QUIMELÜN ÑI PAPILTUNGEAL 41
ÜLCATUN 13 Inayentuafiyiñ Jesús
¿Chem quimeleleiñmu Jesús tañi bemün petu amutunolu huenu mu?
“40 antü peubaluuqui ca ngütramelbi engün Chau Dio tañi Ngünenel” (HECH. 1:3).
¿CHEM QUIMAIÑ?
Chumngechi inayentuabüiñ Jesús tañi bemün abchi 40 antü petu amutunolu huenu mu.
1, 2. ¿Chem upai epu huentru amulelu Emaús lob mu?
FEICHI 16 conchi nisan 33 tripantu mu, Jesús ñi pu discipulo rume hueñancülei ca llicaleingün. Epu tañi pu discipulo amuingu Emaús pingechi mapu, 11 kilometro camapulei Jerusalén. Feichi mu Jesús hue langümngei, feimu rume hueñancüleingu. Fei engu maneluhuingu Jesús tañi femal fentren dungu, huelu lalu ta Jesús, afi reque ñi maneluhun. Huelu epe puucülei ñi afmatulehueal engu.
2 Quiñe huentru püllecontueyu, huelu quimlafi engu. Amulelu rüpü mu engün, ti epu discipulo nütramcafi ti huentru ñi rume hueñancülen engu ñi lan Jesús. Huelu rupai quiñe falin dungu. Ti huentru feipieyu com feiti dungu mülefui ñi rupayal, femngechi huiriconcülei. Tüfachi cüla huentru puulu engün Emaús, ti epu discipulo quimingu ñi Jesús ngen tüfachi huentru. ¿Rume ayüupelaingu ti Mesías ñi huiñomongeletun? (Luc. 24:13-35).
3, 4. 1) Jesús tañi pu inanequetu, ¿chem dungu upaingün? (Hechos 1:3). 2) ¿Chem ngüneduamaiñ tübachi papiltun mu?
3 Feichi 40 antü petu ñi mülen mapu mu, Jesús fentren rupa peufaluhui tañi pu discipulo meu (papeltunge Hechos 1:3). Feichi mu, Jesús yafültucufi tañi pu discipulo. Feimeu hueñancülehuelai ca llicalehuelai engün. Doi mai, fei engün rume ayüucületui, doi maneluucülefui ca eluhuingün ñi amuldungual ca quimeltucheal Chau Jehová tañi Gobierno. a
4 Iñchiñ inaduamfiliyiñ ñi femün Jesús feichi 40 antü petu ñi amunon huenu, rume cümelcayafeiñmu. Tüfachi troquiñ mu ngüneduamaiñ cüla dungu ñi femün Jesús: 1) Jesús yafültucufi tañi pu discipulo, 2) quellufi engün tañi doi cüme quimal ti Huirin Dungu mu, ca 3) pepicafi ñi llohual doi falin cüdau. Ca peaiñ chumngechi taiñ inayentuafiel Jesús.
CHUMNGECHI YABÜLTUCUAL CAQUELU
5. Jesús tañi pu inanequetu, ¿chemu duamnebüingün yabültucungeal?
5 Jesús ñi pu discipulo duamniefuingün ñi yafültucungeal. Quiñeque elcünui ñi ruca, ñi familia, ñi cüdau tañi inanieafiel ta Jesús fill antü (Mat. 19:27). Ca quiñeque caiñetungefui engün ñi inaniefiel mu ta Jesús (Juan 9:22). Ñi maneluuquen Jesús ñi Mesías ngen, eluucülefui engün ñi femngechi rupayal engün (Mat. 16:16). Huelu langümngelu Jesús, tañi maneluhun afi reque. Feimu ngañhuadnagi engün.
