamcülenoal? Loncontucuaiñ ñi feipin Hechos 20:35. Tati che mañumle cam mañumnole rume, huelu iñchiñ eluucüleaiñ taiñ ayüucüleal taiñ cümelcafiel ta caquelu. Peafiyiñ quiñeque dungu taiñ quelluafeteu.

16. ¿Chem loncontucuaiñ?

¹⁶ Loncontucuaiñ iñchiñ taiñ hulqueel mu inayentuquefiyiñ ta Jehová. Jehová cümelcaquefi pu che, tüfa falintufilu cam femnole rume (Mat. 5:43-48). Üngümnoliyiñ taiñ huiñolelngetual taiñ cümelcafiel ta caquelu, Jehová feipicünueiñmu taiñ cümelcayaeteu fei (Luc. 6:35). Feimu huesa duamquilnge mañumeyu pinoelmu ta caquelu. Jehová rumel huiñoleltuaiñmu cümeque dungu taiñ femün caquelu mu ca taiñ ayühunquechi hulün mu taiñ nieel (Prov. 19:17; 2 Cor. 9:7).

17. ¿Chem quelluaiñmu taiñ cüme inayentobel Jehová? (Lucas 14:12-14).

 ¹⁷ Ca quelluafeiñmu inayal ñi feipin Lucas 14:12-14 (papeltunge). Huesa dungu no taiñ eluafiel quiñeque che taiñ pepi huiñoleltuafeteu taiñ femel. Huelu ramtuhuafuiñ: “Taiñ cümelcafiel mu caquelu, ¿ca ayüqueiñ taiñ cümelcayaeteu?”. Femngechi raquiduamliyiñ, cümei taiñ inayafiel Jesús ñi feipin. Eluafuiñ tati che quimnielu iñchiñ taiñ pepi huiñolelnoaeteu. Femngechi femliyiñ, ayüucüleaiñ taiñ inayentufiel mu ta Jehová, ca amuleai taiñ hulün ayühun mu mañumeyu pingenoliyiñ rume.

18. ¿Chem quelluaiñmu taiñ hueya raquiduamnoal caquelu mu?

¹⁸ Huesa raquiduamlayaiñ caquelu mu (1 Cor. 13:7). Mañumeyu pingenoliyiñ, ramtuhuafuiñ: “¿Rüf falintulai tañi femün cam acordalai ñi feipial tañi mañumün?”. Quimlaiñ chemu tañi femün. Cüdautuquei chi tañi feipial ñi chum duamcülen. Caquelu quelluhuelaingün chumngechi ñi femquefel cuifi, ¿feimu peno yehuei tañi quellungeal? Huelu piuqueyefiliyiñ taiñ pu peñi, pu lamngen, huesa raquiduamlayaiñ fei engün mu. Fei ayühun mu amuleai taiñ quellufiel (Efes. 4:2).

19, 20. Mañumngenoliiñ, ¿ca chumabüiñ? (Pebinge pu adentun).

¹⁹ Raquiduamlayaiñ müchai taiñ mañumngeal. Salomón feipi taiñ rücüngenoal, femngechi feipi: “Co meu ütrüftucunge tami cofque, fentren antü rupale huiño petuafimi” (Ecl. 11:1). Tüfa quimeleiñmu misaufiliyiñ ta caquelu, quiñeque mu rupayafui “fentren antü” taiñ mañumngeal. Femngechi rupai quiñe lamngen.

²⁰ Cuifi mu, quiñe superintendente ñi domo huirintucui quiñe carta ñi yafültucuafiel quiñe lamngen hue fautizaulu,  femngechi ñi püntütripanoal Jehová mu. Rupalu pura tripantu hula, taiñ lamngen huiñoldungufi ti carta. Huirintucui: “Eimi quimlaimi tunte tañi quellueteu tami carta com tüfachi tripantu mu”. “Piuque mu tripai tami huirintucun, huelu tañi doi quellueteu fei tati texto tami huirintucuel, piuquentucuniefiñ”. a Ti lamngen ca huirintucui huesaque dungu tañi rupan, fei feipi: “Quiñeque mu afeluuquefun, serfihuelayan ta Jehová raquiduamquefun, huelu feichi texto tami huirintucuel yafültucuquefeneu, quelluqueneu tañi amuleal. Feichi pura tripantu mu ngequelafun chem rume tañi fente quellueteu” pi. Raquiduamnge tunte tañi ayühun mu taiñ lamngen huiñoldungungelu ñi carta. Ca femngechi cümelcafiliyiñ ta caquelu, rupayafui “fentren antü” taiñ mañumaeteu.

21. ¿Chemu nehuentuleaiñ taiñ inayentobel Jehová ñi hulchebengen?

²¹ Chumngechi ngüneduampeiñ, elungeliyiñ chem rume, iñchiñ ayüuqueiñ. Huelu doi ayüuqueiñ iñchiñ taiñ elufiel mu ta caquelu, femngechi deumaeiñmu Jehová. Cüme duamqueiñ taiñ quellufiel mu pu peñi, pu lamngen. Ca cüme duamqueiñ mañumeyu pile engün. Femnole rume engün, ca ayüucülequeiñ taiñ cüme femün meu. Chem rume hul-liyiñ, loncontucuaiñ ñi feipin 2 Crónicas 25:9: ‘Jehová doi eluafeiñmu’. Inei no rume doi cüme piuquengelai Jehová reque. Rume ayüucülequeiñ Jehová taiñ cümelcaqueteu. Felei llemai, rume cümei taiñ inayentunieafiel Jehová ñi cüme piuquengen.