6. Huiñomongeltungelu hula Jesús, ¿chumi?
6 Jesús quimniefui ñi rume hueñancün-ngen tañi lan quiñe che. Feimu hueñancülefulu tañi pu discipulo tañi lan mu Jesús, raquiduamlai tañi feyentunon engün. Feimu huiñomongetulu, müchai müten eluhui tañi yafültucuafiel tañi pu hueni. Por ejemplo, petu ngümalu María Magdalena, Jesús peufaluhui (Juan 20:11, 16). Cafei epu tañi pu discipulo petu rüpütulelu Emaús pingechi huaria mu, Jesús ca peufaluhui. Ca antü mu, Jesús peufaluhui Pedro ñi adquiñ mu (Luc. 24:34). Jesús ñi femün, ¿chem quimeltueiñmu? Inaduamaiñ chem ñi rupan peufaluulu Jesús María Magdalena mu.
7. Jesús pebilu María, ¿chem ngüneduami ca chem chumi? (Juan 20:11-16; pebinge tati adentun).
7 (Papeltunge Juan 20:11-16). Fei 16 conchi nisan pulihuentu quiñeque domo amui cheu ñi rüngalcülen ta Jesús (Luc. 24:1, 10). Quiñe fei ta María Magdalena. Puulu María cheu ñi rüngalcülen Jesús, inaduami ñi mülenon Jesús ñi cuerpo. Fei lefcülen amutui ñi feipiafiel Pedro ca Juan. Fei engu lefcülen amui ti rüngan lolo mu, fei María inaeyu. Penofilu Jesús ñi cuerpo, huiñotuingu tañi ruca mu. Huelu María femlai, mülenagi fei ngümai. María quimlafui Jesús tañi penieteu. Fei Jesús inaduamlu tañi ngümamequen, cutranpiuqueyefi ca peufaluhui ñi yafültucuafiel ta María. Feimu Jesús elfalcünufi ta María tañi feipiafiel pu apostol quiñe falin dungu: tañi huiñomongetun Jesús (Juan 20:17, 18).
Jesús reque, inaduamaiñ chem ñi rupamequen pu peñi, pu lamngen ca yafültucuafiyiñ engün. (Inaduamnge parrafo 7).
8. ¿Chumngechi inayentuabüiñ Jesús?
8 ¿Chumngechi inayentuafuiñ ta Jesús? Quelluafiyiñ taiñ pu peñi ca pu lamngen, yafültucuafiyiñ ñi serfinieafiel ta Jehová. Jesús reque, hune quimaiñ chem dungu mu ñi rupamequen taiñ pu peñi ca pu lamngen. Quimtucuafiyiñ tañi chum duamcülen engün ca piuqueyen mu yafültucuafiyiñ. Peaiñ ñi rupan quiñe lamngen Jocelyn pingelu. Fei ñi lamngen lai. Fei feipi: “Fentren cüyen mu rume hueñancülefui ñi piuque” pi. Fei quiñe curehuen mangeleyu tañi ruca mu. Piuqueyen mu allcütuñmaeyu tañi chum duamcülen. Feipieyu engu ñi rume falin-ngen Jehová mu. Taiñ lamngen ca feipi: “Feichi mu quimlafun tañi chumal. Ñamconlu lafquen mu reque felefun. Huelu Jehová pünefi tañi pu lamngen tañi montulaeteu. Fei engün quellueneu tañi ayüucületual ca tañi serfinieafiel Jehová” pi taiñ lamngen. Ca femngechi iñchiñ cüme allcütuñmayafiyiñ tañi chum duamcülen pu peñi ca pu lamngen. Femngechi yafültucuafiyiñ ca quelluafiyiñ tañi serfinieafiel Jehová (Rom. 12:15).
CHUMNGECHI QUELLUABIIÑ CAQUE CHE ÑI DOI CÜME ADÜMABEL BIBLIA
9. ¿Chem dungu cüme adümlaingün pu inanequetu ca chumngechi quellueyu Jesús?
9 Jesús tañi pu discipulo feyentuquefuingün Chau Dios ñi Dungu mu ca eluuquefuingün tañi inayeafiel (Juan 17:6). Huelu pepilquelafuingün chumngelu Jesús langümngei quiñe hueñefe reque. Jesús quimniefui tañi pu discipulo ñi cüme piuquengen engün, huelu cüme adümlafingün Chau Dios ñi Huirintucun (Luc. 9:44, 45; Juan 20:9). Feimu Jesús quellufi ñi ngüneduamal engün ñi chem pifel Chau Dios ñi dungu. Ngüneduamaiñ chumngechi quellufi Jesús tañi epu discipulo amulelu Emaús mu.
10. ¿Chumcünobi Jesús tañi pu inanequetu ñi loncontucual tañi Mesías ngen? (Lucas 24:18-27).
10 (Papeltunge Lucas 24:18-27). Jesús feipifemlafi ineingen ta quisu, doi mai ramtucafi. ¿Chumngelu? Ayülefui chi fei engu ñi feipial chem raquiduamcülen engu. Fei engu feipifingu ta Jesús ñi maneluucülefel Jesús mu ñi lonco ülmen-ngerpual, fei ñi lifrenentuafiel pu Israel che pu Roma che mu. Jesús cüme allcütufi ñi feipin engu. Fei hula quimeltufi Chau Dios ñi Huirintucun mu fentren dungu ñi huechutripan. b Feichi pun ca trahuluhui caquelu discipulo engün. Fei ca quimelelfi ñi chem pin tüfachi profecia (Luc. 24:33-48). ¿Chem quimeltueiñmu tüfa?
11, 12. 1) Huirin dungu mu Jesús quimelelbi pu che, ¿chumngechi inayentuabüiñ? (Pebinge pu adentun). 2) Nortey, ¿chumngechi quellungi?
11 ¿Chumngechi inayentuafuiñ ta Jesús? Petu quimelelfiliyiñ Biblia quiñe che, entuaiñ cümeque ramtun, femngechi ti che pengelcünuafui chem ñi nieel piuque mu (Prov. 20:5). Quimüñmafiliyiñ chem ñi raquiduamcülen ti che, fei pengelelafuiñ quiñeque texto tañi quelluafeteu. Feipilayafiyiñ chem ñi femal, doi mai ti che mülei ñi quisu raquiduamal chem pin ti texto. Feimu quelluafiyiñ ñi inayal ti ngülam quisu tañi mongen mu. Peafiyiñ ñi rupan quiñe peñi Nortey pingelu, Ghana mapu mu mülelu.
12 Nielu mari cayu tripantu, eluhui tañi estudiayal Biblia. Huelu pichin antü rupalu, tañi familia catrütueyu. ¿Chem quellueyu taiñ peñi ñi amuleal? Fei loncontucui chem tañi quimeleleteu tañi quimeltufe. Quisu feipieyu chem ñi feipin Mateo capitulo mari tañi caiñetungeal pu cristiano. Nortey feipi: “Caiñetuelumu tañi familia, quimtucun tañi pefiel ti rüf dungu”. Nortey ñi quimeltufe ca pengeleleyu Mateo 10:16. Fei raquiduamelfi tañi cuñiutucuucüleal ca tañi yamün mu feipiafiel tañi pu che chem ñi feyentuquen. Nortey fautizahui. Fei ayülefui tañi precursorngeal. Huelu tañi chau ayüfui tañi amual universidad mu. Nortey tañi quimeltufe ca feipilaeyu chem tañi femal. Doi mai entui cümeque ramtun ca raquiduamelfi Biblia mu, femngechi tañi cüme dullial. Fei, ¿chem femürpui Nortey? Eluhui tañi precursorngeal. Huelu tañi chau huemünentueyu ruca mu. Taiñ peñi feipi: “Iñche quimnien tañi cüme femün” pi. Raquiduamelfiliyiñ caquelu che chem pin Biblia, femngechi quelluafiyiñ tañi doi feyentual ca tañi serfinieafiel ta Jehová (Efes. 3:16-19).
Jesús reque, raquiduamelafiyiñ caquelu che Chau Dios ñi Dungu mu. (Inaduamnge parrafo 11). e
CHUMNGECHI PEPICABEL PU HUENTRU ÑI CÜDAHUAL TRAHUNCHE MU
13. ¿Chumi Jesús ñi bentecünongenoal tati amuldungun amutule hula huenu mu? (Efesios 4:8).
13 Mülepalu mapu mu Jesús cüme femürpui ti cüdau ñi elfalcünuleteu Jehová (Juan 17:4). Huelu turpu feipilai: “Iñche femnoli tüfachi cüdau, caquelu cüme femlayai”. Feichi cüla tripantu ca rangiñ tañi amuldunguyahun Jesús, pepicafi caquelu tañi femal ti cüdau. Jesús maneluucülefui tañi pu discipulo mu. Feimu elfalcünufi engün tañi amuldungual, quimeltucheal ca ñi cuidayafiel Jehová tañi pu che. Quiñeque tañi pu discipulo petu puhul-lafuingün rume 30 tripantu (papeltunge Efesios 4:8). Feitachi pu huentru nehuentu cüdahuingün Jesús engün. Fei Jesús petu ñi amutunon ta huenu, cüme pepicacünueyu engün tañi doi adümuucüleal. ¿Chumngechi femi? Peafiyiñ.
14. Petu amutunolu huenu mu, Jesús, ¿chumngechi quellubi tañi pu inanequetu? (Pebinge tati adentun).
14 Jesús piuqueyen mu cüme ngülamtufi tañi pu discipulo. Por ejemplo, quiñeque tañi pu discipulo müte feyentulelafuingün tañi lan ta Jesús ca ñi huiñomongetun. Fei Jesús ngülamtueyu engün, femngechi quellueyu tañi quimtucual (Luc. 24:25-27; Juan 20:27). Ca rupa Jesús ca ngülamtufi tañi pu discipulo ñi doyümnoal ti plata, huelu mai tañi cuidayafiel Jehová tañi pu che (Juan 21:15). Ca ngülamtufi tañi trürümuunoal ti elfal cüdau ñi elungeel caquelu peñi mu (Juan 21:20-22). Ca rupa Jesús norcünutufi chem ñi raquiduamqueel tañi pu discipulo Jehová ñi Gobierno mu. Fei feipifi tañi amuldunguleal müten (Hech. 1:6-8). Pu loncolelu, ¿chem quimürpuafuingün Jesús ñi femün mu?
Jesús reque, pepicayafiyiñ caquelu peñi ñi nieal elfal cüdau trahunche mu. (Inaduamnge parrafo 14).
15, 16. 1) Pu loncolelu, ¿chumngechi inayentuabüi Jesús? 2) ¿Chumngechi quellungi Patrick ñi ngülamtucünongen mu?
15 Pu loncolelu, ¿chumngechi inayentuafui ta Jesús? Pepicayafuingün ca quelluafingün pu peñi cafei tati pu hueche, femngechi ñi doi cüdaucüleal trahunche mu. c Pu loncolelu quimtucunieingün pu peñi duamnieingün ñi quimeltungeal. Piuqueyen mu ngülamtuafingün ñi ñom chengeal engün, ñi manelfalngeal ca ñi cüpa quelluntucual engün (1 Tim. 3:1; 2 Tim. 2:2; 1 Ped. 5:5).
16 Peafiyiñ ñi rupan quiñe peñi Patrick pingelu. Huechengelu, trencül dunguquefui caquelu, pu lamngen cütu. Cafei piuqueyenchengelafui. Quiñe loncolelu inaduami ñi femngechi chengen ta Patrick, feimu cüme ngülamtufi. Patrick feipi: “Mañumfiñ tati peñi tañi ngülamtueteu mu. Pefilu iñche caquelu peñi tañi elungen falinque cüdau iñche tañi ayüniefel, rume huesa duamelquefeneu. Huelu tañi ngülamtueteu ti loncolelu, quellueneu tañi quintuyaunoal falinque cüdau trahunche mu. Doi mai tañi quelluafiel pu peñi, pu lamngen ñom piuque mu”. Femngechi Patrick puhul-lu 23 tripantu üitungei ñi loncoleal (Prov. 27:9).
17. Jesús, ¿chumngechi pengeli tañi maneluucülen tañi pu inanequetu mu?
17 Jesús huercülafi tañi pu discipulo tañi amuldungual müten. Ca huercüfi tañi quimeltucheal engün. Jesús tañi pu discipulo pepicaucülenolu troquihuingün chi tañi femürpual tüfachi cüdau, huelu Jesús maneluucülefui fei engün mu. Feimu feipifi: “Chumngechi huercüeneu ti Chau, iñche ca huercühuayiñ ta eimün” (Juan 20:21).
18. Pu loncolelu, ¿chumngechi inayentuabüi Jesús?
18 Pu loncolelu, ¿chumngechi inayentuafui ta Jesús? Doi adümuuchi loncolelu elfalcünuquefi caquelu peñi ñi femal quiñeque cüdau (Filip. 2:19-22). Elfalcünuafuingün huecheque peñi ñi liftuafiel ca cüme adcünuafiel ti Trahunhue Ruca. Pu loncolelu elfalcünuquefingün caquelu peñi ñi femal ti cüdau. Feipiquefingün chumngechi ñi femal ca maneluuqueingün tañi cüme enturpual ti cüdau. Peaiñ ñi rupan quiñe hue loncolelu Matthew pingelu. Pu loncolelu pepicaqueyu tañi femal fillque cüdau trahunche mu ca maneluuqueingün tañi cüme femal. Fei Matthew rume mañumcülei. Taiñ peñi feipi: “Quiñeque mu huelulcaulu iñche femün mu ti cüdau, pu loncolelu quelluquefeneu tañi ngüneduamal chem mu ñi huelulcahun, fei ñi doi cüme enturpual ti cüdau”. d
19. ¿Chumaiñ?
19 Epe puulu ñi amual ta huenu, Jesús 40 antü mu yafültucufi, quimeltufi ca pepicafi caquelu. Ca femngechi com inayentuafuiñ ñi femün ta Jesús (1 Ped. 2:21). Fei Jesús quelluaiñmu taiñ femal. Quisu feipicünueiñmu: “Mülean ta eimün mu fentepuule mapu meu müleyechi dungu” (Mat. 28:20).
ÜLCATUN 15 ¡Püramyeafiyiñ Jehová tañi hunen Fotüm!
a Tati meli Evangelio ca caquelu lifru Biblia mu pengeli Jesús deu ñi huiñomongetun peufaluhui quiñeque tañi pu discipulo mu: María Magdalena (Juan 20:11-18); caquelu pu domo (Mat. 28:8-10; Luc. 24:8-11); epu tañi pu discipulo (Luc. 24:13-15); Pedro (Luc. 24:34); com pu apostol petu ñi mülenon Tomás (Juan 20:19-24); com pu apostol mülelu Tomás (Juan 20:26); regle tañi pu discipulo (Juan 21:1, 2); doi 500 tañi pu discipulo (Mat. 28:16; 1 Cor. 15:6); tañi peñi Santiago (1 Cor. 15:7); com pu apostol (Hech. 1:4); pu apostol fülcülelu Betania mu (Luc. 24:50-52). Ca quiñeque rupa peufaluupelai, huelu Biblia feipilai (Juan 21:25).
b Peafuimi quiñeque profecia ñi femtripayal ti Mesías ti troquiñ “Pu profecia Biblia mu, ¿pengeli Jesús ñi Mesíasngen?” mülelu jw.org mu.
c Quiñeque mu, huecheque loncolelu 25, 30 tripantu nielu superintendente de circuitongeafui. Huelu hune mülei ñi cüme adümuucüleal tañi loncolen.
d Tami doi quimal chumngechi ñi pepicangeal huecheque peñi, peafimi Ti Huerquen agosto 2018 tripantu pag. 13, 14, parr. 15-17, ca La Atalaya 15 abril 2015 tripantu pag. 3-13.
e ¿CHEM PENGELI TI ADENTUN? Quiñe peñi raquiduamelfi tañi estudiante chem pi Biblia, femngechi quellufi ñi ayühuelafiel Jehová.
